Заев со Ахмети денеска ќе разговара за консензуален претседателски кандидат


Скопје, 18 февруари, 2019 - 10:02 (META) 

Зоран Заев како претседател на СДСМ и во име на коалицијата денеска ќе разговара со претседателот на ДУИ, Али Ахмети за можен заеднички, односно консензуален кандидат за претседателските избори.
Средбата ќе се одржи денеска во 12.30 часот во Клубот на органите на државната управа (порано познат како Клуб на пратениците) .

Претходно ДУИ реши на претседателските избори да излезат со свој кандидат, но сепак кажа и дека е отворена за  предлозите што би дошле од СДСМ.

Синоќа СДСМ со партиите од нејзината коалиција одржаа прв состанок на тема консензуален претседателски кандидат. На средбата не беше претседателот на ЛДП, Милевски кој најави дека на изборите ќе одат со свој кандидат.

Според соопштението од средбата, била постигнатаначелна согласност на лидерско ниво партиите од коалицијата предводена од СДСМ да застанат зад заеднички кандидат за претседател на државата, како и заеднички да настапат на претстојните претседателски избори.

Коалициските консултации за кандидатот продолжуват.


Гордана Силјановска-Давкова: Противничката на Договорот од Преспа како можен кандидат за претседател


Скопје, 6 февруари, 2019 - 11:28 (META) 

Деновиве доста се дискутира околу можноста Правниот факултет при УКИМ одново да даде кандидат за станар во претседателската вила на Водно, откако актуелниот Ѓорѓе Иванов почнува да си ги пакува своите лични предмети, заради завршување на претседателскиот мандат. Имено, се говори за тоа дека не само локацијата од каде се бира нов носител на највисоката функција во државата е истоветна на онаа од пролетта 2009 година, кога со потписи на своите колеги Иванов стана кандидат на ВМРО ДПМНЕ, туку дека сега ќе се јави своевиден „копирајт“ во методот на кандидирање. Се собираат потписи на колегите на потенцијалната кандидатка – професорката по уставно право  на правниот факултет „Јустинијан Први“, Гордана Силјановска-Давкова. Таа е наводно изненадена и трогната од кандидатурата и ветува дека ќе размисли.

Иако, конкурсот на партијата ВМРО ДПМНЕ е практично затворен на 1 февруари, а гласањето за кандидатите ќе биде тајно во средината на месецов во Струга, јасно е дека Силјановска – Давкова предолго е на браникот на политиките на оваа партија за да не биде фаворит, се разбира, ако се кандидира. И овојпат, при можната кандидатура, како кај Иванов, би се одело на тоа дека потенцијалната кандидатка не е поврзана со политиката (!), па оттаму треба во гласачката јавност да се создаде слика дека се јавува како квалификувана личност која нема партиско минато.

Ова последното секако не е точно, бидејќи Силјановска-Давкова во време на стартот на транзицијата кај нас, беше член на првата политичка Влада на РМ, направена веднаш по кусиот опстанок на т.н. експертска влада на Кљусев. Во оваа политичка Влада влегоа и некогашните членови на Младинската напредна партија (некогашниот Сојуз на социјалистичката младина), која се спои со Сојузот на реформски сили на Македонија на Стојан Андов, а потоа станаа Либерална Партија (1990). Како и да е Силјановска-Давкова доби министерство без ресор (1992 – 1884), но беше член и на телото кое работеше на Уставот на РМ (Уставна комисија на Собранието од 1991 г.).

Во она време, а и сега се мислеше дека Владата на Црвенковски ја прави шефот на државата – Глигоров и дека истата е „скопска“, односно дека министри станаа главно деца на негови политички пријатели (Крсте Црвенковски, Владо Малески …), во чиј круг може да се стави и снаата на покојниот социјалистички функционер Павле Давков.

Професорката е родена во Охрид во мај 1955 година. Основно и средно образование завршила во Скопје, на Правен се запишала во 1973 година, а истиот го има завршено во 1978 година. Нејзината прва работна функција е асистент на професорот Владимир Митков , по предметот Меѓународни политички системи.

Докторирала во 1993 година на Универзитетот во Љубљана. Основач е и на првиот Совет на европско движење во Македонија. Во периодот од 2012 до 2016 година  беше и член на Веницијанската комисија за малцински прашања. Денес е редовен професор на Правниот факултет во Скопје, на Институтот за правни и политички науки. Во официјалната биографија стои дека е автор на над 200 научни трудови од областа на уставното право, како и член на бројни домашни и меѓународни институти и правни асоцијации.

