!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Катар ги укина визите за Македонија – од денеска може да се престојува и до 30 дена


Доха, 9 август, 2017 - 16:18 (META) 

Катар денеска соопшти дека ги укинува визите за државјаните на 80 земји, меѓу кои и Македонија, за да ги стимулира туризмот и авиосообраќајот. Одлуката веднаш стапува на сила.

Одлуката доаѓа неполн месец отако  македонскиот министер за транспорт и врски, Горан Сугаревски, соопшти дека Македонија е ставена на листата на земји со олеснат визен режим.

Од денеска на граѓаните на Македонија, како и на државјаните на другите 79 земји на кои Катар им одобри безвизен режим, ќе им биде потребен само пасош за да влезат во оваа емиратска држава. Граѓаните на 33 држави ќе можат да останат во Катар 180 дена без виза, додека на другите 47, вклучувајќи ја и Македонија, имаат право на престој од 30 дена и право за едно продолжување на престојот.

84c7231cd788cda5c30ce6ff760a82064dd33157На списокот се земјите членки на шенгенската зона, латиноамерикански и азиски земји. Либан е единствената арапска земја што се наоѓа во Заливот, а не е на списокот.

– Укинувањето на визите ќе го направи Катар поотворен за странци – рече претставник на министерството за туризам на Катар.

Мохамед Рашид ал-Мазруи од катарското Министерство за внатрешни работи рече дека при изборот на државите се воделе од критериумите за безбедност и за економска моќ.

Катар, за разлика од Дубаи, која располага со огромни трговски центри и одморалишта, не е познат како примарна туристичка дестинација.

Во изминатите два месеци, оваа земја се најде на црната листа на земјите од Персискиот Залив кои ја обвинија официјална Доха за поддржување тероризам. По ваквите обвинувања, земјите од регионот, освен Иран, ги прекинаа дипломатските односи со Катар и го затворија својот воздушен простор за авионите регистрирани во оваа заливска земја.


Ердоган: Никому не му е во интерес продолжувањето на катарската криза


Истанбул, 23 јули, 2017 - 12:50 (META) 

Турскиот претседател, Реџеп Таип Ердоган, во Истанбул изјави дека „никому не му е во интерес“ да продолжи кризата во Персискиот Залив.

Говорејќи пред почетокот на неговата дводневна поста на Катар и на Саудиска Арабија по повод дипломатската криза во регионот, Ердоган истакна дека веќе никој нема каков било интерес за пролонгирање на кризата.

Претседателот на Турција ги обвини „непријателите“ дека се обидуваат да ги „зајакнат тензиите помеѓу браќата“.

Саудиска Арабија, Обединетите Арапски Емирати, Бахреин и Египет на 5 јуни ги прекинаа дипломатските односи со Катар обвинувајќи ја земјата дека поддржува тероризам и дека е поврзана со Иран кој е регионален ривал на Саудиска Арабија.

Катар ги отфрли обвинувањата.

Ердоган денеска и утре ќе ги посети Катар и Саудиска Арабија, а медиумите пренесуваат дека тој ќе го посети и Кувајт, кој е главен посредник во решавањето на дипломатската криза во тој регион.


Од денеска ќе има редовни летови помеѓу Скопје и Доха


Скопје, 17 јули, 2017 - 11:03 (META) 

Од денеска ќе се воспостави редовна авиолинија помеѓу Скопје и Доха, а на скопскиот аеродром „Александар Велики“ се очекуваат да пристигнат првите патници од Доха, информираат од „ТАВ Македонија“.

Во петокот на скопскиот аеродром се промовираа уште три нови авиолинии и тоа до Малта, Рим и до Ваксјо.

Во првите шест месеци од годинава забележан е пораст од шест отсто на бројот на патници споредено со истиот период минатата година, или на двата македонски аееродрома, скопскиот „Александар Велики“ и охридскиот „Св. Апостол Павле“, од јануари до јуни поминале вкупно 860.130 патници.


Египет, Саудиска Арабија, УАЕ и Бахреин одлучуваат за судбината на Катар


Каиро, 5 јули, 2017 - 18:57 (META) 

Министрите за надворешни работи на Египет, Саудиска Арабија, Обединетите Арапски Емирати и на Бахреин во Каиро имаат состанок за катарската криза.

