!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Деветмина повредени во верижна сообраќајка на патот Гостивар – Кичево


Гостивар, 10 декември, 2017 - 12:41 (META) 

Во верижен судир на три возила што се случил вчера на патот Гостивар – Кичево во близина на отворените сепарации над Гостивар, биле повредени девет лица, информираше СВР Гостивар.

Трите автомобили – голф, лупо и киа, биле со гостиварски регистарски таблички. Судирот се случил околу 17.30 часот, а во него тешки телесни повреди задобил возачот на автомобилот „фолксваген лупо“, 58-годишниот гостиварец З.М. Возачот на автомобилот „киа“, 59-годишниот Т.А., исто така гостиварец, и седум сопатници од трите автомобили се пренесени во Општа болница Гостивар со телесни повреди, од каде по укажаната лекарска помош биле пуштени на домашно лекување.

Полицијата извршила увид и според првичните информации причина за несреќата е недржење растојание.


Завршен проектот за пруга од Кичево до Албанија


Скопје, 29 ноември, 2017 - 17:39 (META) 

Изработена е проектна документација за изградба на железничка линија Кичево – границата со Република Албанија, извести Министерството за транспорт и врски.

За овој проект утре на настанот што ќе се одржи во 9.30 часот во ЕУ-инфоцентарот во Скопје, ќе зборува и министерот за транспорт и врски, Горан Сугарески.


Ахмети објави победа во Тетово, Струга, Кичево, Чаир и во Сарај


Скопје, 29 октомври, 2017 - 21:56 (META) 

Претседателот на ДУИ, Али Ахмети, вечерва објави победа на кандидатите за градоначалници од неговата партија во клучните општини со големо албанско мнозинство, како Тетово, Чаир, Струга, Сарај, Дебар, Липково, Долнени, Теарце и Кичево.

– Тука сум да ја потврдам веста за големата победа на ДУИ во Тетово, Струга, Чаир, Дебар, Сарај, Липково, Долнени, Теарце и во Кичево – соопшти Ахмети.

На плоштадот Скендербег во Скопје вечерва почна прослава на победата на Висар Ганиу во општина Чаир, а претходно во речиси целата населба Чаир се слушаа рафали од автоматски пушки и од пиштоли.


Ахмети: Дехари работел и ќе работи во интерес на сите кичевци


Кичево, 13 октомври, 2017 - 19:56 (META) 

На градскиот плоштад во Кичево, денеска лидерот на ДУИ, Али Ахмети, побара сите граѓани на општината од сите националности да гласаат за кандидатот за градоначалник и актуелен градоначалник од партијата, Фатмир Дехари, велејќи дека тој покажал дека умее да се грижи за сите. И самиот Дехари нагласи дека ќе биде добар градоначалник за сите.

– Ви ветувам дека и во наредните четири години, ако го добијам мандатот, ќе продолжиме со интензивна изградба, како во градот така и во руралните средини. Без никаква причина од некои партии беше изразена резерва кон мене како иден градоначалник и сметам дека такви поделби на народот во нашата општина не му се потребни – рече Дехари.

Првиот човек на ДУИ, Али Ахмети, во кратко обраќање истакна дека се негирани сите сомнежи во изминатите години дека градоначалник Албанец на чело на оваа општина ќе биде погубен за другите.

– Сè што беше добро за жителите на Кичево, но и за селата во општината во целост беше остварено, а така ќе биде и во наредниот четиригодишен мандат, кој очекуваме да го добие нашиот кандидат – рече Али Ахмети.


Искршени стаклата на штабот на ВМРО-ДПМНЕ во село Другово


Кичево, 10 октомври, 2017 - 12:51 (META) 

Непознато лице вчера во село Другово, Кичевско, ги искршило стаклата на изборниот штаб на ВМРО-ДПМНЕ, наведува МВР во полицискиот билтен.

„Во времето од полноќ до 16 часот, во село Другово– Кичево, непознат сторител со употреба на тврд предмет искршил две стакла од објектот кој се користи како штаб на политичка партија ВМРО-ДПМНЕ. Увид на местото на настанот е извршен и се преземаат мерки за пронаоѓање на сторителот“, информираат од МВР.

Вчера во полициското одделение во селото Мирковци независниот кандидат за градоначалник на општина Чучер-Сандево, Г.Ч.(40), пријавил дека кај раскрсницата кај Чардак забележал повеќе фотокопии од ливчиња расфрлани на улицата на кои пишувало „Потврда за казнена евиденција“ со негово име и презиме.

Кандидатот за градоначалник потврдата ја извадил кога ја поднесувал кандидатурата и ја доставил единствено кај претседателот на општинската комисија на Чучер-Сандево.

Полицијата фотокопии од потврдите пронашла и на автобуските постојки во селата Кучевиште, Бразда, Мирковци, Сандево и Бањани.


