!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

САД има бројни воени опции против Северна Кореја, вели шефот на Пентагон


Вашингтон, 19 септември, 2017 - 10:57 (META) 

Соединетите Американски Држави имаат „бројни“ воени опции против Северна Кореја, од кои повеќето не би ја загрозиле Јужна Кореја, односно би го поштедиле Сеул од брутален контранапад, изјвил американскиот министер за одбрана, Џејмс Матис, јавуваат светските агенции.

„Пастојат многу воени опции кои можеме да ги примениме, заедно со нашите сојузници, за одбрана на сојузниците и на нашите интереси“, изјавил шефот на Пентагон во Вашингтон, без да прецизира за какви воени станува збор.

Инаку, и покрај зовриената реторика помеѓу САД и Северна Кореја, засега нема позиционирање на американски воени сили кои би упатиле на непосреден воен судир.

Матис изјавил дека верува во дипломатијата и санкциите со кои се врши притисок на Пјонјанг за запирање на нуклеарната програма.

Северна Кореја во текот на летото го изведе шестиот, најголем нуклеарен тест досега и лансираше неколку интерконтинентални балистички проектили, по што Советот за безбедност на Обединетите нации (ОН) донесе нов пакет санкации против Пјонгјанг.

САД најавија дека ќе го искористат Генералното собрание на ОН, кое заседава оваа недела во Њујорк, да побара целосна примена на меѓународните санкции против Северна Кореја.

Инаку, за време на Корејската војна, од 1950 до 1953 година, животите ги загубија 50.000 Американсци и милиони Корејци.


Вашингтон и Сеул телефонски разговараа за нуклеарниот тест на Северна Кореја


Сеул, 3 септември, 2017 - 13:15 (META) 

Претседателскиот кабинет на Јужна Кореја соопшти дека највисоките власти на Сеул и на Вашингтон разговарале по шестиот нуклеарен тест што го изведе Северна Кореја.

Кабинетот соопшти дека американскиот советник за национална безбедност, Херберт Рејмонд Мекмастер, и неговиот корејски колега, Чунг Уи-јонг, телефонски се слушнале и разговарале околу 20 минути.

Денешниот нуклеарен тест на Северна Кореја е најмоќен што досега таа држава го спровела. Државните медиуми на Северна Кореја тврдат дека станува збор за хидрогенска бомба.

Метеоролошката агенција на Јужна Кореја соопшти дека е регистриран земјотрес со јачина од 5,7 степени според Рихтеровата скала, кој најверојатно настанал како последица на детонацијата.


Американски бомбардери изведоа вежба во близина на Северна Кореја


Сеул, 31 август, 2017 - 12:57 (META) 

Американските стратешки бомбардери, кои можат да носат нуклеарно оружје, изведоа заедничка вежба со јужнокорејските сили во близина на источниот брег на Јужна Кореја.

Војската на Јужна Кореја соопшти дека станува за вежба во која учествуваат два американски бомбардери „Б-1Б“ и четири „Ф-35“ како и јужнокорејските бомбардери „Ф-15“.

Северна Кореја потврди дека во вторникот лансирала ракета која ја прелетала Јапонија и дека ги погодила целните води во Тихиот Oкеан. Лансирањето на ракетата со среден домет ја надгледувал севернокорејскиот лидер Ким Џонг-ун, кој информираше дека ќе има лансирање на повеќе балистички ракети.


Ракетниот тест е подготовка за воени акции во Пацификот, порача Пјонгјанг


Пјонгјанг, 30 август, 2017 - 10:49 (META) 

Севернокорејскиот лидер Ким Џонг-ун го оценил вчерашното тестирање на балистичката ракета како успешно и го опишал како подготовка за напад на американскиот остров Гуам во Пацификот, се наведува во соопштението што го пренесе државната новинска агенција на Северна Кореја – КЦНА.

Во соопштението се наведува дека Ким Џонг-ун изразил големо задоволство поради успешниот тест и наредил уште неколку слични тестирања во области во Тихиот Океан.

Агенцијата КЦНА истакна дека балистичкиот тест на Пјонгјанг е одговор на заедничките воени вежби на САД и на Јужна Кореја.

Советот за безбедност на Обединетите нации (ОН) синоќа одржа итен состанок на кој остро го осуди лансирањето на балистичката ракета кон Јапонија и го повика Пјонгјанг да се откаже од ракетната и од нуклерната програма.

Советот за безбедност на ОН ги оцени акциите на Северна Кореја како „невидени“, наведувајќи дека се изведени со намера да се загрози мирот и стабилноста во регионот. Советот го повика Пјонгјанг да преземе „директни и конкретни мерки“ за намалување на тензиите на Корејскиот Полустров.

Итниот состанок беше одржан на барање на Вашингтон, Токио и на Сеул, откако Пјонгјанг вчера истрела балистичка ракета која ја прелета Јапонија пред да падне во Тихиот Океан.


Северна Кореја истрела ракета преку Јапонија, итна седница на Советот за безбедност на ОН


Пјонгјанг, 29 август, 2017 - 10:45 (META) 

Советот за безбедност на Обединетите нации (ОН) денеска ќе одржи итна седница на барање на САД, Јапонија и на Јужна Кореја, откако Пјонгјанг истрела балистичка ракета што ја прелета територијата на Јапонија пред да падне во Тихиот Океан.

Како што јавуваат светските медиуми, сирените за тревога се активирале во северниот дел на Јапанија, предупредувајќи ги луѓето да побараат засолниште, а железничкиот транспорт бил прекинат.

Јапонскиот премиер Шинзо Абе денеска изјавил дека во текот на 40-минутниот телефонски разговор со американскиот претседател, Доналд Трамп, се согласил да се засили притисокот на Северна Кореја.

