Нова Демократија води со 12,4 отсто пред владејачката Сириза


Атина, 27 јуни, 2018 - 16:59 (META) 

Најголемата опозициска партија во Грција, Нова Демократија на Кирјакос Мицотакис, го зголемува водството пред владејачката Сириза на Алексис Ципрас, покажала анкетата објавена од весникот „Прото Тема“, пренесува „Блумберг“.

26,4 отсто од испитаниците се определиле за Нова Демократија, а за во Сириза само 14 отсто.

Мнозинството на владејачката коалиција на Ципрас во парламентот се намали на само два пратеника предност во законодавниот дом со 300 пратеници, откако двајца пратеници на Независни Грци излегоа од коалицијата по потпишувањето на Договорот со Македонија.

Во Грција редовни парламентарни избори би требало да се одржат во септември следната години, но малото мнозинство носи ризик за предвремени избори.

Исто така, ниту еден грчки премиер по Костас Симитис, не издржал цел мандат, без да распише предвремени избори, потсетува „Блумберг“.


Мицотакис: НД не прифаќа македонска националност и македонски јазик


Атина, 6 јуни, 2018 - 9:47 (META) 

Уставни измени, отстранување на иредентизмот, заемно прифатливо име ерга омнес, без македонска националност и македонски јазик, се условите за решение на прашањето за името, според лидерот на грчката партија опозициска Нова демократија (НД), Кирјакос Мицотакис.

Говорејќи пред одговорните на секторите во партијата, Мицотакис рече дека договорот што нема да ги задоволува националните интереси, нема да биде прифатен од Нова демократија.

– Ние како партија цврсто остануваме на нашата позиција. Решението треба да биде едно, комплетно и да содржи три елементи: промена на Уставот на Скопје, отстранување на секаков иредентистички елемент, вклучувајќи ги и националноста и јазикот. Македонска националност и македонски јазик не можат да бидат прифатени. Едно име за севкупна употреба во и вон границите и име заемно прифатливо што нема да ги труе односите на двете држави, веќе следниот ден – рече Мицотакис, потенцирајќи дека оваа позиција е чесна, реална и патриотска и ја гарантира и обединетоста на Грците.

Претседателот на Нова демократија упати остри критики до грчката влада, велејќи дека а шефот на грчката дипломатија дека повеќе ги бранел македонските аргументи, отколку грчките интереси.

– Ципрас и понатаму е опасен за националните интереси и неговата влада не ја поседува потребната сериозност за да управува со критични национални прашања и ова треба да го сфати, не само Ципрас туку и Коѕијас, кој често пати изгледа како повеќе да ги брани аргументите на нашите соседи отколку интересите на земјата и го прави тоа, го стори тоа и вчера во телевизиското интервју – рече Мицотакис.

Според лидерот на најголемата грчка опозициска партија, Ципрас по секоја цена се обидува да постигне договор со нашата земја.


Мицотакис: Не е можно решение без соседите да го променат Уставот


Атина, 27 април, 2018 - 15:03 (META) 

Решение не може да постои без претходно соседната земја да го промени нејзиниот Устав и комплетно и неповратно да ги отстрани сите елементи на иредентизмот, рече Кирјакос Мицотакис, лидерот на најголемата грчка опозициска партија, говорејќи пред одговорните на различните сектори во Нова демократија.

Мицотакис смета дека начинот на кој владата управува со преговорите, предизвикува загриженост и уште еднаш го повтори неговиот став дека „нема да ги поделат Грците, за да ги обединат Скопјаните“.

– Особена загриженост предизвикува ситуацијата во скопското прашање. Таму каде што тајната дипломатија, со незнаење на никој, одеднаш донесе во прв план едно прашање, кое како што се чини, не беше зрело да се реши. И уште полошо, со скопското прашање, владата на крај успеа да ги обедини и да ги зајакне нашите соседи и се обиде да ги подели Грците – вели лидерот на опозициската Нова демократија.

Како што јави дописничката на МИА од Атина, Мицотакис упатил остри критики до владата на премиерот Алексис Ципрас дека е опасна за грчката надворешна политика.


Мицотакис го обвини Ципрас дека игра на картата на поделба


Атинa, 15 февруари, 2018 - 16:04 (META) 

Лидерот на опозициската Нова демократија, Кирјакос Мицотакис, го обвини грчкиот премиер Алексис Ципрас дека повторно игра на картата поделба, бидејќи сакал да направи поделба во опозицијата, но не му успеало, а истото сакал да го стори и со народот кога ги нарекол радикални десничари оние што учествувале во протестите.

Според него, грчката влада без план и без гаранции тргнала да даде сѐ, и вели дека за тоа доволни и биле само два симболични потези, преименувањето на автопатот и аеродромот.