Нејзиниот политички став стана погласен во многу прилики на почетокот на милениумот, а особено во миговите кога беше против новата територијална поделба на Македонија (2004). Во основа текстовите што покажуваат наклонетост кон нејзината евентуална кандидатура главно ја третираат како еден од лидерите на професорскиот пленум. Таа беше дел и од протестот на професорите пред Собранието, каде одржа одличен говор зошто предложеното законско решение е погрешно, ја критикуваше затвореноста на министерството за образование кое не ги консултираше експертите, а не се согласуваше ниту со недостигот на концепт како да се развива факултетското образование.

Силјановска гостуваше во десетина емисии во кои цврсто застана против новиот Закон за употреба на јазиците со кој дефакто се воведува двојазичност во Македонија на повеќе нивоа, вклучувајќи ги сите институции. Таа е еден од фронтмените на отпорот кон овој акт, заедно со професор Билјана Ванковска и академик Катица Ќулафкова.

Секако, Силјановска-Давкова се противеше на инсинуациите дека е „албанофоб“ и во своите настапи користеше исклучително правни аргументи, особено за постапката во која беше донесен Законот со европско знаменце.

За неа Преспанскиот договор е неприфатлив и „покажува дека Македонија е земја во распаѓање која се ставила во подредена улога на Грција со дозвола да ѝ се мешаат дрско во внатрешните прашања“.

Повеќе за профилот на Гордана Силјановска-Давкова може да прочитате во Вистиномер.


Алијанса за Албанците: Одлуката на ДУИ да излезе со свој кандидат е за поздравување


Скопје, 31 јануари, 2019 - 10:20 (META) 

Алијанса за Албанците (АА) денеска ја поздрави вчерашната одлука на Централното претседателство на Демократската унија за интеграција (ДУИ) да излезе со свој кандидат на претседателските избори.

АА порача дека „ДУИ го прифати предизвикот на Зијадин Села за претседателските избори“ но ја поттикна владејачката партија да го прифати и предизвикот за парламентарни избори“.

„Посакуваме кандидатот за претседател од редовите на ДУИ да биде Албанец! Не би сакале да веруваме дека оваа нивна одлука дојде како последица на затворената врата и презир кон ДУИ во однос на нивната лажна идеја за консензуален кандидат, денес со СДСМ, вчера со ВМРО-ДПМНЕ“, вели АА.


Влатко Ѓорчев со претседателски амбиции и политички стаж без криминален багаж


Скопје, 31 јануари, 2019 - 10:16 (META) 

Пратеникот на ВМРО-ДПМНЕ, Влатко  Ѓорчев, е првиот кој се охрабри јавно да ги соопшти своите амбиции да влезе во битката за шеф на државата. Тој уште пред една недела (23.01.2019), објави дека се пријавил на конкурсот на ВМРО-ДПМНЕ за претседателски кандидат, кој трае до денеска, пишува „Вистиномер“.

Ѓорчев е дипломиран политиколог, кој во август минатата година наполни 40 години и со тоа формално го исполни уставниот услов за да може да се кандидира за претседател на државата. Оженет е со Сузана Питри, Американка од Охајо и имаат четири деца: Марта (8), Филип (6), Никола (5) и Катерина (2).

Иако е млад, има долг политички стаж повеќе од 20 години. Член на ВМРО-ДПМНЕ е уште од 1996 година. Пошироката јавност првпат слушна за Ѓорчев на почетокот на 1997 година за време на студентско-средношколските протести против употребата на албанскиот јазик на Педагошката академија во Скопје. Некаде во тој период започнува и неговиот пробив во политиката, најпрво низ структурите на својата матична партија ВМРО-ДПМНЕ, а потоа и како партиски портпарол (2001 -2004).

Лојален на сите лидери на ВМРО-ДПМНЕ

Ѓорчев веќе 13 години е пратеник во Собранието на Република Македонија, учесник е во пет собраниски состави. За првпат е избран за пратеник на изборите во 2006 година, а потоа следат уште четири мандати  во 2008, 2011, 2014 и 2016 година. На сите избори од 2006 година наваму е носител на кандидатска листа во третата или во шестата изборна единица и има заслуги за изборните победи на ВМРО-ДПМНЕ.

Сепак, освен пратеничкиот мандат, немаше други функции во текот на едондецениското владеење на ВМРО-ДПМНЕ и не беше дел од ниту една влада предводена од Никола Груевски.

