!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Ослободени шест од осум каталонски политичари


Барселона, 4 декември, 2017 - 18:13 (META) 

Шпанскиот Врховен суд одлучи да пушти на слобода шест од осум членови на поранешната каталонска влада, кои се сменети и уапсени по прогласувањето независност.

Судот, меѓутоа, го одби барањето за ослободување со кауција на поранешниот каталонски потпретседател Ориола Жункерас и регионалниот министер за внатрешни работи Жоаким Форна.

За шестeмина поранешни членови на каталонската влада кои беа притворени во рамките на истрагата за вмешаност и незаконско еднострано прогласување независност на 27 октомври, им е одредена кауција во износ од 100.000 евра.

Истовремено одлуката за испорачување на Шпанија на поранешниот каталонски претседател Карлес Пучдемон и четворица членови на неговата сменета влада, ќе биде донесена на 14 декември, седум дена пред регионалните избори во Каталонија.

Пучдемон и неговите министри одбиваат да се вратат во Шпанија каде што се обвинети за бунт и за злоупотреба на јавните фондови поради што би можеле да добијат повеќедецениска казна затвор.


Имало надворешно мешање во Каталонија, тврди шефот на шпанската дипломатија


Мадрид, 13 ноември, 2017 - 14:29 (META) 

Шефот на шпанската дипломатија, Алфонсо Дастис изјави дека ќе ги запознае колегите од ЕУ со наводното „кибернетичко мешање“ од Русија и други делови од светот.

Дастис рече дека податоците покажуваат дека имало „интернет сообраќај“ на медиумските мрежи во Русија и други земји после забранетиот референдум за независноста на Каталонија.

Говорејќи за неодамнешниот состанок во Лондон на основачот на „Викиликс“, Џулијан Асанж и еден висок претставник за независноста на Каталонија, Дастис рече дека постојат назнаки дека Асанж и други во текот на кризата во Каталонија се обиделе да се вмешаат и да манипулираат.

Шпанските претставници минатата недела соопштија дека назнаките не значат дека била вмешана власта на Русија.

Владата во Мадрид засега нема објавено докази за да ги поткрепат тврдењата за мешање во каталонската криза.


Пучдемон се жали дека го третираат како педофил и сериски убиец


Брисел, 11 ноември, 2017 - 11:30 (META) 

Сменетиот каталонски лидер, Карлес Пучдемон наведе дека откако е пуштен на условна слобода во Белгија, јавноста го третира како педофил.

Пучдемо во моментов се наоѓа во Брисел, каде замина откако Каталонија прогласи независност, а Мадрид ја смени каталонската влада. Тој и четворица министри, откако Шпанија распиша европска потерница им се предадоа на белгиските власти, а беа пуштени на условна слобода еден ден подоцна.
– Третиран сум како криминалец, педофил, сериски убиец… Тоа е малтретирање… Ова е користење на судовите за политички цели., Тоа е закана затоа што злосторството за кое сум обвинет може да ме стави зад решетки и до 30 години. Тоа е лудост. Тоа не е правда, туку одмазда – рече тој за „Скај њуз“.

Пучдемон вели дека не е бунтовник, туку дека е дисциплиниран и оти сака да го направи тоа што неговиот парламент го одобрил.

– Тоа е сосема нормално, нема ништо бунтовнички во тоа – додаде тој.


Европа да ги отфрли сепаратизмот и национализмот, порача Јункер од Шпанија


Саламанка, 9 ноември, 2017 - 19:16 (META) 

Претседателот на Европската комисија, Жан Клод Јункер денеска ја повика Европа да се спротивстави на сепаратизмот во време кога иницијативата за незaвисноста на Каталанија длабоко ја подели Шпанија, јавуваат светските агенции.

– Национализмот е отров кој ја спречува Европа да функционира обединето – рекол Јункер во својот говор на универзитетот во шпанскиот град Саламанка, каде денеска му била врачена награда.

Тој додал дека на ситуацијата „не може да се гледа со скрстени раце“ и дека е против „сепаратизмот која ја слабее Европа и дополнително ги проширува постоечките пукнатини“.

Шпанскиот премиер, Маријано Рахој, кој го придружувал Јункер во Саламанка, му се заблагодарил на претседателот на ЕК за поддршката во вакви тешки времиња.

– Јункер ги поддржува потезите на шпанската влада, нашиот устав и правосуден систем – изјавил Рахој.


Шпанија разгледува можност да им дозволи на регионите да организираат референдуми


Мадрид, 8 ноември, 2017 - 20:24 (META) 

Шпанија би можела да направи промени во уставот на земјата што ќе им овозможат на регионите да организираат референдуми за независност во иднина, вели шпанскиот министер за надворешни работи, Алфонсо Дастис за „Би-би-си“.

Тој додава дека за ова прашање би требало да се одржи референдум на национално ниво.

– Формиравме комитет во парламентот што ќе ја разгледа можноста да се направат уставни измени, што на подобар начин би ги изразиле аспирациите на каталонскиот народ. Свесни сме дека постои политичка ситуација која треба добро да се проанализира, но за оваа одлука треба да реши целиот шпански народ – изјави Дастис.

Ваквите најави доаѓаат по потезите на шпанската влада во Каталонија, каде регионалната влада беше распуштена токму поради одржување на референдум и еднострано прогласување на независност.

Инаку, денеска низ цела Каталонија се одржаа протести и штрајкови поради апсењето на претставници на поранешните каталонски власти.

