!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Објавен конкурсот за наградите „Крсте Чачански“ и „Јован Котески“


Струга, 21 декември, 2016 - 10:02 (META) 

Културниот центар „Бран“ и ревијата за книжевност „Бранувања“ од Струга, седми пат распишаа конкурс за наградите „Крсте Чачански“ – за необјавена збирка на кратки раскази и „Јован Котески“ – за необјавена поетска збирка.

Расказите, односно песните, не треба да се претходно објавувани.

Секој расказ треба да не биде подолг од 100 реда (три страници новинарски проред) и да има наративна форма.

Поетската збирка треба да содржи најмногу 50 песни, а секоја песна да не биде подолга од 30 стихови.

Ракописите во четири примероци треба да се испратат, најдоцна до 20 април 2017 година или по електронски пат на: raskazchachanski@hotmail.com, zbirkakoteski@hotmail.com.

Досегашни добитници на наградите „Крсте Чачански“, односно „Јован Котески“ се: Христо Петрески, Трајче Кацаров, Милован Стефаноски, Санде Стојчески, Петре Димоски, Витомир Долински, Марина Мијаковска, Добре Тодоровски, Славчо Ковилоски, Зоран Пејковски и Васил Тоциновски.


Промоција на романот „Поклонение“ од Естонецот, Тијт Алексеев


Охрид, 22 септември, 2016 - 10:08 (META) 

Вечерва, од 20 часот, во НУ Центар за култура „Браќа Миладиновци“ во Струга, ќе се одржи промоција на романот „Поклонение“ од истакнатиот автор во естонската книжевност, Тијт Алексеев.

Промотор на романот ќе биде Роберт Алаѓозовски, а гостин на вечерта е Елизабета Шелева.

Алексеев за овој роман ја доби престижната награда за литература на ЕУ.

Романот раскажува за светот на крстоносните витези, длабоко контемплирајќи над вредностите што ги мотивирале витезите-монаси, истовремено мешајќи елементи од трилер и од шпионска афера, во манирот на великанот Умберто Еко.


Годинешните „Струшки книжевни средби“ во знакот на 155-годишнината од Зборникот на Миладиновци


Охрид, 7 јули, 2016 - 11:34 (META) 

Од денеска до 9 јули, во Струга, Охрид и во Вевчани се одржува манифестацијата „Струшки книжевни средби – 2016“.

Програмата почнува на Вевчански извори, каде ќе се одржи Меѓународно поетскo матине, а свои песни ќе читаат поети од Македонија, Албанија, Бугарија, БИХ, Полска, Романија, Словенија, Србија, Хрватска…

Хрватското книжевно друштво од Риека ќе се претстави со стихови на поетите: Хрвојка Миловановиќ-Салопек, Валерио Орлиќ, Срѓан Духовиќ, Жаклина Глибо, Никола Шимиќ-Тонин, Анте Грегов, Љубица Рибиќ и Мирјана Мајиќ.

Во Црквата „Св. Никола“ ќе се одржи Портрет на Олга Лалиќ-Кровицка (Полска) – лауреат на наградата „Книжевна далга“ за 2016 година. Промотори ќе бидат: Мишо Китановски и Васил Тоциновски. Песни од творештво на наградените ќе чита Верица Мукоска, а предвидена е и промоција на книжевните списанија „Хелис“ – (Романија) и „Нестор“(Полска). Промотори се Ѓорѓи Добре, Тоде Илиевски, Олга Лалиќ-Кровицка и Васил Тоциновски.

На 8 јули, петок, манифестацијата продолжува во Струга, во Центарот за култура „Браќа Миладиновци“, со изложбата „Луѓе и птици“ на Христо Петрески. За постановката ќе говорат Васил Тоциновски и Искра Пенева.

На 9 јули, сабота, во Струга, пред црквата „Свети Ѓорѓија“ ќе се одржи поетски настан, со настап на учесниците на манифестацијата „Струшки книжевни средби 2016“.

Ќе има врачување на големата награда „Книжевна далга“ за 2016 година, на лауреатот Олга Лалиќ-Кровицка (Полска) – доделена од советот на манифестацијата „Струшки книжевни средби“. Ќе биде врачена и меѓународната награда „Струшко слово“ на Виолета Димова (Македонија) и на Ѓорѓе Добре (Романија), доделена од редакцијата на ревијата за книжевност „Бранувања“. Реч за добитниците на наградата ќе имаат Христо Петрески и Тоде Илиевски.

Ќе се додели и наградата „Книжевни бранови“ за најдобра прочитана песна на поет од Македонија и од странство.


