Хан: Ни треба државништво, а не партиски игри


Брисел, 19 октомври, 2018 - 23:56 (META) 

Еврокомесарот за проширување и соседска политика, Јоханес Хан, преку својот „Твитер“ профил им честиташе на пратениците кои вечерва гласаа за потребата од уставни измени кои произлегуваат од Договорот од Преспа потпишан помеѓу Македонија и Грција.

„Добар ден за демократијата во Скопје! Им честитам на сите оние кои одлучија да одат по патеката на ЕУ. Очекувам дека слободниот избор на сите пратеници е целосно почитуван, особено на оние кои направија премин. Ни треба државништво, а не партиски игри“, напиша Хан.

И првиот човек на НАТО, Јенс Столтенберг, на „Твитер“ честиташе на постигнатото двотретинско мнозинство во Собранието.

„Го поздравувам гласањето на парламентот во Скопје за предложените уставни измени. Сега владините и политичките лидери треба да ги завршат националните процедури за спогодбата за името и да ја искористат оваа историска можност да ја доведат земјата во НАТО”, напиша Столтенберг.

 


Хан е убеден дека сите пратеници се свесни за огромната можност и одговорност


Брисел, 19 октомври, 2018 - 12:39 (META) 

Еврокомесарот за проширување и соседска политика Јоханес Хан на својот „Твитер“ изрази увереност дека пратениците од сите политички парии во македонското Собрание ќе ги тргнат настрана партиските интереси и ќе донесат одлука во интерес на земјата и граѓаните.

„Ова се одлучувачки денови за Македонија. Пратениците ќе гласаат за историскиот Преспански договор што ги отвора вратите на земјата за евороатлантската интеграција. Ова е гласање за иднината на земјата и позитивните перспективи за граѓаните. Јас сум уверен дека пратениците од сите политички партии се свесни за огромната можност и одговорност со која се соочуваат денес. Сега е време да се стават настрана партиските интереси и да дејствуваат во интерес на земјата и нејзиниот народ“, напиша Хан.


Седницата за уставни промени ќе продолжи утре


Скопје, 18 октомври, 2018 - 9:37 (META) 

Собраниската седница за уставни измени кои произлегуваат од Договорот од Преспа помеѓу Македонија и Грција ќе продолжи утре.

Вториот дел од вчерашната седница помина без пратениците од ВМРО-ДПМНЕ и коалицијата „За подобра Македонија“, откако тие претходно преку соопштение најавија дека се откажуваат од дебатата, нарекувајќи ја јалова и потенцираа дека ќе гласаат против уставните измени.

Тие ги повикаа пратениците од владејачкото мнозинство да се откажат од настапите и да се пристапи кон гласање по владиниот предлог за измени на Уставот.

За парламентарното мнозинство не може да има подобар договор од овој и ако се отфрли на Македонија и се заканува долгогодишна изолација и стопирање на интеграцијата во НАТО и ЕУ.

Според информациите од Собранието гласањето најверојатно ќе се случи в петок.

Владиниот портпарол Миле Бошњаковски вчера истакна дека Владата дека ќе пристапи кон изработка на уставните амандмани дури откако ќе заврши работата во Собранието со изгласување на потребата за нивно изготвување. Владата смета дека е најдобро тие да се подготват заедно со опозицијата односно да се постигне национален консензус.

Еврокомесарот за соседска политика и проширување, Јоханес Хан, преку социјалната мрежа „Твитер“ ја повика опозицијата да се однесува државнички и да го поддржи договорот од Преспа.

-Ако не успее во тоа, тогаш ќе мора да одговара за тешките последици за граѓаните на Македонија – напиша Хан.


Хан: ВМРО-ДПМНЕ да се откаже од деструктивниот пристап


Брисел, 9 октомври, 2018 - 10:08 (META) 

Еврокомесарот за проширување и соседска политика, Јоханес Хан, во интервју за австриски „Стандард“ вели дека е запознаен со закани од страна на опозицијата против пратеници кои сакаат да ја напуштат партиската линија и да го поддржат Договорот со Грција во Собранието.

Тој од ВМРО ДПМНЕ побарал да се откаже од, како што вели, деструктивниот пристап, и интересите на земјата и граѓаните да ги стави пред партиските. Додава дека партијата целосно ќе ја сноси одговорноста за затворањето на вратите на ЕУ за Македонија, ако не помине Договорот.

-Ова е целосно неприфатливо за партија која вели дека е про-европска, демократска партија – изјавил Хан.

Тој потсетува дека евроатлантската интеграција е декларирана цел на ВМРО-ДПМНЕ, но дека партијата тоа треба да го докаже на дело и дека Договорот со Грција ги отвора токму вратите за интеграција во ЕУ и НАТО.

За еврокомесарот референдумот бил чисто консултативен и огромно мнозинство од граѓаните се изјасниле „за“.

– Повиците за бојкот сведочат за недостаток од демократската зрелост – смета еврокомесарот.

Хан вели дека предвремени избори носат ризик од пробивање на поставените рокови за Договорот за името и изрази сомнеж дали Грција ќе биде во можност да го усвои во својот Парламент. Тој додава и дека нови избори не се гаранција за потребното двотретинско мнозинство.

