!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Заев: Прашање на денови е кога ќе го објавиме името на новиот министер за здравство


Скопје, 30 ноември, 2017 - 17:14 (META) 

Привршуваат разговорите меѓу коалициските партнери во Владата за пополнување на испразнетите ресори, изјави премиерот Зоран Заев, одговарајќи на новинарски прашања пред почетокот на неформалниот состанок на претставници на царинските управи од земјите од Западен Балкан во Скопје.

Заев рече дека е прашање на денови кога би се објавило името на новиот министер за здравство, на местото на Арбен Таравари, кој стана градоначалник на Гостивар.

– Граѓаните го очекуваат новиот министер за здравство. Ние сме на крај на разговорите со коалициските партнери, а се надевам дека во прашање се само денови додека го објавиме и името на министерот, но и да ги пополниме другите испразнети места, заменик-министер и министер без ресор и да ги комплетираме раководните структури на извршната власт – изјави Заев.

Тој додаде дека е важно да се пополнат и местата во институциите за кои се објавени јавни конкурси и упати апел до граѓаните кои ги исполнуваат условите да се пријават на конкурсите.

– Досега имаше за еден дел в.д. решенија, еден дел не беа ниту променети, мандатите истекуваат и во согласност со правилатаи со законите во Македонија, сакаме да ги поставиме новите менаџменти на многу значајни институции за коишто огласите се во тек – рече Заев.


Заев го информирал ЦО на СДСМ дека очекува нови министри до крајот на месецот


Скопје, 26 ноември, 2017 - 10:28 (META) 

Премиерот и лидер на СДСМ, Зоран Заев, на синоќешната седницата на централниот одбор на партијата, изразил очекување дека до крајот на овој месец ќе се донесат одлуките за кадровските решенија и за пополнување на местата што се испразнија по локаклните избори.

Заев вчера, по потпишувањето на договорите за поддршка на млади земјоделци, изјави дека до крајот на ноември најверојатно ќе се знаат новите министри за здравство и за странски инвестиции.

Премиерот, како што стои во соопштението од СДСМ, синоќа го информирал централниот одбор на партијата за политичките разговори со дел од коалициските партнери по ова прашање.

На седницата владејачката партија го усвоила извештајот за локалните избори што се одржаа во октомври, поднесен од централниот изборен штаб.

„Во наредниот период ќе го вградиме целокупниот легитимитет добиен од граѓаните на последните избори во придвижување на економските и реформските процеси, за граѓаните да имаат повеќе пари и повисок животен стандард. Покажавме дека сме успешни во надворешната политика, а тоа ќе го покажеме и на внатрешен план преку реализација на програмата што носи живот за сите. Чесниот и домаќински пристап ќе продолжи и на локално ниво“, порачал Заев, стои во соопштението.

Централниот одбор на партијата донел одлука и за распишување на внатрепартиски избори на органите и носителите на функции во општинските организации на СДСМ и на градската организација на СДСМ – Скопје.

„Во согласност со роковникот, постапката за избор на органите и носителите на функции во општинските организации на СДСМ и градска организација – Скопје почнува на 27 ноември, а завршува пред крајот на 2017 година“, велат од партијата.

Членовите на ЦО на СДСМ дискутирале и за актуелната политичка состојба во Македонија и за темпото на спроведување на реформите.


Заев: Ако некаде има несоодветни кадри, тоа се кадрите останати од ВМРО-ДПМНЕ


Скопје, 24 ноември, 2017 - 13:37 (META) 

„Ако некаде се појавиле несоодветни луѓе како кадровски решенија на новата влада, тоа ќе биде коригирано. Внимателно следам и слушам, нестручни луѓе нема да останат во институциите“, рече премиерот Зоран Заев во Собранието, како одговор на прашање упатено од пратеникот на ВМРО-ДПМНЕ, Илија Димовски, за време на првата седница со пратенички прашања за оваа влада.

Димовски побара од Заев да наброи барем пет кадровски решенија кои се несоодветни, на што премиерот му одговори дека ако веќе треба да наброи, тоа се несменетите кадри од ВМРО-ДПМНЕ.

– Ако треба прецизно да набројам, тоа се несменети началници и раководители од ВМРО-ДПМНЕ. А, ако имало досега некој што треба да се смени, тоа треба да се утврди низ постапка. Многу од кадровските решенија се само вршители на должност. Сите наредни постапки за назначување кадри ќе се водат на транспарентен начин. Ќе видите непартиски луѓе во многу институции, како и досега. Прв приоритет мора да биде квалитетот, потоа искуството, а на крајот и општествената, интелектуалната и професионалната припадност на кадрите – рече Заев.


Владата денеска ќе одржи невообичаено кратка седница


Скопје, 27 октомври, 2017 - 9:30 (META) 

Владата денеска ќе ја одржи 33. седница, која, за разлика од претходната, е со невообичаено краток дневен ред со само четири точки по кои министрите треба да расправаат.