Сиве овие години Ѓорчев е ревносен бранител на политиките на ВМРО-ДПМНЕ. Неговите ставови секогаш биле во линија на генералната партиска политика независно кој стоел на партиското кормило. Тој со иста препознатлива жестина ги застапуваше партиските ставови како портпарол во времето на Љубчо Георгиевски, како пратеник во Собранието за време на 11-годишното владеење на Груевски, а остана лојален и на новото раководство предводено од Христијан Мицкоски, а краток период беше в.д. координатор на пратеничката група.

Голема „километража“, но без криминален багаж

Влатко Ѓорчев има голема километража во политиката и, иако може да се спори со неговите ставови, реториката, па и театралноста со која знае да ги обои настапите, тој, сепак, е еден од ретките експонирани кадри на ВМРО-ДПМНЕ кој на грбот нема криминален багаж, а, исто така, не можат да му се залепат етикети дека е антиевропски настроен.

Сепак, јавноста му забележува што никогаш не се одважи да се дистанцира или, пак,  огради од штетните политики на својот поранешен лидер Никола Груевски.

Но исто така, треба да се каже и дека Ѓорчев одигра исклучително позитивна улога за време на крвавиот собраниски инцидент од 27 април 2017 година, кога несебично и со жив штит ги бранеше нападнатите колеги пратеници и помогна во нивното спасување и извлекување од Собранието. За неговата постапка во Парламентот доби јавна благодарност од пратениците од СДСМ и од ДУИ. Социјалдемократот Хари Локвенец на едно од рочиштата од судењето поврзано со овој настан сведочеше дека „Ѓорчев се однесувал кон нив како кон сопствените деца, обидувајќи се да ги заштити од сите опасности“.

Повеќе за биографијата на Влатко Ѓорчев може да прочитате во Вистиномер.


Милошоски го поддржува Ѓорчев за претседателски кандидат на ВМРО-ДПМНЕ


Скопје, 24 јануари, 2019 - 11:48 (META) 

Пратеникот од ВМРО-ДПМНЕ, Антонио Милошоски ја поддржа кандидатурата на неговиот колега Влатко Ѓорчев за претседател на државата. Тој на својот „Фејсбук“ профил му честиташе на Ѓорчев за мотивираноста и му вети дека ќе гласа за него на конвенцијата на партијата во Струга.

„Најбитното за ваквата поддршка е тоа што со Ѓорчев споделуваме блиски гледишта за надворешно-политичките приоритети на Република Македонија (втемелени на македонско-американското стратешко партнерство што го потпишав во 2008 година, стратешкото партнерство со Турција, партнерските односи со државите членки на ЕУ и определбата за проактивна мултилатерална дипломатија во ОБСЕ, ОН и Советот на Европа). Го ценам тоа што Влатко Ѓорчев како личност цврсто се залага за промоција на семејните вредности како темелна основа во општеството, а како пратеник одлично знае што значи да се биде непосредно избран од граѓаните, како темелна вредност во демократијата“, вели Милошоски.

Тој го оцени како правилен ставот на Ѓорчев да не гласа за, како што вели, незаконскиот референдум, „каде мнозинството Македонци јасно беа против октроираниот проект на Заев за менување на уставното име на Македонија“.

Милошоски е убеден дека Влатко Ѓорчев има потенцијал да ја добие поддршката на најголемиот број на делегати на конвенцијата на ВМРО-ДПМНЕ на 16 февруари.


Влатко Ѓорчев, можен кандидат на ВМРО-ДПМНЕ за претседател


Скопје, 23 јануари, 2019 - 13:13 (META) 

Пратеникот Влатко Ѓорчев на претстојната конвнција на ВМРО-ДПМНЕ ќе биде еден од кандидатите кои ќе претендираат да бидат кандидат од редовите на ВМРО-ДПМНЕ на претстојните претседателски избори. Ѓорчев ова го потврдил за „Независен весник“, а се очекува денеска да одржи прес-конференција. Верува дека со искуството и знаењето што го има, ќе успее да ги придобие гласовите на граѓаните.

Јавниот оглас во најголемата опозициска партија ВМРО-ДПМНЕ за наследник на Ѓорге Иванов, трае до крајот на месецот.


Заев: За десет личности се прават анкети кој би бил најдобар кандидат за претседател


Скопје, 22 јануари, 2019 - 14:08 (META) 

Централниот одбор на СДСМ ќе се одржи во петок, а дебатата за консензуален кандидат е во тек, одговори денеска на новинарско прашање премиерот Зоран Заев во врска со името за консензуален претседател, на прес-конференцијата во Владата посветена на проекти во патната инфраструктура.

