Одземена лиценцата на водичот од „Трансверзалец“, Зоран Костадиновски


Скопје, 16 февруари, 2018 - 16:38 (META) 

Федерацијата на планински спортови му ја одзеде лиценцата на водичот Зоран Костадиновски од планинарското друштво „Трансверзалец“ и забрани организирање планински тури на планини повисоки од 2.000 метри до 21 март, откако во саботата при качување на планината Ниџе животот го загубија Калина Велевска и Александар Миновски.

Одлуката е донесена на денешниот состанок на кој бил разгледан извештајот за тоа што се случувало во кобните часови на врвот Кајмакчалан.

Според претседателот на Федерацијата, Јовица Угриновски, лиценцата на Костадиновски му се одзема поради мали технички пропусти во организирање на турата, а повеќе од морални причини.


Федерацијата на планинарски спортови формира комисија за загинувањето на планинарите


Скопје, 13 февруари, 2018 - 18:32 (META) 

Федерацијата на планинарски спортови на Македонија (ФПСМ) преку својата Фејсбук-страница попладнево изрази жалење и сочуство до семејствата и на загинатите планинари Калина Велевска и Александар Миновски и извести дека формирала комисија која ќе го испитува случајот.

Велевска и Миновски ги загубија животите викендов при искачувањето до врвот Кајмакчалан.
Комисијата што ќе ја испитува нивната трагична смрт е составена од членови на ФПСМ и од експерти.

„Комисијата ги очекува сите релевантни податоци од надлежните институции во Република Македонија и соседна Република Грција, како и официјалните податоци од организаторот на планинарската експедиција. Од огромна важност за Федерацијата ќе биде да се направи темелна анализа за трагичниот настан. Болката и тагата за прерано згаснатите животи не може да се надомести со ништо, но вистината за трагичниот настан заслужува да ја знаат семејствата, планинарите и нашите членови. Во меѓувреме, сакаме да се воздржиме од шпекулации и дезинформации за настанот, затоа што ваквите настани заслужуваат темелна и длабока анализа во соработка со сите надлежни институции“, стои во соопштението од Федерацијата.


МВР: Чекаме точни информации дали има загинати на Кајмакчалан


Скопје, 11 февруари, 2018 - 10:36 (META) 

Медиумите објавуваат на своја одговорност, она што можам сега да го кажам е дека наскоро ќе ве контактирам со проверени информации, изјави за „Мета“ Ивица Илиевски, од МВР за случајот за кој медиумите известијата претпладнево.

Според неофицијалните информации што некои медиуми ги пласираат, двајца македонски државјани загиналe на планината Кајмакчалан.


Груевски: Не го оправдувам ниту Неделковски, ниту нелегалното поставување плоча на Кајмакчалан


Скопје, 1 октомври, 2016 - 10:56 (META) 

„Во врска со настаните со спомен-плочата на Кајмакчалан, не можам да го оправдам ниту нелегалното поставување спомен-плоча од војници од друга држава, кои нелегално ја поминале границата и нелегално поставиле спомен-плоча во Македонија, ниту, пак, начинот на кој новинарот Миленко Неделковски решил индивидуално и со чин кој генерира негативна енергија и омраза да се справи со тој акт“, напиша претседателот на ВМРО-ДПМНЕ, Никола Груевски, на својот фејсбук-профил.

„Доколку Србија има своја спомен-плоча на таа локација, не гледам причина, ако и Бугарија побара на легален начин поставување на нивна таква плоча, да не се дозволи. Двете држави се наши соседи со кои имаме многу испреплетени истории и не постои причина да бидат различно третирани кога станува збор за поставување меморијални обележја од ваков тип, особено затоа што се надвор од населени места и никому не можат да пречат. Затоа мислам дека проблемот требаше и треба да се решава институционално, а не на начин што ќе создаде проблеми, гнев, омраза и меѓусебни обвинувања“, пишува Груевски.

Тој вели дека освен што Република Македонија треба да дозволи по институционален пат Република Бугарија да постави своја плоча на тоа место, доколку тоа го побара, потребно е и нашата држава на најзначајните такви точки да постави и свои државни обележја.

