!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ВМРО-ДПМНЕ во Карпош го поддржува Стевчо Јакимовски, во Кратово – Мите Андоновски


Скопје, 15 септември, 2017 - 17:34 (META) 

ВМРО-ДПМНЕ попладнево го објави комплетниот список на сите кандидати за градоначалници со кои ќе настапи на локалните избори. Кандидатите, инаку, беа соопштувани во изминатите денови на повеќе прес-конференции.

Во четири општини партијата ќе поддржи други кандидати и го повика членството да гласа за нив. Така, во Карпош партијата ќе го поддржи актуелниот градоначалник Стевчо Јакимовски, кој ќе настапи како кандидат на ГРОМ, а во Кратово ќе го поддржи кандидатот на Социјалистичка партија на Македонија и актуелен градоначалник, Мите Андоновски.

Во општина Старо Нагоричане, ВМРО-ДПМНЕ ја поддржува кандидатурата на Елена Јакимовиќ, кандидат на Демократска партија на Србите во Македонија, а во Чучер – Сандево независниот кандидат Јован Пејковски.


ВМРО-ДПМНЕ ги објави последните девет кандидати за градоначалници


Скопје, 15 септември, 2017 - 16:52 (META) 

ВМРО-ДПМНЕ ги договорило и последните девет кандидати за градоначалници, соопшти денеска Христијан Мицкоски, генералниот секретар на партијата.

Во Центар нивниот адут е кошаркарот Дејан Јовановски, во Илинден и во Македонски Брод тоа се актуелните градоначалници, Жика Стојановски и Милосим Војнески, додека во Делчево и во Берово партијата оди со нови кандидати и не им даде доверба на сегашните градоначалници. Во Делчево за градоначалничкото место ќе се бори Иван Соколов, а во Берово – Никола Атанасов.

Во Могила партијата ќе настапи со Стевче Пивковски, во Лозово со Јордан Илиевски, а во Зелениково со Александар Манев.

Партијата ќе настапи со свои градоначалнички кандидати во општините Кичево и Теарце, па така во Кичево нејзин кандидат ќе биде Влатко Сајкоски, а во Теарце – Војо Гогоски.

– Овие кандидати како и досега промовираните се најквалитетните решенија, работливи луѓе, посветени на работата, докажани во браншата од која доаѓаат, кои уживеат голем углед и почит во средината на живеење. Граѓаните на 15 октомври не гласаат само за кандидати, туку и за концепт на работа, кој го гарантира ВМРО-ДПМНЕ и нејзините кадри, испреплетен со голема посветеност, работа и насоченост кон развој – рече Мицкоски.


ДУИ утврди кандидати за градоначалници, Арифи повторно во трка за Тетово


Тетово, 14 септември, 2017 - 18:59 (META) 

Централното претседателство на ДУИ ги утврди кандидатите за градоначалници во општините каде оваа партија ќе учествува на претстојните локални избори на 15 октомври.

Градоначалничката на Тетово, Теута Арифи, повторно ќе се кандидира, а во трка за втор мандат е и актуелниот градоначалник на Гостивар, Невзат Бејта.

Градоначалниците на Дебар, Ружди Лата, како и на Кичево, Фатмир Дехара, исто така ќе се кандидираат за втор мандат.

Кандидат за градоначалник на Струга ќе биде Рамиз Мерко, а на Сарај – Блерим Беџети.

Од партијата информираат дека кандидати за градоначалници избрале и за општините Арачиново, Желино, Теарце, Сарај, Липково, Чаир, Шуто Оризари, Студеничани, Боговиње, Врапчиште, Пласница, Долнени.

ДУИ, за општина Брвеница, нема да номинира свој кандидат, туку ќе ја поддржи независната кандидатура на актуелниот градоначалник, Енвер Пајазити.

За Битола, Охрид и за Гази Баба, ДУИ ќе учествува со заеднички листи за советници со политички партии од албанскиот блок.

Портпаролот на централниот изборен штаб на ДУИ, Арбер Адеми, изјави дека изборите на 15 октомври се многу значајни, бидејќи граѓаните на нив непосредно избираат своите претставници кои треба потоа да најдат решенија за нивните секојдневни потреби.


