Богов ја повлече кандидатурата за гувернер на Народна банка


Скопје, 16 мај, 2018 - 13:57 (META) 

На четири дена од истекот на мандатот, гувернерот на Народна банка, Димитар Богов се повлекува од кандидатурата за втор мандат и за тоа веќе го известил претседателот на државата Ѓорге Иванов, кој го предложи за нов гувренерски мандат.

Во пишаната изјава за МИА, Богов посочува дека со внимание ја следел дебатата во јавноста поврзана со предлогот по втор пат да биде именуван за гувернер на Народната банка и оти одлуката ја донел имајќи ги предвид реакциите на дел од чинителите во политиката и роковите за избор на гувернер.

– Во оваа пригода би сакал да му се заблагодарам на претседателот Ѓорге Иванов за довербата што ми ја даде со моето повторно предложување за прв човек на Народната банка, што за мене лично претставува валоризација на сработеното во изминатите седум години. Имајќи ги предвид реакциите на дел од чинителите на политичкиот живот во Македонија, моменталната политичка констелација и роковите за избор на гувернер, во интерес на државата се повлекувам од кандидатурата за гувернер на Народната банка, за што веќе го известив претседателот – вели Богов.

Тој верува дека во периодот што претстои ќе се изнајде решение и во најскоро време ќе биде предложен нов кандидат за гувернер на Народната банка, од редот на професионалците, кој ќе добие консензуална политичка поддршка.

– Народната банка не смее да се остави без гувернер. Очекувам решение во најкус можен рок, што ќе биде во интерес на Македонија – потенцира Богов.

Мандатот на Богов како гувернер на НБРМ завршува на 20 мај.


Путин ја предаде неговата кандидатура за претседателските избори


Москва, 27 декември, 2017 - 14:41 (META) 

Претседателот на Русија, Владимир Путин и ја предаде на Централната изборна комисија документацијата за поднесување на кандидатура за претстојните претседателски избори.

Централната изборна комисија во понеделникот одби да ј регистрира кандидатурата на лидерот на опозицијата Алексеј Навални. Него кандидирањето му е оневозможено затоа што во 2013 година кривично е осуден за проневера од 16 милиони рубљи или околу 236.000 евра.

Путин на годишната конференција за медиумите во Москва одржана на средината на декември најави дека на изборите ќе излезе како самостоен кандидат.

Според истражувањата на јавното мислење во Русија, Путин моментално има поддршка од околу 80 отсто од граѓаните.

Претстојните избори за претседател на Русија ќе се одржат на 18 март, а предизборната кампања официјално започна на 18 декември.


Мицкоски со чиста мисла се кандидира за претседател на ВМРО-ДПМНЕ


Скопје, 21 декември, 2017 - 17:48 (META) 

Генералниот секретар на ВМРО-ДПМНЕ, Христијан Мицкоски ја објави својата кандидатура за претседател на партијата во пресрет на вонредниот конгрес што ќе се одржи утре и задутре во Валандово.

Мицкоски, во објавата на „Фејсбук“ вели дека ова за него лично е „една од најсериозните одлуки во животот“.

– Во изминатиот период голем дел од членството на ВМРО-ДПМНЕ, членови на партиската структура, членови на општинските и месните комитети, но и огромен број на обични граѓани ми изразија поддршка и охрабрување да преземам чекор. И јас, со чиста мисла, со голема верба, и со отворено срце ќе ја прифатам одговорноста да поднесам кандидатура за претседател на ВМРО-ДПМНЕ кој ќе се избере на 16. конгрес во Валандово. Ова за мене лично е една од најсериозните одлуки во животот, целосно разбирајќи ја тежината, честа, но и одговорноста да се води партијата која е вградена во кодот на македонецот и македонската држава и која ќе остане еден од главните темели на нашата татковина. Никогаш во животот не сум бегал од предизвици, а овој, можеби е мојот најголем, и јас тој го прифаќам – вели Мицкоски.

Тој порачува дека неговата кандидатура „е широко понудена рака за секој еден кој сака да биде дел од тимот кој ќе ја создава визијата и ќе го реализира сонот за победничка и економски напредна Македонија“.

– Јас имам план. За нова надеж за нашата татковина, силна и достоинствена – напиша Мицкоски на „Фејсбук“.


