!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Пропаднаа преговорите меѓу власта и опозицијата во Албанија, посредувани од ЕП


Тирана, 26 април, 2017 - 12:42 (META) 

Преговорите меѓу власта и опозацијата во Албанија, посредувани од европарламентарците Кнут Флекенштајн и Дејвид Мекалистер, не успеаја да донесат никакви резултати, јавува дописникот на „Мета“ од Тирана.

Опозицијата, предводена од Љуљзим Баша, смета дека критериумите за техничка влада не треба да бидат предмет на преговори. Разговорите на двајцата европратеници со претставниците на власта и на опозацијата траеја нeколку часа. Извори блиски до албанската влада потврдија дека премиерот Еди Рама изразил согласност неколку министерски места во владата да бидат заменети и на нивно место да бидат поставени технички министри, но, од друга страна лидерот на опозицијата, Баша, истакнал дека техничка влада значи дека во неа не траба да биде актуелинот премиер Рама.

По неуспехот на преговорите, канцеларијата на Европската Унија во Албанија издаде заедничко соопштение на претседавачот на комитетот за надворешни работи на Европскиот парламент, Дејвид Мекалистер, и на известувачот во ЕП за Албанија, Кнут Флекенштајн.

Во изјавата се наведува дека двајцата европратеници имале добри дискусии со владејчкото мнозинство и со опозицијата и дека дале конкретни предлози за надминување на кризата.

„Двајцата европарламентарци дадоа предлози за во иднина, кои се однесуваат на декриминализацијата, борбата против трговија со дрога, технички мерки за подобрување на изборниот процес, како и мерки за зајакнување на политичката доверба“, се наведува во изјавата на европарламентарците.

Тие, исто така, предложиле неколку идеи околу датумот за парламентарните избори и можни предизборни промени во структурата на владата за долгорочно зајакнување на довербата во системот.


Кнут Флекенштајн и Дејвид Мекалистер слетаа во Тирана на нова посредничка мисија


Тирана, 25 април, 2017 - 14:49 (META) 

Европратениците Дејвид Мекалистер и Кнут Флекенштајн, кој е специјален известувач на Европскиот парламент за Албанија, денеска слетаа во Тирана за нови средби со власта и со опозицијата, во обид да посредуваат во пронаоѓање излез од политичката криза.

Според планот, првин се предвидени средби со претставниците на власта, а потоа со претставници на опозицијата. Лидерот на опозицијата, Љуљзим Баша, рече дека ќе се сретне со европратениците за да разговара, но нема да отстапи од барањата.

Средбите ќе се одвиваат само еден ден откако опозицијата ги блокираше патиштата за влез во Тирана.


СДСМ во меѓународна „офанзива“


Стокхолм, 9 април, 2017 - 18:45 (META) 

Претседателката на Комисијата за труд и социјална политика на СДСМ, Мила Царовска Потпретседателот на СДСМ Дамјан Манчевски и пратеникот Љупчо Николовски остварија повеќе средби со битни фигури во политичкиот живот на Шведска и Хрватска, меѓу кои и со премиерот на Шведска, Стефан Лефвен, министерката за надворешни работи на Шведска, Маргот Волстром, како и со европратеникот Кнут Флекенштајн, потпретседател на Групата на социјалистите и демократите во Европскиот Парламент  и со  европратеничката Тања Фајон, соопшти СДСМ.

Пратеникот Љупчо Николовски, и претседателката на Комисијата за труд и социјална политика на СДСМ, Мила Царовска учествуваат на меѓународната парламентарна конференција којашто е посветена на перспективите на Југоисточна Европа и интеграциските процеси во Унијата, што се одржува во Цавтат, Хрватскa.

Притоа се сретнале со европратеникот Кнут Флекенштајн, потпретседател на Групата на социјалистите и демократите во Европскиот Парламент  и со  европратеничката Тања Фајон.