На состанокот ќе разговараат за реакцијата на Катар на 13 барања што четирите заливски држави ѝ ги доставија на Доха.

Саудиска Арабија. Обединетите Арапски Емирати, Бахреин и Египет на 5 јуни објавија дека ги прекинуваат односите со Катар, а потоа на таа земја ѝ поставија листа од 13 барања.

Овие земји ја обвинуваат Доха за поддржување екстремизам и за блиски односи со Иран, обвинувања кои Катар ги негира.

Откако истече рокот од 10 дена, овие земји му го продолжија рокот на Катар за уште 48 часа за да ги исполни нивните барања, по барање на Кувајт кој дејствува како посредник во кризата.

Четирите заливски земји се заканија дека доколку Катар не ја исполни листата со барања, ќе ги зајакнат санкциите.

Катарскиот министер за надворешни работи, шеикот Мохамед бин Абдулрахман ал-Тани, вчера изјави дека невозможно е да се исполнат барањата на арапските земји и дека листата со барања е нереална и неспроведлива.


Катар ги отфрли барањата на арапските земји, оценувајќи ги како максималистички


Доха, 2 јули, 2017 - 13:29 (META) 

Катар ги отфли барањата на арапските земји, поставени како услов за деблокада на дипломатските односи, оценувајќи ги како максималистички и насочени против суверенитетот на земјата.

Списокот со барања, меѓу кои се и затворање на телевизијата „Ал Џезеира“, прекин на односите со Иран и затворање на турската воена база во Катар, ѝ беше доставен на Доха на 22 јуни, со рок за одговор од 10 дена, кој истекува вечерва.

„Барањата се така напишани за да бидат одбиени“, изјавил синоќа во Рим катарскиот министер за надворешни работи, Мохамед Абдурахман ал-Тани, пренесува балканскиот сервис на „Радио Слободна Европа“.

По неговата изјава, во печатените медиуми во Обединетите Арапски Емирати денеска се појавиле написи, со наслови „Катар го избра непознатото“ и „Катар се фрли во прегратките на Иран“.

Саудиска Арабија, Бахреин, Обединетите Арапски Емирати и Египет на 5 јуни оваа година ги прекинаа дипломатските односи со Катар, обвинувајќи ја Доха дека го поддржува тероризмот и дека е премногу блиска со Иран.

Катар ги отфрли ваквите наводи и соопшти дека никој нема право да ѝ диктира на земјата каква надворешна политика ќе води.

„Целиот свет е свесен дека целта на барањата е да се ограничи суверенитетот на Катар“, рекол шефот на катарската дипломатија.

Катар, во конкретниот случај, ја има поддршката на Иран и на Турција, додека од САД стигнуваат контрадикторни пораки. Американскиот претседател Доналд Трамп од Катар побара да прекине со финансирање на екстремистички движења, додека Стејд департментот повика на дијалог за решавање на кризата.

Досега како посредник во кризата дејствуваше Кувајт, а помош понудија и САД, Турција, Франција и Русија.


Путин разговарал со катарскиот емир за решавање на заливската криза


Москва, 1 јули, 2017 - 20:59 (META) 

Рускиот претседател Владимир Путин денеска разговарал со катарскиот емир, Тамим бин Хамад ал Тани, околу решавањето на дипломатската криза во односите на Катар со заливиските земји, соопшти Кремљ.

„Лидерите во текот на телефонскиот разговор долго зборуваа за кризата во односите на Катар со соседните земји. Путин го нагласи значењето на вложувањето дипломатски напори за решавање на кризата и за нормализација на ситуацијата“, било наведено во соопштението, јавуваат агенциите.

Кремљ претходно денеска соопшти дека Путин разговарал и со кралот на Бахреин, Хамад бин Иса ал Халиф, исто така за решавањето на заливската криза.

Саудиска Арабија, Египет, Обединетите Арапски Емирати и Бахреин го изолираа Катар и минатата недела поставија 13 барања кои земјата мора да ги исполни во рок од 10 дена доколку сака да бидат укинати дипломатските санкции воведени поради наводно финансирање на терористички групи.

