Заев: Оптимист сум дека е можен национален консензус за прашањето за името


Скопје, 28 јануари, 2018 - 0:43 (META) 

Јас сум оптимист дека е можно да се најде национален консензус по ова важно прашање, изјави премиерот Зоран Заев по петчасовниот координативен состанок на државно-политичкиот врв на кој беа разгледувани предлозите на медијаторот Метју Нимиц за решавање на спорот за името.

– Вечерва имавме информативна средба на политичките претставници на која беа презентирани и дискутирани предложените идеи од медијаторот Метју Нимиц после што разменивме информации и мислења за разговорите меѓу мене и грчкиот премиер Алексис Ципрас. Овој процес бара инклузивност, посветеност и политичка одговорност со цел градење на национален консензус во Република Македонија. За тоа е потребна политичка волја и храброст од наша страна, но решение е можно доколку таква политичка волја постои и на грчката страна. Конечна цел, наша, заедничка е да се најде решение за да може Македонија да биде членка на НАТО и да отпочне преговори со Европската Унија – рече Заев по средбата.

Прашан дали ќе има нови средби, премиерот изјави „секако дека ќе има“ и оти се надева дека сите ќе опстојат на ваквите средби со што нашата позиција во процесот, како што рече, би била поунисона и подобра во функција на конечно решение на овој долгогодишен проблем.

Лидерот на ВМРО-ДПМНЕ, Христијан Мицкоски изјави дека на средбата бил презентиран предлогот на Нимиц, кој, како што додаде, помалку или повеќе и е познат на јавноста во Македонија и дека од овој момент „целокупната одговорност е сега на Владата како ќе го води процесот“.

– ВМРО-ДПМНЕ е силен поддржувач и останува на опцијата дека Македонија мора да биде дел од НАТО и од Европската Унија и ВМРО-ДПМНЕ останува на браникот на државните и национални интереси на Македонија – рече Мицкоски, кој додаде дека ваква средба требала да се случи порано.

Претседателот на државата, Ѓорге Иванов изјави дека не може да открие повеќе детали за што точно се зборувало, но рече дека е реалист со искуство.

– Очекувам Владата да нè информира за сите активности. Овој процес продолжува да се одвива во рамки на Обединетите нации. За да нема притисоци се договоривме да не коментираме за предлогот“, рече Иванов.

Лидерот на ДУИ, Али Ахмети, по средбата рече дека ова бил еден од најплодните состаноци за ова прашање.

– Го ценам дијалогот за потрага по решение. Ова е почетокот на крајот на еден процес за Македонија. Важно е да бидеме дел од НАТО во мир и стабилност – рече Ахмети.


Почна координативниот состанок на државниот врв за предлозите на Нимиц


Скопје, 27 јануари, 2018 - 18:52 (META) 

Почна координативниот состанок на државниот врв на кој ќе се разгледува иницијалната рамка за решавање на спорот за името, која ја предложи медијаторот Метју Нимиц.

Во Клубот на пратеници пристигнаа претседателот Ѓорге Иванов, со двајца претставници на неговиот кабинет, премиерот Зоран Заев заедно со министрите за одбрана и за надворешни работи, Радмила Шекеринска и Никола Димитров, лидерот на ВМРО-ДПМНЕ, Христијан Мицкоски на состанокот е придружуван од Владо Мисајловски и Александар Николовски, а лидерот на ДУИ, Али Ахмети дојде со потпретседателите во Владата, Бујар Османи и Хазби Лика.

Од МНР вчера соопштија дека по завршувањето на средбата не е предвидена прес-конференција и изјави за медиумите.


Државниот врв денеска на координативен состанок за предлозите на Нимиц


Скопје, 27 јануари, 2018 - 10:00 (META) 

Државниот врв денеска на координативен состанок ќе ја разгледува иницијалната рамка за решавање на спорот за името, која ја предложи медијаторот Метју Нимиц.

Состанокот, кој вчера и официјално беше најавен од Министерството за надворешни работи, ќе се одржи во 18 часот, во Клубот на пратениците.

На состанокот ќе учествуваат претседателот на државата Ѓорѓе Иванов, премиерот Зоран Заев, министерот за надворешни работи, Никола Димитров, претседателот на ВМРО-ДПМНЕ, Христијан Мицкоски и претседателот на ДУИ, Али Ахмети.

Од МНР соопштија дека по завршувањето на средбата не е предвидена прес-конференција и изјави за медиумите.

Посредникот на ОН во разговорите за името, Нимиц, на 17 јануари по средбата со македонскиот и со грчкиот преговарач, Васко Наумовски и Адамантиос Василакис, во седиштетот на ОН изјави дека има големи надежи дека овој процес се движи во позитивна насока и дека на повидок е решение на спорот за името.

Нимиц на покана на владите на Македонија и на Грција ќе престојува во Атина и во Скопје во периодот од 29 јануари до 1 февруари.

Тој на 31 јануари ќе пристигне во Скопје, а следниот ден ќе има средби со државниот врв.


