Хан: Верувам дека сите политички лидери ќе покажат храброст за следните чекори


Брисел, 20 јуни, 2018 - 16:23 (META) 

Еврокомесарот за проширување и добрососедска политика, Јоханес Хан ја поздрави ратификацијата на договорот од страна на Собранието.

– Ова е првиот чекор од многу други кон целосна имплементација. Верувам дека сите политички лидери ќе покажат лидерство и храброст за следните чекори – напиша Хан на неговиот твитер-профил.


Вајгл: Иванов не смее да биде претставник на својата партија туку на целата држава


Брисел, 20 јуни, 2018 - 16:17 (META) 

Европратеникот и известувач за Македонија во Европскиот парламент, Иво Вајгл запрашан да го коментира ставот на претседателот Ѓорѓе Иванов за Договорот со Грција, порача дека од ЕУ во повеќе наврати му испратиле порака дека Македонија мора да гледа кон иднината.

– Обврска на политиката, на политичките партии и на претседателот на државата е да водат грижа за перспективите на младите генерации. Таа перспектива најсигурна е со членството во ЕУ, па и во НАТО. Така што, не би смеело да има дилеми за тоа каков би требало да биде ставот на претседателот на државата, кој не смее да биде претставник на својата политичка партија туку на целата Македонија и на сите Македонци. Тоа е порака за Иванов. Тоа би било многу корисно и за Македонија, а и за него, како ќе го памтат луѓето кога тоа би го сфатил – изјави Вајгл за МИА.


Хан: Граѓаните на идната Северна Македонија заслужуваат европска иднина


Ресен, 17 јуни, 2018 - 13:47 (META) 

„Ова е историски ден затоа што граѓаните на идната Северна Македонија заслужуваат европска иднина“, изјави еврокомесарот Јоханес Хан во Отешево, по потпишувањето на договорот помеѓу Македонија и Грција во Псарадес, на грчката страна од Преспанско Езеро.

Тој додаде дека требаше многу време и многу пат за да се стигне таму каде што сме денеска, но исто така потсети дека следува и понатаму работа, бидејќи завршува еден процес, но почнува нов.

„На крајот од денот сите ќе видат дека договорот е добар компромис во кој сите добиваат по нешто“, додаде Хан.

Високата претставничка за надворешна политика и безбедносна политика на ЕУ, Федерика Могерини рече дека лично се надева дека за две недели ќе има датум за почнување на преговорите со ЕУ, а денешното потпишување на договорот помеѓу Македонија и Грција е позитивен сигнал.

„Ова е добар ден за двете земји. Тука сме да кажеме дека е добар ден и за ЕУ и за Балканот. Навистина е историски ден. Се сеќавам на почетокот на преговорите со двајцата премиери. Многумина беа скептични, но благодарение на храброста, и на посветеноста на двајцата премиери се постигна решение. Сакаме да кажеме дека не направија горди нас Европјеците бидејќи преку дијалог и дипломатија дојдоа до решение. Тоа е добро и за Балканот, за да се шири ваква атмосфера и порака и останатите во регионот дека треба да преземат храбри чекори. Дипломатијата, дијалогот и тешката работа секогаш треба да бидат водилка во решавање на разликите и во регионот и во Европа“, кажа Могерини.

Таа додаде дека сега двете земји имаат работа за да го имплементираат договорот и дека ЕУ ќе биде тука при секој чекор, бидејќи имплементацијата не е важна само за двете земји, туку и за Европа.


Хан: Несоодветно е претседател да одбие разговор со премиер, треба одговорност


Брисел, 14 јуни, 2018 - 9:32 (META) 

Несоодветно е за претседател на држава, да одбие да разговара со премиер, со министер за надворешни, за да добие информации од прва рака, вели еврокомесарот за проширување и добрососедска политика Јоханес Хан, во интервју за МИА.

„Мислам дека премиерот и министерот за надворешни целосно ги почитуваа уставните насоки и можам само да го повикам итно претседателот да преземе одговорност. Ова не е прашање на прифаќање, но во демократија може да очекуваме да се слушаат луѓето меѓусебно и да дискутираат и не треба да се заборави дека шеф на држава е на некој начин модел за многу луѓе во една земја. Претседателот како директно избран има специјална позиција и одговорност и треба да е свесен за ова, инаку и наштетува на функцијата“, вели Хан.

Тој и порачува на опозицијата дека треба внимателно да го простудира договорот.

„Треба да дискутира со Владата, зборуваме за тема која е од национален интерес, има непосреден ефект врз иднината на земјата и нејзината евроатлантска перспектива. Тоа не беше мала пречка, тоа беше планина и сега таа е отстранета. Се разбира, не сакам да го проценувам исходот на овој договор, но таква е природата на преговорите и на компромис, секој треба да отстапи, но генерално се чини дека исходот е доста поволен за вашата земја. Но уште еднаш, ова треба да биде проценето од сите, мое скромно барање е дека секој треба да е свесен за историската димензија и долгорочниот импакт врз развојот на оваа земја и условите на живот и можностите за нејзините граѓани“, додава Хан.

