!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Јанковиќ поднесе оставка поради претседателската кандидатура


Белград, 7 февруари, 2017 - 14:27 (META) 

Досегашниот народен правобранител на Србија, Саша Јанковиќ, денеска и формално поднесе оставка на функцијата, половина година пред истекот на вториот петгодишен мандат, бидејќи ќе се кандидира за претседател на Србија.

– Одлучив да се кандидирам и да ја вратам смислата на институцијата претседател и за да гарантирам дека ќе биде во функција на граѓаните, а не на еден човек – рече Јанковиќ.

Јанковиќ кон крајот на минатата година ја најави својата кандидатура, одговарајќи на апелот на стотина јавни личности, меѓу кои и угледни книжевници, новинари, актери и професори. Тој денеска рече дека досега добил поддршка од осум партии и движења и оти очекува победа на претседателските избори оваа пролет.


Србија: Демократска странка ја поддржа кандидатурата на Саша Јанковиќ


Белград, 10 јануари, 2017 - 18:54 (META) 

Српската партија Демократска странка (ДС) ќе го поддржи актуелниот народен правобранител Саша Јанковиќ како кандидат на изборите за претседател на Србија, едногласно денеска одлучи претседателството на опозициската партија.

Претседателот на ДС, Драган Шутановиќ рече дека Јанковиќ е „персонификација на вредностите за кои се залага ДС“.

– Водени од интересите на граѓаните, убедени сме дека тој е најдобар кандидат и дека ќе победи – рече Шутановиќ по седницата на претседателството на ДС.

Оценувајќи дека ова е момент кога во Србија треба да се воспостави „сила на правото, а не правото на сила“, Шутановиќ рече дека одлуката е донесена едногласно, на негов предлог.

– Саша Јанковиќ покажа дека се залага за заштита на човековите и на правата на малцинствата, на работниците, дека се залага за почитување на институциите на системот. Во носењето на одлуката не калкулиравме, таа е базирана на тоа што Јанковиќ го прави во изминатиот период – рече лидерот на ДС.

Освен ДС, Јанковиќ досега го поддржаа неколку стотина јавни личности, кои по тој повод упатија отворено писмо до јавноста, а откако ја најави кандидатурата за претседател на Србија, омбудсманот доби поддршка и од Нова странка, на Зоран Живковиќ.