„Европратениците посочија дека очекуваат брз и мирен трансфер на власта во Македонија, деблокирање на Собранието, како и формирање на новата реформска Влада, којаштo ќе започне со спроведување на итните реформи во интерес на граѓаните“, се вели во соопштението на СДСМ.

На конференцијата присуствуваат претставници на 13 национални парламенти, како и претставници на Европскиот парламент.

Потпретседателот на СДСМ, Дамјан Манчевски, пак, е во работна посета на Кралството Шведска. Тој денеска се сретнал со премиерот на Шведска, Стефан Лефвен, со  високи претставници на Социјалдемократската партија на Шведска, којашто е и владеачка партија во земјата, на коишто е изразена јасна поддршка на демократските процеси во Македонија, а на конгресот на Социјалдемократската партија на Шведска, Манчевски имал средба со министерката за надворешни работи на Шведска, Маргот Волстром.

„Министерката Волстром пренесе очекување за деблокирање на Собранието во Македонија, избор на претседател и брзо формирање нова реформска Влада, во интерес на граѓаните и на Република Македонија“, се вели во соопштението на СДСМ.

Потпретседателот на СДСМ се сретнал и со Јенс Нилсон, пратеник во Европски парламент и со Бјорн фон Сидоф, пратеник во шведскиот Парламент, поранешен претседател на Парламентот и поранешен министер за одбрана.


ЕП: Ситуацијата во Македонија е многу сериозна, кризата ја оддалечува од ЕУ


Стразбур, 6 април, 2017 - 11:16 (META) 

На пленарната седница на која се разгледуваше извештајот што известувачот Иво Вајгл го подготви за напредокот на Македонија во 2016 година, Европскиот парламент синоќа изрази загриженост поради политичката состојба во Македонија.

Европарламентарците оценија дека ситуацијата во Македонија е многу сериозна и оти со продлабочувањето на политичката криза се загрозува европската перспектива на земјата. Тие побараа да се деблокираат процесите за конституирање на Собранието и за формирање влада.

Претставникот на малтешкото претседателство, Јан Борг, зборувајќи во име на Советот на Европската Унија, рече дека Македонија страда од поларизација и од култура на поделби и дека системски недостатоци се регистрирани во судскиот систем, човековите права и борбата против корупцијата.

Известувачот Вајгл истакна дека Собранието не може да работи и да се формира нова влада поради системски опструкции и однесувањето на шефот на државата. Тој, исто така, ги повика земјите од регионот да не се мешаат во внатрешните работи на Македонија, особено во период кога ситуацијата во земјата е толку проблематична и комплицирана.

– Не треба да ја правите ситуацијата уште потешка со мешање во внатрешните работи. Македонија се соочува со големи предизвици на патот кон ЕУ. Сепак, очекувам дека ќе дојде крајот на кризата, дека владата ќе се формира и дека ќе се обнови нормалното функционирање на Собранието – порача Вајгл.

Известувачот „во сенка“, европратеникот Кнут Фленкештајн, порача дека е лошо да се држи цела земја заложник затоа што не се оствариле очекувањата на една партија за останување на власт.

– Поголемиот дел од земјата мисли дека демократијата функционира само ако победат – рече Флекенштајн.

Европратеникот и известувач во сенка, Едвард Кукан, го повика претседателот Иванов „да ја почитува волјата на мнозинството и да го даде мандатот за формирање влада, а Собранието да почне да работи според нормална процедура“.

Гласањето за резолуцијата е предвидено за првата сесија на Европскиот парламент во мај.


Вајгл, Кукан и Флекенштајн: Нема оправдување за тактиките на одолговлекување


Стразбур, 5 април, 2017 - 15:56 (META) 

Не гледаме никакво оправдување за одолговлекувачките тактики што се користат во Собранието за одложување на изборот на нов спикер и за формирање влада, стои во заедничкото изјава на тројцата европратеници, Иво Вајгл, Едвард Кукан и Кнут Флекенштајн, по средбата со шефот на македонската дипломатија во заминување, Никола Попоски, во Стразбур.

