Архитектите ја поздравија одлуката новиот Клинички центар да се гради во Злокуќани


Скопје, 9 март, 2018 - 15:44 (META) 

Асоцијацијата на архитекти на Македонија ја поздрави одлуката на Владата и Министреството за здравство, со која се разреши дилемата околу изградбата на новиот Клинички центар, кој треба да се гради во Злокуќани.

„Истовремено изразуваме целосна поддршка за определбата на Владата новиот Клинички центар да се гради на друга локација, надвор од центарот на Скопје, што беше заложба на Асоцијацијата на архитекти на Македонија, како и на неколку генерации врвни архитекти пред нас, кои се залагале за изградба на еден, нов модерен клинички центар по сите светски стандарди“, се вели во соопштението на Асоцијацијата на архитекти на Македонија.

Од таму додаваат дека се задоволни што при донесувањето на ваквата одлука на Владата биле земени предвид и мислењата и сугестиите на стручната јавност.

„Се надеваме дека оваа соработка при носењето на важни одлуки за унапредување на урбаниот простор на Македонија ќе продолжи и во иднина“, велат од Асоцијацијата.

Одлуката ја поздравија и Лекарската, Стоматолошката и Фармацевтската комора на Македонија.


Архитектите бараат дислокација на Клиничкиот центар


Скопје, 10 февруари, 2018 - 11:04 (META) 

Асоцијацијата на архитекти на Македонија (ААМ) порача дека не смее да се случи ново „Скопје 2014“ и побара од Владата да ги вклучи во донесувањето оценка при изборот на локацијата за изградба на најзначајниот здравствен комплекс во земјава.

Претседателот на ААМ, Мартин Пановски вели дека од ниту една релевантна институција, која се занимава со архитектура и урбанизам, не е побарано официјално мислење или експертиза околу изградбата на новиот Универзитетски клинички центар.

– Во сите наши изјави кога сме прашани кој е најлошиот аспект на проектот Скопје 2014, дали се тоа фасадите, објектите или скулптурите, секогаш како најлош момент го издвојуваме всушност тоталитарниот систем на планирање и изградба, кој го наметна проектот Скопје 2014 а се прошири низ целата земја. Тој систем се карактеризира со комплетно негирање на архитектите во креирањето на урбаниот простор. Тоа значи дека архитектите веќе подолго време не го креираат просторот во кој сите живееме. Повеќе од 10 години архитектите и урбанистите се третираат од страна на властите како извршители на нечии желби и замисли, а не како креативни, стручни лица кои треба да се најодговорни за урбниот простор на една држава – вели Пановски.

Официјалниот став на ААМ е дека Универзитетскиот клинички центар во Скопје треба да се гради на нова локација.

Со изготвената урбанистичка документација за Скопје во изминативе две децении се потврдило дека најсоодветен простор за изградбата на овој здравствен комплекс е просторот од околу 92 хектари во близина на селото Бардовци. Европската инвестициска банка веќе ја финансирала физибилити студијата за дислокација на Универзитетскиот клинички центар на овој простор, а искуствата на Папскиот универзитетски клинички центар во Рим биле дадени во предусловите за изработка на прелиминарната Планска програма за новиот здравствен комплекс.


Новиот Клинички центар ќе чини 120 милиони евра и ќе се гради 3,5 години


Скопје, 24 јануари, 2018 - 12:57 (META) 

Владата до крајот на февруари ќе ја донесе одлуката за тоа, дали ќе гради нов Клинички центар. Од таму, не сакаа да откријат дали Клиничкиот центар ќе се гради на нова локација или новиот објект ќе биде изграден кај веќе постоечките болници.

– Рокот за изградба на новиот објект ќе биде 3,5 години и дополнителна 1,5 година за реконструкција на постојната зграда на хируршките клиники. Вредноста на проектот е 120 милиони евра од кои 70 милиони евра се кредит, а остатокот е од буџетот. Во новиот објект ќе бидат инкорпорирани 21 клиника, а на постојните сегашни локации ќе останат клиниките за детски болести, кардиологија, инфективна, максилофацијална – рече Бошњаковски и додаде дека по владината одлука ќе започне процесот на реализација.

