Нова книга од академик Георги Старделов посветена на писателот Владимир Костов


Скопје, 4 јуни, 2018 - 10:02 (META) 

Во издание на „Везилка 2011“ излезе од печат најновата книга на академик Георги Старделов „Критика на деморализираниот ум“ посветена на истакнатиот македонски писател Владимир Костов.

На 165 страници, оваа книга содржи тринаесет секвенци за литературата и филозофијата во романескниот опус на Владимир Костов.

Оценувајќи дека „на страниците на литературата на Владимир Костов се води отворен дијалог со нашето време“, Старделов пишува дека „неговата литература, особено неговата прозна уметност, нé соочува со сознанието дека живееме во едно скудно време (Хајдегер) на доминација на распаметениот политички ум во сите сфери на животот, кој со неверојатна леснотија го употреби човекот против него самиот. Нашето време до невидени граници ги усвити спротивностите во општеството; тие се оттргнаа од нас и не можеме да ги хармонизираме, сé повеќе ги чувствуваме како сила против себе.”


Адвокатите се обидуваат да го спречат објавувањето на новата книга за Трамп


Вашингтон, 4 јануари, 2018 - 19:14 (META) 

Адвокатите на американскиот претседател Доналд Трамп се обидуваат да го спречат објавувањето на новата книга за претседателот на САД, во која тој е претставен како неук човек и милијардер-фалбаџија, јавуваат американските медиуми.

Книгата чиј автор е новинарот Мајкл Волф, насловена „Оган и бес: Во Белата куќа на Трамп“, излегува на 9 јануари.

Американскиот претседател вчера соопшти дека ги прекинал сите контакти со својот поранешен главен стратег и советник во неговиот изборен штаб за време на претседателски избори, Стив Бенон поради „навредливите коментари“ на сметка на семејството на Трамп.

„Стив Бенон нема ништо со мене или со моето претседателство. Кога беше отпуштен не само што ја загуби работата, туку го загуби и разумот“, наведе Трамп во соопштението за својот поранешен соработник.

Бенон во книгата, од која делови објави „Вашингтон пост“, наведува дека средбата на соработници и на членови на семејството на Трамп, меѓу кои и неговиот син, Доналд Трамп Јуниор и неговиот зет Џаред Кушнер, со руски претставници во јуни 2016 година во „Кулата Трамп“ во Њујорк била „предавничка“ и „непатриотска“.

„Вашингтон пост“ денеска објави дека адвокатот на Трамп, Чарлс Хардер се обидува да го спречи објавувањето на книгата во која Трамп е претставен како милијардер-фалбаџија кој не ни сакал да стане претседател, туку дека намерата му била со претседателската кампања да го зајакне својот бренд.

За претседателот на САД се наведува дека не знае многу работи и дека не може да сфати сложени проблеми.

Хардер на Волф и на неговата издавачка куќа „Хенри Холт енд Компани“ (Henry Holt and Co) им испратил известување во кое се наведува дека разгледуваат тужби за клевета и се бара „веднаш да запре објавувањето, издавањето или диструбуцијата на книгата и на делови од неа.

Волф, како што пренесуваат медиумите во САД, изјавил дека Трамп бил запознаен со неговата работа и дека им дозволил на своите соработници да разговараат со него.

Во делови од книгата што ги објави магазинот „Њујорк“ се наведува дека авторот имал повеќе од 200 разговори со претседателот и со челнови на неговиот тим во период од 18 месеци.


Книга за Охридско Езеро од комедиографот Бранислав Нушиќ


Скопје, 11 септември, 2017 - 10:52 (META) 

Во издание на „Везилка 2011“, излезе од печат книгата на знаменитиот српски писател Бранислав Нушиќ „Покрај бреговите на Охридското Езеро“, чиешто прво издание е публикувано во Белград во далечната 1892 година. Ова издание на македонски јазик го преведе писателот Ристо Лазаров.

Станува збор за ретка книга, со повеќе белешки со кои се опишуваат Охридското Езеро и околината. Во предговорот кон книгата самиот Нушиќ наведува дека најмногу се служел со советите и со упатствата на Стојан Новаковиќ и на Љубо Ковачевиќ, во тоа време академици.

