Италијанските компании заинтересирани за учество во развојни капитални проекти


Скопје, 3 декември, 2018 - 13:48 (META) 

Искуствата, технологиите и знаењата на италијанските компании во фазите на проектирање, изведба и надзор на градежните проекти кои се планира да се реализираат во Македонија се добродојдени, порача вицепремиерот за економски прашања Кочо Анѓушев на отворањето на бизнис-форумот кој го организира канцеларијата на италијанската Агенција за трговија во Скопје.

На бизнис-форумот присуствуваа претставници од 15 италијански компании, со меѓународно искуство во реализација на проекти од патна и железничка инфраструктура, енергетски како и проекти за заштита на животната средина.

Вицепремиерот ги информираше присутните за тековните и планирани инфраструктурни проекти, при што потенцираше дека заинтересираните италијански компании треба да ги следат јавните повици за реализација на проектите, нивното присуство ќе доведе до дополнителен квалитет и конкурентност во самите постапки.

Амбасадорот на Италија во Македонија Карло Ромео нагласи дека ова е втор бизнис-форум кој се организира во Македонија само во 2018 година, со што се докажува големиот интерес на италијанските компании за учество во развојни проекти во транспортот, енергетиката и животната средина. Тој нагласи дека претставниците на компаниите кои се присутни претставуваат здруженија кои работат во 90 земји и годишно реализираат приходи од околу 14 милијарди евра.

Италија е шести трговски партнер на Македонија, трговската размена помеѓу двете земји во првите девет месеци од 2018 година, во однос на истиот период лани, бележи раст од над 14,2 проценти, со вкупен обем од 448 милиони евра, а голем придонес за зголемување на економската соработка има порастот на извоз на производи од 11,7 проценти.

Бизнис форумот е во организација на Италијанската Агенција за трговија (ICE), во соработка со Италијанското здружение на приватни градежни компании (ANCE) и Италијанското здружение за инжинерство и градежништво (OICE).


Груби – Ромео: За ниту еден закон не е дебатирано повеќе и подолго од Законот за јазиците


Скопје, 12 март, 2018 - 16:39 (META) 

Ниту еден друг закон не е дебатиран повеќе и подолго од Законот за употреба на јазиците и затоа дојде време да се затвори ова прашање деновиве, со што успешно ќе го заокружиме нормативниот дел на Охридскиот договор, рекол претседателот на Комисијата за европски прашања на Собранието, Артан Груби на средбата со амбасадорот на Италија во Македонија, Карло Ромео.

„Истата храброст во решавање на прашањата треба заеднички да ја демонстрираме и со спорот со името“, изјавил Груби.

На средбата, Груби и Ромео разговарале за актуелните настани, при што истакнале дека во земјата приоритет се ЕУ-реформите, кои се неопходни за отстранување на условената препорака за давање датум за почеток на преговорите за ЕУ-членство, во претстојниот годишен извештај на Европската комисија во април.


Поповски – Ромео: Со законот ќе се обезбеди независно работење на МРТВ и ААВМУ


Скопје, 27 февруари, 2018 - 14:49 (META) 

Се обврзавме на создавање услови за независно и професионално работење на Македонска радио-телевизија, Агенцијата за аудио и аудиовизуелни медиумски услуги и на сите медиуми во Македонија и измените на Законот за аудио и аудиовизуелни медиумски услуги се во таа насока, го информирал министерот за комуникации, отчетност и транспарентност, Роберт Поповски италијанскиот амбасадор Карло Ромео.

На средбата, како што информираат од владата, било разговарано за придобивките од измените на Законот за ААВМУ со кои, како што се додава во соопштението, „се отвора простор, експерти и истакнати личности од медиумската и општествената сфера да членуваат во советите на Македонската радио-телевизија и на Агенцијата за аудио и аудиовизуелни медиумски услуги, како и да раководат со нив.“

„Очекувам да имаме поддршка и разбирање и од опозицијата за измените на Законот што се испратени веќе во Собранието, со оглед дека промените во медиумската сфера се меѓу клучните забелешки во двата извештаја на Рајнхард Прибе, како и обврска од Договорот во Пржино“ рекол Поповски на средбата.


Конференција „Иднината на Берлинскиот процес“: Позитивен, но недоволно видлив


Скопје, 1 декември, 2017 - 14:03 (META) 

Берлинскиот процес за четири години создаде позитивни моменти во односите на Западен Балкан со Европската Унија и донесе извесни резултати, но за да се постигне целосниот потенцијал, потребно е да се зголеми видливоста на процесот во јавноста.

Ова е заклучокот од денешната конференција „Иднината на Берлинскиот процес“, организирана од Институтот за демократија „Сосиетас цивилис“, на која учествуваа и амбасадорите на Италија и на Велика Британија, Карло Ромео и Чарлс Гарет.

