!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Уапсена министерката за култура на Јужна Кореја поради „црна листа“ на уметници


Сеул, 21 јануари, 2017 - 18:17 (META) 

Јужнокорејското обвинителство денеска ги уапсило министерката за култура на земјата, Чо Јун-сун, и поранешниот шеф на кабинетот на отповиканата претседателка на државата, Парк Геун-хе, Ким Ку-чин, под обвинение дека правеле списоци со уметници кои имаат критички ставови кон владата, јавуваат светските медиуми.

Министерката и Ким Ку-чин, заедно со уште тројца претходно уапсени функционери, според обвинувањата, направиле листа со имињата на неколку илјади „неподобни“ уметници и други лица од областа на културата, за да ги оневозможат да учествуваат во програмите финансирани од државата. Тие, меѓу другото, се товарат и за злоупотреба на моќта.

Неколку часа по апсењето, министерката за култура си поднела оставка, која веднаш била прифатена од премиерот Хванг Кјо-ан, кој по отповикувањето на Парк, ја врши должноста претседател на земјата.

Како што јавуваат светските медиуми, меѓу уметниците на „црната листа“ наводно, се и режисерот на филмот „Олдбој“ (Oldboy), Парк Чан-вук, и поетот Ко Ун, кого многумина го сметаат за кандидат за Нобеловата награда.

Обвинувањата за правење „црни листи“ се појавиле откако јужнокорејските власти ја прошириле истрагата за политичкиот скандал кој доведе до импичмент на претседателката Парк Геун-хе, на крајот на минатата година.

Конечната одлука дали претседателката Парк предвреме ќе го заврши својот мандат или ќе се врати на функцијата треба да ја донесе уставниот суд на земјата.


Бан Ки-мун се врати во Јужна Кореја, навестува претседателска кандидатура


Сеул, 12 јануари, 2017 - 11:44 (META) 

Поранешниот генерален секретар на ОН, Бан Ки-мун, денеска се врати во својата земја, Јужна Кореја, каде многумина очекуваат да се кандидира за претседател на земјата.

Бан пристигна во Сеул, а стотина приврзаници го пречекаа на аеродромот, извикувајќи го неговото име. Тој во обраќањето, кое го пренесуваше државната телевизија, рече дека ќе се посвети на постигнување национално единство.
Бан Ки-мун и претходно има давано слични изјави, но аналитичарите сметаат дека со тоа ги навестува своите амбиции да се кандидира за претседател.

Анкетите покажуваат дека Бан Ки-мун е еден од фаворитите да ја наследни претседателката Парк Гуен-хје, на која на 9 декември ѝ беше изгласана недоверба и привремено е отповикана поради корупциски скандал. Уставниот суд сега треба да одлучи дали и официјално ќе стави крај на нејзиниот мандат и ќе свика нови избори.


Јужнокорејскиот парламент ѝ изгласа импичмент на претседателката на државата


Сеул, 9 декември, 2016 - 11:48 (META) 

Парламентот на Јужна Кореја денеска ѝ изгласа импичмент на претседателката на земјата, Парк Геун-хје, со што ги суспендираше нејзините извршни овластувања поради големиот корупциски скандал, јавуваат светските медиуми.

Предлогот за отповикување на претседателката го поддржале 234 пратеници, а 56 биле против, од вкупно 300 членови колку што брои јужнокорејскиот парламент. За отповикување на Парк Геун-хје беше потребно двотретинско мнозинство, за чие постигнување беше потребно да гласаат и некои од членовите на нејзината партија, што тие очигледно и го направиле, пишуваат агенциите.

Сега уставниот суд на земјата треба и формално да ја разреши претседателката од функцијата или да донесе одлука за повторно воспоставување на нејзините претседателски овластувања. За донесување одлука судот има рок од 180 дена.

Засега, Парк Геун-хје го задржува звањето претседател, но ѝ се одземени извршните овластување, кои до одлуката на уставниот суд ќе ги извршува премиерот на Јужна Кореја, Хванг Кјо-ан.

Во Сеул повеќе од еден месец се одржуваат протести на кои граѓаните бараа од претседателката да поднесе оставка поради обвинувањата дека ѝ овозможила на својата советничка и пријалетка Чои Су-сил, која нема официјална функција, да го користи своето влијание и да принудува компании да донираат милиони долари во двете фондации што биле под нејзината контрола.


