Собранието ги донесе законите за судовите, за Судски совет и за високотo образование


Скопје, 2 мај, 2018 - 14:26 (META) 

Собранието на Република Македонија на денешната 45. седница ги донесе Законот за високото образование и измените и дополнувањата на законите за судовите, за Судскиот совет, за оружјето и за безбедност на сообраќајот на патиштата, како и за НБРМ, за класифицирани информации, за оружје и за ловство.

Процедурално координаторот на пратеничката група на ВМРО-ДПМНЕ, Драган Данев, рече дека нема да гласаат за Законот за високото образование бидејќи не бил прифатен ниеден од амандманите што ги поднеле како партија. Според него, многу аналитичари и експерти во оваа област сметаат дека со ова законско решение, високообразовниот систем во Македонија се враќа триесетина години наназад. Тој на почетокот на денешната седница порача дека власта мора да престане со „штанцање“ закони, за што, како што рече, предупредила и Европската Комисија.

Координаторот на пратеничката група на СДСМ, Томислав Тунтев, реплицирајќи му на Данев рече дека во однос на пакетот на реформски закони што Република Македонија го прифати како задача и пред домашната и меѓународната јавност, добро е што опозицијата дала свој конструктивен придонес.

Собранието по скратена постапка ги донесе измените и дополнувањата на законите за ревизија, за хартии од вредност, за Кредитно биро и за технолошки индустриски развојни зони.

На денешната седница претседателот на Собранието, Талат Џафери, ја констатираше оставката на Ѓорги Сламков од функцијата претседател на Комисијата за заштита на првото за слободен пристап до информациите.


Предлози за членови на Советот на јавни обвинители и за уставен судија во Собранието


Скопје, 1 март, 2018 - 10:14 (META) 

Четири комисии на Собранието денеска ќе заседаваат разгледувајќи десетици предлог-закони, но и кадровски решенија за клучните позиции во правосудството.

Комисијата за прашања на изборите и именувањата ќе утврдува предлози за членови на Советот за јавни обвинители, но ќе избере и кандидат за судија на Уставниот суд.

На другите комисии ќе се расправа за низа предлог-закони со кои ќе се воведе АПТИС тестот за англиски јазик за раководители на различни нивоа и во различни институции, но и е се исфрла психолошкиот тест како услов за вработување на ваквите кадри.

Ќе се расправа и за предлог-закон за изменување и дополнување на Законот за производство и промет на вооружување и воена опрема, како и за предлог-закон за изменување и дополнување на Законот за класифицирани информации.


Станишев побарал да прекине обвинението против него за изгубени тајни документи


Софија, 15 февруари, 2017 - 19:02 (META) 

Поранешниот бугарски премиер Сергеј Станишев побарал од Апелацискиот суд во Софија да го прекине случајот против него за изгубени тајни документи поради застареност на делото, јавува дописничката на „Мета“ од Софија.

Адвокатот Васил Василев побарал да се прекине случајот против Станишев, бидејќи рокот истекол на 27 јануари, така што завршница на случајот се очекува следниот месец.

Во декември лани Основниот суд во Софија го ослободил Станишев од обвинение за изгубени документи со класифицирани информации. Во обвинението против него, било наведено дека тие документи му биле дадени лично за да ги потпише во периодот од 2005 до 2009 година. Но според судот, не било докажано дека тие документи биле тајни и дека тој ги изгубил.

Станишев изјави дека ги почитувал правилата за заштита на класифицирани информации. Запрашан за содржината на документите, одговорил дека само во еден од нив станувало збор за информации кои се однесуваат на силни националистички чувства за земја од регионот.

Дури и да беше осуден, Станишев само требаше да плати глоба од 5.000 лева (2.500 евра).


СЈО се жали против решението да не ги добие доказите од Судот


Скопје, 3 март, 2016 - 15:17 (META) 

Специјалното јавно обвинителство денеска преку соопштение информираше дека поднело жалба против решението на Основниот суд Скопје 1 со кое е одбиено барањето на СЈО да му бидат предадени копии на списи и електронски докази.

