Државата со кампањи ќе ги убедува родителите да вакцинираат


Скопје, 12 октомври, 2018 - 11:16 (META) 

Министерството за здравство, со кампањи ќе се бори против антиваксерите. Планирано е да се преземат низа активности со кои ќе се едуцираат родителите за важноста на вакцинацијата и потребата од имунизација.

За „Мета“, министерот за здравство, Венко Филипче вели дека е подготвена комуникациска и едукативна стратегија со која преку социјалните медиуми, градинките и училиштата, ќе се допре до родителите.

– Сакаме да им посочиме проверени и научно потврдени извори на информации во врска со имунизацијата. Преку општините и локалната самоуправа се планираат јавни дебати и трибини каде што сме спремни да одговориме на прашањата на родителите. Исклучително важна ни е соработката со медиумите и на тоа посветуваме големо внимание. Тие се нашиот партнер и сојузник во правилниот начин на информирање, достапноста на точни и проверени податоци и секако објективна критика ни е потребна. Само со едукација и презентирање на точни факти можеме да ги победиме анти-вакциналните кампањи и да го подигнеме опфатот на имунизација – вели Филипче.

Инаку, како што веќе е познато, а потсетува министерот, две постари вакцини се заменети со нови и современи.

– За сето ова да го овозможиме го зголемивме буџетот за имунизација за 70 отсто. Факт е дека последните две-три години опфатот постепено опаѓа, како резултат на антивакциналните кампањи, што е глобален проблем, а не само кај нас. Со овој опфат не се обезбедува колективен имунитет и можно е појава на претходно искоренети заболувања. Токму затоа, имунизацијата е еден од приоритетите на Министерството за здравство, имајќи предвид дека инвестицијата во превентивата има докажана клиничка, социјална и фармакоекономска оправданост – додава Филипче.


Захарова: Западните земји по секоја цена сакаат да ја внесат Македонија во НАТО


Москва, 4 октомври, 2018 - 13:40 (META) 

Западот, како и досега, се обидува да ја вовлече Македонија во НАТО, дури и по референдумот за промена на името, изјави портпаролката на руското Министерство за надворешни работи, Марија Захарова, на редовниот неделен брифинг во Москва.

Како што пренесува ТАСС, Захарова изјавила дека „очигледната цел на западните земји е по секоја цена да ја внесат Македонија во НАТО“.

Позицијата на Русија, според Захарова, останува принципиелна и непроменета, а тоа е долгорочно решение за проблемот може да најдат самите земји, без мешање и притисоци однадвор, бидејќи се покажа дека тоа не функционира.

– Ако зборуваме за немешање во внатрешните работи, тогаш не смееме да агитираме „за“ и „против“, доколку зборуваме за референдуми. Ако зборуваме за немешање во внатрешните работи и почитување на законот, вклучувајќи ги и меѓународните, тогаш првиот човек на еден блок од држави не смее да говори за одлука што треба да ја донесе парламентот на една земја – изјави портпаролката на руското МНР.

Таа, исто така, кажа дека е изненадена од наодите на комисијата на ОБСЕ, што го следеше одржувањето на референдумот во Македонија.

– Големата пропагандна кампања на Западот се претставува на позитивен начин. Тоа не е нормално. Што ќе се случеше доколку Москва ги повикаше Македонците да гласаат? Тоа веднаш ќе се сфатеше како мешање во внатрешни работи. Ова не се само двојни стандарди, туку злоупотреба на социјални правила и норми – додаде Захарова.


На полноќ завршува кампањата за референдумот и почнува молкот


Скопје, 27 септември, 2018 - 9:31 (META) 

Јавната пропаганда за референдумот што ќе се одржи во недела завршува вечерва на полноќ. Дотогаш треба да завршат сите активности на учесниците во кампањата и од полноќ започнува предизброниот молк.

Коалицијата „Излези ЗА европска Македонија“ вечер завршен собир има во Тетово, движењето Беса во скопски Чаир, а прес-конференции најавија Алијансата на Албанците. Прес-конференција ќе одржи и координативното тело против референдумот при Светскиот Македонски конгрес кое повикува на бојкот на референдумот.

Агенцијата за аудио и аудиовизуелни медиумски услуги вчера извести дека кампањата „Твој став, твое право“ на Државната изборна комисија, како кампања од јавен интерес не спаѓа во јавната пропаганда за референдумот и може да се емитува и во петок и во сабота иако веќе ќе биде молк пред референдумот.

– Ве известуваме дека АВМУ испрати известување до сите радиодифузери, во кое им посочи дека едукативната и информативна медиумска кампања „Твој став, твое право“ на Државната изборна комисија не се смета за платена јавна пропаганда за Референдумот и од тие причини можат да ја емитуваат и во деновите на референдумот, се вели во одговорот на АВМУ на барањето на ДИК.

Според Роковникот на ДИК молкот пред референдумот започнува 48 часа пред одржувањето на референдумот.


