!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Заев и Груевски изразија сочувство за смртта на Хелмут Кол


Скопје, 17 јуни, 2017 - 14:08 (META) 

Претседателот на Владата на Република Македонија, Зоран Заев, испрати телеграма со сочувство за смртта на поранешниот германски канцелар Хелмут Кол до канцеларката на Сојузна Република Германија, Ангела Меркел, и до граѓаните на Германија.

„Граѓаните на Сојузна Република Германија загубија голем човек и политичар, кој го препозна обединувањето како вредност и пат што води напред и успеа да ја обедини Германија и да обезбеди стабилна иднина на државата. Она што го остави овој голем европски државник зад себе е наследство на целиот свет. Тоа се мостовите на пријателства со државите и меѓу државите во светот, градени низ мирољубиви политики. Како борец на помирувањето, поранешниот канцелар Кол се вгради во темелите на политичката и на економската интеграција на Европа. Подаде рака на Република Македонија при процесот на осамостојувањето на нашата држава, со што останува дел и од политичката меморија на Македонија и на нејзините граѓани“, се вели во телеграмата од Заев.

Сочувство до Меркел испрати и лидерот на ВМРО-ДПМНЕ, Никола Груевски.

„Ова претставува загуба за целиот германски народ и за германската држава, како и загуба за Европската Унија во чија изградба и пораст се вгради со своето дејствување и работа. Кол беше промотор на ширење на европската интеграција кон Источна Европа, како и архитект на еврото и почитувач на десничарските вредности. Кол имаше и значајна улога во стекнувањето независност на Република Македонија, подржувајќи го процесот на нејзино осамостојување и понатамошен развој“, се вели во телеграмата од Груевски.

Германската канцеларка Ангела Меркел, пак, оддавајќи му почит на поранешниот германски канцелар Хелмут Кол, кој почина вчера на 88-годишна возраст, истакна дека тој дефинитивно го променил нејзиниот живот со улогата што ја имал во повторното обединување на Германија.

Претседателот на Германија Франк-Валтер Штајнмаер изјави дека поранешниот германски канцелар Хелмут Кол успеал да го постигне обединувањето на Германија и да ги задржи мирните односи со соседните земји.

– Тој успеа да постигне германско единство при мирна согласност и зачувување на партнерството со нашите европски соседи. Ние сме му благодарни за тоа дека Германија беше потврдена како европска единствена нација и дека на тој начин беше решено „германското прашање“ – наведе Штајнмаер.

Се огласи и шефот на германската дипломатија Зигмар Габриел.

– Кол беше голем државник, голем германски политичар, а пред сè голем Европеец – истакна Габриел.

Поранешниот германски канцелар Герхард Шредер изјави дека Кол бил патриот и оти неговиот историски придонес заслужува почит.

Длабоко жалење за смртта на Кол изразија и поранешните и сегашните европски и светски лидери. Последниот лидер на Советскиот Сојуз, Михаил Горбачов, го нарече Кол „исклучителна личност која покажала длабоко интересирање за Русија“.

Генералниот секретар на ОН, Антонио Гутереш, изрази сочувство за смртта на поранешниот германски канцелар Хелмут Кол, кој според него „помогнал за одредувањето на курсот кон историскиот процес на политичката и економската интеграција во Европа“.

Претседателот на Европскиот парламент, Антонио Тајани, изјави дека Кол бил „борец за помирувањето во Европа, кој засекогаш влезе во историјата како татко на заедничкиот европски дом“.

Американскиот претседател Доналд Трамп изјави дека Хелмут Кол бил „пријател и сојузник“ на САД, додека бил канцелар на Германија во текот на 16 важни години.


Почина поранешниот германски канцелар Хелмут Кол, еден од „уривачите“ на Берлинскиот ѕид


Лудвигсхафен, 16 јуни, 2017 - 20:19 (META) 

На 87-годишна возраст, во својот дом во Лудвигсхафен, почина поранешниот долгогодишен германски канцелар Хелмут Кол, еден од учесниците во паѓањето на Берлинскиот ѕид, јавија светските медиуми.

Кол беше канцелар на Германија од 1982 до 1998 година. Тој ја поведе иницијативата за соединувањето на Западна и на Источна Германија и беше „движечка сила“ за воведувањето на единствена европска валута, убедувајќи ги скептичните Германци да се откажат од марките.