Јохан Тарчуловски е градоначалнички кандидат на ВМРО-ДПМНЕ во Кисела Вода


Скопје, 14 септември, 2017 - 15:46 (META) 

Јохан Тарчуловски во Кисела Вода, пратеникот Зоран Илиоски во Битола, а актуелниот Илчо Захариев во Штип. Тоа се дел од имињата што како градоначалнички кандидати извршниот комитет (ИК) на ВМРО-ДПМНЕ му ги препорачал на централниот комитет на партијата, рече денеска поранешниот технички премиер Емил Димитриев, член на ИК.

Како што рече тој, во игра за Бутел е Дарко Костовски, во Виница – Мартин Павлов, а во Босилово, Василево, Ново Село и Свети Николе најверојатно ќе бидат кандидирани актуелните градоначалници Љупчо Колев, Ванчо Стојанов, Блажо Велков и Зоран Тасев.

И актуелниот градски татко на Кочани, Ратко Димитровски, повторно ја добива довербата на ВМРО-ДПМНЕ за локалните избори, исто како и Жанета Чаушевска во Градско, Ѓоко Стрезовски во Ресен, Иван Франгов во Гевгелија и Дарко Митевски во Македонска Каменица.

Во Охрид партијата ќе го кандидира ортопедот Митко Тилев, а во Дојран ќе настапи со актуелниот градоначалник Борче Стамов.

Актуелни градоначалници што ќе бидат кандидирани за таа функција се и Арсенчо Алексовски во Крива Паланка, Блаже Станков во Зрновци, Стефче Трпковски во Сопиште,  Игор Трајковски во Дебрца, Љупчо Блажевски во Демир Хисар, Тони Коцески во Јегуновце, Игор Поповски во Пехчево и Тони Тоневски во Пробиштип.


Објавен огласот за нов јавен обвинител, почнуваат да течат роковите за пријавување


Скопје, 14 септември, 2017 - 9:48 (META) 

Собранието на Република Македонија денеска го објави огласот за именување нов државен јавен обвинител, по разрешувањето на Марко Зврлевски од оваа функција.

Со ова и официјално почнува да тече рокот од 15 дена за пријавување на заинтересираните кандидати за оваа функција.

„Заинтересираните кандидати кои ги исполнуваат условите предвидени со членот 44, ставови 1 и 2 од Законот за јавно обвинителство (да е државјанин на Република Македонија, активно да го владее македонскиот јазик, да е работоспособен и да има општа здравствена способност, да има стекнато универзитетска диплома за дипломиран правник во Република Македонија или нострифицирана диплома од странство, да има положено правосуден испит во Република Македонија и да има работно искуство од најмалку осум години со потврдени резултати на правни работи по положениот правосуден испит, или редовен или вонреден универзитетски професор кој предавал повеќе од десет години правен предмет од правосудната практика), пријавите со потребните документи треба да ги поднесат до Собранието на Република Македонија, во рок од 15 дена од денот на обајвувањето на одлуката во ’Службен весник’“, пишува во огласот, потпишан од претседателот на Собранието, Талат Џафери.

oglas za imenuvanje na javen obvinitel 2

Рокот за пријавување на заинтересираните кандидати е 15 дена, пишува во огласот потпишан од претседателот на Собранието, Талат Џафери

Инаку, Собранието го изгласа распишувањето на огласот за именување нов државен јавен обвинител пред точно една недела.

Според Законот, по пријавувањето на кандидатите, Владата мора да поднесе барање за мислење до Советот на јавни обвинители, кое има обврзувачка улога.

Советот има рок од 15 дена од денот на приемот на барањето од Владата да даде позитивно или негативно мислење за сите пријавени кандидати. По тоа, до Собранието доставува предлог за именување јавен обвинител со кандидатите за кои Советот дал позитивно мислење.

Доколку Советот на јавни обвинители од оправдани причини во рок од 15 дена не достави мислење, добива дополнителен рок од 15 дена, а ако и во овој рок Советот не достави мислење, се смета дека мислењето е позитивно.

Во случај Советот да не даде позитивно мислење за ниту еден од пријавените кандидати, Владата не може да достави предлог за именување јавен обвинител и може да му предложи на Собранието да го повтори огласот.

