Сообраќајот на патот Крупиште – Пробиштип е во прекин поради превртен камион


Скопје, 20 март, 2018 - 10:08 (META) 

Сообраќајот на магистралниот пат село Крупиште – Пробиштип е во прекин, поради превртен камион и во тек е негово извлекување, информираат од Авто-мото сојузот на Македонија.

На регионалниот пат Маврови Анови – Дебар, во близина на село Трница поради одрон на земја, сообраќајот се одвива по една коловозна лента и само за патнички моторни возила.

Сообраќајот на државните патишта се одвива по претежно влажни коловози. Врнежи од снег со слаб интензитет има во Маврово, додека на Ѓавато снежните врнежи се со умерен интензитет, но не се задржуваат на коловоз.


Полицијата спречила криумчарење на 143 килограми марихуана


Скопје, 28 февруари, 2018 - 16:49 (META) 

Во две одвоени акции, Министерството за внатрешни работи (МВР) вчера спречила криумчарење на околу 143 килограми марихуана, при што приведени се осум лица. Шестмина се македонски државјани, а другите двајца албански државјани, соопшти директорот на Бирото за јавна безбедност (БЈБМ), Лазо Велковски на денешната прес конференција во МВР.

Во првиот случај, од Албанија преку Македонија во Грција требало да бидат пренесени 55 килограми марихуана со вредност на нарко пазарот од околу 150.000 евра. Во оваа акција се уапсени шест македонски и еден албански државјанин.

Во близина на браната на Мавровско Езеро вчера биле уапсени четири жители на скопско Студеничани, кои со автомобили „бмв“ и „ауди“ ја презеле марихуаната од Дебар и требало да ја транспортираат до Солун, за надомест од 9.000 евра.

По ова апсење, набргу во Дебар бил уапсен 49-годишен маж од албанското село Блата, Република Албанија, кој ја прокриумчарил дрогата во Македонија илегално премиинувајќи ја границата.

Набргу се уапсени и двајца роднини од Дебар, кои биле на 26 и 27 годишна возраст. Тие ја презеле дрогата од Албанецот и ја предале на жителите на Студеничани.

Во вториот случај вчера околу 18 часот на граничниот премин „Деве Баир“ од слобода е лишен 47-годишен државјанин на Албанија. Тој управувал со камион во чија приколка биле пронајдени 88 килограми марихуана. Дел од дрогата била скриена во штици од приколката на камионот.


Едно лице загина откако воз со членови на Конгресот на САД удри во камион


Ричмонд, 31 јануари, 2018 - 21:15 (META) 

Патнички воз во кој се наоѓале членови на Конгресот на САД од редовите на републиканците, кои патувале од Вашингтон кон Западна Вирџинија, удрил во камион за превоз на отпад во Кросет, Вирџинија, јавуваат светските агенции.

Во несреќата загинало едно лице, кое не било во возот.

Инцидентот го потврди и Белата куќа.

„Претседателот Доналд Трамп е информиран за ситуацијата во Вирџинија. Имаме потврда дека едно лице смртно настрадало, а едно е сериозно повредено. Нема посериозно повредени меѓу членовите на Конгресот или меѓу нивниот персонал“, се наведува во соопштението на Белата куќа.

Железничката компанија „Амтрак“ соопштила дека до несреќата дошло во 11.20 часот според локално време и дека нема информации за повредите на патниците и на членовите на посадата на возот.

Полицијата ги истражува причините за инцидентот, додека надлежните ги утврдуваат штетите од несреќата.

Конгресменот Карлос Курбело за телевизијата МСНБЦ (MSNBC) изјавил дека имало помал број полесно повредени, но дека „најголем дел од патниците се во ред“.

„Ние сме добро, но нашиот воз удри камион за превоз на смет. Членови со медицинска обука им помагаат на возачите на камионот“, напиша конгресменот Грег Валден на „Твитер“.


Тројца загинати во превртување на автомобил, камион и запрежна кола


Скопје, 28 декември, 2017 - 13:58 (META) 

Во три несреќни случаи во изминатото деноноќие, три лица ги загубиле животите, извести МВР.

Првиот случај бил на Градечка Планина кај Валандово, при што камион „там 80 т“ управуван од 58-годишен валандовец вчера попладне се превртел и паднал во провалија, при што од добиените повреди починал Ж.Д.(51) од Валандово, кој бил сопатник во возилото, а друг сопатник задобил повреди на главата.

Во вториот случај, 75-годишниот С.М. од делчевското село Град вчера околу 20 часот бил пронајден починат во атарот на селото. На телото имало знаци на внатрешно и надворешно крварење, по што екипа на на Итна помош утврдила дека смртните повреди ги задобил кога врз него се превртела запрежна кола натоварена со дрва.

Во сообраќајна несреќа утрово пак во Скопско, загинал тинејџер. Според полицијата, на која случајот и бил пријавен нешто пред 7 часот утрово на локалниот пат од населбата Илинден кон селото Миладиновци, скопско, автомобил „голф“ со скопски таблички, управуван од А.З.(19) од Миладиновци излетал од коловозот и се превртел. Тинејџерот починал на местото на несреќата.