Прва точка на дневниот ред е иницијативата за задолжување за проектот „Пречистителна станица за отпадни води Скопје“.

Министрите ќе расправаат и за склучување билатерален договор за кофинансирање на проектот „Подобрување на инфраструктурата за собирање на отпадни води за градот Скопје“ помеѓу Европската комисија и Владата на Република Македонија.

Освен по овие две точки, на седницата денеска ќе се расправа и за одредени кадровски прашања и предлози.


Собрание: Повеќе за Дарко, отколку за Марко


Скопје, 16 август, 2017 - 14:40 (META) 

Кадровските решенија на Владата во државните институции и откажувањето од функциите на дел од нив се една од главните теми на кои пратениците од ВМРО-ДПМНЕ меѓусебе си реплицираат на денешното продолжение на седницата за разрешувањето на државниот јавен обвинител, Марко Зврлевски.

Координаторот на една од пратеничките групи на ВМРО-ДПМНЕ, Илија Димовски во своите реплики на говорите на своите сопартијци рече дека „СДСМ покажува дека воопшто нема кадровски потенцијал“ и поставува луѓе на раководни позиции во јавните институции кршејќи ги законите и правилата за систематизација.

– За Љупчо Зиков (се откажа од член на управниот одбор на МЕПСО) и Дарко Лешовски (се откажа од позицијата претседател на управниот одбор на Струшките вечери на поезијата) криво да ти падне, па и добри решенија беа, ако се земе предвид дека на Академијата за спорт назначен е професор по историја од средно училиште, во „Танец“ назначен е градежен техничар. Ова покажува дека не е во прашање Зврлевски, туку грубо непочитување на законите и газење по правилата, општество и по се – рече Димовски.

Неговиот колега од опозициската партија Зоран Илиоски рече дека дебата за разрешување на јавниот обвинител „не е само на местото на Марко да се стави Дарко“, туку да се испрати порака до сите што не мислам како власта и да се „дефокусира јавноста од важните прашања и потезите на владата, кои како што рече , се спротивни на интересите на граѓаните.

Претседателот на Собранието, Талат Џафери повеќе пати ги опоменуваше пратениците да се држат до точката на дневен ред, на што Димовски побара од спикерот да биде „погалантен“, попозитивно и без нервоза да се однесува кон колегите – пратеници.

Пратенциите од владејачкото мнозинство предводено од СДСМ не учествуваат во расправата.

По двочасовна расправа, Џафери даде пладневна пауза од еден час. Седницата продолжува во 15 часот.


Укината титулата национален уметник, прифатени оставките на Мизо и на Грозданов


Скопје, 26 јули, 2017 - 11:29 (META) 

Владата на вчерашната 16. седница ги прифатила оставките на директорот на Дирекцијата на технолошки индустриски развојни зони, Виктор Мизо, како и на Цветко Грозданов, генералниот директор на АД за стопанисување со станбен и деловен простор, информираше владината прес-служба.

Разрешени се и Муедин Кахвеџи, директор на Педагошка служба, Весна Хорватовиќ од должноста директор на Бирото за развој на образованието и Костадин Богданов од должноста директор – владин агент на Бирото за застапување на Република Македонија пред Европскиот суд за човекови права, а на негово место како в.д. директор поставена е Драгица Џонова.

За директорка на Институтот за македонски јазик „Крсте Мисирков“ – Скопје, избрана е Елена Јованова-Грујовска, научен советник.

Владата одлучила за членови на надзорниот одбор на Македонска банка за поддршка на развојот да ги именува Никола Поповски, Веланд Рамадани, Кирил Колемишевски и Софче Јовановска, по добиена согласност од гувернерот на Народна банка.

Владата на седницата го усвоила и предлогот за измена и за дополнување на Законот за култура по скратена постапка за да се заштити буџетот од штетни менаџерски договори на раководни лица во културните институции.

Според информацијата споделена на владината седница, менаџерските договори направиле штета на буџетот од неколку милијарди денари.

На седницата се усвоил и предлогот за престанување на важењето на Законот за националниот уметник на Република Македонија, а на барање на Министерството за култура, Државниот завод за ревизија ќе изврши вонредна ревизија во министерството.

Владата на седницата одлучила да се врати постапката за стекнување лиценца за лектори, прекината во 2013 година, а дала и согласност да се поддржи Општина Чаир да се довршат работите за плоштадот Скендер-бег со средства од буџетот за 2018 година.


Владата на тематска седница ќе го утврдува правецот на реформските приоритети


Скопје, 19 јуни, 2017 - 11:51 (META) 

Владата денеска ќе одржи тематска седница што ќе биде посветена на утврдувањето на правецот на реформските приоритети.

Седницата, како што соопштија од Владата, е закажана за напладне, а еден час подоцна, односно во 13 часот, владиниот кабинет ќе ја одржи седмата редовна седница.