– Сега постои шанса што треба да се искористи, во спротивно оваа единствена шанса да помине Договорот и со тоа патот кон членство во ЕУ може да се изгуби за долго време, можеби засекогаш – изјави Хан.

Тој додава дека ВМРО ќе биде целосно одговорно за таквото сценарио и пропуштената шанса што е важна не само за Македонија, туку и за целиот регион.


Хан: Не нови избори, туку градење двотретинско мнозинство во парламентот


Виена, 5 октомври, 2018 - 12:55 (META) 

Нови избори во Македонија ќе бидат одолговлекување на патот кон почетокот на преговорите со ЕУ, порачува комесарот за проширување на ЕУ, Јоханес Хан за австрискиот весник „Куриер“, велејќи дека го советувал македонскиот премери Зоран Заев да не свикува вонредни парламентарни избори, туку да изгради двотретинско мнозинство во Собранието кое би го поддржало Договорот со Грција.

-Новите избори ќе бидат одолговлекување на патот кон почетокот на преговорите со ЕУ. Опозицијата придонесе за нискиот одзив преку бојкот. Далеку од тоа дека може да се каже оти референдумот бил неуспешен. Невообичаено е еден референдум да добие поддршка од 94 проценти од гласачите, но да земат учество само 37 проценти – затоа што опозицијата очигледно беше успешна во бојкотот. Во парламентот ќе може да се обезбеди двотретинско мнозинство. На власта ѝ се потребни 8 или 9 гласа од опозицијата и тоа мора да биде остварливо. Сите велат дека сакаат во ЕУ и НАТО, и опозицијата исто така, и затоа мора да се плати цената со овој договор – вели Хан.

На новинарското прашање како да се дојде до потребното мнозинство во парламентот, Хан одговора „со комбинација на Балкан и рационалност“.


Собранието да го спроведе Договорот од Преспа, порачаа Хан и Могерини


Брисел, 1 октомври, 2018 - 13:07 (META) 

Високата претставничка на ЕУ за безбедност и надворешна политика Федерика Могерини и еврокомесарот за проширување Јоханес Хан во заедничка изјава го повикаа парламентот да го спроведе Договорот од Преспа за името и да ги усвои уставните измени. Могерини и Хан велат дека ова е историска шанса за земјата да направи решавачки чекор напред на патот кон Европската унија.

„На 30 септември, граѓаните на Поранешната Југословенска Република Македонија имаа можност да гласаат за иднината на нивната земја. Со мирно и демократско гласање, огромно мнозинство од оние кои го искористија правото на глас кажаа „да“ за Преспанскиот договор за спорот за името и за европскиот пат на земјата. Собранието сега е на ред да продолжи со следните чекори од имплементацијата на договорот за името со одлука за усвојување на уставните промени. Ова е историска шанса, не само за помирување во регионот, туку, исто така, за решавачки чекор напред за земјата на патот кон Европската Унија. Сите политички и институционални актери сега треба да делуваат согласно нивните уставни надлежности и над партиските линии. ЕУ ќе продолжи да ја поддржува и придружува земјата, нејзините институции и сите нејзини граѓани“, се вели во заедничката изјава.


Лидерите да ја почитуваат и да ја спроведат одлуката на граѓаните, порача Хан


Брисел, 30 септември, 2018 - 21:43 (META) 

Еврокомесарот за проширување и соседска политика, Јоханес Хан на социјалната мрежа „Твитер“ оцени дека гласовите „за“ на референдумот се значајни и со тоа се дава поддршка на Договорот од Преспа.

„Им честитам на оние граѓани кои гласаа денеска на консултативниот референдум и ги искористија своите демократски слободи. Со значајното „да“ има широка поддршка за Преспанскиот Договор и евроатлантската иднина на земјата. Сега очекувам сите политички лидери да ја почитуваат оваа одлука и да ја спроведат со голема одговорност и единство ширум партиските линии во интерес на земјата“, напиша Хан.


Хан: Задоволен сум од досегашниот тек на реформи, но останува уште многу работа


Скопје, 28 септември, 2018 - 12:47 (META) 

Македонија неповратно се движи кон полноправно членство во ЕУ и од овој пат нема враќање назад, порача денеска во Брисел вицепремиерот задолжен за европски прашања Бујар Османи на заедничката прес-конференција со еврокомесарот за проширување Јоханес Хан.

Османи, кој во Брисел ја предводи македонската делегација составена од 40 лица, која од вчера го почна објаснувачкиот скрининг процес, на прес-конференцијата говореше на македонски, албански и на англиски јазик.

– Македонија вчера и денеска испишува историја. Ова е моментот кој долго го чекавме и се подгототвувавме, сите досегашни влади. Дозволете да констатирам дека успеавме. Македонија неповратно се движи кон полноправно членство во ЕУ. Од тој пат нема назад – рече вицепремиерот.

Хан е задоволен од досегашниот тек на реформи, но наведува дека останува уште многу работи да се завршат. Тој вели дека нема конкретни датуми до кога треба да се спроведат реформите, особено во сферата на правосудството.