Истовремено, денеска Уставниот суд на Шпанија ја прогласи за неуставна декларацијата за независност на Каталонија, што беше донесена на 27 октомври, по која шпанските власти ја распуштија регионалната влада и парламентот, воведоа директна управа и распишаа предвремени регионални избори на 21 декември.


Повеќе од 200 градоначалници од Каталонија протестираа во Брисел


Брисел, 7 ноември, 2017 - 20:39 (META) 

Околу 200 каталонски градоначалници денеска се собраа во Брисел за да му изразат поддршка на сменетиот претседател на овој шпански регион, Карлес Пучдемон, додека Мадрид бара негова екстрадиција.

Собирот на градоначалниците се одржа во таканаречениот европски кварт на Брисел, каде се сместени институциите на ЕУ, а во близина се собраа и стотина приврзаници за единствена Шпанија, кои носеа транспаренти на кои беше испишано „Не за каталонската независност“.

Осум сменети членови на каталонската влада се во затвор во Шпанија, еден е пушен со кауција, додека Пучдемон се подготвува да учествува на вонредните избори за каталонскиот парламент, кои Мадрид ги распиша за 21 декември.

– Бараме од Европа и молиме да нè сослуша, ние се чувствуваме како Европејци и тука сме во срцето на Европа за тоа да го кажеме – рече градоначалничката на Англес, Астрид Десед.

Пучдемон и четворица доскорешни каталонски министри доброволно им се предадоа на белгиските власти во неделата, а вчера беа пуштени на условна слобода. Тие не смеат да ја напуштаа Белгија и мора да останат на адресите на кои пријавиле дека престојуваат, но и да одговараат на сите судски и полициски повици.


Пучдемон и министрите се предале на белгиската полиција


Брисел, 5 ноември, 2017 - 14:29 (META) 

Според медиумите во Белгија, сменетиот претседател на каталонската влада, Карлес Пучдемон, ѝ се предал на полицијата. Освен Пучдемон, уапсени се и четворицата министри со кои тој пребега во Белгија, откако шпанските власти наредија апсење на неговиот кабинет.

Обвинителството во Брисел за денеска најави дополнителни информации за ектрадицијата на Пучдемон и на министрите во Шпанија.

По поранешниот каталонски лидер, властите во Мадрид распишаа европска потерница. Десет од поранешните министри во кабинетот на каталонската влада се во затвор, а еден е пуштен со кауција да се брани од слобода.


Бошњаците од Санџак бараат автономија од Србија


Белград, 4 ноември, 2017 - 11:50 (META) 

Претседателот на Бошњачкиот национален совет во Србија, Сулејман Угљанин, вчера побара од српските власти и од Европската Унија да се распишат „избори за формирање на територијална автономија на српската областа Санџак“, каде мнозинството од жителите се Бошњаци.

Угљанин, кој е и лидер на Партијата за демократска акција на Санџак (СДА), го темели барањето на резултатите од референдумот за автономија на Санџак од 1991 година, кој не е признат од страна на Белград.

Тој тврди дека Бошњаците се „туѓо тело во земја во која институциите се нарекуваат српска војска и српска полиција“ и дека државните органи кон бошњачкото малцинство се однесуваат непријателски и дискриминаторски.

Овие изјави на Угљанин, српскиот министер за одбрана Александар Вулин ги оцени како провокативни. Тој додаде дека претседателот на Бошњачкиот национален совет сака да предизвика „неред и немир“, затоа што му пречи мирот и законитоста во Србија.


Во Каталонија затворени 15.000 работни места


Барселона, 3 ноември, 2017 - 10:40 (META) 

Во Каталонија во октомври, во екот на политичката криза околу прогласувањето на независноста на овој регион, затворени се 15.000 работни места, соопшти шпанското Министерството за вработување и социјална безбедност.

Политичката несигурност во Каталонија принудила 1.000 компании да ги преселат своите централи во други делови на Шпанија, од страв дека во случај на независност би можеле да останат надвор од заедничкиот европски пазар.

Каталонија е на прво место според бројот на загубени работни места во споредба со другите шпански региони.

Според податоците од централната влада во Мадрид, минатиот месец 58.000 лица во Шпанија останале без работа. Шпанија во моментов има 3,4 милиони невработени, што е најнизок степен во последните осум години.


Шпанското обвинителство бара од судот да издаде европски налог за апсење на Пучдемон


Мадрид, 2 ноември, 2017 - 19:32 (META) 

Шпанското обвинителство денеска побарало од судот да издаде европски налог за апсење на разрешениот каталонски лидер, Карлес Пучдемон, и на уште четворица членови на неговата влада, откако не се појавија на сослушувањето во Мадрид, јавуваат светските медиуми.

Судот сè уште не донел одлука по барањето на обвинителството.

Пучдемон и 14 членови на каталонската влада беа разрешение на 27 октомври, откако еднострано прогласија независност на Каталонија.

Пучдемон од понеделникот оваа недела се наоѓа во Брисел, каде ангажираше адвокат. На прес-конфрененција завчера, тој изјави дека ќе се врати во Шпанија доколку добие гаранции од владата во Мадрид дека нема да биде гонет.

Судот во Мадрид денеска сослуша дел од членовите на разрешеното раководство на Каталонија.

Шпанското обвинителство побара притвор за каталонските лидери, додека трае истрагата за нивната улога во прогласувањето на независност на Каталонија.