Во пожарите во Калифорнија 80 загинати и повеќе од 1.200 исчезнати


Сан Франциско, 19 ноември, 2018 - 10:31 (META) 

Бројот на исчезнати лица во големите пожари што ја зафатија Калифорнија од 8 ноември, ноќеска се искачи до повеќе од 1.200 луѓе, а бројот на загинати е 80, јавуваат медиумите од САД.

Двата пожара што избија речиси истовремено се сметаат за најдеструктивните досега во оваа сојузна држава.

Досега се идентификувани 63 тела на загинати, а пожарот зафати 1.040 квадратни километри.

Најголемиот дел од загинатите, односно 77, се жртви на „Логорскиот оган“ во Област Бут во Северна Калифорнија, која го заслужи неславниот епитет на најсмртоносниот и најуништувачкиот шумски пожар во историјата на Калифорнија. Од вкупно исчезнатите, 1.202 се во подрачјето опфатено од „Логорскиот оган“.

Вториот пожар, кој го зафати и Малибу, на другиот крај на Калифорнија, беше именува „Вулси“.

Чадот од пожарите покри огромен дел од сојузната држава и предизвика енормно загадување, зафаќајќи го и Сан Франциско.

Метеоролозите за денеска предвидуваат разгорување на пожарите, бидејќи ќе се намалува влажноста на воздухот, а на подрачјето каде што пламти „Логорскиот оган“ се очекува и ветер со брзина до 65 километри на час.


Полицаец од конвојот на канадскиот премиер повреден во судир со џип во САД


Лос Анџелес, 10 февруари, 2018 - 19:29 (META) 

Полицаец на моторцикл кој бил во придружба на конвојот возила во кој бил канадскиот премиер Џастин Трудо бил повреден денеска во Калифорнија откако удрил во џип. Полицаецот е пренесен во болница со повреди, а Трудо не бил повреден.

Несреќата ја предизвикал џип што нагло свртел лево додека возел пред конвојот.

Несреќата се случила во јужна Калифорнија, кратко откако Трудо ја завршил посетата на Претседателската библиотека „Роналд Реган“ во долината Сими.

Канадскиот премиер е во дводневна посета на Калифорнија.


Прва жртва на шумските пожари во Калифорнија


Лос Анџелес, 9 декември, 2017 - 18:16 (META) 

Жена чие што тело е пронајдено на местотот на сообраќајката на пат по кој се вршела евакуација во Јужна Калифорнија е првата потврдена жртва во серијата шумски пожари во оваа сојузна држава на САД.

Претседателот на САД, Доналд Трамп, прогласи вонредна состојба во Калифорнија поради пожарите во кои изгореа најмалку 500 куќи, а евакуирани се повеќе од 212.000 жители. Се очекува разгорување на пожарите поради силните пустински ветришта што го засилуваат огнот. Се очекува тие утре да дуваат со уште поголема брзина.

Пожари има во Сан Диего, северно од Лос Анџелес и во Санта Барбара. Повредени се најмалку шестмина граѓани и четири пожарникари.

Гувернерот на Калифорнија ќе го посети округот Вентура, каде беснее најголемиот од шесте пожари.

Пожарите ги гаснат 8.700 пожарникари, меѓу кои и волонтери од соседните држави.


При пожарите во Калифорнија загинаа 35 лица, 600 се исчезнати


Сан Франциско, 14 октомври, 2017 - 16:53 (META) 

На северот на сојузната американска држава Калифорнија, 22 пожари досега однесоа 35 животи.

Властите предупредуваат дека бројот би можел да се зголеми затоа што повеќе од 600 лица се водат како исчезнати.

Најмалку 3.500 куќи и компании се уништени во најопасните пожари во историјата на Калифорнија, кои во неделата вечерта избија северно од Сан Франциско.


Сè поголем бројот на загинати во пожарите на северот на Калифорнија


Сакраменто, 11 октомври, 2017 - 15:37 (META) 

Најмалку 17 лица загинале, а 150 се водат како исчезнати во пожарите што беснеат во северните делови на американската сојузна држава Калифорнија, јавуваат светските медиуми.

Стотици пожарникари се обидуваат да ја стават под контрола огнената стихија во која досега изгореа 1.500 куќи, а десетици илјади лица се евакуирани. Работата на пожарникарите им ја отежнува ветерот, кој на моменти дува со брзина поголема од 80 километри на час.

Според медиумите, пожарите на северот на Калифорнија ќе остават тешки последици за економијата на тоа подрачје, кое е познато по одгледувањето винова лоза.

Од противпожарната служба соопштија дека во пожарите изгореле 46.000 хектари насади во Северна Калифорнија.