„Тоа се можеби пет-шест места, главно надвор од населени места, кои треба да се одбележани независно што тие битки биле во време пред раѓањето на нашата држава Република Македонија. Најмалку затоа што во сите тие битки гинеле и многу Македонци, многу наши предци и многупати судбината се поигрувала со нив, соочувајќи браќа Македонци од двете страни на фронтот еден против друг“, стои во фејсбук-објавата.

Груевски вели дека Бугарија е наш сосед со кој имаме многу заеднички работи низ историјата и треба да се трудиме историјата да нè зближува, а не да нè оддалечува.


Неделковски за бугарска ТВ: Бугарите се како кучиња, сакаат да обележуваат територии


Софија, 29 септември, 2016 - 10:22 (META) 

„Мојата цел беше да се ослободиме од нешто што е незаконско и криминално. Јас не направив ништо нелегално. Спомен-плочата нема право да биде таму“, вели Миленко Неделковски во интервју за бугарската „Нова ТВ“, по повод кршењето на обележјето на бугарските војници на Кајмакчалан.

– Вандализам е да се оди на туѓа територија. Бугари илегално влегле на наша територија – рече Неделковски.

Според него, поставувањето на плочата на Кајмакчалан е провокација за да се нарушат односите меѓу двете земји и да се направи конфликт.

– Мојата цел е одбрана на територијата на Македонија. Прво, плочата може да се стави во Грција, а не на нашите простори, и второ, за тоа треба да се побара дозвола. Бугарите се како кучиња кои сакаат да одбележат територија – рече Неделковски.

Тој вели дека никој не ја оспорува идејата и желбата на Бугарите да го одбележат настанот, ама, сепак, тие имаат своја територија.

Неделковски тврди дека Македонија не треба да стане членка на ЕУ, но треба да има добри односи со соседите.

– Тоа што го направив е за да се почитува поредокот и не смее да влијае на нашите односи. Тоа беше моја работа и работа на секој Македонец – вели тој во врска со изјавата на премиерот на Бугарија, Бојко Борисов, кој случајот на Кајмакчалан го нарече вандализам.

Во интервјуто, Неделковски додава и дека единствено неговиот тим, односно четворица луѓе знаеле што ќе направи тој, негирајќи дека имал поддршка од владата за да ја искрши плочата.

Тој за телевизијата призна дека бил осуден, но не поради фалсификување американски визи.

– Американски адвокат ме тужеше. Лежев во притвор седум месеци и бев условно казнет на три години. Сакам да ми се извини Бугарија. Јас не направив ништо погрешно. Ако повторно постават обележје на истото место, пак ќе го искршам – вели Миленко за бугарската телевизија.


Кој е Динко – бугарскиот „ловец на мигранти“, кој доаѓа да се соочи со Миленко Неделковски


Софија, 27 септември, 2016 - 15:28 (META) 

Бугаринот Динко В’лев, „ловецот на мигранти“,  кој изјави дека ќе тргне по Миленко Неделковски (затоа што тој со токмак ја искрши бугарската спомен-плоча на Кајмакчалан), дека планира да го најде неговиот дом и да му го искрши автомобилот со чекан, во Бугарија е една од најекспонираните фигури во јавниот живот, јавува дописничката на „Мета“ од Софија.

За некои Динко е национален херој, можен иден градоначалник на Јамбол, кој е негов роден град. Некои се категорични дека Динко е „вистински Бугарин“, ја бранел државната граница од мигранти „како што треба секој Бугарин да направи“.

Тој силно се залага против организации со надворешно финансирање, како бугарскиот Хелсиншки комитет. Поради тоа, тој има многу поддржувачи.

В’лев е, всушност, сопственик на неколку компании, а во минатото бил поврзуван со луѓе од криминалните кругови.

Тој е спортист и возач на АТВ-мотори (тренски возила со погон на сите тркала), но, сепак, вели дека ќе нема судир со Неделковски затоа што тој за него бил физички слаб.

– Ако го фатам, со бокс ќе го фрлам во воздух и нема да му дадам да застане. Но, за тепачка не зборуваме затоа што јас се тепам само со луѓе достојни на мене, а овој за мене е глушец – вели Динко.


