!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Охрид денеска како во екот на туристичката сезона 


Охрид, 1 јануари, 2017 - 17:24 (META) 

Невообичаено топлото време за овој период од годината, ги наполни шеталиштето, парковите и кафулињата во Охрид.

Овој продолжен празничен викенд во Охрид донесе голем број гости. Тоа можеше да се забележи по улиците и на паркиралиштата, кои изгледаа како среде туристичка сезона.

Заживеа и бродскиот туризам, така што кајчињата и бродовите ги превозуваа туртистите до Канео, Горица, Св.Стефан и до другите места.

Традиционално, покрај од земјата, најголемиот број од туристите во Охрид и во Струга се од соседните земји, пред сè, Бугарија, Србија, Албанија и во помал број од Грција.

Гости има и од Црна Гора и од Хрватска, а со индивидуални аранжмани, присутни се и одреден број новогодишни славеници и од Велика Британија, Полска и од Израел.

Покрај хотелиерите, задоволни се и приватните станоиздавачи, кои среде зима исполнија добар дел од своите капацитети.


Сопствениците на кајчиња во Охрид почнаа штрајк


Охрид, 27 јуни, 2015 - 13:52 (META) 

Езерските води денеска ги брануваат само бродовите и слични поголеми пловила, откако охридските кајчари официјално се во штрајк

Само двајца-тројца најхрабри можеа да се забележат како ризикуваат и превезуваат туристи до Канео и до други дестинации.

Езерото изгледа празно покрај шеталиштето на градскиот кеј, откако пазарната инспекција од кајчарите побара да регистрираат фирма и да издаваат фискална сметка, а не како досега превозот со такси-кајчињата да го вршат како физички лица, со годишен паушал кој им го одредуваше истата инспекција.

Кајчарите со години се жалат дека во УЈП ги плаќале давачките во висина од 10 проценти од просечната плата во државата. Никој не ги информирал за измени во законот. Дури се жалат на некоординација во самата управа. Оттаму биле повикувани да се појават со лична карта и да го потпишат документот за паушал за годинава, а истовремено инспекторите на самото место им наплатувале казни. Особено се незадоволни што сето ова им се случува во туристичка сезона. Работат само 30 дена во сезона, а според новите прописи, би требало за фирма и за давачки да издвојат 1.500 евра.

Во Пазарниот инспекторат се решени да ја спроведат обврската и превозот со такси-кајчиња да се врши преку регистрирана фирма, во согласност со новиот закон за спречување и вршење нерегистрирана дејност кој стапи на сила во април годинава. Велат дека излегле на терен откако добиле претставка од граѓанин кој се пожалил дека во Охрид кајчарите немаат регистрирано фирма.
Кајчарите, пак, се сомневаат дека претставката ја испратил некој од сопствениците на поголемите пловила.

Во Инспекторатот велат дека тие се дури и благонаклони кон кајчарите. Со новиот закон казната за вршење дејност со нерегистрирана фирма била дури 3.500 евра.

Сепак, тие, од милост, во одредувањето на казните издадени досега, постапувале во согласност со законот за трговски друштва кој бил полиберален, а казната била само 500 евра, или 250 ако се плати на самото место или во рок од осум дена.