Јужна Кореја тврди дека има план за целосно уништување на Пјонгјанг


Сеул, 11 септември, 2016 - 13:18 (META) 

Јужна Кореја има план за целосно уништување на севернокорејската престолнина Пјонгјанг, доколку тамошните власти покажат каков било знак дека подготвуваат нуклеарен напад, објавила јужнокорејската агенција „Јонхап“, повикувајќи се на воени извори, пренесува „Би-би-си“.

Воени извори за агенцијата рекле дека секој агол во Пјонгјанг „ќе биде целосно уништен со балистички ракети и со високо-експлозивни гранати“.

Северна Кореја во петокот ја изведе петтата и најсилна досега нуклеарна проба, што предизвика жестока реакција на меѓународната заедница. САД и Јапонија ги разгледуваат можностите за воведување унилатерални поостри санкции кон Пјонгјанг.

Претставник на јужнокорејската војска за „Јонхап“ рекол дека делот на Пјонгјанг, во кој, како што се смета, живее лидерот на Северна Кореја Ким Џонг-Ун, би бил особено изложен на удари.

Престолнината на Северна Кореја, додал изворот, „ќе биде претворена во пепел и целосно ќе исчезне од светската мапа“.

Дописникот на „Би-би-си“ задолжен за Северна и за Јужна Кореја, Стив Еванс, наведува дека Сеул сега ја користи истата остра реторика, од која се замрзнува крвта во вените, што Пјонгјанг често ја употребува кога зборува за јужнокорејската влада.


ОН најавија нови санкции кон Пјонгјанг по нуклеарната проба


Њујорк, 10 септември, 2016 - 11:33 (META) 

Советот за безбедност на Обединетите нации се согласи да изрече нови санкции кон Северна Кореја, откако Пјонгјанг вчера ја изведе петтата и најсилна досега нуклеарна проба, јавуваат светските медиуми.

Одлуката е донесена на вонредниот состанок на 15-члениот совет, јавува „Би-би-си“.

Јужнокорејската претседателка, Парк Гуен Хје, вчера жестоко ја осуди нуклеарната проба и изјави дека „провокациите на Северна Кореја го забрзуваат нејзиното самоуништување“ и дека пробата сведочи за „манијачкото несовесно однесување“ на севернокорејскиот лидер Ким Џонг-ун.

Кина формално го осуди чинот на Пјонгјанг, додека Јапонија упати официјален протест до севернокорејските власти.

Северна Кореја од почетокот на оваа година изведе две нуклеарни проби и покрај забраната од Обединетите нации.


Северна Кореја ја изведе петтата нуклеарна проба, најсилна досега


Пјонгјанг, 9 септември, 2016 - 10:05 (META) 

Северна Кореја успешно ја извела петтата нуклеарна проба, најсилна досега, соопштија официјални јужнокорејски претставници кои остро го осудија новото тестирање, оценувајќи го како „чин на самоуништување“.

Американските, европските и кинеските сеизмолошки служби вчеравечер регистрирале потрес, за кој се претпоставува дека е предизвикан од нуклеарната проба на Пјонгјанг.

Нуклеарнот тест го потврди и Северна Кореја.

„Нашите нуклеарни научници изведоа проба на најновата нуклеарна боева глава, на полигонот за нуклеарни тестови на северот на земјата“, соопштила спикерката на севернокорејската телевизија.

Во извештајот се наведува дека по пробатата не било регистрирано радиоактивно течење, ниту штетни последици за околината.

Јужнокорејската претседателка, Парк Гуен Хје, изјави дека „провокациите на Северна Кореја го забрзуваат нејзиното самоуништување“ и дека пробата сведочи за „манијачкото несовесно однесување“ на севернокорејскиот лидер Ким Џонг-ун.

Претседателот на САД, Барак Обама, веста за нуклеарната проба на Пјонгјанг ја примил во претседателскиот авион на пат од Лаос кон Вашингтон, по што веднаш имал одвоени разговори со претседателката на Јужна Кореја и со премиерот на Јапонија, Шинзо Абе.

Портпаролот на американскиот претседател изјавил дека Обама ќе ги продолжи консултациите со сојузниците и со партнерите на САД во наредните денови околу последиците од провокациите на Северна Кореја.

Јапонскиот премиер рекол дека севернокорејската нуклеарна проба не смее да се толерира, а јапонското министерство упатило официјален протест до властите во Пјонгјанг.