Динко В’лев: На Миленко ќе му го искршам автомобилот со чекан


Софија, 27 септември, 2016 - 10:36 (META) 

„Тргнувам по Миленко! Планирам да го најдам неговиот дом и да му го искршам автомобилот со чекан. (Ще му потроша колата с чук, както той счупи плочата) Ќе го снимам целиот настан и ќе го објавам на интернет. Тогаш ќе го прашам: Пријатно ли ти е сега“, вели Динко В’лев, ловец на мигранти и познат бугарски спортист возач на АТВ-мотори, пренесува „Бгднес“.

„Поранешниот затвореник, кој е суден и лежел во затвор, Миленко Неделковски, минатата недела со чекан го искрши споменикот на бугарските војници на Кајмакчалан. Миленко Неделковски, кој во моментов се претставува како спортски новинар, сам се пофали со стореното дело и ја пушти фотографијата на ’Фејсбук’“, пишува „Бгднес“.

– Истото го чека и него, простување ќе нема. Тој прв пролеа крв, посегна по нашата историја – се заканува Динко, кој вели дека планира да патува сам со својот автомобил.

Сепак, бугарскиот спортист вели дека ќе нема судир затоа што Неделковски бил физички слаб.

– Ако го фатам, со бокс ќе го фрлам во воздух и нема да му дадам да застане. Но, за тепачка не зборуваме затоа што јас се тепам само со луѓе достојни на мене, а овој за мене е глушец – вели Динко.

Како што јавува дописничката на „Мета“ од Софија, Динко е всушност многу сличен на Миленко – контроверзен, „патриот“ и „херој“.

Одлуката на Динко, како што појаснил тој за бугарската агенција, е мотивирана од „неактивноста на македонските власти“. Власта, според пишувањата, нема да преземе санкции, бидејќи споменикот бил нелегален.

Затоа Динко решил да ги земе работите во свои раце.


Бугарски европратеник: Груевски со антибугарски акции собира изборни поени


Софија, 26 септември, 2016 - 9:56 (META) 

Лидерот на македонската владејачка партија се обидува со подгревање на антибугарскиот сентимент да ги освои претстојните избори во земјата, изјави бугарскиот европратеник Андреј Ковачев, коментирајќи ги тензиите меѓу двете земји кои настанаа по поставувањето и по кршењето на бугарската спомен-плоча на македонскиот врв Кајмакчалан, посветена на паднатите бугарски војници во Првата светска војна.

Според Ковачев, Груевски се обидува да ги користи антибугарските дела, кои стануваат сè почести како што се приближуваат изборите во декември, за да ја зголеми својата популарност.

– Сведоци сме на тенденцијата на Никола Груевски да ги користи провокациите против Бугарија за да се прикаже себеси како единствен бранител на македонскиот идентитет. Груевски ги користи овие провокации за да добие поголема поддршка на изборите. За жал, тоа не е ниту европски ниту, пак, им помага на македонските граѓани за побрз влез на нивната земја во ЕУ и во НАТО – вели Ковачев за бугарското радио „Фокус“.

Минатата недела бугарска делегација, без дозвола од македонските власти, постави плоча на врвот Кајмакчалан, кој претставува природна граница меѓу Македонија и Грција. Еден ден по поставувањето, новинарот Миленко Неделковски се искачи на врвот и со токмак го искрши споменикот. Ваквата постапка наиде на негодување кај бугарските власти, кои се заканија дека тоа ќе има несакани последици за Македонија.

Македонското Министерство за надворешни работи, пак, ја повика Бугарија да ги почитува меѓународните процедури за поставување спомен-обележја.

„Очекуваме од нашите пријатели од Република Бугарија да ги почитуваат меѓународно прифатените процедури за поставување спомен-обележја. Воедно, очекуваме институциите да ги обесхрабрат сите актери што нелегално поставуваат обележја на територија на друга држава, а кои потоа можат да бидат цел на акти на насилство или да предизвикаат негативни чувства кај граѓаните“, стои во реакцијата од МНР.

Бугарскиот портал „Новините“ наведува дека Бугарија ќе продолжи да ги помага македонските граѓани, но оти официјална Софија ќе остане на ставот дека Македонија не може да влезе во ЕУ доколку продолжи да користи „политики на искривување на историјата и да врши дискриминација на лицата со бугарски идентитет“.