Кол е канцеларот кој во периодот по Втората светска војна постави рекорд според мандатот, задржувајќи се четири последователни мандати на кормилото на Германија.

Тој беше во лоша здравствена состојба и во инвалидска количка од 2008 година.


Мартин Шулц е избран за нов претседател на германските социјалдемократи


Берлин, 19 март, 2017 - 17:53 (META) 

Германската социјалдемократска партија (СПД) денеска одржа конвенција на која за нов претседател на партијата едногласно е избран поранешниот претседател на Европскиот парламент и актуелен кандидат за германски канцелар, Мартин Шулц, пренесува ХРТ.

Новиот претседател на СПД е сè поголема закана за Ангела Меркел, која сè до неодамна имаше отворен пат до нов мандат, но последните анкети покажуваат дека таа и Шулц се изедначени.

Шулц не ги крие своите амбиции да стане канцелар и да ја направи СПД најголема политичка сила во земјата.

Парламентарните избори во Германија се закажани наесен.


Меркел реизбрана за лидер на Христијанско-демократската унија


Есен, 6 декември, 2016 - 19:49 (META) 

Германската канцеларка Ангела Меркел повторно е избрана за лидер на Христијанско-демократската унија (ЦДУ).

На конгресот кој се одржал во Есен, Меркел добила 89,5 проценти од гласовите на делегатите, односно за неа гласале 845 од 949 присутни делегати.

Мандатот на Меркел ќе трае две години, а демохристијаните таа ќе ги предводи и на парламентарните избори во 2017 година.

Меркел минатиот месец најави дека ќе се кандидира за да добие четврти мандат на изборите во септември следната година, а отскочна штица за тоа е нејзиниот реизбор за претседател на ЦДУ.


Кристијан Керн е нов канцелар на Австрија


Виена, 13 мај, 2016 - 15:02 (META) 

Кристијан Керн, генералниот директор на Австриски железници, е именуван за нов лидер на Социјалдемократската партија (СПО) и за австриски канцелар.

Канцеларот Вернер Фајман поднесе оставка на 9 мај на двете функции, две недели откако неговата партија доживеа неуспех во првиот круг на претседателските избори.

СПО ја сочинува владејачката коалиција со центристичката Народна партија.

Во првиот круг на претседателските избори на 24 април, кандидатот на десничарската антиимигрантска Слободарска партија, Норберт Хофер, освои повеќе од 35 отсто од гласовите. Другите пет кандидати имаат значително помалку гласови од него.


Австрискиот канцелар Вернер Фајман поднесе оставка


Виена, 9 мај, 2016 - 14:29 (META) 

Австрискиот канцелар Вернер Фајман соопшти дека поднесува оставка од сите државни и партиски функции. Фајман поднесе оставка две недели по неуспехот на својата Социјалдемократска партија во првиот круг на претседателски избори.

Во краткото обраќање пред новинарите, тој изјави дека донел одлука да се повлече од местото лидер на Социјалдемократската партија, како и од позицијата шеф на владата.

Одлуката на Фајман била објавена изненадно, пред денешниот состанок на претседателството на партијата.

 


Австрискиот канцелар до Германија: Преземeте ги мигрантите од Грција


Виена, 2 март, 2016 - 10:53 (META) 

Австрискиот канцелар Вернер Фајман ја повика Германија директно да ги преземе бегалците од Грција и од соседните држави на Сирија, така што ќе издава документи за нивно патување до целната дестинација.

Но, како што вели Фајнман, претходно е неопходно германската влада да утврди квоти за бегалците од Грција, Турција или Јордан.

Фејман за австриски „Курир“ изјави дека тој документ треба да им обезбеди влез на мигрантите на германската граница. Тој истакна дека повеќе не е подносливо дневно да се пропуштаат повеќе од 1.000 лица.

Австрискиот канцелар повтори дека неговата земја не смее да стане „чекалница за бегалци“ заради Германија и дека официјална Виена ќе се бори против тоа.

Од кабинетот на канцеларот објаснија дека ако Германија го прифати овој предлог, Австрија би ги пропуштала само тие бегалци што имаат документ за патување, а кој би ги издавале германските власти.

Фајман се залага и за основање фонд на ЕУ за бегалците во Европа, сличен на тој за спасување на банките.