Граѓанска кампања „Зачекори напред! Изборот е твој“


Скопје, 10 септември, 2018 - 13:33 (META) 

Граѓанската иницијатива „Зачекори напред“ денеска со првото издание на весникот „ЕУрека“, кој бесплатно ќе се дели на фрекфентни места низ целата држава, ја започна информативната кампања со која во следните недели ќе се обиде на граѓаните да им понуди информации поврзани со придобивките и предизвиците од зачленувањето во Европската Унија и НАТО.

Под слоганот „Зачекори напред! Изборот е твој“, граѓанските организации обединети во  иницијативата ќе се обидат на граѓаните да им ја доближат Европската Унија и нејзините политики, како и да одговорат на бројните прашања поврзани со тоа што треба да направи Македонија на патот кон ЕУ и НАТО и што ќе добие со евроатланската интеграција.

Кампањата ќе се одвива низ целата држава преку ТВ спотови, анимации, фото факти, на телевизиите, радио станиците, социјалните мрежи, а ќе бидат поставени и билборди. Истовремено ќе се организираат низа медиумски и јавни дебати, директни средби со граѓаните, промоции на книги и други настани.

Исто така, планирани се и две изданија на „ЕУрека“ – денешното и второто, што треба да излезе по 22  септември.  Весникот има македонска и албанска верзија, со вкупен тираж од 55.000 примероци. Електронската верзија на „ЕУрека“, како и сите информации и материјали поврзани со кампањата се достапни на веб-страницата.

Носители на граѓанската иницијатива се: Фондацијата Отворено општество – Македонија, Хелсиншкиот комитет за човекови права на РМ, „Евротинк“ – Центар за европски стратегии, НВО Инфоцентар, Младински образовен форум (МОФ), Цивил – Центар за слобода, ЕСЕ – Здружение за еманципација, солидарност и еднаквост на жените, Рурална коалиција, Асоцијација за здравствена едукација и истражување – ХЕРА и  Центар за современи уметности.


ДПА започна со кампања за референдумот


Скопје, 10 септември, 2018 - 11:45 (META) 

Демократската партија на Албанците викендов донесе одлука за формирање централен партиски штаб за претстојниот референдум кој ќе се одржи на 30 септември. Одлуката е донесена на седница на централното претседателство на партијата.

Според нив, евроатланските интеграции се еден од основните сегменти во програмата на ДПА и барање на Албанците, каде и да живеат.

Централното претседателство за претседател на штабот го избра генералниот секретар на партијата Имер Алиу.

„Во текот на викендот се формираа општинските и локалните штабови и официјално се започна со кампањата ЗА референдумот. ДПА ќе стартува со кампањата од денеска со одржување на собири и средби со граѓаните со цел да се зголеми поддршката за референдумот “, соопштуваат од партијата.


Почнува кампањата за референдумот на 30 септември


Скопје, 10 септември, 2018 - 9:40 (META) 

Денеска официјално започнува кампањата за претстојниот референдум кој ќе се одржи на 30 септември и на кој граѓаните треба да одговорат на прашањето „Дали сте за членство во ЕУ и НАТО со прифаќање на договорот меѓу Македонија и Грција“.

Носител на кампањата е Собранието на Република Македонија, а претседателот на парламентот Талат Џафери најави дека ќе ја водат кампањата транспарентно, непосредно и директно, без дискриминација, предрасуди и со почитување на волјата на секој граѓанин.

Во кампањата на Собранието ќе се вклучат 71 пратеник од сите пратенички групи, со исклучок на опозициската ВМРО-ДПМНЕ која го известила Џафери дека нема да учествува во кампањата и дека бара средствата да бидат потрошени за други цели.

Тој ги повика сите учесници во кампањата да се однесуваат соодветно, коректно и достојно со цел граѓаните на 30 септември да ја донесат вистинската одлука.

Собранието ќе откупи простор во некои од 65–те медиуми кои до 10 август доставиле ценовник до Државната изборна комисија за референдумот. Медиумскиот план ќе биде објавен на веб-страницата на Собранието и пратениците ќе ја реализираат кампањата на телевизиите и радијата и за претставување на своите ставови ќе имаат девет минути во еден час.

За време на кампањата не се очекува да се одржат пленарни седници во Собранието, но претседателот на Парламентот не ја исклучува можноста да има итна седница доколку за тоа има потреба.

Лидерот на ВМРО-ДПМНЕ, Христијан Мицкоски соопшти дека оваа недела ќе излезат со официјален став за референдумот. Останатите парламентарни партии се уште не излегле со конкретни информации за тоа кога и како ќе водат кампања.


Џафери: Пратениците нема да добиваат готовина за кампањата


Скопје, 7 септември, 2018 - 13:32 (META) 

Пратениците, ниту партиите нема да добиваат пари во готово за водењето кампања за референдумот, рече на прес-конференција претседателот на Собранието, Талат Џафери, ветувајќи дека кампањата ќе се води транспарентно и без дискриминација.

Тој појасни дека предвидените 80 милиони денари ќе се префрлаат на медиумите.