– Немам конкретни датуми, но досега сум задоволен со процесот што е направен. Останува многу работа да се заврши до следната година. Ова вклучува и силна посветеност да се испорачаат резултати и затоа ова е причината зошто не сакаме да губиме повеќе време. Затоа сме тука – рече Хан.


Македонија денеска го почнува скрининг процесот за членство со ЕУ


Скопје, 27 септември, 2018 - 9:40 (META) 

Во Европската комисија во Брисел се наоѓа 40-члена делегација составена од експерти од надлежните државни институции кои имаат надлежности во дадената област, предводена од главниот политички преговарач вицепремиерот за европски прашања Бујар Османи, а во нејзиниот состав се и министерката за правда Рената Дескоска, главниот технички преговарач Бојан Маричиќ и експерти од Секретаријатот за европски прашања. Скринингот ќе почне со Поглавјето 23 – Правосудство и фундаментални права.

Овој прв објаснувачки состанок ќе трае два дена за време на кои ЕУ ќе ги презентира законски одредби, судски одлуки, или, пак, т.н.р. „најдобри практики“ кои во текот на самите преговори ќе им бидат водилка на земјите преговарачи на патот кон зачленувањето во Унијата.

За два месеца, во текот на ноември, треба да се одржи вториот состанок, посветен на поглавјето 24 наречен „правда, слобода и безбедност“.

Според новата методологија на преговори со ЕУ, воведена по последниот бран проширување, сите нови земји кандидати задолжително започнуваат со овие две поглавја, клучни за консолидирање на владеењето на правото, човековите права и правдата.

Во следните месеци, па сѐ до јуни 2019, кога Советот на ЕУ треба и официјално да го даде зеленото светло за старт на преговори доколку Македонија ги исполни зададените услови, треба да се одржат 31 слични состаноци на денешниот за секое од останатите преговарачки поглавја, од земјоделство до животна средина или, пак, конкурентност.

Сите овие подготвителни состаноци ќе се одржуваат заедно со албанската делегација, поради фактот што двете земји во јуни заедно добија условен датум за старт на преговори. Оваа практика не е вообичаена за ЕУ, која претпочита секоја земја да напредува според сопствените заслуги, но во оваа подготвителна фаза одлучено е двете земји да одат во пакет. Понатаму, во текот на самите преговори за членство, се очекува да се примени принципот на „секој по сопствена заслуга“, брифираат дипломатски извори во Брисел.

Состанокот започнува утринава, во девет часот, и ќе трае до петок попладне. Во петок комесарот Јоханес Хан се очекува да одржи прес-конференција со Бујар Османи и неговиот албански колега, додека на маргините на овој прв скрининг, Рената Дескоска треба да оствари средба со евркомесарката за правда, Вера Јурова.


Хан му порачал на Мицкоски дека не е време за играње политички игри


Скопје, 18 септември, 2018 - 10:08 (META) 

Изминатите неколку недели Скопје стана најпопуларната дестинација за политичарите од целиот свет. Ова е доказ дека многу се цени Договорот што го постигнавте со Грција. Во светот има многу конфликти, а ова е редок пример на решавање на таков конфликт, рече еврокомесарот за проширување и соседска политика, Јоханес Хан на прес-конференција со премиерот Зоран Заев.

-Референдумот е можност што се јавува еднаш во животот. Одлуката што ќе ја донесете на 30 септември ќе има далекусежно влијание дури и за оние кои сѐ уште не се родени. За жал сѐ уште морам да ја користам кратенката ПЈРМ – Поранешна Југословенска Република Македонија, иако воопшто не ми се допаѓа. Вие, граѓаните ќе одлучите дали во иднина ќе ви се обраќам со Република Северна Македонија– рече Хан.

Еврокомесарот оствари средба и со лидерот на опозицијата, Христијан Мицкоски на кого му пренел порака референдумот да не се претвори во политички настан.

– Важно е да се мотивираат сите да учествуваат во референдумот и да го остварат своето демократско право. Постојат лични чувства, но најважното нешто е да се учествува. Преку тоа, да се покаже колку е важна одлуката. Сакам колку што е можно повеќе граѓани да учествуваат на референдумот, бидејќи тоа е порака до ЕУ. Мојата порака до Мицкоски и кон премиерот е дека станува збор за референдум за иднината на земјата. Целата ситуација не смее да се претвори во нешто кое е политични настан. Мислам дека политичките партии треба да се воздржат од партиски потреби и цели. Не е време да се играат политички игри – додаде Хан.

Премиерот Заев потенцираше дека најважниот чекор во преговорите со ЕУ ќе го направат граѓаните на 30 септември.

-Секоја средба со лидерите на ЕУ во оваа фаза на нашиот пат е огромна придобивка. На 27 септември ќе го започнеме скринингот за вовед во преговорите, а во јуни 2019 ќе стартуваме со преговорите за членство во ЕУ. Веќе правиме многу реформи, но ова ќе придонесе на тој пат да чекориме побргу. Денешната посета на големиот пријател на Македонија, ја потврдува поддршката на ЕУ за Македонија – рече Заев.