!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Киднапирале 11-годишно девојче од Чичино Село и го терале да питачи


Скопје, 30 септември, 2017 - 13:45 (META) 

Девојче на возраст од 11 години било киднапирано во понеделникот од три лица, кои пет дена потоа го терале да питачи во Скопје, соопшти МВР. Случајот во полиција го пријавила 27-годишната мајка на девојчето дури откако девојчето било вратено во нивниот дом во Чичино Село вчера.

Како што соопшти СВР Скопје, девојчето во понеделникот на последната автобуска постојка во селото Сарај било пресретнато од три лица кои биле со возило. Девојчето се познавало со еден од нив. Киднаперите со сила го внеле девојчето во возилото и потоа го носеле на различни места во Скопје и го терале да питачи.

Вчера додека девојчето питачело пред трговскиот центар „Веро Џамбо“, во еден момент го здогледало татко си и се стрчало кон него, а еден од киднаперите што бил таму, избегал.

Полицијата информира дека во врска со случајот е приведен Ќ.К.(60), како и дека се преземаат мерки за целосно расчистување на случајот.


Киднапирано девојче во Шуто Оризари


Скопје, 1 август, 2017 - 15:11 (META) 

Малолетно девојче вчера ноќта било киднапирано на улица во скопската населба Шуто Оризари, извести СВР Скопје.

Девојчето вчера, околу 3 часот, со својата малолетна сестра, отишло во продавница и при враќањето дома, на улицата Патрис Лумумба, до нив застанал автомобил од кој излегле две лица кои се познавале со девојчињата. Потоа едното од лицата насила го внел девојчето во автомобилот, по што заминале.

Случајот во полиција вчера околу 19 часот го пријавил 44-годишен татко на киднапираната. СВР Скопје вели дека се работи на расчистување на случајот.


Скопјанка насилно внесена во возило, успеала да побегне во Пинтија


Скопје, 25 јуни, 2017 - 13:34 (META) 

Скопјанката М.С. (41) ноќеска побарала помош од МВР тврдејќи дека била грабната од непознат маж.

МВР денеска извести дека додека М.С. била во дневната соба, забележала непознат маж како стои на балконот од нејзината куќа.

Кога излегла да види кој е, тој ја фатил за коса, насилно ја одвлечкал и ја внел во патничко возило и тргнал кон манастирот „Св. Еремија“ во населбата Пинтија.

Кога возилото застанало, М.С. успеала да ги отклучи вратите и да избега.


Двајца претставници на ОН киднапирани во Конго


Бразавил, 13 март, 2017 - 19:48 (META) 

Непознати напаѓачи во Конго киднапирале двајца претставници на Обединети нации – државјани на САД и на Шведска, соопшти владата на Конго.

Како што се наведува во соопштението, Американецот Мајкл Шарп и Швеѓанката Заида Каталан „паднале во рацете на сили кои уште не се идентификувани“, заедно со уште четворица граѓани на Конго со кои биле во селото Нгомбе, во провинцијата Касаи.

Во соопштението не се наведува кога се случил инцидентот.

Министерот за информирање на Конго, Ламберт Менде, наведе дека надлежните служби, заедно со мисијата на ОН, работат на ослободување на киднапираните.


Исламска држава киднапираше војници и семејства, можно е да се искористат како жив штит


Женева, 8 ноември, 2016 - 14:18 (META) 

Борците на терористичката организација Исламска држава киднапирале 295 поранешни припадници на ирачките безбедносни сили и присилиле околу 1.500 семејства да се повлечат со нив од ирачкиот град Хамам Ал Алил, информираат од Обединети нации. Киднапирањето се случило минатата седмица откако ирачките државни безбедносни сили, курдските борци и шиитската милиција, поддржани од американските воздушни сили, извршија напад врз Мосул за да го ослободат од Исламска држава.

– Киднапираните лица се присилно иселени, а веројатно е дел од нив понатаму да бидат искористени како жив штит, а дел да бидат убиени, зависно од нивната припадност – изјави портпаролката на комесарот за човекови права на ОН, Равина Шамдасани.

Според информациите на Шамдасани, околу 100 поранешни ирачки офицери се киднапирани околу полноќ на 3 ноември, на дваесетина километри западно од Мосул, а 195 се киднапирани од 1 до 4 ноември од селата во провинцијата Тал Афар. Киднапираните семејства, пак, биле однесени на аеродромот во Мосул. Портпаролката Шамдасани изјави дека судбината на киднапираните е неизвесна.

ОН имаат информации дека на 2 и 3 ноември најмалку 30 шеици биле, исто така, киднапирани и однесени на непозната локација, а се претпоставува дека 18 од нив се веќе убиени, изјави портпаролката Шамдасани.


