Јовески го испрати барањето за автентично толкување до Собранието


Скопје, 13 февруари, 2019 - 16:13 (META) 

Јавниот обвинител Љубомир Јовески денеска до Собранието го испрати барањето за автентично толкување за член 22 од Законот за Специјалното јавно обвинителство.

Ваквиот потег уследи откако стручниот колегиум на Јавното обвинителство на проширениот состанок пред една седмица одлучи дека начелно-правното мислење на Врховниот суд за предметите на Специјалното јавно обвинителство ја нарушува законитоста и дека ќе поднесе барање до Собранието за давање автентично толкување на член 22. од Законот за СЈО.

Сè почна со одлуката на Врховниот суд, кој на општа седница на 30 јануари, одлучувајќи по иницијатива на адвокатите Боро Тасевски и Еленко Миланов, бранители на голем дел од обвинетите во случаите на СЈО, донесе мислење дека Специјалното обвинителство не смеело да почнува истраги и да отвора судски процеси по истекот на рокот од 18 месеци внесен во законот за ова обвинителство.

„Потребата од давање автентично толкување произлегува од  различното толкување на чл. 22 од Законот за јавното обвинителство  за гонење на кривични дела поврзани и кои произлегуваат од содржината на незаконското следење на комуникациите“, се вели во барањето што Јовески денеска го испрати до Собранието.


Oбвинителството на проширена седница ќе решава што понатаму со предметите на СЈО


Скопје, 6 февруари, 2019 - 13:06 (META) 

Јавниот обвинител Љубомир Јовески денеска свикал проширена седница на обвинителите во Јавното обвинителство, на која треба да се дискутира за побараното мислење од скопскиот Кривичен суд. Скопскиот суд побара известување кој обвинител ќе ги работи случаите на Специјалното јавно обвинителство (СЈО) по мислењето од Врховен суд со кој се посочува дека СЈО повеќе од година и пол нема мандат да покренува истраги и да поднесува тужби. Истовремено, судиите од Кривичниот суд побараа Јовески од Собранието да побара автентично толкување на член 22 од Законот за СЈО.

На утрешната седница на Стручниот  колегиум на јавните обвинители во Јавното обвинителство, ќе учествуваат и вишите јавни обвинители на Вишите јавни обвинителства и јавниот обвинител на Основното јавно обвинителство за гонење на организиран криминал и корупција.


Кривичен суд бара Јовески и Собранието да се изјаснат за надлежноста на СЈО


Скопје, 5 февруари, 2019 - 16:26 (META) 

Скопскиот Кривичен суд побара Јавниот обвинител Љубомир Јовески да се изјасни кој обвинител ќе ги работи случаите на Специјалното јавно обвинителство (СЈО) и да побара автентично толкување од Собранието за членот 22 од Законот за специјалното јавно обвинителство, јавува „Порталб“.

Таква одлука била донесена на вчерашниот состанок на Кривичниот суд по правното мислење на Врховниот суд кој го оспорува почнувањето истраги и поднесувањето обвиненија од СЈО по 30 јуни 2017 година и нареди овие случаи да бидат преземени од редовните обвинителства.

Според барањето од судот, Јовески мора да се произнесе кој ќе биде овластен тужител на случаите на СЈО, дали СЈО или Основното јавно обвинителство за гонење организиран криминал и корупција. Притоа јавниот обвинител ќе треба од Собранието да побара автентично толкување на законот за СЈО, бидејќи само законодавецот смее да ги толкува законските одредби, а судските тела се надлежни само за спроведување на одредбите, а не нивното толкување.


Дане Илиев: не е важен моделот за СЈО, туку да продолжат постапките што ги води


Скопје, 5 февруари, 2019 - 11:42 (META) 

Не е важно во која форма ќе функционира Специјалното јавно обвинителство (СЈО), решенија има, важно е да има политичка волја да продолжат постапките што тоа ги покрена и ги презема, смета Дане Илиев, поранешен претседател на Врховниот суд. Тој оценува дека е доведено во прашање постоењето на СЈО.