Таравари: Ако гостиварци не ми веруваат, се враќам на лекарската професија


Скопје, 10 септември, 2017 - 10:59 (META) 

Министерот за здравство во заминување, Арбен Таравари, во неделното интервју на „Радио Слободна Европа“ зборува за проблемите во ресорот што ги затекна и со кои се справуваше, како и за својата кандидатура за градоначалник на Гостивар.

– Сега е моментот да видам колку тежам и вредам во мојот град. Ако тие ми веруваат и ми дадат гласови, ќе знам дека вредам во политиката. Ако не ми дадат гласови и мислат дека не треба да продолжам во политиката, јас си имам златен занает – вели министерот за здравство во заминување.

Арбен Таравари, кој важи за истакнат стручњак во својата професија, верува дека во Министерството за здравство ќе има континуитет по него.

– Точно е дека нема да стигнам да ги видам првите резултати од тримесечното работење на директорите, меѓутоа јас мислам дека во Министерството ќе има континуитет и за тоа гарантирам, и во здравствените политики и во идеите што јас ги почнав во првите 100 дена, така што, кој било да е мој наследник, јас се надевам дека тој ќе продолжи по истиот пат, ќе се трасираат и ќе се очекуваат истите резултати што јас ги почнав во првите 100 дена, така што граѓаните нема да почувствуваат дека има некаква промена, само личноста ќе биде друга – вели Таравари.

Запрашан за смртните случаи во текот на неговото министерување, вклучително и за мртвороденчињата, Таравари вели дека комисијата формирана уште пред неговиот мандат, а потоа преоформена во нов состав, треба да даде решенија, односно препораки.

– Пред јас да дојдам за министер, имаше комисија која требаше да ги разгледува овие случаи и да направи одреден акциски план, меѓутоа, за жал, таа комисија не се имаше сретнато речиси две години. Сега направивме нова комисија која ќе се занимава само со смртта на доенчиња. Комисијата ќе даде одреден акциски план, кој Министерството ќе треба да го спроведе, сè со цел до 2021 година да имаме како предизвик да ја намалиме смртта на доенчињата до 20 отсто. Не само Министерството, туку и повеќе невладини организации во Македонија ни стојат на располагање за ова, бидејќи еден од индикаторите кој кажува колку е добра и стабилна здравствената политика во една држава е смртноста на доенчињата. Комисијата веќе е назначена, тие што поскоро треба да дадат одредени чекори и мерки што треба да ги преземеме ние како администрација за да ја достигнеме таа цел, да ја намалиме смртта на доенчињата за 20 отсто за четири години – вели министерот за здравство во неделното интервју за „Радио Слободна Европа“.


Хоџај: Косово годинава ќе поднесе барање за кандидатски статус во ЕУ


Брисел, 3 мај, 2017 - 19:40 (META) 

Косовскиот министер за надворешни работи, Енвер Хоџај, обелодени дека Косово планира во текот на оваа година да поднесе барање во Европската Унија за добивање кандидатски статус.

– Сакаме да ги видиме Србија, Македонија, Босна и Херцеговина и Црна Гора како дел од ЕУ, но сметаме дека треба да бидеме наградени за работата што ја работиме во нашата земја и во рамките на дијалогот, исто како и нашите колеги во Белград, што во моментов не е случај – изјави Хоџај во Брисел.

По новинарско прашање од „Танјуг“ што биле конкретните намери на косовскиот претседател Хашим Тачи кога ја поддржал идејата за соединување на Косово и на Албанија, шефот на косовската дипломатија одговорил дека „нема време за понатамошен разговор со новинарите“ и ја напуштил зградата на Европскиот парламент во Брисел.


Државјаните на Србија во странство, до утре треба да се пријават за гласање за претседателските избори


Белград, 10 март, 2017 - 13:17 (META) 

Државјаните на Србија кои престојуваат во странство, најдоцна до сабота, 11 март, треба да поднесат барање за да се запишат во единствениот избирачки список за на 2 април да имаат можност да гласаат на претседателските избори, јавува дописничката на „Мета“ од Белград.

Тоа барање се поднесува до амбасадите и до конзулатите на Србија во странство.