Јапонските власти соопштиле дека надлежните служби со авиони ја мерат радијацијата и ги утврдуваат евентуалните последици кои пробата ги има на околината.

Нуклеарната проба е изведена на денот кога Пјонгјанг го прославува основањето на Демократска Народна Република Кореја, на 9 септември 1948 година.


Кина жестоко се противи на американскиот антиракетен штит во Јужна Кореја


Хангџу, 5 септември, 2016 - 11:54 (META) 

Кинескиот претседател Си Џинпинг на својата колешка, претседателката на Јужна Кореја, Парк Геун Хје, ѝ соопштил дека Кина е против распоредувањето на американски противракетен штит во нејзината земја, јавуваат светските агенции.

Си Џинпинг, за време на билатералниот состанок, на маргините на Самитот на Г20, кој се одржува во Хангџоу, Кина, ја предупредил дека неадекватното третирање на ова прашање не е добро за мирот во регионот и може да го интензивира спорот меѓу двете земји.

Кина претходно остро реагираше на одлуката на Сеул за распоредување на антиракетниот систем ТХААД, во воена база на југот на Јужна Кореја.

Вашингтон и Сеул тврдат дека поставувањето на ракетниот штит е за заштита од заканите на Северна Кореја, додека Пекинг предупредува дека штитот ќе ѝ овозможи на војската на САД увид длабоко на североистокот на Кина.

Инаку, Северна Кореја денеска истрелала три балистички ракети во водите на својот североисточен брег, соопштија јужнокорејски официјални претставници, јавува „Би-би-си“.

Проектилите биле истрелани од регионот Хвангџу, соопштила денеска здружената команда на јужнокорејската армија, пренесува агенцијата „Јонхап“.

Засега нема информации за типот на ракетите и за нивниот дострел.


Сеул тврди дека е погубен министерот за образование на Северна Кореја


Сеул, 31 август, 2016 - 10:37 (META) 

Севернокорејскиот министер за образование е погубен, а уште двајца членови на режимот во Пјонгјанг биле испратени на превоспитување, објавија властите во Сеул.

– Министерот за образование, Ким Јонг-џин, е погубен – изјави на прес-конференција портпаролот на јужнокорејското министерство за обединување, Јеонг Јоон-хее.

Министерот Јонг-џин исто така бил и потпретседател на владата.

Под обвинение дека е антипартиски и антиреволуционерен агитатор, Ким Јонг-џин бил стрелан во јули, изјави неименуван претставник на јужнокорејското министерство.

Оттаму известуваат дека двајца севернокорејски владини претставници биле испратен на превоспитување. Меѓу нив е и Ким Јон-чол, висок претставник за меѓукорејски работи.

Откако на крајот на 2011 година на должност го наследи својот татко, Ким Јонг-ун погуби и смени голем број режимски функционери.


Северна Кореја истрела балистичка ракета од подморница


Пјонгјанг, 24 август, 2016 - 10:44 (META) 

Северна Кореја истрелала балистички проектил од подморница, јавува севернокорејската новинска агенција „Јонхап“.

Проектилот од типот КН-11 бил истрелан од подморница на источниот брег на Северна Кореја и прелетал 500 километри пред да падне во Јапонското Море, соопштил претставник на властите на САД.

Јапонскиот премиер Шинзо Абе потегот на Пјонгјанг го нарекол „пакосен чин“.

Инаку, Обединетите нации ѝ забранија на Северна Кореја, за која се претпоставува дека развива нуклеарно оружје, да користи какви било балистички ракети.

Последното истрелување на балистички прокетил се случува откако Северна Кореја најави дека ќе се одмазди поради воените вежби на САД и на Јужна Кореја, кои режимот во Пјонгјанг ги толкува како обид за инвазија на земјата.


Јужнокорејската морнарица пукала на севернокорејски брод


Сеул, 27 мај, 2016 - 11:12 (META) 

Јужнокорејската морнарица испукала предупредувачки истрели откако севернокорејски патролен брод и рибарски чамец ја минале спорната граница на Жолтото Mоре кај западниот брег на Корејскиот полуостров, изјавија претставници во Сеул.

Двата пловни објекта, кои ја минале северната линија на раздвојување, во близина на јужнокорејскиот остров Јеонпиеонг, ја смениле насоката осум минути откако Сеул испукал предупредувачки истрели и се вратиле во севернокорејските води.

Севернокорејските рибарско бродови и чамци повремено заталкуваат во јужнокорејските води.