Тој додаде дека сега се разгледуваат повеќе опции, но ќе се одбере онаа која е најдобра за граѓаните, како од аспект на пациенти, така и во однос на трошењето на нивните пари.


Владата го стега ременот, наскоро одлука дали ќе се гради нов Клинички центар


Скопје, 23 јануари, 2018 - 21:59 (META) 

На денешната седница, Владата, меѓу големиот број мерки, донела одлука за поригорозни мерки за да се подобри ефикасноста на контролата на трошењето на јавните финансии. Исто така, донесена е и програмата за нејзината работа во оваа година, како и заклучок дека наскоро може да се очекува одлука за тоа дали ќе се гради нов Клинички центар во Скопје.

Службата за информирање соопшти дека откако на почетокот бугарскиот амбасадор ја презентирал програмата за претседавањето со ЕУ, делегација на Банката на Советот на Европа ги презентирала опциите за активирање на изградбата на новиот Клинички центар во Скопје, при што било нагласено дека тоа е еден од најважните приоритети во оваа година, и дека се очекува конечната одлука за најдобрите опции за изградбата да биде донесена наскоро.

Владата ја разгледала и усвоила информацијата за состојбите и напредок во процесот на европската интеграција, како и за статусот на користењето и имплементацијата на фондовите од ЕУ за 2018 и  2019 година. Посебно внимание, се вели во владиното соопштение, е посветено на плановите и програмите на ЕЛЕМ, во кои се вклучени и предвидените трошоци за реконструкција на електростатски филтри и за намалување на емисии на прашина во РЕК Битола, како и определбата за развој на капацитети за обновливи енергии, односно изградбата на фотоволтаични електрани и ветерни електрани.

На предлог на Министерство за финансии владата денеска ја усвоила и информацијата за Програмата на економски реформи  2018 – 2020 година, како и Годишниот извештај за функционирање на системот на јавна внатрешна финансиска контрола за 2016 година, при што било забележано дека има слабости во работата на внатрешните ревизии и контрола на јавните финансии на централно и локално ниво, и е усвоен заклучок да бидат преземени соодветни и поригорозни мерки за да се подобри ефикасноста на контролата на трошењето на јавните финансии.

Истовремено, Министерството за образование и наука презентирало предлог – закон за изменување и дополнување на Законот за учебници за основно и средно образование, со кои побрзо ќе може да се печатат нови изданија.


ВМРО-ДПМНЕ: Таравари да каже кои експерти одлучуваат за изградбата на клинички центар


Скопје, 23 септември, 2017 - 17:12 (META) 

По загубени четири месеци, Владата и министерот за здравство, Арбен Таравари, сфатија дека не можат да градат нов клинички центар на друга локација освен во рамките на веќе постојниот каде што владата на ВМРО-ДПМНЕ потпиша договор за градба и се обезбедија пари, се вели во реакцијата на ВМРО-ДПМНЕ на прес-конференцијата на министерот за здравство, Арбен Таравари.

Од ВМРО-ДПМНЕ велат дека интересно е што и во јуни, Заев и Таравари кажаа дека експерти го гледаат договорот и оцениле дека не треба да се гради, за сега Таравари подготвува терен за промена на одлуката.

Од ВМРО-ДПМНЕ бараат министерот за здравство да ги објави имињата на експертите од јуни и на експертите што сега ќе одлучуваат за градба на овој капитален проект за државата, подготвен од ВМРО-ДПМНЕ според, како што велат, сите законски прописи и по највисоки стандарди.

Околу Советот за јавни набавки, од партијата велат дека оваа институција постои за да спречи местење тендери на државните институции.

„На Таравари, на Заев и на владата ова им пречи. Тие сакаат уште кога ќе излезе тендерот, да се знае кој ќе е победникот, кој се разбира во такви услови ќе понуди лек по повисока цена и со поголема заработувачка во која ќе има вградено провизија за сите што треба“, се додава во соопштението.