Мицотакис вели дека Ципрас, наместо да создаде консензус и поддршка од опозициските партии, формирајќи една заедничка линија, одбрал прашањето за името да го искористи за партиски интереси.

Според него, преговарањето на Владата уште од почеток било погрешно.

– Дури и основните прашања за иредентизмот и промената на Уставот ги ставија во агендата по соодветните барања од Нова демократија. И до овој момент сѐ уште не е разјаснето дали овие промени навистина се неопходен предуслов за да продолжи било каков разговор за името, како што ние се залагаме – вели Мицотакис.


Мицотакис не му даде поддршка на Ципрас за прашањето за името


Атина, 27 јануари, 2018 - 13:39 (META) 

Претседателот на најголемата грчка опозициска партија Нова демократија, Кирјакос Мицотакис, по средбата со грчкиот премиер, Алексис Ципрас ја отфрли можноста да и даде поддршка на владата за формирање на поширок национален консензус за прашањето за името, јавува македонската државна новинска агенција МИА.

Мицотакис по средбата со Ципрас упатил критики за начинот на кој грчката влада управува со конкретното прашање. Тој изјавил дека биле направени отстапки без конкретни и неповратни добивки, а Ципрас, наместо да создаде силен национален фронт, на прво место ја ставил партијата.

– Начинот на кој се развиваат преговорите предизвикува сериозна загриженост. Многу сериозниот пропуст на господинот Ципрас, директно и јавно да го постави прашањето за промена на Уставот на соседната земја, како неопходен предуслов за да постојат какви било преговори, ја ослаби националната линија. Фрагментација на решението на поединечни прашања не може да биде прифатена, затоа што директно ги поткопува интересите на Грција – рекол Мицотакис.

Тој остро го критикувал Ципрас и затоа што пред да ги почне разговорите не ги информирал ниту политичките партии, ниту парламентот, ниту грчкиот народ.

– Прашањето со Скопје не е само едно прашање во надворешната политика. Се однесува на нашата национална свест, на нашата историја и на крај и на самиот идентитет на Грците. Го повторувам она што го кажав пред неколку дена – нема да ги поделиме Грците за да ги обединиме Скопјаните – нагласил Мицотакис.

Во реакцијата на изјавата на лидерот на Нова демократија, од кабинетот на Ципрас навеле оти било очекувано дека „Мицотакис ќе го избере полесниот пат на неодговорност“.


Мицотакис: Прво ќе барав промена на македонскиот Устав, а потоа ќе преговарав


Атина, 24 јануари, 2018 - 18:15 (META) 

Во други околности треба да се бара решение на спорот со името, вели лидерот на опозициската Нова демократија, Киријакос Мицотакис, кој пред политичкиот комитет на опозициската партија упати остри критики кон грчката Влада во однос на тоа како се однесува со прашањето за името.

Во присуство на поранешните премиери Костас Караманлис и Андонис Самарас, Мицотакис детално објаснил што ќе направел доколку во негови раце беа преговорите за името. Тој вели дека ќе ги информирал лидерите на политичките партии, како што било случај во 2008, ќе ги обединел силите, а не, како што вели, да ги подели сите, граѓаните, црквата, партиите, но и ќе побарал промена на македонскиот Устав.

-Преговорите ќе ги почнев од прашањата поврзани со иредентизмот и ќе чекав да видам опипливи чекори во однесувањето на другата страна, пред да поминам во следната фаза. Немаше да разговарам за ништо, ако Скопје прво не се обврзеше дека ќе го сменат нивниот Устав. И немаше да прифатам никакво споменување на македонска нација, како што направи господинот Нимиц, без да добие никаков одговор од владата. Ќе се потпрев на довербата на народот. И верувам дека така ќе можевме да стигнеме до заемно прифатливо решение – вели Мицотакис.

Лидерот на опозициската партија, рече дека за нив прашањето завршува тука, со што индиректно порача дека Нова демократија нема да учествува во никаков разговор за евентуалното решение што ќе се најде на маса. Кирјакос Мицотакис објасни дека нема да бидат соучесници во нешто што, „како што тргнал Ципрас има опасност да ја повреди душата на нацијата“.

– Вака како што е ситуацијата, решението, веројатно, треба да се бара во некои други околности со подобра подготовка и пред се, доколку другата страна има покажано во пракса дека бара вистинско решение, вистинско, а не фиктивно, кое ќе не одведе, како што сите сакаме во хармоничен соживот на двата народа – додаде Мицотакис.