Полицијата чува 3.570 вреќи со избирачки материјал во Клубот на пратеници


Скопје, 12 декември, 2016 - 13:28 (META) 

Во Клубот на пратеници, под силно полициско обезбедување се наоѓаат 3.570 вреќи со избирачки материјал. Синоќа по завршувањето на изборите, па сè до денеска, вреќите со избирачките ливчиња и другиот материјал за гласање од сите гласачки места се носат во Клубот на пратеници, каде што комисија на ДИК прави записници.

Долж булеварот Теодосиј Гологанов има голем број комбиња, автомобили, но и полициски возила помеѓу нив.

– Во вреќите има доверлив материјал кој треба комисијата на ДИК да го провери. Тие не се отвораат туку се проѕирни и имаат лепенки на кои пишува што содржат внатре. Доколку има приговори, овие доверливи материјали ќе служат како доказ. Избирачкиот материјал ќе биде во Клубот на пратеници си додека ДИК не ги направи сите записници, а потоа ќе се пренесе во нашите магацини. Порано оваа процедура се правеше во големата просторија на ДИК, но сега таа ја користиме како прес-центар и затоа гласачкиот материјал за овие избори се чува во Клуб на пратеници – вели портпаролката на ДИК, Љупка Гугучевска.

Гугучевска додава дека рокот за поднесување приговори до ДИК е 48 часа и истекува утре во 19 часот.


Преговорите на политичките партии продолжуваат во Клуб на пратеници


Скопје, 19 јули, 2016 - 10:13 (META) 

Преговорите на политичките партии потписнички на Договорот од Пржино, денеска во 12 часот продолжуваат во Клубот на пратеници во Скопје. Се очекува да се разговара за последното отворено прашање, односно ингеренциите на министерот за внатрешни работи.

Преговорите синоќа, пак, завршија без договор. Амбасадорот на САД во Македонија, Џес Бејли, по средбата истакна дека на маса има интересен предлог и дека до крајот на неделата очекува решение на кризата.

На средбата, која вчера се одвиваше во резиденцијата на амбасадорот на САД, присуствуваа Никола Тодоров од ВМРО-ДПМНЕ, Радмила Шекеринска од СДСМ, Артан Груби од ДУИ и Имер Алиу од ДПА.

Посредници беа американскиот амбасадор Џес Бејли и заменикот на евроамбасадорот Аиво Орав, кој е на дополнителни консултации во Брисел.

Партиите за време на викендот имаа внатрепартиски консултации за единственото преостанато спорно прашање – ингеренциите на министерот за внатрешни работи.


Вонредна лидерска средба пред објавувањето на оцената за условите за избори


Скопје, 21 февруари, 2016 - 15:31 (META) 

Лидерите на политички партии потписнички на Договорот од Пржино, во моментов се во Клубот на пратеници каде од 15 часот е закажана вонредна лидерска средба.

На средбата, од засега непознати причини, не е присутен лидерот на ВМРО-ДПМНЕ, Никола Груевски, додека претседателите на СДСМ, ДУИ и на ДПА се во Клубот на пратеници, каде повеќе од еден час трае состанокот.

На него, претставници на Европската унија (ЕУ) и на Соединетите Американски Држави (САД) треба да им го презентираат на партиските лидери извештајот за тоа дали се исполнети условите за фер и веродостојни избори на 24 април.

На лидерската средба ѝ претходеше презакажување на терминот во кој амбасадорите на ЕУ и на САД треба да ја соопштат оцената за условите за изборите.

Наместо во 14.30 часот, како што првично беше најавено, поради лидерската средба изјавата на амбасадорите е закажана по средбата во Клубот на пратеници.

Засега не се знае на чие барање е свикана вонредната лидерска средба. На неа, според порталот „Нова ТВ“, присутен е амбасадорот на САД во земјава, Џес Бејли.

Денеска на прес-конференција, пратеникот и член на извршниот комитет на ВМРО-ДПМНЕ, Илија Димовски, одговарајќи на новинарско прашање дали е можно поместување на датумот за избори и што ако извештајот на меѓународните посредници за Договорот од Пржино биде негативен, рече дека нема ниту еден сериозен момент кој укажува на тоа дека избирачкиот список не може да биде прочистен навреме.


Ванхауте: Проблем се составот на Агенцијата за медиуми и владините реклами


Скопје, 17 февруари, 2016 - 17:14 (META) 

Белгискиот посредник, Питер Ванхауте, пред почетокот на денешната средба на работните групи во Клубот на пратеници, на која се преговара за медиумите, рече дека ситуацијата никогаш не е безнадежна и дека преговорите ќе продолжат.

– ВМРО-ДПМНЕ денеска имаше консултации и наскоро ќе видиме дали има компромис и ако нема, дали ќе може да се постигне. Ако нема договор до петок (19 февруари), до кога амбасадорите треба да кажат дали има или нема услови за одржување на изборите, ќе има голем црвен знак на прашањето за медиумите. Никогаш не е безнадежно и ние ќе продолжиме да преговараме со надеж дека ќе се постигне договор – рече Ванхауте.

