Димитров на средби со Ди Карло и со колешките од Канада и Норвешка


Брисел, 12 јули, 2018 - 17:02 (META) 

На вториот ден на самитот на НАТО во Брисел, македонскиот министер за надворешни работи Никола Димитров учествуваше на состанокот на земјите-членки на Глобалната коалиција, предводена од САД, за борба против тероризмот и Исламска држава.

Како што соопштија од Министерството за надворешни работи, Димитров ги презентирал пред колегите активностите што Македонија ги презела за справување со заканите од тероризмот и насилниот екстремизам. Притоа искажал цврста заложба Македонија и понатаму да дава придонес во борбата против глобалните закани.

На маргините на самитот, Димитров остварил поединечни средби со својата колешка од Норвешка, Ине Марие Ериксен Сореиде, како и со канадската министерка за надворешни работи Кристиа Фриланд, како и со Розмари Ди Карло, потсекретар за политички работи на ОН. Притоа се заблагодарил за упатената покана до Македонија да ги почне пристапните преговори со НАТО, истакнувајќи дека овој чекор ќе даде нов и позитивен импулс во заложбите на регионот за негово целосно европско и евро-атлантско интегрирање, како и тоа дека Европа ќе добие уште еден партнер во споделувањето на заедничките вредности и одговорности.

Фриленд и Димитров потпишале Декларацијаа за стратешко партнерство меѓу двете земји.


Канада целосно ја легализираше марихуаната


Скопје, 20 јуни, 2018 - 10:19 (META) 

Канадскиот парламент го усвои законот со кој се легализира рекреативната употреба на марихуана во земјата.

Законот ја помина и последната пречка, откако вчера беше изгласан во Сенатот со 52 гласа „за“ и 29 гласови против и тој контролира и регулира како канабисот ќе се одгледува, дистрибуира и продава.

Канаѓаните слободно ќе можат да купуваат и консумираат марихуана најрано од септември.

По Уругвај, Канада е втора држава во светот која целосно ја легализираше марихуаната, 17 години откако ја дозволи и нејзината медицинска употреба.

-Досега, на децата им беше лесно да дојдат до марихуана, а на криминалците да го собираат профитот. Денеска го менуваме тоа. Нашиот план за легализација на марихуана тукушто помина во Сенатот – објави премиерот Џастин Трудо на Твитер.

Се проценува дека во 2015 година Канаѓаните потрошиле 4,5 милијарди долари на марихуана, па државата очекува огромен профит од оваа индустрија.


Најмалку 10 жртви откако комби во Торонто покоси пешаци


Торонто, 24 април, 2018 - 11:06 (META) 

Десет луѓе се мртви, а 15 се повредени во инцидент што вчера се случи во најголемиот канадски град Торонто. Сè уште не е утврдено дали станува збор за терористички акт или напад поради други причини.

Инцидентот се случил вчера во 13.30 часот по локално време, на раскрсницата на улицата Јонг и авенијата Финч.

Возачот на комбито, 25-годишниот Алек Минасиан, бил уапсен неколку улици подалеку од местото на нападот и денеска треба да биде изведен пред суд. При апсењето вперил пиштол кон полицајците, но сепак не пукал.

Заменик шефот на полицијата во Торонто, Питер Јуен,  изјави дека не може да каже која била причината или мотивот за нападот.

Нападот се случил во време кога се користи паузата за ручек. Возилото било изнајмено од компанијата „Рајдер систем“.

Очевидец на настанот изјави дека „возачот дејствувал планирано и сакал да ги убие сите“, удирајќи во луѓе, хидранти, поштенски сандачиња…

– Гледав како луѓе летаат во воздух. Шест или седум луѓе. Делуваше како на филм. Мислам дека сите се мртви – вели еден очевидец.


Канадската химна стана родово неутрална


Отава, 1 февруари, 2018 - 19:18 (META) 

Канадскиот Сенат го усвои законот со кој националната химна на земјата станува родово неутрална, пренесуваат светските медиуми.

Со измените, во вториот стих од хумната „О, Канада“ зборот „синови“ се заменува со изразот „сите нас“.

Против донесувањето на законот беа опозициските конзервативци, но решението сепак го помина конечното гласање.

Борбата за промена на стиховите во текстот на химната предизвика, како што пренесува „Би-би-си“, жестока дебата, а слично решение беше одбиено од конзервативците во 2010 година, кои тогаш го имаа мнозинството во канадскиот парламент.

Промената во 2016 година ја предложи сега покојниот пратеникот на либералите, Морил Беланже, на кого му беше дијагностицирана Амиотрофична латерална склероза, позната и како Лу Геригова болест и кој почина кон крајот на истата година.

Инаку, канадскиот Сенат се изјаснува за законите кои претходно ќе ги усвои Претставничкиот дом.


Патнички авион се урна во Канада


Отава, 14 декември, 2017 - 9:46 (META) 

Авион на компанијата „Вест винд“ со 22 патника и тричлен екипаж се урна во Канада, јави „Си-би-ес“.

Несреќата се случила синоќа, набрзо по полетувањето на аеродромот „Фонд ду Лак“.

„Си-би-ес“ јавува дека сите патници пронајдени и „тргани од местото на несреќата“.

Според првичните информации, неколку лица се повредени.

Како што се наведува, после падот немало ниту експлозија, ниту пожар.