Попладнево Европскиот парламент на пленарна седница треба да расправа за ситуацијата во Македонија.

– Како членови на Европскиот парламент кои ги поддржаа сите напори за надминување на актуелната криза и кои работеа напорно за поддршка на европската перспектива на македонските граѓани, длабоко сме загрижени за неоправданото пролонгирање на кризата и за порастот на последици за земјата, вклучувајќи го и влошувањето на меѓуетничките односи. Гласањето за извештајот за земјата за 2016 година веќе беше двапати одложувано како директна последица на несигурноста во земјата и вечерва на пленарна седница на Европскиот парламент ќе дебатираме за ваквата ситуација. И покрај ова, ние силно веруваме дека ситуацијата во земјата може да се подобри преку спроведување на демократски процеси, кои треба да доведат до надминување на политичката криза – стои во изјавата на тројцата европратеници.


Касами: Хан даде поддршка за опцијата за формирање влада


Скопје, 21 март, 2017 - 16:22 (META) 

Еврокомесарот за проширување и за добрососедска политика, Јоханес Хан, и тројцата европратеници, Иво Вајгл, Едвард Кукан и Кнут Флекенштајн, даваат поддршка за излез од кризата и бараат да гледаме повеќе кон иднината на државата отколку за личниот интерес, изјави лидерот на Движењето Беса, Билал Касами, по средбата со бриселската четворка.

– Денеска имавме уште една посета на еврокомесарот Јоханес Хан која ѝ е неопходна на Македонија во ситуацијата во која се наоѓа. Членовите на делегацијата ја даваат поддршката за да излеземе од кризата. Во овој правец работи и Беса, не гледајќи на личниот интерес затоа што сè уште има сили во Македонија кои сакаат да нè турнат во меѓуетничка криза, што е многу лошо за земјата – рече Касами.

Тој истакна дека Хан дал поддршка на опцијата за формирање влада, за што има 67 пратеници и додаде дека не постои никаква „тиранска платформа“ туку декларација.


Кој побара Иванов да ја повлече одлуката, а кој го поддржа?


Скопје, 8 март, 2017 - 11:43 (META) 

Генералниот секретар на ОБСЕ, двајца еврокомесари, министри на земји членки на ЕУ, амбасадорот на САД во Македонија, министерката за надворешни работи на Канада и заменик-помошникот државен секретар на САД за европски и евроазиски прашања досега побараа македонскиот претседател, Ѓорге Иванов, да ја преиспита својата одлука да не го додели мандатот на СДСМ, кој обезбеди 67 пратенички потписи, односно мнозинство во Собранието.

Генералниот секретар на ОБСЕ, Ламберто Заниер, минатата недела на „Твитер“ изрази загриженост поради одлуката на претседателот Ѓорге Иванов да не го додели мандатот на лидерот на СДСМ, Зоран Заев:

„Загрижен сум поради развојот на настаните во Скопје. Владеењето на правото мора да надвладее. Резултатите од декемвриските избори се цврста основа за формирање влада што ќе ги застапува интересите на сите граѓани“.

Високата претставничка за надворешна политика на Европската Унија, Федерика Могерини, за време на посетата на Македонија, побарала од Иванов да ја ревидира својата одлука во интерес на волјата и на интересот на сите граѓани:

„Никаде во демократскиот свет не може на парламентарното мнозинство, кое го претставува мнозинството на граѓаните во унитарна држава, да не му се дозволи да формира влада. Побарав од Иванов да ја ревидира својата одлука во интерес на волјата и на интересот на сите граѓани, согласно Уставот на Македонија, кој вели дека мандатот се дава на лидерот кој има мнозинство во парламентот“.

Еврокомесарот за проширување и за соседска политика, Јоханес Хан, порача дека „во демократија мора да се признае парламентарното мнозинство, иако некому тоа можеби не му се допаѓа“:

„Сите лидери, вклучително и претседателот, мора да го почитуваат исходот од последните избори. Политичките лидери и институции да дозволат демократските процеси да течат, во интерес на граѓаните“.