Тој додаде дека, како партија и коалиција која сака да победи на претседателските избори, прават анкети кој кандидат најдобро ќе помине кај граѓаните и дека тој треба да биде прифатлив за сите.

„За повеќе од десет имиња се прави истражување. Одиме чекор по чекор, дебатираме, го слушаме ставот на граѓанските организации, на граѓаните за да најдеме личност која е најприфатливо решение за сите“, рече Заев.

Тој додаде дека доколку се оди само на претседателски избори тие треба да поминат покомфорно за граѓаните, за да не се наршат процесите што течат во државата. Премиерот го повтори неговиот познат став дека лично е против парламентарни избори заедно со претседателските.

„Изминатиот период донесовме тешки одлуки, и граѓаните сега треба да ги соберат плодовите од тие одлуки. Но треба да се слушне и партијата, сите анкети покажуваат дека СДСМ и Коалицијата е во предност и оттука избори ни одговараат. Тоа значи обезбеден четиригодишен мандат, мнозинство во парламентот, но ќе трпи државата“, рече Заев и додаде дека сигурно е дека заедно со претседателските избори ќе има локални за избор на градоначалник во Охрид, Ново Село и Дебар.

Прашан за Законот за јазици кој е даден на Венецијанска комисија, премиерот одговори дека како и до сега сите препораки ќе бидат имплементирани за да се отстрани секој сомнеж на граѓаните.


Заев: Посакувам консензуален кандидат за претседател, прифатлив за мнозинството граѓани


Скопје, 4 јануари, 2019 - 14:35 (META) 

До сега не сме разговарале за името на консенсузалниот претседател, да заврши процесот во парламентот поврзан со уставните измени и потоа ќе отвориме дебата, одговори премиерот Зоран Заев на новинарско прашање за тоа дали со ДУИ разговарале за можните имиња кои се вртат во јавноста на кандидат за претседател како Бујар Османи, Никола Димитров, Радмила Шекеринска.

„Сакам консензуален кандидат за претседател зад кој ќе застанеме сите. ДУИ не е единствениот коалиционен партнер, ги има повеќе. Верувам дека ќе изнајдеме сила да избереме кандидат, кој ќе биде прифатливо решение за мнозинството граѓани“, одговори Заев.

Тој потврди дека денеска во 16 часот ќе оставри средба со Билал Касами од БЕСА со кого ќе разговараат за поддршка за уставните измени.

„Сугестиите на двете албански опозициски партии делуваа позитивно. Нивните сугестии се вградени во амандманите, сакам да слушнам што ги загрижува“, рече накратко Заев.


Aхмети: На претседателските избори ќе бараме консензуален претседател


Скопје, 8 ноември, 2018 - 12:28 (META) 

Лидерот на ДУИ, Али Ахмети, на гостување во емисијата „Клан дебат“ на телевизијата „Клан Македонија“, кажа дека на следните претседателски избори кои треба да се одржат ќе побараат консензуален претседател.

На прашање дали на претседателските избори ДУИ повторно ќе игра на картата на консензуален претседател Ахмети изјави дека тој е нивен став кој го објавиле и ќе го бранат.

– Секако ова е еден од ставовите кои сме ги објавиле и ќе го браниме со фанатизам и ќе го промовираме на сите простори тука во Македонија. Ние сакаме консензуален претседател, да седнеме, да разговараме, да се усогласиме – рече Ахмети.

Ахмети исто така кажа дека веќе има и имиња за кандидати консензуален претседател, но се уште е рано да се збори за тоа.

– Секако дека може да зборуваме и со имиња, но се уште е рано за тоа – рече Ахмети.


Пучдемон ќе мора да се врати во Каталонија за да биде шеф на регионалната влада


Мадрид, 28 јануари, 2018 - 12:01 (META) 

Уставниот суд на Шпанија едногласно одлучил дека поранешниот каталонски лидер, Карлес Пучдемон мора да се врати во земјата и да биде присутен во регионалниот парламент за да може повторно да биде кандидат за шеф на владата на Каталонија, јавуваат светските медиуми.

Уставниот суд навел дека седницата на каталонскиот парламент, која е закажан за во вторник, ќе биде откажана доколку Пучдемон, кој е во Брисел, се обиде да биде избран во отсуство.

Судот исто така одлучил дека Пучдемон мора да бара судска дозвола за да присуствува на седницата.

Каталонскиот парламент го предложи Пучдемон за канадидат за претседател на Генералилетот – каталонската влада, иако е тој надвор од земјата.

Тој се засолни во Брисел во октомври, минатата година, стравувајќи дека шпанските власти можат да го уапсат поради референдумот за назависност на Каталонија.