Терорист со камион повреди петмина во Канада


Едмонтон, 1 октомври, 2017 - 14:01 (META) 

Пет луѓе се повредени од 30-годишник кој вчеравечер во канадскиот град Едмонтон првин со нож избодел полицаец, а потоа со изнајмен камион од фирмата „У хаул“ удрил пешаци додека бегал од полицијата. Откако ги повредил луѓето, камионот се превртел и напаѓачот е уапсен.

Според канадските медиуми, во кабината било пронајдено знаме на терористичката мрежа Исламска држава. Полицијата го испрашува уапсениот, а според досегашните информации, дејствувал сам.

Инцидентот се случил пред стадионот „Комонвелт“, околу 20 часот по локално време вчера. Првин камионот со голема брзина удрил во барикада на сообраќајната полиција, по што еден полицаец летнал неколку метри. Потоа возачот излегол и неколкупати со нож го избодел паднатиот полицаец, па избегал со камионот.

По четири часа, полицијата му сигнализирала на камионот да застане на друга барикада, но возачот избегал и почнала полициска потера. Таа завршила така што терористот возејќи удрил четворица пешаци, а потоа камионот се превртел.


Трудо до Заев: Го очекуваме денот кога ќе ви посакаме добредојде во НАТО


Скопје, 13 септември, 2017 - 9:51 (META) 

Премиерот на Канада, Џастин Трудо, упатил писмо со честитки за изборот за премиер на Зоран Заев во кое изразува надеж за плодна соработка во иднина, соопшти владината прес-служба.

„Сигурен сум дека ќе продолжите да ја водите Вашата земја со чест и одговорност достојни на поддршката на народот на Вашата земја, кон светла иднина заснована на најавените реформи, на европските аспирации и на заложбите за регионална стабилност. Канада и понатаму продолжува со поддршката на амбициите на Македонија за членство во НАТО и го очекуваме денот кога ќе ви посакаме добредојде во алијансата“, стои во писмото од Трудо.

Тој му посака на македонскиот премиер да успее да ја оствари владината програма и изрази надеж за соработка за остварување на заеднички приоритети на двете земји.


Пинингтон: Канада ја поддржува Македонија во НАТО-аспирациите


Скопје, 20 јули, 2017 - 11:25 (META) 

Владата на Република Македонија презема сè што е потребно да го отвори патот кон евроатлантските интеграции и со тоа да го обезбеди и да го осигури квалитетот на живот на граѓаните, изјави премиерот Зоран Заев на средбата со амбасадорот на Канада за Република Македонија, Филип Пинингтон.

Како што соопшти владината прес-служба, Заев истакнал дека новата влада сака да го спречи големото иселување на младите од Македонија, преку подобрување на економската состојба на земјата.

– Има големо иселување од Македонија, претежно на млади луѓе, за кои сакаме да обезбедиме перспективи и преку работни места и достоинствени плати да ги мотивираме да останат да живеат во Македонија, а тие што заминале – да видат услови да се вратат. За таа цел се обврзавме на амбициозен план „3-6-9“, во чијашто реализација го интегрираме целото општество – рече премиерот Заев.

На средбата било констатирано дека ваквите инклузивни политики на новата влада и исчекорот кон добрососедските односи имаат поддршка и од меѓународната заедница, што придонесува за градењето доверба кон Република Македонија како држава која заслужува да напредува.

Амбасадорот Пинингтон ја поздравил реформската определеност на Владата, која, како што оценил, се одразува со видлива промена на расположението кај граѓаните и со оптимизам дека позитивните промени во државата стануваат реалност. Тој соопшти дека Канада ја поддржува Македонија во НАТО-аспирациите.

Заев и Пинингтон разговарале и за можноста за продлабочување на односите меѓу Македонија и Канада, во делот на економијата.

На состанокот, исто така, е изразена заедничка согласност дека на регионот му треба стабилност и гледање кон иднината, како и дека напредокот на регионот отвора заедничка перспективна иднина за сите држави, меѓу кои и Македонија.


Канада го поддржува американскиот напад во Сирија


Квебек, 7 април, 2017 - 17:03 (META) 

Канада целосно ги поддржува нападите на САД врз сириската воена база во провинцијата Холмс, соопшти денеска канадскиот премиер Џастин Трудо.

– Користењето хемиско оружје од сирискиот претседател Башар ал Асад и злосторствата извршени од сирискиот режим врз народот во земјата не можат да бидат занемарени – нагласи канадскиот премиер.

Сепак, тој истакна дека Канада ќе продолжи да ги поддржува дипломатските напори за решавање на кризата во Сирија.

Нападот на воената база го нареди американскиот претседател Доналд Трамп, како одговор на нападот со хемиско оружје во Идлиб, за кој постојат индиции дека го извршиле силите на режимот на сирискиот претседател Башар ал Асад.


Турција тврди дека Ѓулен планира да избега во Канада


Анкара, 27 февруари, 2017 - 19:47 (META) 

Заменикот на турскиот министер за надворешни работи, Нуман Куртулмуш, вели дека Турција има проверени информации дека Фетулах Ѓулен, кој живее во САД, планира да избега во Канада.

Турција го бара Ѓулен поради наводно организирање на неуспешен државен удар во јули минатата година.

Според разузнавачките служби, следбениците на Фетулах Ѓулен купиле земја и фарма во Канада, а турската влада таа информација ја споделила со американското министерство за правда.

Турција побара од САД Ѓулен да биде во притвор додека американските власти не го разгледаат барањето на Турција за екстрадиција, за да се спречи Ѓулен да побегне во друга земја.