Aмбасадорот на САД во Македонија, Џес Бејли, минатата недела  го повика претседателот на државата, Ѓорге Иванов, повторно да ја разгледа својата одлука:

„Сметаме дека ова не е конзистентно со основните демократски принципи и со владеењето на правото, кои се клучни вредности на НАТО. Како стратешки партнери на Македонија и како пријатели, со цела почит кон суверенитетот и кон унитарноста на Македонија, го повикуваме Иванов повторно да ја разгледа одлуката“.

Се огласи и британскиот министер за Европа, сер Алан Данкан, со порака објавена на веб-страницата на британската канцеларија за надворешни работи:

„67 новоизбрани пратеници кои претставуваат различни заедници во Македонија побараа да формираат влада. 67 од 120 е јасно мнозинство. Претседателот Иванов треба да си ја преиспита одлуката“.

Шефот на германската дипломатија, Зигмар Габриел, изјави дека е вознемирен од состојбата во земјава и побара Иванов да ја преиспита одлуката:

„Претседателот Иванов го лишува досегашниот лидер на опозицијата од мандатот за формирање влада, иако тој го обезбеди парламентарното мнозинство зад себе. Тоа е спротивно на демократските принципи и на европските вредности, на кои земјата се обврза. Претседателот Иванов би требало да ја преиспита оваа одлука и да ја коригира во интерес на граѓаните на својата земја“.

Повик да се почитува демократската одлука на граѓаните и да се прифати секое демократски договорено мнозинство упатија и тројцата европарламентарци Едвард Кукан, Кнут Флекенштајн и Иво Вајгл:

„Од суштинско значење е исходот од изборите и волјата на народот да се почитуваат и да се овозможи да се одвиваат демократските процеси, како што би се очекувало во едно демократско општество“.

На почетокот на оваа недела, и канадската министерка за надворешни работи, Кристија Фриленд, испрати соопштение во кое ги повика македонските политички лидери да дозволат формирање влада без одложување, а претседателот Иванов да ја изврши својата уставна обврска:

„Канада ги повикува македонските лидери да го дозволат формирањето на новата влада без одложување. Апелираме до сите страни да продолжат со поддршката и со зајакнувањето на нашите заеднички демократски принципи, вклучително и почитување на демократските институции и владеењето на правото. Апелираме и до претседателот на државата да ја изврши својата уставна обврска и да го прифати формирањето на новата влада што следува по парламентарните избори во Македонија одржани на 11 декември 2016 година“.

Загриженост за актуелната состојба изрази и холандскиот министер за надворешни работи, Берт Кундерс, кој повика на почитување на парламентарното мнозинство и на смирување на тензиите:

„Сметам дека постои парламентарно мнозинство и дека Македонците треба да одлучат за тоа. Ние сме загрижени поради вербалната агресија во земјата. Мислам дека нештата мора да се решат на мирен начин и ги повикувам сите партии да го сторат тоа на мирен и на демократски начин“.

Заменик-помошникот државен секретар на САД за европски и евроазиски прашања, Хојт Брајан Ји од Загреб ги повика сите страни во Македонија да бидат подготвени на компромис и да се формира нова постизборна влада:

„Искрено се надеваме дека македонскиот претседател ќе им овозможи на пратениците кои изразија желба за тоа и на партиите што тие ги претставуваат да формираат влада што е можно поскоро, бидејќи на Македонија ѝ треба влада која ќе ги продолжи и ќе ги доврши почнатите процеси во рамки на претпристапниот процес на Европската Унија“.

Државниот секретар на Франција за европски прашања, Арлем Дезир, во изјава за актуелните политички случувања во Македонија порача дека Уставот, резултатите од парламентарните избори од 11 декември 2016 година и демократските принципи треба да се почитуваат:

„Франција со големо внимание ги следи најновите политички случувања во Скопје. Ние ја поддржуваме заложбата на високата претставничка за надворешни работи и безбедносна политика на Европската Унија, Федерика Могерини, за излез од политичката криза, за време на нејзината неодамнешна посета на Република Македонија и апелираме за брзо формирање на влада која ќе ги спроведе реформите како предуслов за натамошно приближување на земјата кон Европа“.