Игор Бандовиќ од „Европскиот фонд за Балкан“ рече дека политичарите декларативно се посветени на евроинтеграциите, но ако се прашат граѓаните колку од тоа гледаат на дело, одговорот е дека „не ги чувствуваат промените“. Тој истакна дека сите земји од регионот, имајќи предвид дека имаат заедничко минато, се борат со исти проблеми, односно реформи во правосудството, независност на судството и борба против корупцијата.

Координаторот на Центарот за ЕУ-интеграција, Зоран Начев, рече дека во Берлинскиот процес треба да се вклучат повеќе актери, не само владите на државите од Западен Балкан, односно парламентите, граѓанските организации и вработените во администрацијата. На тој начин ќе се поттикне забрзувањето на имплементацијата на предвидените мерки.

Амбасадорот Ромео повтори дека Берлинскиот процес не е сам по себе цел, туку механизам за забрзување на ЕУ-интеграциите на земјите од Западен Балкан, преку нивна поголема меѓусебна соработка, а со тоа и со зголемена соработка на регионот со ЕУ. Тој го спомена самитот во Трст кој се одржа во јули годинава, а на кој беа дефинирани проекти и обезбедени финансии за транспортна и за енергетска поврзаност на земјите, за зголемена безбедносна и прекугранична соработка.

Британскиот амбасадор Гарет рече дека земјите од Западен Балкан треба да го искористат следниот период за забрзување на евроинтеграциите, истакнувајќи дека и во европските институции и во земјите членки на ЕУ се свесни дека е потребно придвижување на процесот.

Следниот самит посветен на Берлинскиот процес ќе се одржи во Лондон, во јули следната година. Гарет рече дека се работи на подготовка на самитот и оти четирите клучни точки на кои ќе се фокусираат се: транспортна и енергетска поврзаноста на шесте земји од Западен Балкан, дигитално-технолошкото претприемништво, младите и нивна едукативна професионална обука и безбедноста, која овојпат ќе се однесува на борбата против фискалниот криминал и корупцијата.


Жбогар: Што поскоро да се финализира договорот за добрососедство со Бугарија


Скопје, 10 јули, 2017 - 15:22 (META) 

Секогаш е добро да се има добри односи со соседните земји, изјави денеска евроамбасадорот Самуел Жбогар на заедничката прес-конференција со италијанскиот амбасадор Карло Ромео, посветена на самитот ЕУ – Западен Балкан, кој од 12 јуни ќе се одржи во Трст.

Жбогар рече дека Брисел очекува што поскоро да се финализира договорот за добрососедство меѓу Македонија и Бугарија и дека е потребно да се решат билатералните прашања со соседите и со земјите членки на ЕУ во регионот.

– Никогаш нема да погрешите ако инвестирате во пријателство со соседите. Мора да имате круг на пријатели околу вас. Првите чекори се навистина охрабрувачки. Ние не сме вклучени во договорот, но се надеваме дека ќе биде финализиран и потпишан до август. Тоа ќе покаже одлучност на самата влада за повторно да го гради овој круг на пријатели со соседите -рече Жбогар, додавајќи дека колку подобри односи земјата има со соседите кои се во ЕУ, толку поголема поддршка за евроинтеграција има.

Евроамбасадорот, исто така, изрази надеж дека договорот ќе се најде на дебата пред Собранието.

Италијанскиот амбасадор Ромео рече дека самитот во Трст ќе помогне во придвижувањето на регионот на патот кон евроинтеграциите и дека ќе придонесе за инфраструктурно и за економско поврзување на Западен Балкан.

Самиот во Трст е највисоко ниво, а на него покрај премиерите на шесте земји од Западен Балкан и министрите за економија и за транспорт, ќе учествуваат високата претставничка на ЕУ за надворешна политика и за безбедност, Федерика Могерини, еврокомесарот за добрососедство и за проширување, Јохане Хан, како и еврокомесарката за транспорт, Виолета Болц.


Анѓушев до Ромео: Владата е посветена на обврските што произлегуваат од Берлинскиот процес


Скопје, 27 јуни, 2017 - 15:07 (META) 

Заменик-претседателот на Владата задолжен за економски прашања, Кочо Анѓушев, со италијанскиот амбасадор Карло Ромео разговарал за побрза интеграција на земјите од овој регион во Европската Унија. Средбата доаѓа во пресрет на самитот за Западен Балкан во Трст, што ќе се одржи на 12 јули, а се одвива во рамките на Берлинскиот процес.

Ромео, чија земја е домаќин на годинашниот самит за Западен Балкан, ги презентирал приоритетите на италијанското претседавање со самитот, како и деталната агенда за време на самитот. Тој го поздравил формирањето на Владата и изрази надеж дека процесите за интеграција на Република Македонија, како и на целиот регион во Европската Унија, ќе се одвиваат со побрза динамика, како и дека Република Италија како актуелен претседавач со процесот ќе помогне за интензивирање на активностите.

Анѓушев истакнал дека Владата e посветена на сите процеси во врска со итните реформски приоритети, како и на обврските што произлегуваат од таканаречениот Берлински процес.