Во однос на одлуката на Советот за старт на преговорите во јуни, Хан очекува дека „ако се ова сега е потпишано и договорено, дека ќе има импакт во заклучоците на Советот.

Очекува, по препораката за преговори, да почнат подготовките за старт на преговори.

„Ништо не можам да гарантирам стопроцентно. Секогаш сум многу внимателен кога треба да се вети нешто, но имам многу, многу добро чувство, а обично можам да им верувам на моите чувства“, додаде тој.


Могерини, Хан и Туск им честитаа на Заев и Ципрас за покажаното лидерство и одлучност


Брисел, 13 јуни, 2018 - 10:03 (META) 

Високата претставничка на Европската Унија за надворешни работи и безбедносна политика и потпретседателката на Европската комисија, Федерика Могерини и еврокомесарот за соседска политика и проширување Јоханес Хан, во заедничка изјава им честитаа на премиерите на Македонија и на Грција, Зоран Заев и Алексис Ципрас за нивната одлучност и лидерство во постигнувањето договор за спорот за името и порачаа дека ова е добар ден за Европа.

Могерини и Хан порачаа дека успехот им припаѓа на лидерите на двете земји, нивните екипи но пред се на граѓаните на двете земји и на Европа.

„Заедно мораме да ја искористиме приликата што широко се отвори за да ги придружиме и консолидираме ветровите на мирот и соработката во регионот. Перспектива на ЕУ за Балканот, потврдена неодамна на софискиот самит, останува најсилната стабилизирачка сила за регионот и ние имаме интерес и одговорност да го искористиме тоа добро. Тоа беше клучен поттик за овој договор, во духот на добрососедските односи и соседската соработка. Чекаме сега Советот да ги потврди заклучоците од извештајот за напредок од 17 април и да ги отвори пристапните преговори за Македонија во јуни. Европската Унија ги охрабри и ги поддржува преговорите од самиот почеток. Сега ќе преземеме следни чекори со сите наши средства во истиот дух на дијалог за нашата заедничка европска иднина“, се вели во заедничката изјава.

Претседателот на Европскиот совет, Доналд Туск на својот твитер-профил изрази благодарност до двајцата премиери, што невозможното го направиле возможно. Тој истата порака ја сподели на англики јазик, македонски и грчки.

Известувачот за Македонија во Европскиот парламент Иво Вајгл пак порача дека сега е клучно договорот да биде поддржан од широко мнозинство на политичките партии и населението од двете држави.

– Со договор за името, вратата е отворена сега за Македонија (Република Северна Македонија) да добие полноправно членство за ЕУ и НАТО. Членките на ЕУ и НАТО треба да го поздрават договорот како шанса за продолжување на процесот на проширување кон сите земји од Југоисточна Европа – вели Вајгл.

Честитки за постигнатиот договор и поддршка за Македонија да ги отпочне преговорите со ЕУ испратија и дел од партиите во европскиот парламент.


Хан: Сите од се срце ги поддржуваме преговорите за името


Брисел, 28 мај, 2018 - 12:07 (META) 

Еврокомесарот за проширување и соседска политика, Јоханес Хан по појадокот помеѓу министрите за надворешни работи на ЕУ и македонскиот министер за надворешни работи Никола Димитров, изјави дека сите изразиле силна поддршка за преговорите за името помеѓу Македонија и Грција.

„Плодна дискусија помеѓу пријателите на Македонија на појадокот. Благодарност до Никос Коѕиас и Никола Димитров за нивната конструктивна напорна работа. Сите, од се срце, ги поддржуваме преговорите. Во собата постои консензус дека решението за проблемот со името ќе значи пресвртница за наредните чекори во процесот на приклучување на Македонија кон ЕУ“, напиша утрово еврокомесарот Јоханес Хан на „Твитер“ за новата рунда преговори за името во Брисел.


Дигиталното поврзување на Западен Балкан ќе биде финансирано со 200 милиони евра од ЕУ


Софија, 17 мај, 2018 - 11:44 (META) 

Заклучоците од првиот Дигитален Самит, што пред еден месец се одржа во Скопје, веќе се дел од агендата на Европската Унија, информираат од министерството за информатичко општество и администрација.

„Еврокомесарот за проширување Јоханес Хан, од самитот на ЕУ и Западен Балкан, информираше дека иницијативите за дигитална агенда и поголема поврзаност во регионот ќе бидат финансирани со повеќе од 200 милиони евра. Во фокусот на овие мерки е намалување на трошоците за роаминг, подобрување на широкопојасниот интернет, развој на е-Влада како и дигитализација на индустријата“, се вели во соопштението на МИОА.