Бранислав Нушиќ шестпати патувал по крајбрежјето на Охридското Езеро и напишал книга записи која содржи драгоцени документи за животот во Охрид и во Охридско во тоа време, за разликите на Македонците од другите балкански народи, за етнографските и културно-историските богатства на овој крај. Нушиќ бил конзул и службеник во конзултатот на Србија во Битола, како и директор на Народниот театар во Скопје во времето на Кралството СХС.


„Лавиринт“ нова книга од Ристо Лазаров


Скопје, 13 март, 2017 - 10:16 (META) 

Издателството „Везилка 2011“ ја објави новата, 32. поетска книга „Лавиринт“ од Ристо Лазаров. Како и последните десетина книги на овој автор, и оваа содржи 50 песни, седум циклуси со седум песни и една воведна песна.

Авторот на поговорот кон книгата, професорот Ферид Мухиќ, оваа книга ја нарекува поетска ревизија на архетипските митови. Класичните антички митови, оценува Мухиќ, од Тројанската војна и сите најважни херои и ликови што одиграле клучна улога во овој настан опеан од Хомер, преку Зевс и Хермес.

Инаку, „Лавиринт“ пред извесно време беше одбиена на конкурсот на Министерството за култура за финансирање на проекти од национален интерес за 2017 година.


Промоција на книгата „Македонскиот народ во Албанија“ од Спасе Мазенковски


Прилеп, 4 февруари, 2017 - 11:19 (META) 

Во организација на Иницијативата за семакедонско обединување од Прилеп, ќе се одржи промоција на книгата „Македонскиот народ во Албанија“, чиј автор е Спасе Мазенковски, интелектуалец, новинар од селото Леска во Мала Преспа, Албанија.

Настанот е закажан за 18 часот, во градската библиотека „Борка Талески“, додека промотор е професор д-р Виолета Ачкоска.

Книгата содржи повеќе податоци за етничките Македонци во Република Албанија, нивниот живот и културната афирмација.
Промоцијата на книгата е по повод одбележувањето на 145-годишнината од раѓањето на великанот на македонското револуционерно движење Гоце Делчев, извести електронскиот весник на македонски јазик „Илинден“.


Промоција на книгата „Македонските бронзи“ со записи за предмети пронајдени во Охрид


Охрид, 1 февруари, 2017 - 11:04 (META) 

Центарот за истражување на предисторијата, вечерва од 20 часот, во Археолошкиот музеј на Македонија организира промоција на книгата „Македонските бронзи: религијата и митологијата на железнодобните заедници од Средниот Балкан“, на проф. д-р Никос Чаусидис.

Монографијата ги обработува македонските бронзи – археолошки предмети од осмиот до шестиот век пр.н.е., пронајдени, главно, во Охрид, но и во други делови од Македонија.
Голем дел бронзени предмети беа пронајдени летово во Охрид, кога беа откриени 85 гроба, од кои 12 датираат од македонско-хеленистички период, односно некаде од трети и втори век пред наша ера, а другите се од османлискиот период, од 15 до крајот на 18 век.

Меѓу пронајдените артефакти се бронзени садови, бронзени копчиња и други предмети.


Книгата на Трамп што Груевски „ја препорачува“, ја нема во нашите книжарници


Скопје, 4 јануари, 2017 - 13:16 (META) 

Книгата „Повторно величествена“ (Great Again: How to Fix Our Crippled America), чиј автор е новоизбраниот претседател на САД, Доналд Трамп, а со која поранешниот премиер и сегашен лидер на ВМРО-ДПМНЕ, Никола Груевски, се одмора во Маврово, не може да се најде низ книжарници во Скопје.

Примерок од оваа книга имало само во книжарницата „Матица“, но не на македонски, туку на српски јазик. Од таму велат дека имале вкупно шест примероци кои чинеле по 620 денари, но се продале. Нови примероци очекуваат да добијат за околу еден месец.

Во книжарницата „Магор“ го немаат најновото остарување на Трамп, но ја имаат книгата „Размислувај како шампион“, која чини 400 денари.

Во кафе-книжарницата „Три“ имаат две постари изданија од Трамп. Таму, на македонски јазик можат да се најдат „Размислувај како шампион“ и „Сè што сакам е и вие да бидете богати“ кои чинат 340 и 350 денари.

Во другите поголеми книжарници не се продаваат и досега не се продавале негови книги.

Трамп, следниот американски претседател, почнувајќи од 1987 година досега има напишано 16 книги, дел од кои се мемоари, дел се бизнис-совети, а дел се политички, како последната „Повторно величествена“.