СДСМ: Здравството тонеше поради криминалните апетити на Тодоров и на Груевски


Скопје, 9 септември, 2017 - 13:48 (META) 

„Лицемерна и лажна е загриженоста на ВМРО-ДПМНЕ за состојбата во здравството, бидејќи сите ги чувствуваат последиците од катастрофалните штети што ВМРО-ДПМНЕ ги направи во здравствениот систем. Никола Груевски, Никола Тодоров и ВМРО-ДПМНЕ оставија пустош во здравството, руинирани болници, понижени пациенти и лекари, неупотреблива опрема и огромни долгови на здравствените установи“, реагира СДСМ на денешната прес-конференција на ВМРО-ДПМНЕ.

„Поради криминалното и расипничко владеење на Тодоров и на Груевски, сите здравствени установи во Македонија тонеа во милионски долгови. Клиничкиот центар во Скопје должи 3 милиони евра, бидејќи цели 10 години не се плаќале сметки за вода, а Градската општа болница „8 Септември“ има вкупен долг од 5 милиони евра. Владата предводена од СДСМ стави крај на таквото криминално, коруптивно и расипничко работење во здравството“, се вели во реакцијата.


ВМРО-ДПМНЕ: СДСМ направи цунами во здравството


Скопје, 9 септември, 2017 - 10:55 (META) 

„Ова што го прави СДС на сопствениот народ и држава е рамно на цунами. Изминативе 100 дена од доаѓањето на власт неспособната влада на СДС ветуваше разно-разни реформи и подобрување на услугите во здравството, а од сето тоа македонските граѓани не видоа ништо“, обвини денеска Дафина Стојаноска од ВМРО-ДПМНЕ на прес-конференција пред Министерство за здравство.

Таа рече дека владата на СДСМ во првите недели направила реваншистичка смена на дирекорите во јавното здравство, а не набавила ниту еден нов медицински апарат или опрема.

– Ветувањето за зголемување на платата на докторите за 100.000 денари, СДС не го реализира ниту за 1 денар. Укинат е ургентниот интернистички центар при кампусот „Мајка Тереза“. Запрени се дури и проектите за едукацијата што врвните странски стручњаци и лекари ја правеа во Македонија, а тоа беше организирано од страна на владата – рече Стојаноска.

Таа порача и дека „неспособноста на владата на СДСМ“ се гледа и во тоа што „за една недела умреа 10-тина дечиња по разни болници, а за ова одговорност од СДС немаше“.


Таравари подготвува нови смени на директори и извод за роденчињата уште во болница


Скопје, 16 јули, 2017 - 17:02 (META) 

Хигиената во болниците останува главен проблем и во следните пет-шест месеци еден од моите главни фокуси ќе биде хигиената во сите болници, рече министерот за здравство, Арбен Таравари, по денешното чистење на слободниот простор меѓу клиниките во скопскиот Клинички центар. Тој истовремено најави дека наскоро ќе бидат обелоденети и наодите на инспекциите во некои болници, а тогаш ќе има и казни.

– Ќе има казни за менаџери, за вработени, но тоа ќе биде како што ќе каже инспекторатот. Лошо е во Клиниката за гинекологија, а ни во штипската болница не е подобро, најдени се некои работи што не треба да ги има во болница – рече Таравари.

Тој додаде дека постои можност наскоро да се ангажира приватна фирма за чистење на болниците, за да се сузбијат интрахоспиталните инфекции.

-Веќе размислуваме за решенија и како да го поправиме тоа. Можеби ќе ангажираме надворешни фирми, прво експериментално во две болници. Во клиниката во Гостивар и на Клиниката за гинекологија ќе почне една фирма што бесплатно ќе работи и според тоа како ќе бидат задоволни пациентите и лекарите и дали интрахоспитални инфекции ќе бидат намалени, ќе одлучиме дали тоа ќе го спроведеме на уште неколку клиники каде можеме финансиски – изјави Таравари.

Министерот во однос на ревизиите на досегашното работење и именувањата на нови директори на здравствените установи и клиниките рече дека ќе има смени и оваа и следните недели.

– Засега е направена ревизија само на Министерството за здравство, а ќе направиме ревизии на клиниките кога ќе именуваме нови директори. Именувања ќе правиме и оваа недела, но полека, не брзаме, 70-80 отсто од клиниките во наредните недели ќе имаат нови директори – рече Таравари.