Најмалку 10 загинати во пожарите во Калифорнија


Сакраменто, 10 октомври, 2017 - 9:56 (META) 

Најмалку десет лица загинале во пожарите што од вчера беснеат во американската сојузна држава Калифорнија, соопштиле утрово локалните власти, јавуваат светските агенции.

Повеќе илјади лица биле евакуирани, а поради силниот ветер, пожарот се проширил на 14 места, изјавил на прес-конференција во Сакраменто Кен Пимлот, шеф на службата за заштита на шума.

Пожарите се активни во осум окрузи во Северна Калифорнија, вклучувајќи ги и окрузите Напа и Сонома, познати по одгледувањето на винова лоза.

Според првичните проценки, 30.000 хектари се уништени во пожарите.

Уништени се и повеќе од 1.500 куќи и деловен простор, а околу 20.000 луѓе морале да бегаат од чадот и од пламенот.


Вонредна состојба во Лос Анџелес поради големиот пожар


Лос Анџелес, 4 септември, 2017 - 10:08 (META) 

Поради големиот пожар кој го зафати поголемиот дел на Лос Анџелес, гувернерот на Калифорнија прогласи вонредна состојба.

Околу илјада пожарникари, со стотина противпожарни возила, како и девет специјализирани хеликоптери се вклучени во гаснењето на пожарот, кој досега уништи неколку станбени згради, куќи, а се приближува и до реонот на Бурбенк.

Досега на реонот на Бурбенк се евакуирани повеќе од 300 куќи, а во другиот дел од градот уште 180 поради пожарот што во саботата избувна на падините на планината Вердуго и за кратко време се рашири на повеќе од 2.000 хектари шума.


Бројот на загинати во пожарот во Оукленд можно е да достигне 40 лица


Оукленд, 4 декември, 2016 - 13:14 (META) 

Властите во градот Оукленд, во американската сојузна држава Калифорнија, стравуваат дека бројот на загинати во пожарот што избувна во магацин од зграда за време на забава, би можел да изнесува неколку десетици лица, јавуваат светските медиуми.

Локалните власти веќе ја потврдија смртта на девет лица кои присуствувале на забавата, но оттаму посочиле дека бројот на загинати можно е да достигне 40 лица.

Пожарот избувнал вчера, триесетина минути пред полноќ според локално време, а од огнот се урнал покривот на магацинот, што дополнително ја компликува работата на спасувачките служби за извлекување на телата на настраданите.

Според агенциите, во моментот на избувнувањето на пожарот во магацинот, кој се користел како студио од страна на група музичари и уметници, имало од 50 до 100 луѓе.

Пожарникарите кои интервенирале утврдиле дека во зградата и во магацинот немало никаков противпожарен систем и дека целиот простор бил натрупан со инвентар, поради што единствениот излез бил преку дрвените скали.


Најмалку девет загинати во пожар во Оукленд, Калифорнија


Оукленд, 3 декември, 2016 - 18:42 (META) 

Најмалку девет лица загинале, а 25 се водат како исчезнати во пожар во градот Оукленд, во американската сојузна држава Калифорнија. Пожарот избувнал во магацин во зграда во кој се одржувала забава, соопштиле денеска од локалната противпожарна служба, додавајќи дека засега сè уште не е позната причината за пожарот.

Пожарот избувнал триесетина минути пред полноќ, според локално време, а од огнот се урнал покривот на магацинот, што дополнително ја компликува работата на спасувачките служби за извлекување на телата на настраданите.

Според агенциите, во моментот на избувнувањето на пожарот во магацинот, кој се користел како студио од страна на група музичари и уметници, имало најмалку 50 лица.

„Се надеваме дека девет е конечниот број на жртви и дека нема да има повеќе, но детално ќе ја провериме целата зграда“, изјавиле од противпожарната служба во Оукленд.


Калифорнија воведе состојба на подготвеност поради можен земјотрес


Лос Анџелес, 2 октомври, 2016 - 18:51 (META) 

Жителите на Северна Калифорнија се во состојба на подготвеност до вторник поради зголемена можност од силен земјотрес, соопштија официјални лица.

– Такви предупредувања обично се соопштуваат еднаш или двапати годишно – изјави претставник од кабинетот на гувернерот, задолжен за вонредни ситуации.

Експерти предупредуваат дека веројатноста за земјотрес со интензитет од 7 степени или посилен во областа Сан Андреас е еден спрема 100 и засилената веројатност важи до вторник.

Гувернерот Џери Браун одобри закон со кој е развиен систем за предупредување на граѓаните. Предупредувањата ќе ги добиваат граѓаните на своите мобилни телефони, преку радиостаници и други уреди.