Специјалниот ополномоштеник на Министерството за надворешни работи на Германија за Југоисточна Европа, Турција и за ЕФТА-државите, Кристијан Хелбах, по средбата со претседателот Ѓорге Иванов, шефот на македонската дипломатија, Никола Попоски, и со лидерите на политичките партии во Македонија, рече дека е потребно брзо формирање влада која ќе биде посветена на имплементирање на реформските приоритети.

„Ние сме уверени дека претседателот Иванов ќе покаже мудрост, ќе ги почитува резултатите од неодамнешните избори и ќе овозможи мнозинството во Собранието да формира влада што е можно поскоро“.

Соединетите Американски Држави се разочарани што претседателот Иванов одби да им понуди можност да ја формираат новата влада на претставниците кои имаат јасно парламентарно мнозинство и бара од него да ја преиспита својата одлука, стои во соопштението од обраќањето на шефицата на Мисијата на САД во ОБСЕ, Кејт Брнс во врска со политичката ситуација во Македонија.

„Заедно со нашите сојузници во НАТО и партнерите од ЕУ, САД внимателно го следат процесот на формирање на влада во Македонија, по парламентарните избори на 11 декември 2016 година. САД се разочарани што претседателот Иванов одби да им понуди можност да се формира новата влада на претставниците кои имаат јасно парламентарно мнозинство. Ние сметаме дека оваа одлука не е во согласност со заложбите на ОБСЕ, основните демократски принципи и владеењето на правото, што се основни вредности на оваа организација. Како стратешки партнер и пријател на Македонија, како и со целосно почитување на суверенитетот и единството, Мисијата на САД во ОБСЕ бара од претседателот Иванов да ја преиспита својата одлука“.

Руското МНР со соопштението од 2 март и со изјавата следниот ден го поддржа Иванов:

„Еврокомесарот Јоханес Хан, високиот претставник за надворешна и безбедносна политика на ЕУ, Федерика Могерини, генералниот секретар на НАТО, Јенс Столтенберг, и други претставници на т.н. „просветлена Европа“, продолжуваат бесрамно да вршат невиден притисок врз македонскиот претседател Ѓорге Иванов, барајќи од него премиерскиот мандат да го даде на опозицијата, која ја прифати ултимативната „албанска платформа“.

Европратеничката Маријана Петир, која претседава со групата на пријатели на Македонија во Европскиот парламент, изрази загриженост за политичката состојба во Македонија и за „прифаќањето на платформата на албанските партии од страна на СДСМ“ и побара да се разгледа можноста за одржување нови избори.

„Условите на трите партии кои ја застапуваат албанската заедница во Македонија, кои по изборите формираа т.н. ‘албанска платформа’, не се во согласност со Уставот на Република Македонија…Со неа се бара на албанската заедница, која веќе ги ужива сите малцински права, да и се даде статус на државотворен народ. Доколку не е возможно да се постигне коалиција меѓу двете најголеми партии во Македонија, не треба да се исклучува одржувањето на нови избори како решение за кризата“.


Кукан, Флекенштајн и Вајгл ќе препорачаат ЕП да го одложи донесувањето на извештајот


Брисел, 2 март, 2017 - 22:57 (META) 

Ги повикуваме претседателот и сите политички партии да ја почитуваат демократската одлука на граѓаните на земјата и без понатамошно одложување да го прифатат секое договорено парламентарно мнозинство, се вели во заедничката изјава на тројцата европарламентарци Едвард Кукан, Кнут Флекенштајн и Иво Вајгл во врска со актуелните политички случувања во Македонија.