Катар ги отфрли барањата, оценувајќи ги како неразумни. Русија оттогаш повикува на дијалог и ја нуди својата помош во решавањето на кризата.


Арапските земји испратија листа со барања до Катар, вклучувајќи и затворање на „Ал Џезеира“


Доха, 23 јуни, 2017 - 10:09 (META) 

Четирите арапски држави кои воведоа санкции кон Катар поради наводна поддршка на тероризмот, ѝ испратиле на Доха 13 барања, вклучувајќи и затворање на телевизијата „Ал Џезеира“ и намалување на врските со Иран, изјавил официјален претставник на една од четирите држави.

Листата со барањата, како што пренесуваат светските агенции, ја составиле Саудиска Арабија, Обединетите Арапски Емирати, Египет и Бахреин.

Од Катар се бара и затворање на турската воена база во оваа земја и испорачување на сите терористи од нејзина територија.

Четирите држави ѝ дале на Доха рок од десет дена да ги исполни барањата.

Листата на раководството на Катар ја предал претставник на Кувајт, земјата посредничка во спорот меѓу земјите во овој регион. Од Катар претходно ги демантираа наводите дека поддржуваат терористички групи.


Масовна тепачка меѓу арапски магнати пред кризата во Катар


Кувајт, 17 јуни, 2017 - 13:01 (META) 

Делегации од Катар и од Саудиска Арабија направиле тепачка на конференцијата на Унијата на работници од нафтената област што се одржуваше во Кувајт.

Видеоснимката ја објави ирачкиот политичар Валид ел Азави. Според него, инцидентот се случил на 20 март оваа година, на маргините на настанот. Саудиските нафтени претставници почнале да ги навредуваат своите катарски колеги, кои на крајот го загубиле трпението и се нафрлиле врз своите противници со тупаници.

Неколку земји од Блискиот Исток, вклучувајќи ги Саудиска Арабија, Египет и Обединетите Арапски Емирати, на почетокот на јуни ги прекинаа дипломатските односи со Катар, обвинувајќи ја земјата за поддржување на тероризмот.


Путин и Салман разговараа за катарската криза


Москва, 13 јуни, 2017 - 15:40 (META) 

Претседателот на Русија, Владимир Путин, и владарот на Саудиска Арабија, кралот Салман, телефонски разговарале за катарска криза, соопшти Кремљ.

„Дипломатскиот судири меѓу Катар и одредени арапски нации, вклучувајќи ја и Саудиска Арабија, не помагаат во напорите за пронаоѓање решение за ситуацијата во Сирија, ниту во борбата против тероризмот“, стои во соопштението на Кремљ.

Саудиска Арабија, Обединетите Арапски Емирати, Бахреин и Египет минатата недела ги прекинаа дипломатските односи со Катар, обвинувајќи ја таа држава за поддржување на исламистичките екстремисти и на Иран, нивниот долгогодишен непријател, додека официјална Доха ги отфрли обвинувањата како неосновани.


Ердоган одобри закон за распоредување на турски војници во Катар


Анкара, 9 јуни, 2017 - 11:57 (META) 

Претседателот на Турција, Реџеп Таип Ердоган денеска одобри закон со кој се овозможува распоредување турски сили во Катар, по што законот е објавен во Службен весник, јави Турската радио-телевизија.

Парламентот на Турција на 7 јуни во рамки на Спогодбата меѓу Турцијаа и Катар усвои нацрт закон кој овозможува распоредување на турски сили во Катар.

Инаку, спогодбата меѓу двете земји за распоредување турски сили на подрачјето на Катар е потпишана на 28 април 2016 година.

Целта на усвоениот закон е придонес кон модернизација на воените структури на Катар во рамки на меѓународното право и интензивирање на соработката во рамки на воената обука и образование.

Исто така, законот предвидува дополнителен развој на вооружените сили на Катар преку заеднички вежби, обуки и образование, како и зголемување на интероперативноста и координацијата на двете земји за придонес кон мирот во регионот и во светот. Во договорот се наведува дека главна цел на заедничките обуки и вежби е развивање на одбранбените можности на Катар