СЈО отвори нова истрага „Империја“, осомничени Мијалков и семејството Камчеви


Скопје, 9 ноември, 2018 - 13:45 (META) 

Специјалното јавно обвинителство отвори нова истрага под кодното име „Империја“ против Јордан Камчев, Сашо Мијалков, Ненад Јосифовиќ, Цветан Панделески, Ратка Куноска Камчева, Христина Камчева Стојческа, Зорица Арсовска, Лилјана Гајдовска, Владислав Стајковиќ, Тодор Мирчевски, Дејан Јанев, Ванче Мијалчев и Јованче Тасковски. Тие се осомничени за кривичните дела злосторничко здружување, оштетување или повластување на доверители, злоупотреба на службената положба и овластување, измама и перење пари и „други приноси од казниво дело“.

Од СЈО преку соопштение до јавноста информираат дека во соработка со МВР биле извршени 12 претреси и лишени од слобода биле пет осомничени лица, кои во текот на денот ќе бидат изведени пред судија на претходна постапка и за кои ќе бидат побарани мерки за обезбедување присуство.

„Во текот на предистражната постапка обезбедени се доволно докази од кои произлезе основано сомнение дека во периодот од 2002 година до 2013 година осомничените ги сториле кривичните дела што им се ставаат на товар лично и преку правни лица кои биле или се во нивна сопственост. Во скоро време се очекува и проширување на истрагата кон нови лица и за нови кривични дела, а во насока на обезбедување на имотно – правните барања од оштетените лица и обезбедување на предметите кои потекнуваат од кривичните дела ќе бидат побарани и мерки за привремено обезбедување на имот“, велат од СЈО

Во истрагата се преземени десетина предмети кои се воделе пред надлежни обвинителства и врз кои воспоставена е надлежност на СЈО.


Љупчо Палевски беше на распит во СЈО, изјави дека станува збор за предистражна постапка


Скопје, 16 август, 2017 - 21:49 (META) 

Скопскиот бизнисмен Љупчо Палевски – Палчо беше на распит во Специјалното јавно обвинителство. Палевски, заедно со неговиот адвокат вечерва ги напуштија просториите на СЈО, по што кратко изјави дека станува збор за предистражна постапка.

Палевски вчера беше приведен на барање на Специјалното јавно обвинителство.

Засега официјално не е познато за што се товари Палевски. Се шпекулира дека Палевски е приведен поради тоа што на „Јутјуб“ објавил прислушувани приватни разговори на јавни личности, меѓу кои новинари и бизнисмени.

Уредникот на телевизија „Сител“, Драган Павловиќ – Латас во СЈО пријави вакви злоупотреби, а на профилот Палевски се појавија и снимки од бизнисменот Јордан Камчев.