– Владата ќе работи на реформи во енергетскиот сектор, ќе работиме на создавање поволна бизнис-клима за домашни и за странски инвеститори, а конкурентноста на компаниите ќе ја подигнеме со инвестиции во инфраструктурата, како на патната, така и на железничката инфраструктура – рече Анѓушев за време на средбата.


Османи – Ромео: Време е да се затворат меѓуетничките, како и сите други отворени прашања


Скопје, 15 јуни, 2017 - 13:56 (META) 

Време е да се затворат меѓуетничките, како и сите други отворени прашања кои се клучен елемент за евроатлантските аспирации на Македонија, истакнал вицепремиерот за европски прашања, Бујар Османи, на денешната средба со амбасадорот на Италија во земјава, Карло Ромео.

„Имаме голем предизвик пред нас да надоместиме за изгубеното време и се надевам дека тоа ќе го направиме во тесна соработка со сите заинтересирани страни во земјата, како и со меѓународните партнери“, рекол Османи, се наведува во соопштението од неговиот кабинет за средбата.

Во врска со аспирациите на Македонија за членство во Европската Унија, Османи нагласил дека фокусот останува на исполнувањето на обврските кои произлегуваат од итните реформски приоритети и Договорот од Пржино и дека очекува да се постигнат резултати, за да се отстрани условеноста на препораката за членство.

Тој го посочил Берлинскиот процес како добар механизам за понатамошно зајакнување на регионалната соработка на земјите од Западен Балкан и додал дека земјава очекува конкретни резултати од претстојниот самит во Трст, кој се одржува во рамките на Берлинскиот процес.

Вицепремиерот Османи и амбасадорот Ромео, воедно, изразиле задоволство од билатералната соработка меѓу двете земји, како и од меѓусебните пријателски односи, посочувајќи дека има простор за нивно унапредување со нови конкретни проекти.


Ахмети: ДУИ го почитува унитарниот карактер на Македонија, треба да се избере влада


Тетово, 13 мај, 2017 - 12:44 (META) 

Претседателот на ДУИ, Али Ахмети, на денешната средба со амбасадорот на Италија, Карло Ромео, нагласил дека ДУИ го почитува уставниот поредок, како и унитарниот карактер на земјата, додека новата реформска влада треба што поскоро да се избере и да почне со работа, извести ДУИ.

Во врска со локалните избори, Ахмети рекол дека ДУИ ги поддржува измените на изборниот законик за да се овозможи нормално функционирање до одржување на изборите и изборот на новата администрација.

Лидерот на ДУИ во разговорот со италијанскиот амбасадор исто така рекол  дека нема никакви пречки за одложување и дека приоритет на новата влада се реформите во судството, евро-атланската интеграција, Охридскиот договор, добрите меѓуетнички и меѓусоседски односи, како и економскиот развој и отворањето нови работни места.


Заев до Ромео: Ќе продолжиме со чекорите за деблокирање на демократските процеси


Скопје, 21 април, 2017 - 13:34 (META) 

Парламентарното мнозинство ќе продолжи со чекорите кон избор на нов претседател на Собранието и избор на новата влада, рекол лидерот на СДСМ, Зоран Заев, на денешната средба со амбасадорот на Италија во Македонија, Карло Ромео.

На средбата, како што соопштуваат од СДСМ, била констатирана потребата од деблокада на демократските процеси и била нагласена потребата од разумност за мирен трансфер на власта преку почитување на демократските принципи.

– Македонија мора да оди напред. Парламентарното мнозинство ќе ги продолжи чекорите кон избор на нов собраниски претседател и избор на новата реформска влада, според Уставот, деловникот и законите во Република Македонија – рекол Заев на средбата.

Заев и Ромео разговарале и за ризиците од пролонгирањето на деблокадата на демократските процес, а лидерот на СДСМ, во тој контекст, посочил дека покрај техничкото функционирање на министрите, од средината на мај и на градоначалниицте и на советниците во општините целосно ќе им престане мандатот.


Ахмети – Ромео: Сите да придонесеме за добар изборен процес


Тетово, 2 ноември, 2016 - 18:30 (META) 

Претседателот на Демократската унија за интеграција (ДУИ), Али Ахмети, денеска се сретна со новоименуваниот италијански амбасадор во Македонија, Карло Ромео.

Ахмети и амбасадорот Ромео разговарале за политичката ситуација во земјава и за изборите на 11 декември, но и за реформите, како и за интеграцијата на Македонија во НАТО и во ЕУ.

Ахмети ги појаснил ставовите на ДУИ за иборите на 11 декември, апелирајќи до сите заинтересирани страни да придонесат за изборниот процес.

Лидерот на ДУИ го повторил ставот дека владеењето на правото и системските реформи се составен дел од програмата на неговата партија, заедно со еднаквоста на сите граѓани и економијата.

Ахмети ја повикал Италија да продолжи со поддршката на интегративниот процес на Македонија кон НАТО и кон ЕУ, што ќе овозможи внатрешна стабилност, безбедност, добри меѓуетнички и соседски односи, како и економски развој.