„Во жалбата укажуваме дека со обжаленото решение првенствено е направена суштествена повреда на одредбите на Законот за кривична постапка (ЗКП), во смисла што решението надвор од главната расправа го донел Судскиот совет, наместо да го донесе совет од три судии, во согласност со членот 25, став 5 од ЗКП. Исто така, укажано е дека од наша страна барани се и докази кои воопшто не се класифицирани, како и докази кои се декласифицирани. И овие докази судот не ни ги доставил, туку во целост го одбил нашето барање, повикувајќи се на обврската за чување класифицирани информации, иако таква обврска за овие докази очигледно не постои. Во жалбата се повикувме и на законските и на подзаконските акти кои ја регулираат материјата за класифицираните информации и тоа Законот за класифицирани информации и Уредбата за административна безбедност на класифицирани информации, во кои, меѓу другото, е предвидена можноста за репродукција и за пренос на класифицираните информации за корисниците на класифицирани информации (јавните обвинители во ова јавно обвинителство кои поседуваат безбедносни сертификати со степен на доверливост државна тајна), кои прописи, доколку судот ги примени, во никој случај нема да ја повреди обврската за чување класифицирани информации“, пишува во соопштението на СЈО.

Жалбата на СЈО доаѓа по одбивањето на Основниот суд Скопје 1 да ги предаде сите докази за случајот „Пуч“ на увид на специјалните јавни обвинители.

Денеска соопштение испратија и од Основното јавно обвинителство (ОЈО) за гонење организиран криминал и корупција, во кое се вели дека целокупната документација, со сите списи и докази за случајот „Пуч“ е предадена на СЈО.

Според ОЈО за гонење организиран криминал и корупција разликата што се јавува околу доказите е поради класифицираните материјали за кои нема втор примерок, а единствените се предадени во Основниот суд Скопје 1.


Обвинителство: На СЈО му ги дадовме сите докази за „Пуч“, освен класифицираните кои се во судот


Скопје, 3 март, 2016 - 12:26 (META) 

Основното јавно обвинителство за гонење организиран криминал и корупција ја предало целата документација, со сите списи и докази за случајот „Пуч“ на Специјалното јавно обвинителство (СЈО). Разликата што се јавува околу доказите, велат оттаму, е поради класифицираните материјали за кои нема втор примерок, а единствените се предадени во Основниот суд Скопеј 1, соопшти денеска Јавното обвинителство.

„Основното јавно обвинителство за гонење организиран криминал и корупција ја има предадено севкупната документација со сите списи и докази за предметот познат во јавноста како „Пуч“ при преземањето на надлежноста од Јавното обвинителство за гонење кривични дела поврзани и што произлегуваат од содржината на незаконското следење на комуникациите. Разликата што се појавува во однос на доказите е во класифицираните материјали за кои не постои втор примерок, односно единствениот примерок од нив е предаден во Основниот суд Скопје 1 при поднесување на обвинението. Сакаме да нагласиме дека Основното јавно обвинителство за гонење организиран криминал и корупција ниту задржува, ниту поседува списи и докази за кој било предмет што не е во негова надлежност“, стои во соопштението на Обвинителството.

Оттаму истакнуваат дека ОЈО за гонење организиран криминал и корупција со истите докази, пред тие да бидат предадени на СЈО, го застапувало обвинението за предметот „Пуч“.

Рочиштето за „Пуч“ вчера по деветти пат беше одложено, на барање на специјалната јавна обвинителка Катица Јанева, бидејќи, како што рече, не се исполнети условите од страна на судот, кој одбива да достави до СЈО копии од списи и електорнски докази за случајот.

Вчера, Специјалното обвинителство преку соопштение посочи десетина институции кои ја опструираат работата и одбиваат соработка со СЈО. Меѓу посочените беа и ОЈО за гонење огранизиран криминал и корупција и Основниот суд Скопје 1.


Кривичниот суд одговори: Ние не сме фотокопирница за класифицирани списи


Скопје, 2 март, 2016 - 14:02 (META) 

Ниту судот одолговлекува, ниту избегнува, ниту бега да ја утврди правдата, основна уставна и законска обврска на судот е токму извршувањето на таа функција, а причините за досегашното одложување на оваа постапка се познати на јавноста, се вели во реакцијата на Кривичнот суд по одложувањето на денешното рочиште за случајот „Пуч“.

