!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Косовец приведен во кругот на касарната Илинден


Скопје, 14 ноември, 2017 - 17:15 (META) 

Педесет и осумгодишен косовски државјанин со иницијали Х.Р. вчера бил приведен во полициската станица Карпош, откако бил затекнат во кругот на касарната „Илинден“ во Скопје.

Косовецот, како што информираат од МВР, бил приведен под сомнение за „неовластено влегување во воени објекти и правење скици или цртежи на воени објекти и борбени средства“.

Од МВР додаваат дека по „целосно расветлување и документирање на случајот против лицето ќе биде поднесена соодветна пријава и ќе се преземат понатамошни дејствија“.

Инаку, на почетокот на октомври годинава, во кругот на касарната „Илинден“ беше уапсен 30-годишен британски дражјанин, исто така, поради сомневање за сторено кривично дело „неовластено влегување во воени објекти и правење скици или цртежи на воени објекти и борбени средства“.


Вежба на специјалните единици на МВР во касарната „Илинден“


Скопје, 21 октомври, 2017 - 10:55 (META) 

Припадниците на специјалните единици на Министерството за внатрешни работи денеска во касарната „Илинден“ во Скопје ќе изведат вежба насловена „ВИП 2017“.

На вежбата ќе учествуваат Единицата за специјални задачи и Одделот за заштита на определни личности и објекти, информираат од МВР.


Британски државјанин уапсен кај касарната „Илинден“ поради сомнеж дека шпионирал


Скопје, 10 октомври, 2017 - 12:41 (META) 

Триесетгодишен британски државјанин вчера попладне бил уапсен од полицијата откако бил забележан како неовластено се движи во кругот на касарната „Илинден“ во Скопје, информира Министерството за внатрешни работи.

Според МВР, вчера во 16.20 часот, во полициската станица Карпош пристигнало известување од касарната „Илинден“ дека е забележано лице, странски државјанин, како неовластено се движи во кругот на објектот. Тој бил приведен од воената полиција и било утврдено дека станува збор за К.Р.Џ. (30) од Њукасл, Велика Британија.

Поради сомневање за сторено кривично дело неовластено влегување во воени објекти и правење скици или цртежи на воени објекти и борбени средства, полициски службеници го лишиле од слобода британскиот државјанин, велат од МВР.


АРМ вежбајќи за утре ги вознемири скопјани со плотун


Скопје, 17 август, 2017 - 19:52 (META) 

Силен татнеж вечерва, околу 19 часот ги вознемири скопјани. Од МВР за „Мета“ соопштија дека станува збор за истрелан плотун, како дел од подготовките на Армијата на Република Македонија, за утрешното одбележување на 18 Август – Денот на АРМ.

Од Министерството за одбрана и од Генералштабот на АРМ претходно соопштија дека пред почетокот на утрешната централна свеченост, од касарната „Илинден“ ќе бидат истрелани 10 плотуни од артилериски орудија.

По татнежот, на социјалните мрежи се појави реакции од граѓани, кои прашуваа „што се случува“.


МВР денеска го одбележува Денот на македонската полиција


Скопје, 6 мај, 2016 - 10:17 (META) 

Денеска, со почетокот во 12 часот, Министерството за внатрешни работи со централна свеченост во касарната „Илинден“ во Скопје ќе го одбележи 7 Мај – Денот на македонската полиција. На свеченоста, како што е предвидено, ќе говорат министерот за внатрешни работи, Оливер Спасовски, директорот на Бирото за јавна безбедност (БЈБ), Горанче Савовски, и Славчо Петрушевски, командат на Единицата за специјални задачи „Тигри“, која одбележува 35 години јубилеј од нејзиното формирање.

Покрај централната свеченост, во 10 часот министерот Спасовски и семејствата на загинатите припадници на МВР ќе положат цвеќе на споменикот на загинатите припадници пред главната зграда на МВР.

Делегација на МВР, исто така, ќе положи цвеќе на споменикот во базата Брест, посветен на загинатите припадници во хеликоптерската несреќа, а ќе биде посетен и споменикот на загинатите бранители во паркот Жена-борец во Скопје.

Во одбележувањето на денот на македонската полиција, претставници на МВР традиционално ќе ги посетат децата без родители од Домот за згрижување на деца и младинци „11 Октомври“, Домот за доенчиња и за мали деца во Битола и Дневниот центар за деца со посебни потреби во Тетово.