!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Гаврил Светогорец епископот Велички во Штип беше прогласен за светец


Штип, 28 мај, 2017 - 16:16 (META) 

Скромниот ерудит, во земскиот живот професор по историја на уметноста, а во световниот, духовник што правеше чуда, Гаврил Светогорец епископот Велички, денеска во Штип беше прогласен за светец.

На литургијата во храмот „Свети Никола“, со која чиноначелствуваше поглаварот на МПЦ – ОА, архиепископот охридски и македонски г.г. Стефан, беа изложени моштите на епископот Велички, кој се упокои на 12 јануари 1990 година.

Моштите беа пренесени од манастирот во Лесново, што го носи неговото име, каде во една од пештерите и се упокои. Ковчегот ќе биде повторно вратен во Лесново, но во застаклен дел ќе биде поставен во манастирот.

-Уште едно кандило македонско се запали пред престолот на Господ Бог – рече владиката Агатангел на литургијата, што во чест на Гаврил Лесновски се одржа во црквата „Свети Никола“ во Штип.

Ова е четврто прогласување светци во поново време на МПЦ – ОА, а второ оваа година.

На канонизацијата присуствуваше и техничкиот премиер за спроведување на изборите, Емил Димитриев.


Иванов: Македонија е горда на Мајка Тереза


Скопје, 4 септември, 2016 - 15:53 (META) 

Претседателот Ѓорге Иванов по повод денешната канонизација на Мајка Тереза рече дека земјата е горда што има сограѓанка светица. Тој информираше и дека македонската делегација, која имаше почесно место на денешниот настан, имала куса средба со папата Франциск, кој му потврдил на Иванов дека ќе дојде во Македонија.

Премиерот Емил Димитриев рече дека канонизацијата на Мајка Тереза е голем настан за Македонија и за македонскиот народ.

„Во овие моменти на условно кажано политичка криза, која Македонија ја држи подолг период, убава беше можноста да се сетиме на делата на Мајка Тереза. Хуманоста, добродетелта, почитувањето едни со други, вредностите што ги промовираше Мајка Тереза, апсолутно би ни помогнале во надминување на оваа политичка криза, бидејќи нејзината помош не беше условена ниту од вера, ниту од боја на кожата, ниту од раса“, рече истакна Димитриев.

Порака за почит и за помош испрати и министерката за труд и социјална политика, Фросина Ременски. Таа рече дека со прогласувањето на Мајка Тереза за светица, испратена е порака до сите луѓе на светот, без разлика на нивната национална, етничка и верска припадност, дека сите со своите дела треба да оставаме белег на нашиот животен век – белег на мирољубивост, милосрдие, солидарност и на љубов.

„Денеска е денот кога сите ние, заедно, треба да се обврземе дека споменот и делата на светата Мајка Тереза ќе бидат наша водилка во грижа за најблиските, за децата, за оние што бегаат од злото на војната, за телесно посебните, за болните и за напуштените, за гладните…, за сите што ја љубат, ја слават и ја живеат милоста кон човекот, добрината и праведноста“, пишува во соопштението на Ременски.

Утре на плоштадот Свети Петар ќе биде одржана утринска миса во чест на Мајка Тереза, што ќе ја води државниот секретар на Светиот престол, кардиналот Пјетро Паролин.


Папата Франциск ја прогласи Мајка Тереза за светица


Ватикан, 4 септември, 2016 - 11:45 (META) 

Папата Франциск пред стотици илјади граѓани на плоштадот Свети Петар во Ватикан ја прогласи Мајка Тереза за светица.

Во тек е процесијата околу канонизацијата на светицата Мајка Тереза, а папата Франциск пред граѓаните читаше од „Светата книга на мудроста“.

На прогласувањето во Ватикан присуствува делегација на Македонија во која се претседателот Ѓорге Иванов, министерот за надворешни работи Никола Попоски, министерката за култура Елизабета Канчевска-Милеска, лидерите на ВМРО-ДПМНЕ и на СДСМ, Никола Груевски и Зоран Заев.

По повод прогласувањето на Мајка Тереза за света, во Скопје се одржува манифестација „Денови на Мајка Тереза“, која почнува денеска со света литургија во Спомен-домот на Мајка Тереза, а ќе заврши на 11 септември со прогласувањето на домот на Мајка Тереза за светилиште.

Лидерот на ВМРО-ДПМНЕ, Груевски, на својот профил на „Фејсбук“ напиша дека повел иницијатива да се воспостави меѓународен орден за заслуги „Мајка Тереза“, кој би се давал на истакнати жени од светот со особени и вонредни достигнувања во различни области.

„Замислата е орденот за заслуга да се воспостави со точен ред и прецизни критериуми со единствен домашен и меѓународен одбор во кој задолжително би учествувал секој министер за надворешни работи од Македонија, но во одборот би биле, покрај него, и други личности од Македонија, а би имало и истакнати високоавторитетни личности од различни држави и области во светот. Би се воспоставил прецизен ред по принципот како тоа што е направено во земји со долга традиција од ваков вид, на пример, Франција или Англија. Самиот чин на врачување на орденот за заслуга би бил афирмација на делото и на животот на Мајка Тереза, но и афирмација на Македонија. Се разбира, би било и огромна чест за оној кој ќе ја прими и кој ја заслужил таа награда“, напиша Груевски на „Фејсбук“.


На 11 септември родната куќа на скопјанката Мајка Тереза ќе се прогласи за светилиште


Скопје, 8 јуни, 2016 - 16:54 (META) 

Прогласувањето на Мајка Тереза за светица, Скопската бискупија ќе го одбележи во септември, со манифестација наречена „Денови на св. Мајка Тереза“.