„Во согласност со предложениот дневен ред, на седмата владина седница ќе бидат разгледани состојбите и напредокот во процесот на европската интеграција, користење и имплементација на фондовите од ЕУ, како и статусот на реализација на приоритетите на Република Македонија за влез во НАТО и статус на реализација на Рамковниот договор. На редовната владина седница ќе бидат разгледани и кадровски решенија, како и други информации од економскиот и од политичкиот систем и тековната политика“, стои во соопштението од Владата.


Груевски: СДСМ се плаши, затоа брза со гласањето за новата влада во парламентот


Скопје, 29 мај, 2017 - 16:38 (META) 

СДСМ е уплашена од судот на јавноста и на пратениците на ВМРО-ДПМНЕ, па многу брза со гласањето за новата влада и сака шверцерски „да помине“ низ парламентот, рече претседателот на ВМРО-ДПМНЕ, Никола Груевски, при денешната посета на незавршената нова зграда на Акционерско друштво за изградба и стопанисување со станбен и деловен простор од значење за Република Македонија.

– Скандалозно е тоа што СДСМ како никогаш досега се обидува да го стави гласањето на владата во парламентот. Објавувањето на составот на владата синоќа и на гласањето, односно почетокот на расправата утре сабајле, покажува дека тие од нешто се плашат, дека се плашат од анализа на јавноста и, се разбира, на пратениците од опозицијата, се плашат од анализа на нивните перформанси досега, на нивното минато, на нивното образование, на нивниот учинок. Се плашат, исто така, да не го разгледаме внимателно оној памфлет што тие го нарекуваат програма. Така што, очигледно е дека постои страв и се гледа што е можно побргу шверцерски да се помине на парламент, а досега тоа не се случило. Јас имав четири пати можност досега како мандатар да предложам состав за влада до парламентот, секогаш оставав околу 12 дена за да може и опозицијата, пратениците, јавноста да ги разгледаат предлозите, да ја разгледаат програмата, да ја анализираат, да се подготват, да можат да укажат на забелешки, да го слушнеме нивното мислење – рече Груевски.

Тој вели дека со изборот „се гледало да се задоволат некои луѓе, а не да се одберат најдобри кадри што можат да ги решат проблемите на граѓаните“.

– Сега тие луѓе што ги изгубија изборите, на кои народот не им ја даде довербата, тие ќе бидат министри и тие ќе ги креираат наредните чекори за Република Македонија – вели лидерот на ВМРО-ДПМНЕ.


Заев и Ахмети се договориле поинтензивно да се договараат


Скопје, 19 мај, 2017 - 16:29 (META) 

Лидерот на СДСМ и мандатар, Зоран Заев, и претседателот на ДУИ, Али Ахмети, денеска не разговарале за кадровските решенија за ресорните министерства и оваа тема е оставена за наредните средби, стои во кусото соопштение од СДСМ по средбата на двајцата лидери.

Теми на денешната средба, која е прва во рамките на преговорите помеѓу СДСМ и ДУИ за составување нова влада, биле принципите на соработка, реформската влада и НАТО-интеграциите.

„Во наредниот период ќе се интензивираат динамиката и разговорите помеѓу двете партии, вклучително и со партиите што дадоа поддршка за состав на новата влада на Република Македонија, по што ќе се премине на конкретните решенија за ресорните министерства“, стои во соопштението од СДСМ за средбата.


СДСМ: ВМРО-ДПМНЕ и ДУИ го прекршија Договорот од Пржино


Скопје, 8 април, 2016 - 16:31 (META) 

Нашите оставки, како министри и дополнителни заменици министри, поднесени до техничкиот премиер од ВМРО-ДПМНЕ, не беа констатирани, спротивно на нашата волја, изјавија министрите и дополнителните заменици министри на прес-конференција.

– Денеска, Владата предводена од техничкиот премиер на ВМРО-ДПМНЕ направи ново прекршување на Договорот од Пржино. Донесе противзаконска одлука за поништување на сите правни акти на министрите, донесени пред поднесување на оставките. Со ваквата одлука, ВМРО-ДПМНЕ и ДУИ ги прават изборите невозможни бидејќи ова е техничка влада за спроведување на фер избори. Сите одлуки поврзани со изборите мора да бидат потврдени од опозицијата. Ова е директна потврда и доказ дека ВМРО-ДПМНЕ и ДУИ немаат никаква намера да организираат регулатни, фер и демократски избори – изјавија министрите.

Функционерите од СДСМ велат дека ќе ја гарантираат безбедноста на граѓаните, ќе ги потпишуваат само документите поврзани со сигурноста на граѓаните, исплата на плата, пензија, социјална помош и на сè тоа што по Устав и по закон им следува на граѓаните.

– Ниедна одлука усвоена од оваа влада, која наместо регуларни има намера да спроведе криминални избори, нема да ја потпишеме и нема да ја спроведуваме. За излез од длабоката политичка криза во Македонија мора да има слободни, фер, демократски и регуларни избори – изјавија функционерите на опозицијата.