Тој најави дека наскоро ќе се промовира измена во системот „Мој термин“, односно новороденчињата ќе бидат заведени во матичната книга на родени уште истиот ден по раѓањето и веднаш ќе добијат извод, како и календар на вакцини со препораки за мајката за следните неколку месеци.

– Се работи за една новост, кога ќе се роди детето, да не се оди никаде туку во болница да се дава извод од матичната книга на родени и препораки за мајките за следните неколку месеци… – рече министерот, најавувајќи повеќе детали за следната недела.

 


Уште едно лице починало од пукањето во Бутел, причините за инцидентот и понатаму непознати


Скопје, 2 јули, 2017 - 16:54 (META) 

Скопската полиција сè уште ги истражува причините и работи на расчистување на случајот во кој 84-годишниот П.Т., жител на населбата Бутел, вчера во својот дом пукаше во сопругата, нивната ќерка и во внукот, а потоа се самоуби.

Триесет и двегодишниот внук, од сериозноста на повредата, почина на самото место, а како што соопшти денеска полицијата, утрово во Клиничкиот центар во Скопје починала и сопругата на П.Т. Нивната ќерка, која, исто така, беше хоспитализирана во Ургетниот центар, и понатаму се наоѓа во животна опасност.

Како што информираат од МВР, вчера околу 12.40 часот од засега неутврдени причини, П.Т. со својот пиштол „берета“, кој го поседувал со дозвола, првин испукал еден куршум кон својата 78-годишна сопруга и ја погодил во грлото, а потоа пукал во нивната 58-годишна ќерка, која ја погодил во главата.

„Неговиот внук Т.С. (32), откако влегол во ходникот од куќата, од страна на П.Т. бил погоден во пределот на главата при што поради тежината на огнострелната повреда починал на самото место. Потоа П.Т. со пиштолот си пукал во главата и се самоубил“, стои во информацијата на полицијата за случајот.

По наредба на јавен обвинител телата на починатите се пренесени во Институтот за судска медицина, за обдукција.


Разрешени Лука Кржалоски, Филип Петровски и портпаролот на Влада, Александар Ѓорѓиев


Скопје, 27 јуни, 2017 - 20:35 (META) 

Владата на денешната седница го разгледала планот за изградбата нов објект на Клиничкиот центар во Скопје, при што констатирала повеќе проблематични делови во врска со постапката, локацијата и со други прашања поврзани со проектот, стои во соопштението од владината прес-служба.

„Донесена е одлука премиерот, министерот за здравство и заменикот на претседателот на Владата задолжен за европски прашања да одржат состанок со претставници на Европската централна банка за да се најде соодветно и трајно решение за новиот клинички центар, како исклучително значајно прашање за потребите на граѓаните од цела Македонија“, се вели во соопштението.

На седницата биле формирани и три координативни тела кои ќе работат на постигнување поголеми резултати во ангажираноста на домашните компании при реализацијата на странските инвестиции, на анализа на мерките за привлекување странски инвестиции, како и на мерки за консолидација на енергетиката заради реализација на квалитетна државна енергетска стратегија.

Премиерот и министрите, исто така, го разгледале извештајот за работењето на Инспекцискиот совет, а поради констатираните злоупотреби на инспекциски служби, донесен е заклучок за утврдување стратегија за слабостите и за предностите во функционирањето на Инспекцискиот совет во функција на негова објективна и непристрасна работа.

На денешната владина седница донесени се повеќе кадровски одлуки. Разрешен е досегашниот портпарол на Владата, Александар Ѓорѓиев, како и в.д. директорот на ЈП „Службен весник“, Лука Кржалоски. На местото на Кржалоски е назначен Мартин Костовски. Дарко Каевски доаѓа на челното место на Агенцијата за млади и спорт, на местото на досегашниот директор Марјан Спасески. Разрешен е и досегашниот директор на Државниот архив на Република Македонија, Филип Петровски, а негов наследник е Кирил Петров.

И Државниот завод за статистика доби нов директор, односно Апостол Симовски доаѓа на местото на Лидија Костовска, додека Спасе Глигоров ќе раководи со Агенцијата за администрација, со која досега директоруваше Жаклина Николовска.