Македонска поезија објавена во српското книжевно списание „Брничево“


Белград, 7 јуни, 2016 - 14:07 (META) 

Во најновиот број на списанието за книжевност „Браничево“ од Пожаревац, Република Србија, се објавени одбрани песни од македонските поети Ристо Ѓ. Јачев, Христо Петрески, Петко Шипинкаровски, Славица Г. Свидерски, Весна Мундишевска-Велјановска, Зоран Пејковски, Маја Стела Босилковска, Тоде Илиевски и Марина Мијаковска.

Најновата презентација на македонските поети надвор од Македонија е уште една потврда на активноста и на заложбите на редакцијата на ревијата за книжевност „Бранувања“, што се темели на воспоставување соработка и на градење мостови помеѓу македонската и културите од регионот и пошироко.

На 8 јули во библиотека „Григор Прличев“ во Охрид, во рамките на годинашната манифестација „Струшки книжевни средби“, ќе бидат промовирани списанијата „Браничево“ од Пожаревац (Србија) и „Бранувања“ од Струга, кога за списанијата ќе говорат нивните уредници Билјана Миловановиќ-Живак и Петко Шипинкаровски.


Меѓународна награда за македонските писатели Тоциновски и Шипинкаровски


Охрид, 2 декември, 2015 - 11:40 (META) 

Македонските писатели Васил Тоциновски и Петко Шипинкаровски се годинешни добитници на меѓународната книжевна награда „Донат“, што на институции и на поединци традиционално ја доделува хрватското книжевно друштво од Задар.

Наградата им се доделува за творечкиот опус и за посебен придонес во книжевната соработка меѓу Хрватска и Македонија.

Досегашни добитници на наградата се Задарска жупанија, Задарски лист, ГК Задар, ХРТ-Задар, Задарска приватна гимназија, како и угледните хрватски културни работници Анте Михиќ, Анте Грегов Јурин, Валерио Орлиќ, Фикрет Цацан, Жаклина Куфија и Ени Г. Дешковиќ.


Светлана Алексиевич е добитничка на Нобеловата награда за книжевност


Стокхолм, 8 октомври, 2015 - 13:58 (META) 

Добитничката на годинешната награда за книжевност е белоруската писателка Светлана Алексиевич, за нејзината книга „Споменик на храброста и страдањата на нашето време“, соопшти Шведската академија. За оваа награда, таа добива 938.000 евра.

Светлана Алексиевич е прозна писателка и новинарка. Таа е родена во Украина во 1948 година, а пораснала во Белорусија.

Во книгата „Војната нема женско лице“ пишувала за судбините на жените кои биле во советската војска во текот на Втората светска војна. Книгата ја завршила во 1983 година, а одобрување од советските цензори добила две години подоцна, во зората на перестројката.

Нејзината книга „Гласовите од Чернобил“ се базира на стотици интервјуа спроведени на советските трупи во Авганистан и на жртвите од нуклеарната катастрофа во Чернобил.


Ќулавкова, Ташковски и Димоски застапени во романското списание „ХЕЛИС“


Струга, 25 август, 2015 - 12:15 (META) 

Романското списание „ХЕЛИС“, во најновиот број за јули-август 2015, во специјален прилог на главениот уредник, познатиот романски писател Георге Добре ги објавува насловните страници на ревијата за книжевност „Бранувања“ од Струга и списанието за книжевност, култура и уметност „Раст“ од Битола.

Во истиот број, со биографска белешка и избор од поетското творештво претставени се македонските поети Катица Ќулавкова, Братислав Ташковски и Славе Ѓорго Димоски.

Преводот, односно препевот од македонски на романски јазик е на Димо Димчев и Георги Добре.


Книжевното творештвo на меѓународни саеми на книга


Скопје, 7 јули, 2015 - 15:34 (META) 

Mакедонското  книжевно  творештво ќе биде претставено на меѓународните саеми на книгата во Франкфурт, Софија и во Истанбул.

Меѓународниот саем на книгата во Франкфурт, кој ќе се одржи во периодот од 14  до 18 октомври, е најзначаен меѓународен саем на книгата во светски рамки со застапеност на речиси сите значајни субјекти во издавачката дејност, како и на сите релевантни институции поврзани  со издаваштвото, фондови за превод и за публикување, национални штандови, библиотеки итн.

Во периодот од 7 до 15 ноември, Здружението на албански издавачи и Сојузот на албански издавачи ќе ја претставуваат Македонија на 34. Саем на книгата во Истанбул.

На оваа најзначајна саемска манифестација во регионот, на која присуствуваат издавачи од целиот свет, ќе бидат презентирани дела од најпознатите македонски и албански автори, како и дела на автори од другите националности.