Од таму додаваат дека МИОА по повод 17 мај, Меѓународниот ден на телекомуникации и информатичко општество, уште еднаш се обврзува на реализација на сите најавени активности во областа на информатичкото општество.

„Во наредниот период ќе ги објавиме националните стратегии за широкопојасен интернет и за сајбер безбедност, а до крајот на годината ќе ја објавиме и долгорочната стратегија за ИКТ“, се додава во соопштението.

Во август, МИОА ќе ги пушти во употреба националниот портал за е-услуги, и новиот портал за отворени податоци.

„Тоа што е од особена важност за сите граѓани е дека конечно услугите ги носиме до нивните домови. Најчесто бараните докуметни, граѓаните ќе можат да ги добија по електронски пат, брзо, едноставно и ефтино. Преку дигитализација и професионализација на администрацијата, конечно граѓаните ќе добијат институции кои се нивен сервис и одговараат на нивните потреби и барања“, велат од МИОА.


Нимиц, Димитров и Коѕиас денеска се среќаваат во Виена


Скопје, 25 април, 2018 - 9:36 (META) 

Министрите за надворешни работи на Македонија и на Грција, Никола Димитров и Никос Коѕиас денеска во Виена ќе се сретнат со Метју Нимиц, посредникот во преговорите за името под покровителство на ОН.

Како што соопштија од седиштето на ОН во Њујорк, Нимиц ќе им „асистира на двете страни во изнаоѓање заедничко прифатливо решение за прашањето со името“.

Иако вчера еврокомесарот Јоханес Хан изрази оптимизам дека во следните две седмици може да се реши проблемот со името, премиерот Зоран Заев рече дека посакува, но не верува дека спорот со Грција ќе биде решен за две недели.

По изјавата на Хан реагираше и официјална Атина. Грчкото министерство за надворешни работи преку соопштение го повика еврокомесарот да престане да дава погрешна слика за преговорите, оти не ги разбира, а со такви изјави и ги поткопува.


Хан: Можно е за две недели да има решение на спорот за името


Брисел, 24 април, 2018 - 15:02 (META) 

Европскиот комесар за соседска политика и проширување, Јоханес Хан, изрази оптимизам дека грчкиот спор во врска со името на Македонија би можел да се реши во следните 15 дена.

– Јас сум оптимист дека во следните две недели ќе имаме решение. Барем решение кое ќе го отвори патот за почеток на разговорите за пристап со ПЈРМ. Мислам дека сите се согласуваат дека ова ќе биде корисно за земјата, за општеството и целиот регион на Западен Балкан – изјави тој пред Комитетот за надворешни работи на Европскиот парламент.

Хан рече дека Македонија ја надминала длабоката политичка криза и дека постигнала напредок во спроведувањето на реформите и во одржувањето на добрососедските односи, но предупреди дека „нема време за самозадоволство”.

Коментирајќи за Турција, Хан рече дека земјата се движи подалеку од Европската Унија, особено во однос на човековите права и владеењето на правото и се осврна на неодамнешниот извештај на Комисијата за земјата.


Мицкоски му кажал на Хан дека во Македонија има корупција и неефикасни институции


Скопје, 18 април, 2018 - 16:16 (META) 

Претседателот на ВМРО-ДПМНЕ, Христијан Мицкоски денеска во партиското седиште се сретнал со еврокомесарот за соседска политика и проширување, Јоханес Хан, со кого разговарал за извештајот на Европската комисија кој се однесува на интеграцискиот процес на Македонија кон Европската Унија и за состојбите во државата од економски и политички аспект.

Од партијата информираат дека Мицкоски му посочил на Хан дека европскиот пат е единствениот по кој треба да се движи Република Македонија за подобар стандард и напредок на граѓаните и како начин за заштита на националните и државните интереси.

– Враќањето на позитивната препорака која претходна влада на ВМРО-ДПМНЕ ја добиваше од 2009 година, а ја загуби како резултат на наметната политичка криза во последните 2 години чии актери денес се дел од владата, заедно со препораките кои се содржани во извештајот треба да помогне на подобрување на состојбите и подигнување на критериумите во повеќе сфери во државата. Опозицијата суштински го подобри квалитетот на реформските закони, со што докажа дека државните интереси ги става како основен приоритет, но и дека преостанува да се посвети внимание на нивна имплементација, нешто што зависи од самата Влада – вели Мицкоски.

Според него, загрижуваат состојбите со нотираната корупција во институциите раководени од СДСМ, неефикасноста на институциите, бирократијата, нереформираниот судски систем, организираниот криминал и несигурноста на граѓаните, отворање на судски процеси против неистомисленици на власта, притисок врз медиуми, бркања од работа по партиски клуч и други форми на притисок.