Тој истакнал дека потегот на Пјонгјанг претставува „сериозна закана, без преседан“.

Истовремено, Северна Кореја поднела жалба до Советот за безбедност на ОН поради заедничките воени вежби на САД и на Јужна Кореја, наведувајќи дека таквите акции се провокација во екот на тензиите на Корејскиот Полуостров.

Советот за безбедност на ОН на почетокот на август усвои резолуција која предвидува воведување на нови, поостри санкции кон Северна Кореја, откако Пјонгјанг во јули истрела интерконтинентална балистичка ракета, втора по ред.

Северна Кореја претходно се закани дека би можела да истрела ракета кон американскиот остров Гуам во Пацификот, на што претседателот на САД, Доналд Трамп, изјави дека во таков случај Пјонгјанг ќе се соочи со „оган и бес“.


Американците го поставиле системот „Патриот“ во Јужна Кореја


Вашингтон, 16 август, 2017 - 13:00 (META) 

Американската војска го поставила во Јужна Кореја противвоздушниот систем „Патриот“ за да одговори на заканите за ракетен напад од Северна Кореја.

Како што се наведува, 35-та бригада на американската војска во моментов ја обучува јужнокорејската војска како да ракува со системот.

Покрај „Патриот“, бригадата веќе поседува 13 ракетни системи, меѓу кои ПАК-2 со четири ракети и ПАК-3 со 16 ракети и тоа во Осана, Сувони, Кунсани и Кванџо.

Севернокорејските власти минатата недела соопштија дека разгледале план за ракетен напад на американската база на Гвам. Веднаш потоа, американскиот претседател Доналд Трамп рекол дека неговата земја е подготвена за економски, дипломатски, како и воени мерки против Северна Кореја.


Северна Кореја се закани дека ќе ја погуби поранешната претседателка на Јужна Кореја


Пјонгјанг, 28 јуни, 2017 - 20:23 (META) 

Северна Кореја соопшти дека се обврзува да ги погуби поранешната претседателка на Јужна Кореја, Парк Геун-хје, и шефот на разузнавачката служба кој на позицијата бил за време на нејзината власт.

Пјонгјанг ги обвинува за планирање на убиство на врховниот севернокорејски лидер, Ким Јонг-ун.

Официјалната новинска агенција на Северна Кореја КЦНА објави дека Северна Кореја бара од Јужна Кореја да ги предаде Парк и шефот на разузнавачката служба. Земјата наведе дека ќе примени смртна казна над сменетата јужнокорејска претседателка.

Јужнокорејската претседателка е сменета и уапсена во март оваа година поради корупциски скандал. Северна Кореја во мај ги обвини американските и јужнокорејските шпионски агенции дека се обидуваат да го убијат Јонг-ун со користење на биохемиско оружје.


Јужна Кореја избира нов претседател на државата


Сеул, 9 мај, 2017 - 10:38 (META) 

Граѓаните на Јужна Кореја денеска избираат нов претседател на земјата, откако во март оваа година од функцијата шеф на државата беше сменета Парк Геун-хје, поради корупциски скандал.

Како што пренесуваат светските агенции, анкетите предвидуваат победа на либералниот кандидат Мун Џае-ин, кој, меѓу другото, се залага за подобрување на односите со Северна Кореја. Негов најжесток ривал е Ан Чеол-су.

Мун Џае-ин е јасен фаворит во земјата, каде силните конзервативни сили се обидуваат повторно да се групираат по корупцискиот скандал, кој во март доведе до смена на претседателката Парк Геун-хје.

Последната анкета објавена минатата недела покажува дека Мун Џае-ин, кој е кандидат на Демократската партија, има околу 20 процентни поени повеќе од своите двајца главни ривали, кандидатите на центристите и на конзервативците.

Доколу победи, тоа ќе значи крај на речиси десетгодишното владеење на конзервативците во Јужна Кореја, односно на Парк Геун-хје и на нејзиниот претходник Ли Мјунг-бак.


Уапсен потпретседателот на „Самсунг“ поради истрага за корупција


Сеул, 17 февруари, 2017 - 11:13 (META) 

Јужнокорејските власти го уапсија потпретседателот на компанијата „Самсунг електроникс“, Ли Џае-јонг во рамки на истрага за корупција, која доведе до отповикување на јужнокорејската претседателка Парк Геун-хе.

Судот во Сеул соопшти дека е неопходно Ли Џае-јонг да биде уапсен поради нови докази. Сепак, судот го одби барањето за апсење и на претседателот на компанијата, Парк Санг-јин.

Канцеларијата на специјалниот обвинител во вторникот побара да се уапсат двајцата раководители на „Самсунг“ поради корупција и други обвиненија.

Компанијата е обвинета дека донирала 36,3 милиони долари на невладини организации поврзани со Чои Сун-сил, блиска пријателка на јужнокорејската претседарелка, во замена за поддршка на спорни зделки.


Состанок на Советот за безбедност на ОН поради ракетните тестови на Северна Кореја


Њујорк, 13 февруари, 2017 - 9:37 (META) 

Соединетите Американски Држави, Јапонија и Јужна Кореја денеска побараа итни консултации во Советот за безбедност на Обединетите нации за севернокорејското лансирање на нов тип балистичка ракета со среден до долг дострел, соопшти денеска претставник на мисијата на САД во ОН.

Како што соопшти јужнокорејската војска, Северна Кореја користела систем „студено исфрлање“, каде проектилот го покрева компресиран гас. Јужнокорејската војска наведе дека станува збор за тип ракети со среден дострел.