– Средствата за кампањата се на посебна сметка. Ќе се делат пропорционално спрема пратеничките групи кои се изјаснија „за“ или „против“. Иако 49 пратеници рекоа да се пренаменат, не може, средства остануваат. За кампањата „за“ ќе може да се потрошат 59 отсто од сумата, а за кампањата „против“ остануваат 41 отсто од предвидените средства – рече Џафери на денешната прес-конференција во Собранието.


Собранието ќе врати 41 отсто од парите за кампања за референдумот


Скопје, 3 септември, 2018 - 16:18 (META) 

По барањето на Собранието за одобрување на финансиски средства за кампањата за референдумот која што ќе се спроведува од овластениот предлагач на Одлуката за референдум, Владата префрли 80 милиони денари на посебната наменска сметка на Собранието, која што ќе се користи исклучиво за спроведување на кампањата за референдум, информираат од Собранието.

„Алоцираните финансии исклучиво ќе бидат користени само за намената за која се распределени средствата, односно за кампањата којашто ќе биде спроведена од страна на 71 пратеник кои што се изјасниле дека се во коалицијата ЗА референдумот, што претставува 59 проценти од времето за повластено платено рекламирање во медиумите. Оттука информираме дека остатокот од алоцираните финансии за референдумска кампања, односно финансиите наменети за 41 процент од пратениците кои што во писмото до претседателот на Собранието се изјаснија дека бараат средствата за кампања да се пренаменат за други цели, истите не може да се пренаменат за други цели, односно истите ќе останат неискористени“, се вели во соопштението.

Собранието како корисник на средствата, има обврска, по завршувањето на кампањата да изготви извештај за потрошените средства и неискористените финансии ќе бидат веднаш вратени во буџетот.


Заев: Одбројуваме до денот кога народот ќе излезе за европска Македонија


Скопје, 30 август, 2018 - 15:17 (META) 

Одбројуваме до денот кога нашиот народ ќе излезе за европска Македонија. Само еден настан во поновата историја може да се спореди со предизвикот со кој се соочуваме. Тоа е настанот од пред 27 години, тоа е денот кога сите гласавме за независна Република Македонија. Тоа се двата големи настани што ги преземаме како одговорни граѓани. Заедно ќе ги обезбедиме нашите граници, ќе го обезбедиме нашето културно богатство. Исто како во 1991 година, овој нов референдум ќе се оствари со консензус, односно сите граѓани ќе бидат заедно за европска Македонија, порача премиерот Зоран Заев во Клубот на пратениците во Скопје каде што ја промовираше кампањата за референдумот на коалицијата „Заедно за европска Македонија“.
Таа, рече тој, брои стотина различни субјекти, но се очекува да расте.

– Ни претстои настан со историски пропорции што ќе влијае на годините кои доаѓаат. Со целосна политичка одговорност коалицијата „Заедно за европска Македонија“ составена од партиии, здруженија на граѓани, политички партии, граѓански здруженија, стопански комори, синдикати,  кои на претстојниот референдум сме согласни заеднички и одделно да ги повикаме граѓаните на 30 септември да излезат и да гласаат за подобра Македонија – рече тој, повикувајќи ја и ВМРО-ДПМНЕ да го поддржи референдумот.

– Знам дека се за европска Македонија, но и знам дека се против Договорот за името. Немојте да ја пропуштите оваа шанса да станеме дел од ЕУ. Ги повикувам Мицкоски и ВМРО-ДПМНЕ да ни се приклучат оти Европа и НАТО се над партиската политика – порача Заев.


Заев: Македонија избра иднина наместо неизвесна и бесмислена изолација


Скопје, 29 август, 2018 - 16:14 (META) 

Република Македонија го направи изборот. Избра иднина, наместо неизвесна и бесмислена изолација. За прв пат во својата историја, Република Македонија седна на масата како рамноправен партнер, со медијаторство на Обединетите нации, за да ја разговара, да преговара и да одлучи за својата иднина, порача премиерот Зоран Заев на платото пред Македонска Опера и Балет (МОБ), на отпочнувањето на кампањата на Канцеларијата на Европската Унија „Замисли иднина заедно“, со која се промовираат придобивките од членството во унијата.

– Тоа до сега никогаш не се случило. За нејзината иднина се одлучувало без нејзино присуство. Ние рековме – не. За нас, за нашата иднина ќе разговарате со нас!!! Тоа го прават само потврдени и докажани државотворни народи и политички елити. И светот го препозна тоа. Ни оддаде признанија. Нè препознаа како рамноправен партнер, како фактор во регионот, во Европа и во светот. Наспроти заканите, покажавме храброст, достоинство и политички став. Признанијата дојдоа и како датум за преговори со Европската Унија, и како покана за завршниот процес за пристапување кон полноправното членство во НАТО. Граѓаните на нашата земја го направија изборот и тие се горди на својот избор. Ја избравме иднината. Иднината на Европската Унија – Избор што му припаѓа на секој европски граѓанин – рече македонскиот премиер.

Тој порача дека на претстојниот референдум „ќе го направиме последниот чекор за да ја завршиме изградбата на нашата држава според европски правила“.