Одговарајќи на новинарско прашање за црвените линии на двете партии, Ванхауте рече дека голем проблем се составот на Агенцијата за медиуми и владиното рекламирање.


Денеска во 13 часот средба на работните групи за медиуми


Скопје, 11 февруари, 2016 - 11:25 (META) 

Работната група за реформа во медиумите денеска во 13 часот ќе одржи средба во Клубот на пратеници.

Последна средба на работните групи се одржа во четвртокот, а преговорите се закочени од петокот, откако на билатералните средби со белгискиот олеснуваач Питер Ванхауте, преговарачите му ги повториле црвените линии од кои немаат намера да отстапат.

На последната средба се зборуваше за законот што го предложи СДСМ, кој не е прифатлив за Здружението на новинари на Македонија, а експресно го одби и ВМРО-ДПМНЕ. Според претседателот на ЗНМ, Насер Селмани, ВМРО-ДПМНЕ и СДСМ ги здружиле напорите за да го минираат предлогот на европскиот посредник Питер Ванхауте за реформа на медиумскиот систем.

Според Илија Димовски, член на преговарачкиот тим на ВМРО-ДПМНЕ, овој закон е противуставен, неевропски и го нема во ниту една држава во светот.

Посредникот во преговорите за регулација на медиумите, Ванхауте, во последната своја изјава, дадена по средбата во четвртокот, ги повика политичките партии да постигнат што е можно поскоро компромис за регулација на медиумската сфера. Според него, потребен е нов закон за медиуми кој нема да биде копија на законодавството од друга земја.

– Не е добра идејата да се копира од европските земји и да се земаат закони од нив затоа што вие имате различен правен систем, друг устав, друг менталитет. Вашите медиуми не може да се споредуваат со медиумите во другите земји. Затоа, ве молам, обидете се да го искористите тоа што го имате и да го подобрите – изјави Ванхауте.


Димовски: Предлогот на СДСМ за медиумите е „Гаргамел-закон“


Скопје, 4 февруари, 2016 - 17:36 (META) 

ВМРО-ДПМНЕ го отфрли предлог-законот за медиуми кој СДСМ вчера го предложи на политичките партии потписнички на Договорот од Пржино. Според Илија Димовски, член на преговарачкиот тим на ВМРО-ДПМНЕ, овој закон е противуставен, неевропски и го нема во ниту една држава во светот.

– Со законот на СДСМ се предвидува зголемување на казните за медиумите. Исто така, со него се предвидува МРТВ и Агенцијата за медиуми да бидат составени од членови само на невладини организации. Со предлог-законот на СДСМ се предвидува чудесна балансираност дури и во контактните емисии, па, на пример, ако во нив се јават пет гледачи што ќе го фалат градоначалникот на Град Скопје, во истата емисија мора да се јават и пет гледачи што ќе го нападнат градоначалникот. Овој закон беше одбиен уште пред два месеци од сите здруженија и организации на новинари во Македонија. Ова е „Гаргамел-закон“ – изјави Димовски, пред почетокот на денешната средба на работните групи во Клубот на пратеници за решавање на спорните прашања околу регулацијата на медиумите.

Според него, на 24 февруари ќе се распушти Собранието, а само 20 дена подоцна ќе стапат на сила и одредбите во Изборниот законик, кои ја регулираат сферата на медиумите.

– Ние сметаме дека нашиот закон за медиуми е целосно прифатлив затоа што тој е одобрен од релевантни меѓународни институции. Сепак, ако не сакаат да го прифатат постојниот закон, денеска на маса ќе ги ставиме сите закони од земјите на Европската унија, па нека избираат кој ќе го прифатат – рече Димовски.


Ванхауте: Избори на кои не учествуваат сите политички партии се проблематични избори


Скопје, 27 јануари, 2016 - 18:29 (META) 

Белгискиот олеснувач Питер Ванхауте денеска, пред почетокот на средбата на работните групи во Клубот на пратеници, рече дека, според него, можно е да се постигне договор за законот за медиуми и дека е добро што политичките партии даваат свои предлози, кои не се конечни решенија, туку само предлози.

Тој потврди дека со некои од предлозите има проблем затоа што не се според стандардите на Европската унија. Ванхауте, исто така, додаде дека нема формален договор за методологијата за прочистување на избирачкиот список, но е задоволен што може да каже дека Државната изборна комисија (ДИК) прави сè што може за прочистување на избирачкиот список.

Одговарајќи на новинарско прашање, белгискиот олеснувач рече дека ако нема доволно време да се подготват изборите, според него, тоа може да бидат проблематични избори. Исто така, како одговор на новинарско прашање, Ванхауте рече дека избори кои не се инклузивни, односно на кои не учествуваат сите политички партии, се проблем за демократијата и за државата.

Според него, одговорноста ја имаат и власта и опозицијата, а владејачката коалиција треба да ги направи условите за изборите атрактивни за опозицијата.