Оригиналниот наслов на книгата гласи „Осакатена Америка: Како да се направи Америка величенствена повторно“ (Crippled America: How to Make America Great Again) и е издадена во 2015 година, а во 2016 е реиздадена со насловот „Повторно величенствена: Како да се поправи осакатената Америка“ (Great Again: How to Fix Our Crippled America).

Лидерот на ВМРО-ДПМНЕ во божиќното интервју за порталот „Република“ ја препорачува новата книга на претседателот на САД, за која вели дека е многу интересна и предизвикувачка. Еве го тој дел:

Значи и Вие одморивте малку?
– Би рекол, активен одмор. Навидум одмор, инаку со мислите работев максимално на планови и на стратегии за понатаму. Носев и некои материјали со мене. Прочитав и некоја книга.

Која книга ја читавте?
– „Повторно величествена“ од Доналд Трамп. Многу интересна. Ја препорачувам.

Што најмногу Ви се допадна во неа?
– Ентузијазмот, упорноста, енергијата, жарот, одлучноста… Се разбира, и конкретните планови и идеи на новиот претседател на САД се многу интересни и предизвикувачки…


Промоција на „Трофеј“ на Весна Петрушевска во Штип


Штип, 11 ноември, 2016 - 10:16 (META) 

Денеска напладне во спомен-собата на поетот Ацо Шопов во Дом на културата во Штип, ќе се одржи промоција на автобиографската книга на Весна Петреушевска – Бејби, насловена „Трофеј“.

Издавачката куќа „Три“, делото на популарната актерка и водителка го најавува како неверојатно искрена и трогателна исповед, преку која Весна ќе ја запознаеме од различни аспекти на нејзината личност од минатото и сегашноста. „Пред сè, како „машкуданесто“ девојче, како актерка која никогаш нема да се пензионира, како ТВ-водителка, стендап-комичарка, ќерка и сестра, дваесет и четиричасовна мајка и пријателка, домаќинка… Но, пред сè, како човек со големо срце“, велат од издавачката куќа.


Меѓународната награда „Книжевно перо“ за македонскиот писател Петко Шипинкаровски


Струга, 10 ноември, 2016 - 9:41 (META) 

Македонскиот писател Петко Шипинкаровски е добитник на меѓународната награда „Книжевно перо“, што по петти пат ја доделува Хрватското книжевно друштво од Риека, Република Хрватска.

Наградата на Шипинкаровски ќе му биде врачена на Меѓународната манифестација „Денови на пријателите на книгата“, што ќе се одржи од 17 до 20 ноември.

– Со искрено задоволство ја примив веста за Меѓународната награда „Книжевно перо“ на Хрватското книжевно друштво – Риека, Република Хрватска. Искрено се надевам дека нашата соработка не само што ќе продолжи уште позасилено за афирмација на хрватската и на македонската литература и култура, туку ќе бидат и надградени и проширени во интерес на двата народи и на двете независни држави – вели Шипинкаровски.

Досегашни добитници на наградата „Книжевно перо“ се Христо Петрески (Македонија), Ибрахим Османбашиќ (БИХ), Миодраг Јакшиќ (Србија) и Наташа Швикарт (Словенија).


Рама: Односите меѓу Албанија и Србија се променети на подобро


Белград, 14 октомври, 2016 - 9:53 (META) 

Еди Рама, премиерот на Албанија, синоќа во Белград го промовираше српското издание на книгата „Жртвување“.

Тој вчера оцени дека изминатите две години, колку што поминале од неговата последна посета во Белград, односите меѓу двете држави се променети на подобро.

– Работите се променети. Се сеќавам на изразот на лицето на вашиот премиер пред две години, кога го споменав Косово. Мислев дека ќе умре пред мене – изјави Рама, додавајќи дека Вучиќ и тој и денеска имаат различни ставови, но подобро размислуваат.

На промоцијата на која присуствуваа голем број јавни личности, меѓу кои и шефот на дипломатијата, Ивица Дачиќ, Рама рече дека состојбата на Албанците на југот на Србија е денес подобар и дека ова е првпат тој од нив да слушне дека имаат јасни знаци дека нивните ветувања ќе бидат исполнети.

Посетата на Рама на Србија продолжува денеска во Ниш, каде заедно со Вучиќ ќе учествува на првиот албанско-српски бизнис-форум.