Откриени 128 килограми марихуана во македонски камион во Србија


Владичин Хан, 21 декември, 2017 - 16:24 (META) 

Во камион со македонски регистерски таблички во близина на Владичин Хан, српската полиција пронашла 128 килограми марихуана. Возачот И.И. (69), македонски државјанин, е уапсен, јави „Јужне вести“.

Првично полицајците во резервоарот и во шуплини во камионот пронашла вкупно 131 пакување марихуана со тежина од 80 килограми, а при дополнителните проверки уште 48 килограми марихуана.

Возачот ќе биде предаден на Основното јавно обвинителство во Белград.


Вчера на Блаце фатен еден тон марихуана – најголема заплена досега


Скопје, 1 ноември, 2017 - 17:05 (META) 

Екипите на Царинската управа вчера заплениле околу еден тон марихуана, чија вредност се проценува на околу четири милиони евра, соопшти денеска директорот на Царината, Ѓоко Танаскоски, кој заедно со министерот за внатрешни работи, Оливер Спасовски, го посетија граничниот премин Блаце, каде беше запленета дрогата.

Станува збор за најголемо количество на запленета дрога во еден случај.

Марихуаната била пронајдена во товарно возило, кое било товарено во Косово, а крајната дестинација му била Турција, каде, според информациите на Царината и на полицијата, требало да заврши и марихуаната.

Возачот на камионот успеал да побегне откако вчера царинските службеници го известиле дека ќе извршат детален преглед на камионот и на товарот.

– По консултација со јавен обвинител, направен е детален преглед на полуприколката, која била товарена во Република Косово со отпадна хартија наменета за Република Турција. При прегледот, со отстранување на неколку бали хартија, во средишниот дел на приколката пронајдени се вкупно 839 пакувања завиткани во проѕирна најлонска фолија со различна тежина. Тие биле наполнети со растителна материја со зеленкаста боја, за која на тестер на дрога се покажа дека се работи за наркотична дрога, марихуана – изјави директорот на Царинската управа.

Министерот за внатрешни работи, Оливер Спасовски, истакна дека запленетата дрога покажува дека Владата и МВР се решителни во справувањето со криминалот и со корупцијата.


Тринаесет мигранти од Ирак откриени во камион на граничниот премин Богородица


Гевгелија, 22 октомври, 2017 - 14:46 (META) 

Полициска екипа и службеници на Царинската управа синоќа, околу 20.45 часот, на граничниот премин Богородица, при контрола на камион со бугарски регистарски ознаки, управуван од 45-годишен грчки државјанин, откриле група од 13 мигранти од Ирак, соопшти денеска Министерството за внатрешни работи.

Мигрантите, како што информира МВР, биле пронајдени во специјално направен бункер во предниот дел на приколката, веднаш зад кабината на возилото.

Регионалниот центар за гранични работи Југ при МВР до Основното јавно обвинителство за гонење организиран криминал поднел кривична пријава против грчкиот државјанин С.А., поради сомневање дека криумчарел мигранти.


Бразилската полиција пронашла пет тони марихуана во камион


Бразилија, 9 јули, 2017 - 11:49 (META) 

Бразилската полиција запленила 5,1 тон марихуана во еден камион во државата Санта Катарина, информираат локалните власти.

Три лица се уапсени за време на операцијата која се случила во четвртокот и која овозможила најголема заплена на дрога во таа држава, информираше локалната полиција.

Приведен е возачот на камионот, како и неговите двајца браќа за кои постојат сомневања дека се сопственици на дрогата.

Според првичните истраги, браќата се поврзани и со други две афери на запленет канабис, од пет тона во мај и 4,7 тони во јуни.


Камион пропадна во фонтаната на плоштадот Македонија


Скопје, 6 јуни, 2017 - 11:59 (META) 

Додека течат подготовките за пречек на ракометарите на „Вардар“ на плоштадот Македонија, камион пропадна во т.н. сува фонтана. Засега не е познато како се случил овој инцидент, ниту во чија сопственост е камионот.

Таканаречената сува фонтана во употреба беше пуштена пред помалку од две години, а Градот Скопје и тогашната Влада за неа потрошија 2,5 милиони евра.

На плоштадот Македонија во тек се подготовките за пречекот на ракометарите на РК „Вардар“, кои таму треба да пристигнат во 13 часот.

Освојувачите на европската шампионска титула во ракомет веќе слетаа на аеродромот „Александар Велики“.


Романската гранична полиција открила 111 мигранти во камион


Букурешт, 22 април, 2017 - 16:55 (META) 

Романската гранична полиција открила 111 мигранти, кои биле сокриени во приколка од камион, и ги спречила да ја напуштат земјата и да се упатат кон Западна Европа, јавуваат агенциите.

Полицијата ја открила групата мигранти, меѓу кои имало и деца, на романско-унгарската граница, вчера вечерта. Мигрантите биле со потекло од Ирак, Сирија, Иран, Авганистан, Пакистан и од Индија.

Возачот, инаку романски државјанин, кој е осомничен за соучество, на полицијата ѝ рекол дека не знаел дека има сокриени лица во камионот.

Полицијата соопштила дека мигрантите имале намера да стигнат до шенгенската зона, во која е можно преминување на границата без запирање.