Прогласувањето ќе се одржи на 4 септември во Ватикан, а прославата во Скопје ќе почне на 5 септември и ќе трае до 11 септември.

Од 5 до 11 септември во Скопје ќе има серија хуманитарни активности, а централната манифестација ќе се одржи во недела на 11 септември, во нејзиното родно место, на плоштадот Македонија, кое ќе се прогласи за светилиште.

Централната манифестација во Скопје ќе ја предводи пратеник на папата со титула кардинал.

На денешната прес-конференција, бискупот скопски и апостолски егзарх во Македонија, Киро Стојанов, информираше дека на 4 септември, на денот на прогласувањето на Мајка Тереза за светица, на плоштадот Свети Петар во Рим и во Скопје, во 12 часот, во капелата во Спомен-куќата на Мајка Тереза, ќе се одржи света литургија.

Организатор на прославата е Скопската бискупија, а покровител е претседателот на Република Македонија, Ѓорге Иванов.


Бискупот Киро Стојанов денеска ќе ги најави септемвриските „Денови на Мајка Тереза“


Скопје, 7 јуни, 2016 - 17:03 (META) 

Скопскиот бискуп Киро Стојанов  денеска во 11 часот, ќе одржи прес-конференција во бискупската резиденција во Скопје, на која ќе ја презентира програмата за прославата „Денови на блажена Мајка Тереза“.

Настаните ќе се одвиваат од 5 до 11 септември, а се со повод прогласувањето на Мајка Тереза за светица.

На конференцијата ќе се обрати и Валентина Божиновска, директорка на Комисијата за односи со верските заедници и религиозни групи.


Иванов се сретна со кардиналот Паролин


Скопје, 18 март, 2016 - 15:03 (META) 

Претседателот Ѓорге Иванов, денеска се сретна со државниот секретар на Ватикан, кардинал Пјетро Паролин, кој е во официјална посета на Република Македонија.

На средбата се разговарало за билатералните односи меѓу Македонија и Светиот Престол, како и за тековните иницијативи во насока на продлабочување на меѓусебната соработка.

„Вашата посета, не само што ми овозможува да ви го возвратам извонредното гостопримство, кое ми беше укажано за време на мојата официјална посета на Ватикан минатата година, туку претставува и своевидна потврда за силната поврзаност, меѓусебното почитување и за искреното пријателство меѓу Република Македонија и Светиот Престол“, истакнал претседателот Иванов.

Како што пишува во соопштението од кабинетот на претседателот, Иванов ја поздравил одлуката на Ватикан за прогласувањето на Мајка Тереза за светица, нагласувајќи дека овој чин е од особена културна и историска важност за  Македонија и истакнал дека нашата земја ќе се вклучи во одбележувањето на канонизацијата на Мајка Тереза со повеќе активности.

Иванов изразил надеж дека папата Франциск ќе ја прифати поканата за посета на Македонија, што би било од огромно значење за унапредување на билатералните односи, за католичката заедница во Македонија и воопшто за сите христијански верници.


Папата Франциск: Мајка Тереза во септември ќе биде прогласена за светица


Рим, 15 март, 2016 - 12:27 (META) 

Папата Франциск денеска и формално одобри Мајка Тереза да биде прогласена за светица на 4 септември годинава, истакнувајќи дека тоа ќе се случи 19 години по нејзината смрт.

Неизвесно е дали церемонијата на канонизација ќе се случи во Калкута или во Рим.

Според новинарката Јасмина Миронски, авторка на неколку книги за животот на Мајка Тереза, за Македонија, а особено за нејзниот роден град Скопје што таа неизмерно го сакала, е исклучително значајно што ќе биде прогласена за светица.

– Иако оваа добитничка на Нобеловата награда за мир ја следат многу контроверзии, сепак нејзината светост останува недопрена – вели Миронски.

Мајка Тереза е родена како Агнеса Гонџа Бојаџиу во Скопје. Најголем дел од животот го помина помагајќи им на сиромашните во Калкута.

Во 1979 година доби Нобелова награда за мир, а во 2003 година во Рим беше прогласена за блажена.

Мајка Тереза почина на 5 септември 1997 година, на 87-годишна возраст.


Мајка Тереза може да биде прогласена за светица во 2016 година


Ватикан, 21 мај, 2015 - 16:39 (META) 

Мајка Тереза може да биде канонизирана следната година, вели висок авторитет во Католичката црква, а според друг ова е само хипотеза, пишува „Хафингтон пост“.

Италијанскиот весник „Кориере дела сера“ извести дека во вторникот архиепископот Салваторе Фисичела, претседател на Понтификалниот совет за промовирање нова евангелизација, им рекол на градските власти во Рим дека канонизацијата на калуѓерки била закажана за 4 септември 2016 година, во близина на крајот на јубилејната година прогласена од папата Франциск. Но, портпаролот на Ватикан, свештеникот Федерико Ломбарди, негираше дека е утврден датум за канонизација.

– Тоа е работна хипотеза. Процесот за прогласувањето на Мајка Тереза за светица сè уште е во тек и прерано е да се зборува за датум за канонизација – вели Ломбарди.

Во средата, отец Мануел Дорантес од прес-службата на Ватикан, за „Хафингтон пост“ изјави дека процесот е во тек и дека сè уште не може да се зборува за дефинитивен датум.

– Сепак, гледајќи на нацрт-календарот за јубилејната година, има шанси дека тоа е веројатно да се случи на почетокот на септември – рекол Дорантес.

На Мајка Тереза ѝ се восхитуваат за нејзината работа со сиромашните и со обесправените во Индија.

Таа доби Нобелова награда за мир во 1979 година.