Нова демократија води пред СИРИЗА во анкетите на јавното мислење


Атина, 7 април, 2017 - 11:07 (META) 

Мнозинството грчки граѓани сметаат дека десничарската партија Нова демократија би победила доколку утре се распишат избори во Грција. Ова го покажува новата анкета на јавното мислење спроведена за грчката телевизија „Екшн 24“ (Action 24). Според резултатите од анкетата, опозициската партија предничи 13,5 отсто пред владејачката СИРИЗА.

Подетално, според одговорите на анкетираните за предвидување на победникот на потенцијални избори, Нова демократија води со 32,5 отсто, додека СИРИЗА има поддршка од 19 отсто од анкетираните. На трето место, без поголеми промени, и понатаму се ултранационалистите од Златна зора со 7,5 отсто, а зад нив на четврто место е ПАСОК со поддршка од 7 отсто и на петто место е Комунистичката партија со 6 отсто.

Драстично опадната е поддршката на партијата Река, која има само 2 отсто поддршка, а со истиот процент е и коалицискиот партнер на СИРИЗА, Независни Грци. Според оваа анкета, овие две партии заедно со Унија на центристи најверојатно нема да влезат во следното собрание.

Кај грчкиот народ владее разочараност од политиката и од односот на СИРИЗА, поради што само 18 отсто од испитаниците сметаат дека ако утре се распишат избори, на нив повторно ќе победи владејачката левичарска партија на Алексис Ципрас.

Користејќи ги ваквите резултати од анкетите во Грција, лидерот на Нова демократија, Кирјакос Мицотакис, изминатиов период одржува состаноци со лидерите на опозициските партии во обид да го испита расположението за можно издејствување предвремени избори.


Жестока контра Мицотакис – Каменос околу спорот за името


Атина, 30 март, 2016 - 10:40 (META) 

Спорот за името се најде како една од главните теми во препукувањата меѓу грчката влада и опозицијата во вчерашната жестока парламентарна расправија во грчкото Собрание.

Опозициските Нова Демократија и ПАСОК отворено побараа од Ципрас да си даде оставка и да распише избори. Одговорот на грчкиот премиер беше дека избори ќе има регуларно, откако ќе помине четиригодишниот мандат.

– Да си одите, дајте си оставка бидејќи не сте способни да го понесете товарот за владеење со државата. Ако се осмелувате – распишете избори – остро побара Кирјакос Мицотакис.

Она што ги разгоре страстите во Собранието беше изјавата на лидерот на Независни Грци, Панос Каменос со која индиректно го погази својот претходен став и барање за оставка на министерот за миграција, Јанис Музалас. Иако Каменос по интервјуто на Музалас во кое министерот ја нарече нашата држава Македонија со свои изјави и интервјуа бараше негова оставка, во парламентот сепак призна дека Музалас направил само јазична грешка.

– Кога изразив несогласување со тоа што Музалас направи еден лапсус, веднаш поднесов оставка и до Независни Грци и до премиерот. Ако вие (Нова демократија н.з.) имате толку сила, поднесете предлог за гласање недоверба на Музалас – изјави Каменос.

Ципрас на ова одговори со нов напад, критикувајќи го Мицотакис дека само што дошол на чело на партијата го вратил на позиција пратеникот Никос Георгиадис, кој во 2005 бил исклучен од Нова демократија поради тоа што спорот за името го нарекол „глупост“ поради која се губи време посочувајќи дека Грција и грчките политичари не можат да одлучуваат како ќе се вика соседна држава колку и да не им се допаѓа тоа.

– Не ја знаевте таа изјава или пак таа го следи примерот на ставот дека спорот за Македонија ќе се заборави за 10 години – праша Каменос.


Мицотакис, а не Ципрас, е новиот миленик на грчките медиуми


Атина, 14 јануари, 2016 - 13:30 (META) 

Новиот лидер на десничарската Нова демократија, Кирјакос Мицотакис, полека почнува да го гради својот имиџ како нова политичка ѕвезда на грчката сцена. Мнозинството од грчките медиуми го следат секој негов чекор за реформирање на партијата, претставувајќи го како новиот политички лидер кој може да внесе сериозност и стабилност не само во Нова демократија, туку и во државата како потенцијален премиер.

Тој е син на поранешниот грчки премиер Констатинос Мицотакис и брат на Дора Бакојани, поранешната шефица на грчката дипломатија.

Она што пред само една година беше Алексис Ципрас, светлата политичка ѕвезда, Робин Худ кој можеше да му помогне на народот и да им се спротивстави на острите европски политичари, сега полека станува Мицотакис.

Сите медиумски светла се завртени кон него и кон неговите одлуки како човекот кој е анти-Ципрас и би можел да биде сериозна политичка алтернатива за премиер.

Доаѓањето на Мицотакис како млад, проевропски ориентиран политичар, со свежи идеи и со волја за реформи, се смета дека ќе ја врати Нова демократија како стабилен политички столб на грчката политичка сцена, односно ќе помогне да се врати довербата на грчките гласачи во најголемата десничарска партија во земјата.