Увид во избирачкиот список може да се направи на https://birackispisak.mduls.gov.rs/javniportal

До денеска кандидатури за претседател до Републичката изборна комисија поднеле Александар Вучиќ, Војислав Шешељ, Вук Јеремиќ, Саша Јанковиќ, како и Бошко Обрадовиќ.


Јеремиќ ја поднесе претседателската кандидатура


Белград, 9 март, 2017 - 15:30 (META) 

Поранешниот шеф на српската дипломатија, Вук Јеремиќ, денеска на Републичката изборна комисија ѝ предаде околу 15.000 потписи за поддршка на неговата претседателската кандидатура.

Јеремиќ рече дека одлучил да се кандидира за претседател затоа што во Србија сè поголем е јазот помеѓу богатите и сиромашните и затоа што е потребно да се промени системот кој престанал да биде во служба на граѓаните. Тој изјави дека симболично ја предал кандидатурата на 9 март, на денот кога во 1991 година биле одржани масовни антирежимски демонстрации и, како што истакна, тој ден „симболизира поделба и внатрешни конфликти што не смеат повторно да ѝ се случат на Србија“.

Кандидатурите за претседателските избори во Србија досега ги предадоа лидерот на Српската напредна партија и актуелниот премиер на Србија, Александар Вучиќ, поранешниот омбудсман како кандидат на проевропската опозицијата, Саша Јакновиќ, и лидерот на радикалите Воислав Шешељ.

Републичката изборна комисија денеска одреди дека на 2 април ќе се гласа на 8.253 избирачки места во Србија, додека избирачките места на Косово и во странство ќе бидат утврдени до 12 март.


Чедомир Јовановиќ најави поддршка за Саша Јанковиќ


Белград, 7 март, 2017 - 23:10 (META) 

Лидерот на Либерално-демократската партија на Србија, Чедомир Јовановиќ, вечерва најави дека неговата партија ќе ја поддржи кандидатурата на Саша Јанковиќ, јави дописникот на „Мета“ од Белград.

Тој за телевизија Н1 рече дека на претседателството на партијата ќе предложи да го поддржат Јанковиќ и изрази уверение дека тоа и ќе се случи.

– Тоа ќе го изнесам на претседателството на партијата и верувам дека тоа и ќе се случи – рече Јовановиќ.

Кандидатурата на Јанковиќ досега ја поддржаа Демократската партија, која ја предводи Драган Шутановиќ и Нова странка на чело со некогашниот премиер Зоран Живковиќ, додека поранешниот претседател на Србија, Борис Тадиќ, го поддржа Вук Јеремиќ.

Претседателските избори во Србија се закажани за 2 април.


Шешељ ја предаде кандидатурата за претседател на Србија


Белград, 6 март, 2017 - 16:35 (META) 

Еден од функционерите на Српската радикална странка (СРС), денеска ги предаде потписите за поддршка на претседателската кандидатура на лидерот на СРС, Војислав Шешељ, на Републичката изборна комисија (РИК), јавува дописничката на „Мета“ од Белград.

Кутијата со 14.000 потписи била излепена со плакати со ликот на Шешељ и со натпис „Најдобриот за претседател“.

Шешељ е трет кандидат што ги предаде потписите, а пред него тоа го направија и актуелниот премиер, Александар Вучиќ, и народниот правобранител, Саша Јанковиќ.

Претседателските избори се распишани за 2 април, а ако во првиот круг никој не го освои мнозинството, вториот круг ќе биде одржан на 16 април.


Томислав Николиќ повторно во трка за претседател на Србија


Белград, 16 февруари, 2017 - 9:27 (META) 

Претседателот на Србија, Томислав Николиќ одлучи да се кандидира на претстојните претседателски избори иако кандидатурата ја најави и премиерот и лидерот на Српската напредна странка (СНС), Александар Вучиќ.

Како што пренесоа српските и руските медиуми, Николиќ тоа го објавил на својот 65 роденден.

Тој порано изјави дека не е изненаден со тоа што претседателството на СНС, едногласно го поддржa Александар Вучиќ, но избегна да одговори на прашањето на новинарите дали се откажал од кандидатурата, изјавувајќи само „ќе се договориме“.

Николиќ синоќа приреди прием по повод Денот на државноста на кој се појавил и Вучиќ, но си заминал по говорот на Николиќ.