Заев: Правда во Македонија ќе има, да не се делиме по етничка основа


Кичево, 6 октомври, 2017 - 22:48 (META) 

На предизборниот митинг во Кичево, премиерот и претседател на СДСМ, Зоран Заев, вечерва најави подобри времиња и поубав живот за сите во земјава.

– Во декември лани сите сплотени одржавме лекција на цел свет. Соборивме режим со пенкало и со глас. Ние немаме предрасуди, шарени сме во коалицијата, нè има од сите етнички заедници затоа што оваа наша земја е на сите, заедничка – рече Заев и најави дека во иднина парите нема како досега да се трошат само во главниот град, туку ќе се распределуват низ целата земја.

Тој рече дека Владата за само неколку месеци заштедила 45 милиони евра од кои 8 во РЕК Битола, кои биле заштедени на име пониски услуги за тендери и дека овие пари ќе им бидат вратени на граѓаните во вид на поевтина електрична струја од 14 до 16 часот, која ќе ја компензира државата од овие заштеди, како и ослободување од радиодифузната такса, бидејќи граѓаните преку данокот го полнат буџетот.


Починал носителот на независна листа што беше застрелан во Кичево


Скопје, 5 октомври, 2017 - 11:02 (META) 

Носителот на независна листа на советници во Кичево, 40-годишниот Алит Абази, кој на 27 септември во центарот на Кичево беше застрелан, утрово починал на КАРИЛ во скопскиот Клинички центар.

Абази од ранувањето беше во критична состојба на интензивна нега, поради сериозни повреди на абдоминалните органи и на ’рбетот.

Врз Алит Абази, како и Дестан Абдиу, шеф на неговиот изборен штаб, и Шабан Далипи, случаен минувач, пукаше 58-годишниот Абдула Абдули. Убиецот беше набргу приведен, а судија на претходна постапка му одреди притвор од 30 дена.

Министерот за внатрешни работи, Оливер Спасовски, вчера на прес-конференција го повтори тврдењето на полицијата дека нападот не е поврзан со изборната кампања.

Премиерот Зоран Заев синоќа на митингот во Општина Ѓорче Петров, осуди какво било насилство во изборниот процес и повика на воздржaност од активности кои би оставиле дамка на овие избори.


Само половина кампања, а цела серија инциденти, крв, насилства…


Скопје, 3 октомври, 2017 - 13:28 (META) 

Предизборната кампања за локалните избори е веќе на половина, а е силно обележана со насилство, крв, солзи, палки, куршуми и со демолирање изборни штабови.

Во најновиот случај, Елвис Бајрам, актуелниот градоначалник на општина Шуто Оризари, и Аднан Мемет, шеф на неговиот изборен штаб, вчера изеле ќотек во населбата Шуто Оризари. Според тоа што го кажаа, четири непознати лица физички го нападнале прво Мемет, а потоа и Бајрам. Насилниците побегнале, а екипа на брзата помош констатирала тешки повреди кај Бајрам. Веднаш бил однесен во скопската градска болница „8 Септември“, каде поради сериозноста на повредите бил хоспитализиран. Пратеникот Амди Бајрам тврди дека напаѓачите што го истепале син му Елвис се поврзани со кандидатот за градоначалник на оваа општина од редовите на СДСМ, Курто Дудуш.

Од другата страна, пак, сосема поинаква верзија – Курто Дудуш ги обвини Елвис Барјам и приврзаниците. Пратеникот од редовите на СДСМ вели дека тепачката, како што му пренеле, ја предизвикале Елвис Бајрам и неговите телохранители. Според него, Елвис и неговите придружници дошле и ги кинеле плакатите на Курто Дудуш залепени на штабот на СДСМ, сместен во дуќан на партиски симпатизер.

МВР вети дека ќе го истражи овој случај, како и претходните, но засега нема завршница за ниту еден.

Подолу е визуелизацијата на сите досегашни инциденти и подетално нивно објаснување.