За именувањето, како и за разрешување државен јавен обвинител, Собранието одлучува со просто мнозинство, односно со 61 глас.

Засега во јавноста своите кандидатури ги најавија адвокатите Александар Тортевски, Звонко Давидовиќ, Александар Наков, Сејфула Османи и нотарката Лорија Ваневска.


ВМРО-ДПМНЕ во Скопје и во Гази Баба ќе ги кандидира Коце Трајановски и Тони Трајковски


Скопје, 13 септември, 2017 - 16:49 (META) 

ВМРО-ДПМНЕ најверојатно ќе ги кандидира актуелните градоначалници на Скопје и на општина Гази Баба, Коце Трајановски и Тони Трајковски, за свои кандидати за првите места во главниот град и во општината за локалните избори, соопшти Христијан Мицкоски, генерален секретар на ВМРО-ДПМНЕ.

Како што соопшти тој, партијата и во општина Росоман најверојатно ќе настапи со сегашниот градоначалник, Стојанче Лазов, а за градоначалник на општина Дебар ќе го кандидира лекарот Драган Клопчески.

Како што соопшти Мицкоски, тоа се имињата на кандидатите што централниот комитет на ВМРО-ДПМНЕ му ги предложил на партискиот извршен комитет, но според партиската практика, може да се очекува дека тие ќе бидат и официјално прогласени за кандидати вечерва.

Имињата на Трајановски и на Трајковски се слушаа во „бомбите“ и тоа во снимките за комплексот „Космос“ на Фијат Цаноски, во кој Груевски кажува дека и обајцата биле вознемирени да не бидат прогласени за виновни за целата постапка околу уривањето на комплексот. Во разговорите, пак, на Зоран Ставрески и на Гордана Јанкулоска, Трајановски се споменува во контекст на претседател на ЗЕЛС, од кого битолскиот градоначалник бара да му помогне државата да ги покрие долговите за превоз на ученици, а Јанкулоска дури и вели дека „Коце дава поддршка на сите матни работи“.


ВМРО-ДПМНЕ во Аеродром и во Валандово ќе ги кандидира сегашните градоначалници


Скопје, 7 септември, 2017 - 15:01 (META) 

Со одлука на Централниот комитет на ВМРО-ДПМНЕ, партијата како свои кандидати за градоначалници на општините Аеродром и Валандово на локалните избори ќе ги кандидира актуелните градоначалници, Ивица Коневски и Николче Чурлиновски, соопшти на прес-конференција Христијан Мицкоски, генералниот секретар на ВМРО-ДПМНЕ.

Тој рече дека партијата ќе оствари убедлива победа на локалните избори и најави и предвремени парламентарни избори по „победата на ВМРО-ДПМНЕ на локалните избори“.

– Граѓаните за овие три месеци најлесно можеа да ја увидат разликата помеѓу СДС и ВМРО-ДПМНЕ. Токму локалните избори и убедливата победа на ВМРО-ДПМНЕ ќе отворат можност заедно со граѓаните да ставиме крај на ова лудило и на деструктиција на СДС. Час поскоро по убедливата победа на ВМРО-ДПМНЕ на локалните избори, ќе почне процесот за предвремени парламентарни избори, со кои ќе се спречат последиците од штетни политики што СДС ги води и во сферата на економијата, земјоделството и во локалниот развој, но најважно од сè, во насока на разнебитување на Република Македонија – рече Мицкоски.


Сè уште нема независни кандидати за градоначалници, рокот истекува за 9 дена


Скопје, 5 септември, 2017 - 10:27 (META) 

До Државната изборна комисија 27 лица поднеле листи за собирање потписи за независни кандидати за градоначалник, а за советнички листи поднеле 47. До општинските изборни комисии сè уште никој не поднел кандидатура за независен градоначалник за претстојните локални избори закажани на 15 октомври.

Рокот до кој тие што ги собрале потребните потписи може да поднесат кандидатура за градоначалник истекува на 14 септември, вели за „Мета“ портпаролката на ДИК, Љупка Гугучевска.

– Поднесени кандидатури за независни градоначалници нема сè уште. Досега се собираа потписите за кои рокот истече синоќа на полноќ. Тие што имаат собрано потписи имаат рок до 14 септември да ги поднесат кандидатурите или да се премислат – вели Гугучевска.