– Како што неколкупати кажавме заедно со комесарот Хан, очекуваме новата влада да биде базирана на сеопфатен, реформски консензус и на меѓуетничка соработка. Апелираме на одговорност од претседателот и сите политички партии да се воздржат од какви било провокативни изјави или постапки. Од суштинско значење е исходот од изборите и волјата на народот да се почитуваат и да се овозможи да се одвиваат демократските процеси, како што би се очекувало во едно демократско општество – стои во изјавата на тројцата европарламентарци, кои беа посредници и во постигнувањето на Договорот од Пржино.

Кукан, Флекенштајн и Вајгл во изјавата нагласуваат дека неодамнешните настани може да имаат големо влијание врз европската перспектива на земјата.

– Како што стојат работите, ние сме должни да му препорачаме на Европскиот парламент одложување на планираното пленарно гласање за извештајот за земјата за 2016 година – велат тројцата европарламентарци.


Флекенштајн: Само на слабаците им се потребни приказните за Сорос!


Тирана, 22 февруари, 2017 - 14:59 (META) 

Европратеникот и специјален известувач за Албанија, Кнут Флекенштајн, денеска повторно ја повика Демократската партија (ДП) да го прекине бојкотот и да не ја блокира работата на парламентот.

Флекенштајн на прес-конференција изјави дека изборите се важни за почетокот на преговорите со ЕУ и оти ДП треба да престане со „приказните за Сорос“.

Тој истакна дека има голема почит за Сали Бериша (поранешен лидер на ДП, премиер и претседател), но побара од него „да престане да раскажува приказни за Сорос“, бидејќи слушнал дека такви приказни се шират и во Македонија. Тој истакна дека, од искуство, „само на слабите им се потребни такви приказни, а „колку што тој знае, Бериша не е слабак“.

Тој истакна дека институциите на ЕУ не сметаат дека е исправен бојкотот на парламентот, особено зашто електоратот гласал пратениците да ги застапуваат нивните интереси.

Бериша претходно изјави дека Сорос корумпирал неколку институции во Албанија. Во однос на коментарите на Флекенштајн, тој рече дека се неосновани и оти тој го осудил дејствувањето на Сорос во Албанија врз база на одамна објавени документи.


Албанската опозиција четврти ден на протести бара оставка од Рама


Тирана, 21 февруари, 2017 - 17:32 (META) 

Лидерот на албанската Демократска партија (ДП), Лулзим Баша, денеска на четвртиот ден од антивладините протести порача дека нема да сопрат сè додека премиерот Еди Рама не си поднесе оставка и не се формира техничка влада, која ќе осигури слободни и демократски избори. Тој ги повика пратениците на ДП да го бојкотираат парламентот.

Во меѓувреме, премиерот Рама рече дека опозицијата се плаши од најавените реформите во судството и оти стравот од можни изборни измами на претстојните избори е само изговор. Тој истакна дека не планира да поднесе оставка и ја повика опозицијата да соработува во имплементацијата на судските реформи.

Протестите се совпаѓаат со денешната посета на специјалниот известувач на Европскиот парламент за Албанија, Кнут Флекенштајн, кој на властите во Тирана ќе им го презентира извештајот за Албанија што Европскиот парламент го усвои минатата недела.

Флекенштајн за време на посетата истакна дека тој не е дојден за да посредува меѓу лидерот на ДП и премиерот и порача дека местото на пратениците им е во парламентот, каде треба да се решаваат сите проблеми.

Со слична порака излезе и Брисел, од каде порачаа дека политичката дебата треба да се води во парламентот, а не на улиците.

– Понатамошната поларизација на политичката клима ќе биде контрапродуктивна за аспирациите на Албанија кон ЕУ. Особено е важно парламентот да функционира во вакви клучни моменти, како што се судските реформи. Оваа посветеност е особено значајна за евроинтеграциите на Албанија – рече портпаролката на Европската комисија, Маја Коцијанчиќ, која не сакаше да ги коментира барањата на опозицијата за формирање техничка влада.