  • Вчерашната тепачка беше продолжение на серијата инциденти од почетокот на изборната кампања, од кои сè уште најтежок е оној со тројцата ранети во Кичево на 27 септември. Носителот на независна листа на советници во Кичево, Алит Абази, бил застрелан во слабината, а Дестан Абдиу, кој учествувал во неговата кампања како шеф на изборниот штаб, и Шабан Далипи, кој било заедно со нив, се ранети во бутот, односно во потколеницата. Иако беше отфрлено мислењето дека станува збор за политички мотивиран инцидент, сепак останува фактот дека станува збор за учесници во кампањата.
  • Таа, пак, почна со многу оштетени штабови на политички партии, но и со излог на штаб измачкан со измет. На првиот ден од кампањата, 25 септември, бил искршен излог на штаб на ВМРО-ДПМНЕ во Кисела Вода, додека во Аеродром излог на изборен штаб на СДСМ, како што информираат од партијата, бил измачкан со измет.
  • Еден ден подоцна, односно ноќта меѓу 26 и 27 септември, непознати сторители насилно влегле во штабот на Демократската партија на Србите во Македонија на булеварот Кочо Рацин во Скопје. Откако претходно ги искршиле катанците со кои била обезбедена влезната врата, влегле и претурале низ канцеларијата. Иван Стоиљковиќ, претседателот на партијата, вели дека се работи за обид за политички притисок и за застрашување на членството.
  • Речиси во истото време, во населбата Расадник во општина Бутел, бил искршен месниот штаб на СДСМ Бутел. Непознати сторители ги искршиле прозорците и влезната врата на штабот, ги искинале постерите и ја оштетиле светлечката реклама.
  • Во петокот, на 29 септември, кандидатот за градоначалник од ВМРО-ДПМНЕ за Македонска Каменица, Дарко Митевски, го обвини противкандидатот од СДСМ и од коалицијата за искинати плакати во селата, кои потоа биле фрлени пред неговиот дом. Исто така, во петокот било пријавено дека е искршен излог на изборен штаб на ВМРО-ДПМНЕ на улицата Моша Пијаде во Кавадарци.
  • Ноќта меѓу саботата и неделата, на 1 октомври, биле искршени две стакла на излогот на изборниот штаб на Беса на улицата Тале Христов, во скопската населба Скопје Север и биле искинати шест плакати.
  • Вчера, пак, на 2 октомври, ВМРО-ДПМНЕ информираше дека е искршен партискиот изборен штаб во Битола. Според нив, искршениот штаб е доказ за нервозата на СДСМ од поразот на претстојните локални избори.
  • Вчера, засега непознат сторител ги скршил стаклото од излогот и стаклото од влезната врата на изборен штаб на СДСМ во скопското село Инџиково. Според полицијата, се работи на откривање на сторителите.
  • Утрово избувнал и пожар во пекарницата „Кендо“ во населбата Ѓорче Петров. Допрва ќе се утврдуваат причините за пожарот. Тоа што е интересно е дека пекарницата и куќата во која е таа се на Владо Мисајловски, поранешниот министер за транспорт и врски и кандидат на ВМРО-ДПМНЕ за градоначалник на општина Ѓорче Петров.

Жена загинала во сообраќајка на патот Гостивар – Кичево


Кичево, 29 септември, 2017 - 13:51 (META) 

Во сообраќајка што утрово се случила на патот Гостивар – Кичево, во близина на селото Трапчин Дол, животот го загубила 54-годишна жена од струшкото село Октиси.

Како што соопшти полицијата, несреќата се случила во 7.40 часот, кога автомобил „форд мондео“ со италијански регистарски таблички, управуван од И.И.(54), излетал од патот и удрил во бетонски мост.

Од повредите починала И.И. (54) од селото Октиси, Струшко, додека возачот И.И. и А.И. (33), двајцата од истото село, се пренесени во Ургентниот центар во Скопје.


Обвинителство ќе бара притвор за напаѓачот во Кичево кој рани носител на советничка листа


Кичево, 28 септември, 2017 - 10:39 (META) 

Надлежен обвинител од Основното јавно обвинителство Гостивар извршил увид во центарот на Кичево, на местото каде што синоќа во вооружен инцидент ранети беа три лица, меѓу кои и носителот на независна листа за советници во општината, Алит Абази.

„Според првичните сознанија, до инцидентот дошло кога лицето А.А. од зад грб истрелало неколку куршуми од пиштол кон А.А. и А.Д. При нападот, лесни телесни повреди во пределот на потколеница добил и случаен минувач. Поради сериозноста на повредите, А.А и А.Д се пренесени на лекување во скопските клиники. Во текот на денешниот ден Основното јавно обвинителство – Гостивар до судија на претходна постапка при Основниот суд – Гостивар ќе достави предлог за определување притвор за сторителот“, информираат од ОЈО.

Полицијата вчера го приведе А.А. (58), кај кој пронајден е и одземен пиштол марка „сиг сауер“, калибар 9 милиметри.

Четириесетгодишниот Абази бил застрелан во слабината, додека Дестан Абдиу, кој учествувал во неговата кампања како шеф на изборниот штаб, и Шабан Далипи, кој било заедно со нив, се ранети во бутот, односно во потколеницата. Абази и Абдиу биле пренесени на скопските клиники, а Далипи бил префрлен во кичевската болница.

Инцидентот се случил на булеварот Ослободување во Кичево, околу 18.50 часот. Според првичните информации, се претпоставува дека нападот врз кандидатот за советник и врз другите две лица не е со политичка заднина, туку дека Абази и напаѓачот имале недоразбирања од претходно и воделе судска постапка.