Она што е, исто така, интересно како забелешка е дека неговото присуство може да помогне дел од гласачите кои се во политичкиот центар и се ориентираа кон ПАСОК или Река, повторно да размислат да се вратат во Нова демократија, која Мицотакис се очекува да ја направи силна центро-десничарска сила, напуштајќи ги старите популистички методи и идеологија. Мицотакис, се чини, ја има и европската поддршка, според одекот на неговиот избор во европските медиуми, одземајќи му ја и таму популарноста на Ципрас, кого европските медиуми изминатите две години го покажуваа како нова европска политичка ѕвезда, поддршка што спласна по неговиот политички неуспех во преговорите со европските кредитори минатото лето.

Она што го прави Мицотакис добар избор и за европските кредитори е неговата отвореност кон нови реформи и политичката конзистентност. За разлика од Андонис Самарас, тој никогаш не се противеше на мерките за штедење, а истовремено и се одлучи да го поддржи новиот пакет мерки што го договори Ципрас со европските кредитори за да не дојде до грчки излез од еврозоната. Засега, сепак, сè уште е неизвесно дали европските кредитори би сакале да видат промена на политичката сцена или, пак, би биле посреќни доколку остане владата на Ципрас да ги заврши договорените обврски и да го спроведе договорот.

Мицотакис, во секој случај, веќе активно и агресивно работи на внатрешни промени и на реформи во партијата за да креира силно јадро на соработници околу себе, да ја обедини партијата и да може потоа силно да настапи како потенцијален нов премиер. Тој веќе почна со промени на клучните позиции во партијата, во обид да се реформира начинот на работа на најголемата опозициска политичка сила во Грција.


Семејството Мицотакис се врати на тронот на Нова демократија


Атина, 11 јануари, 2016 - 9:31 (META) 

Кирјакос Мицотакис е новиот лидер на најголемата грчка десничарска партија Нова демократија. Мицотакис изненади и освои 51 отсто од гласовите на десничарските симпатизери наспроти неговиот опонент Евангелос Меимаракис, кој според медиумите беше поголем фаворит за лидер на партијата.

Од Кирјакос Мицотакис, синот на екс-премиерот и лидер на Нова демократија, Константинос Мицотакис и брат на екс шефицата на дипломатијата Дора Бакојани, десничарите очекуваат големи работи.

Се очекува да се врати единството и силата на партијата, да се заврти нов лист, нови реформи кои ќе покажат едно новo лице и посилна политичка идеологија, која би ја го вратила политичкиот сјај и довербата на партијата кај народот.

Со тој план, Мицотакис денеска ја презема палката над партијата. Во изјавата по победата најави нов ден за партијата, почнување политика која ќе ги обедини не само десничарите туку сите граѓани на Грција, политика која ќе ја направи партијата најголема центро-десничарска сила во државата, политика која ќе се води по вредности како искреноста, ефикасност, доследност и трудољубивост.

Јасно ја потенцираше целта за која ќе работи партијата односно ставање крај на политиката на владата на Алексис Ципрас, која ја нарече неспособна.

– Нашата цел е една, Нова демократија јасно да ги претстави сите сили во Грција кои се противат на популизмот на една неспособна влада. Граѓаните ми дадоа јасна наредба, обединети да продолжиме кон креативното возобновување на партијата и нејзино проширување со цел Нова демократија да стане голема центро-десничарска партија. Партија која ќе даде алтернативно решение за владеење со државата – истакна Мицотакис.

Изборот на Мицотакис изненади и ако се земе предвид неговиот личен багаж наречен семејство Мицотакис, политички клан кој е обвиен со скандали, недоверба од народот и политичка клетва да не се врати високо на политичката сцена.

Граѓаните кои постојано потенцираат дека бараат нови лица и се заморени од старите политичари врзани со политички и корупциски скандали, со него го враќаат на сцена историското политичко семејство Мицотакис. Меѓутоа, Кирјакос веќе неколку години наназад се обиде да ги раскине врските со семејството и да се претстави како ново лице во партијата кое има свежи идеи и може да направи политички реформи и промени.

Мицотакис останува запаметен и по својот гест да се откаже од своите пратенички привилегии за автомобил и прифаќање бонуси за пратениците за учество во собранички групи, а потоа и со предлагање да се укинат сите дополнителни финансиски привилегии на пратениците, пратеничката пензија, автомобилите и правото на пратенички имунитет.

Мицотакис има студирано на „Харвард“ и „Стенфорд“, а зборува англиски, француски и германски. На политичката сцена е активен од 2004 кога прв пат е избран за пратеник во грчкото Собрание.