Од ДИК информираат дека сè уште ги собираат податоците за тоа колку од тие што поднеле листи ги имаат собрано законски потребниот број потписи.


Коцевски во Велес, Марин во Аеродром – СДСМ објави дел од кандидатите за градоначалници


Скопје, 2 септември, 2017 - 11:58 (META) 

СДСМ ги објави имињата на кандидатите за градоначалници за дел од општините за престојаните локални избори закажани за 15 октомври.

Во Општина Аеродром кандидат на владејачката партија ќе биде Златко Марин, во Бутел – Велимир Смилевски, во Гази Баба ќе се кандидира Борче Георгиевски, за Ѓорче Петров кандидат е Александар Наумоски, а во Кисела Вода СДСМ за свој кандидат го предложи Филип Темелковски.

Премиерот Зоран Заев вчера при посетата на Арачиново соопшти дека претставник на СДСМ на овие избори во таа општина ќе биде Милитие Халими.

– Во Арачиново ќе настапиме со член на СДСМ, почитуван во општеството. Ќе настапиме со жена Албанка, Милитие Халими, која со семејството потекнува од ова место. Утврдивме 70 отсто од кандидатите на СДСМ за градоначалници, а во тек се преговорите со актуелните, но и за потенцијални коалициони партнери – рече Заев.

Во Штип кандидат ќе биде сегашниот потпретседател на партијата, Благој Бочварски, кој својата кандидатура ја објави на „Фејсбук“.

„Ќе бидам идниот градоначалник на Штип, а градот ќе биде вистински центар на Истокот и најубавиот град во Македонија. Мојот предизвик е да ги обединам сите граѓани, без разлика на партиската и на етничката припадност“, напиша Бочварски.

Во Валандово е предложен Перо Костадинов, во Велес – Аце Коцевски, за Демир Капија е предложен Лазар Петров, во Крушево се кандидира Томче Христоски, во Македонска Каменица – Соња Стаменкова, за Неготино – Тони Делков, во Охрид градоначалник би можел да биде Јован Стојановски, во Пласница – Шресим Ајроски, во Ресен во трката влегува Живко Гошаревски, во Сопиште – Далибор Богдановски, за Старо Нагоричане кандидат ќе биде Жаклина Јовановска, за Чашка – Горан Стојановски.

Во Струмица, каде досега три мандати градоначалник беше сегашниот премиер Зоран Заев, ќе биде предложен Коста Јаневски, кој ја извршува функцијата в.д. градоначалник по предвремените парламентарни избори во декември минатата година.


ВМРО-ДПМНЕ ги објави имињата на неколку кандидати за градоначалници


Скопје, 16 август, 2017 - 16:47 (META) 

Генералниот секретар на ВМРО-ДПМНЕ, Христијан Мицкоски информираше дека ИК на ВМРО-ДПМНЕ донел одлука да му ги предложи на Централниот комитет, кандидатите за градоначалници за општините Струмица, Петровец, Велес, Кривогаштани и за Куманово.

Тој додаде дека „ВМРО-ДПМНЕ е во полна кондиција, заокружувајќи ги своите подготовки за нова голема изборна победа на локалните избори.“

– За Струмица, кандидат за градоначалник е Марјан Бајрактаров, орален хирург, почитуван сограѓанин на струмичани, долгогодишен партиски активист, претседател на Општинскиот комитет и член на Централниот комитет на ВМРО-ДПМНЕ. За Петровец, кандидат е актуелниот градоначалник Борче Митевски, за Велес, кандидат е актуелниот градоначалник Славчо Чадиев, за Кривогаштани, кандидат е актуелниот градоначалник Тони Заткоски, за Куманово, кандидат е пратеникот и поранешен член на Извршниот комитет на ВМРО-ДПМНЕ, Зоран Ѓорѓиевски – изјави Мицкоски.

Тој додаде дека „за локалните избори ВМРО-ДПМНЕ подготвува програми за општините кои се темелат на реалните потреби на граѓаните и има за цел подобрување на нивното секојдневие, инфраструктурата и стандардите на живот.“