„Нејасна и тенденциозна е изјавата во јавноста дека судот е тој што ја опструира работата на Јавното обвинителство за гонење кривични дела поврзани и што произлегуваат од незаконското следење на комуникациите (СЈО), при што јавно се прозива Кривичниот суд како законски единствен стварно и месно надлежен суд дека не поседува сертификат за пристап до класифицирани информации наспроти странките, со што јавно се девалвира и се навредува улогата и позицијата на судот и на судиите во постапката, а со политички говор се издигнува улогата на СЈО“, стои во во соопштението од судот.

Оттаму велат дека во конкретната ситуација не е спорно дали некој има или нема сертификат да врши увид и да работи со списите во предметот, во кои има класифицирани информации, и додаваат дека за судот ова е расчистено прашање.

„На СЈО му е дозволен непречен увид во секое време во сите списи на предметот. Замената на тезите дека некој има сертификат или нема не содејствува со барањата на СЈО. Судот не може спротивно и со повреди на Законот за класифицирани информации да се претвори во фотокопирница и да копира класифицирани списи и докази затоа што нема такво овластување“, се вели во реакцијата.

Од Кривичниот суд, исто така, ги повикуваат обвинетите во „Пуч“ да не ја злоупотребуваат постапката за политички говори и за „директен напад и непочитување на институцијата суд и на овој начин да вршат притисок врз неговото работење“.

Денешото рочиште за „Пуч“ беше одложено на барање на специјалната јавна обвинителка, Катица Јанева, која образложи дека одложувањето не е по нивна вина, туку за тоа е одговорен судот, бидејќи не ги дава бараните копии од списи и електронски докази кои му се потребни на СЈО за да ги подготви воведните зборови за судењето.

Јанева побара на рочиштата во судот да биде присутен и сведокот, кој е оштетен во случајот „Пуч“, односно поранешниот премиер и актуелен претседател на ВМРО-ДПМНЕ, Никола Груевски.


Јанева напредува во истрагата и покрај отежнатата соработка со субјектите


Скопје, 25 декември, 2015 - 11:29 (META) 

Соработката со субјектите до кои се обраќа Специјалното обвинителство е отежната, но и покрај ваквата состојба предистражната постапка по предметите за кои е воспоставена надлженост е во тек и има извесен напредок, соопштија денеска од кабинетот на специјалната обвинителка Катица Јанева.

„Во изминатиот период, особен интерес беше изразен за нашето постапување по однос на бараните материјали од СДСМ. Повторно укажуваме дека ние очекуваме материјалите да ни бидат предадени и сите субјекти да почнат активно да соработуваат со ова јавно обвинителство. Појаснуваме дека соработката со субјектите до кои се обраќаме, без оглед за кого станува збор, е отежната и во оваа насока наш конкретен став за ваквата отежната соработка и мерките што ќе бидат преземени од наша страна, ќе биде соопштен на средината од јануари. Сепак, и покрај ваквата состојба на отежната соработка, Ве известуваме дека во тек се повеќе предистражни постапки по предметите за кои е воспоставена стварна надлежност и постои известен напредок, но во овој момент не сме во можност да соопштуваме детали, а сето во интерес на истрагата“, стои во соопштението на Специјалното обвинителство.

Оттаму апелираат „до сите субјекти да се воздржат од етикетирање на ова јавно обвинителство и негово ставање во функција на реализација на различни политички и други цели, бидејќи најважно во овој момент е спроведување независни и професионални истраги, во рамки на кои доследно ќе се почитуваат начелата на тајност на предистражната постапка, објективност и легалитет во постапувањето“.

Од кабинетот на Јанева, исто така, информираат дека во тек била постапката за добивање безбедносни сертификати за јавните обвинители, а на дел од нив веќе им биле издадени сертификати за работа со класифицирани информации со степен на класификација „државна тајна“.

Во меѓувреме, велат од Специјалното обвинителство, биле спроведени и тендерски постапки и во тек било изведувањето на градежните работи за адаптација на просториите каде треба да биде сместено ова обвинителство.