Се обиделе да киднапираат девојка


Тетово, 6 ноември, 2016 - 12:24 (META) 

Дваесет и осум годишен гостиварец синоќа, околу 23.40 часот, пријавил дека С. Д. од тетовското село Жеровјане ја киднапирал 23-годишната А.А.

Насилникот, заедно со друг маж кој возел патничко моторно возило, под закана дека наводно има пиштол, ја извлекол девојката од возилото „опел астра“ во кое таа била со гостиварецет.

С.Д. влегол во возилото, ја удрил жената по лице, заканувајќи ѝ се дека ќе ја однесе во шумата.

Во 23.50 часот, во село Чајле, од страна на патрола од полициски службеници биле пронајдени насилникот и девојката. С.Д. е приведен и задржан во полиција, информира МВР.


Грчки државјанин бара помош да биде ослободен од заложништво во Јемен


Атина, 7 октомври, 2016 - 13:15 (META) 

Грчки државјанин бара помош од грчката влада и тврди дека е киднапиран и оти го држат како заложник во Јемен. Педесет и шестгодишниот Себоглу Адрианос преку видеоснимка, која пред неколку недели е закачена на видеосервисот „Јутуб“, апелира за помош објаснувајќи дека бил уапсен во декември и веќе 10 месеци го држат како заложник во Јемен.

– Веќе 10 месеци никој не ми помага. Ја молам грчката влада да ми помогне, сакам да се вратам во Грција кај моето семејство – вели човекот во видеоснимката, која е направена на 14 септември годинава.

Себоглу моли за помош и од грчките власти, од Саудиска Арабија и од претседателот на Јемен, објаснувајќи дека има проблеми со срце и не може веќе да издржи во ситуацијата.
Случајот, според информациите во Грција, го истражуваат грчкото министерство за надворешни работи и министерството за цивилна заштита. Педесет и шестгодишниот човек, според сведоштвото на неговите роднини за „Катимерини“, последните две години работел во компанија во Аден, во Јемен, а претходно имал своја фирма специјализирана за конструкција на бродови во Пиреја во Атина. Како што тврдат од семејството на човекот, од декември 2015 година му се губи секаква трага.
Исчезнувањето веднаш било пријавено во грчката полиција, но засега нема никаков исход од истрагата за него. Нејасни се и мотивите за неговото киднапирање, а нема информации ни кој би можел да стои зад целиот случај.

Според информациите, киднаперите немаат побарано откуп од семејството, туку од фирмата во која работи човекот во Јемен. Како што забележува „Катимерини“, семејството на киднапираниот, освен во грчката полиција, случајот го има пријавено и во амбасадата на Саудиска Арабија.


Исламистите на Боко харам убиле 10 и киднапирале 13 лица


Абуџа, 22 август, 2016 - 10:49 (META) 

Нигериската исламистичка група Боко харам во саботата убила 10 и киднапирала 13 лица во селото Кубриву во близина на Чибока, каде милитантите од 2014 година држат повеќе од 200 ученици, соопштија синоќа селаните.

Очевидците велат дека борците на Боко харам во саботата навечер  дошле во селото и почнале да пукаат по селаните кои спиеле, да ги пљачкаат и да ги палат нивните куќи, по што побегнале со 13 жени и деца.

– Борците на Боко харам дојдоа на четири мотоцикли, по тројца на еден, и почнаа да пукаат во куќите во кои луѓето спиеја. Запалија сè откако ги зедоа резервите со храна и стоката и киднапираа жени и деца – рече Лука Дамина, жител на соседното село.


Киднапиран малезиски нафтен танкер


Куала Лумпур, 17 август, 2016 - 12:06 (META) 

Малезиски нафтен танкер со 900.000 литри дизел е киднапиран и пренесен во индонезиските води, соопштија денеска малезиските власти.

Танкерот „Вијер Хармони“, пловел од пристаништето „Тањунг Пелепас“ во Малезија кога бил киднапиран.

Малезиската агенција за поморска безбедност соопшти дека бродот веројатно сега се наоѓа кај индонезискиот остров Батам.

Се уште не е познат идентитетот на киднаперите, а се проценува дека вредноста на товарот на бродот изнесува околу 400.000 долари.

 


Талибанци киднапирале десетици патници


Кабул, 21 јуни, 2016 - 15:36 (META) 

Авганистанските талибанци денеска пресретнале конвој автобуси и автомобили и киднапирале 66 патници, соопштија авганистанските власти.

Талибанците подоцна соопштија дека задржале 27 лица, а другите ги ослободиле.

Нападот се случил во провинцијата Хелманд.

Претставникот на провинцијата, Абдул Гафур Тохи, изјави дека талибанците запреле два автобуса и уште околу 15 други возила, ги претресле, што би значело дека барале некого или нешто.

Автобусите со цивили или лица за кои се верува дека работат за авганистанските власти, се честа мета на талибанците.