Борисов: Тие што ги кршат бугарските споменици ќе имаат несакани последици


Виена, 25 септември, 2016 - 10:18 (META) 

Македонскиот премиер Емил Димитриев вчера во Виена го уверил бугарскиот колега, Бојко Борисов, дека македонските власти ќе реагираат на сквернавењето на спомен-плочата на бугарските херои на Кајмакчалан, кое го изврши новинарот Миленко Неделковски, тврди бугарската информативна веб-страница „Новините“.

– Не сакам да коментирам – изјавил Борисов за новинарите по самитот во Виена.

Сепак, Борисов предупредил дека „штом тие ги кршат бугарските споменици со чекани…, ќе имаат несакани последици“.

Порталот наведува дека Борисов мисли на македонските власти кога го користи зборот „тие“:

– Кога ќе им треба помош, нема да ја добијат. Не чекавме некој да нè замоли, туку веднаш испративме храна, вода (како одговор на августовските поплави во Скопје и во Тетово) и сите граѓани беа задоволни. Во средата владата одобри 300.000 лева (150.000 евра) финансиска помош за нив. Дали ова е тоа што го заслужуваме за нашиот братски однос? Дали тоа придонесува за нашето пријателство? Дали тоа помага во македонските интеграции во ЕУ. Утре ние ќе бидеме тие што ќе треба да гласаат за нивниот влез во ЕУ – изјавил Борисов.

Новинарот Миленко Неделковски во четвртокот се искачил на планинскиот врв Кајмакчалан и со токмак ја искрши бесправно поставената спомен-плоча посветена на бугарските борци, кои загинале на врвот за време на Првата светска војна. Неделковски на својот фејсбук-профил објави фотографии од чинот на крешењето на плочите.

Македонското Министерство за надворешни работи вчера ја повика Бугарија да ги почитува меѓународните процедури за поставување спомен-обележја.

„Очекуваме од нашите пријатели од Република Бугарија да ги почитуваат меѓународно прифатените процедури за поставување спомен-обележја. Воедно, очекуваме институциите да ги обесхрабрат сите актери што нелегално поставуваат обележја на територија на друга држава, а кои потоа можат да бидат цел на акти на насилство или да предизвикаат негативни чувства кај граѓаните“, стои во реакцијата од МНР.


МНР: Бугарија да ги почитува меѓународните процедури за поставување спомен-обележја


Скопје, 24 септември, 2016 - 9:42 (META) 

Чествувањето на жртви од воените конфликти во нашиот регион е дел од културата на помирување и, пред сè, претставува хуман гест, соопштија од Министерството за надворешни работи на Република Македонија и додаваат дека плочата на Кајмакчалан е незаконски поставена.

„Очекуваме од нашите пријатели од Република Бугарија да ги почитуваат меѓународно прифатените процедури за поставување спомен-обележја. Воедно, очекуваме институциите да ги обесхрабрат сите актери што нелегално поставуваат обележја на територија на друга држава, а кои потоа можат да бидат цел на акти на насилство или да предизвикаат негативни чувства кај граѓаните“, стои во реакцијата од МНР.

Во соопштението се наведува дека е важно е да се напомене дека Република Македонија негува добри односи со сите свои соседи.

„Република Бугарија е наш сосед и пријателска држава, со која имаме суштинска соработка во многу области. Оттука, и понатаму ќе продолжиме да работиме во насока на наоѓање модалитети за поголема соработка и за надминување на разликите преку стандардизиран и реципрочен пристап во одбележувањето на настани и на личности. Ова е и многу поважно во услови кога истите може различно да бидат интерпретирани во различни земји од регионот. Во нашиот пристап треба да ги промовираме успешните модели на помирување и на чествување кои постојат во Европа, наспроти еднострани поставувања на одбележја или чествувања во соседна земја“, велат од МНР.

Од министерството истакнуваат дека конфликтите и жртвите од минатото на која било страна треба да бидат мотив повеќе за засилена идна соработка во регионот, како и за заеднички напори за целосна интеграција на регионот во ЕУ, која е најуспешниот мировен проект во Европа.