– Не е добро. Од неколку страни се донесоа прописи кои работата на тоа обвинителство ја доведоа под знак прашалник. Во прашање е доведено и неговото опстојување, дали ќе опстои како јавно обвинителство. Измените во Кривичниот законик, начелното мислење на Врховниот суд, амнестијата… – изјави за „Мета“ Илиев.

По ставот на Врховниот суд, кој минатата недела даде начелно правно мислење дека СЈО не е овластен тужител по истекот на рокот од 18 месеци, предвидени со законот со кој беше формирано, Илиев смета дека со нов закон треба да се најде решение за предметите што ги води ова обвинителство.

– Најверојатно ќе се случи со нов закон, мора да се реши, со директни одредби или со преодни одредби, да се каже што со преземените случаи од јавното обвинителство и со материјалите кои ги поседува. Најлогично е да ги преземе Јавното обвинителство за организиран криминал – смета поранешниот претседател на Врховниот суд.

Според Илиев, не е најважно дали СЈО ќе остане или ќе се претопи во некое од постоечките обвинителства, се додека продолжи процесуирањето на предметите што ги води и обработката на материјалите што ги поседува.

– Идеално решение нема, решенијата се добри, зависи од луѓето. Не е до моделот, туку како ќе се спроведе. Дали постои политичка волја да се спроведе? – се прашува Илиев.


Обвинителство информира дека вакцините со погрешни декларации се уште не се уништени


Скопје, 1 февруари, 2019 - 12:53 (META) 

Постапувајќи по наредбата издадена од Основното јавно обвинителство Скопје, Министерството за внатрешни работи го извести надлежниот јавен обвинител дека во простории во правното лице „Македонија лек“ биле пронајдени МРП вакцините со погрешни декларации и дека тие се уште не се уништени.

„Надлежниот јавен обвинител веднаш издаде Наредба за обезбедување на вакцините за потребите на евентуална идна постапка. Вакцините ќе бидат попишани и обезбедени, а ќе останат во просториите на „Македонија лек“, бидејќи таму има соодветни услови за нивно чување. Проверките во предметот отворен по допрен глас продолжуваат до целосно утврдување на фактичката состојба“, се вели во соопштението на Обвинителство.


Снимките од Груевски избришани, а албански сајт ги „испрати“ во нашето обвинителство


Скопје, 1 февруари, 2019 - 11:36 (META) 

Известувајќи за барањето на македонското обвинителство за снимките од безбедносните камери за бегството на екс премиерот Груевски, албанскиот новински сајт „Балканвеб“ во текст со наслов „Албанија ги праќа во Македонија снимките од бегството на Груевски“,  вели дека снимките од бегството на Груевски веќе се симнати од системот и според барањето од македонските власти, ќе се пратат во Скопје.

Во продолжение на текстот се вели дека во снимките се гледа моментот кога Груевски влегува во автомобил и ја поминува границата.

Имено, на 12.12.2019 македонските власти известија дека ќе бидат побарани снимки од безбедносните камери од Албанија, откако поранешниот премиер Никола Груевски еден месец претходно избега од Македонија за да го избегне издржувањето на двегодишната затворска казна за случајот „Тенк“. Потоа, со помош на унгарски дипломати, преку Албанија, Црна Гора и Србија избега во Унгарија, каде што доби политички азил.

Но, како што е веќе познато во македонската јавност, обвинителството информираше дека иако две службени лица престојуваа таму, по барањето за меѓународна правна помош не е постапено целосно, така што снимките не се обезбедени.

Имено, државниот јавен обвинител Љубомир Јовески вели дека во образложението било наведено дека системот од безбедносните камери од албанските гранични премини автоматски го бришел материјалот поради немање место.

– Има повеќе моменти во нивното образложение. Едно е дека тие податоците се многу од безбедносните камери и дека тој систем не може подолго да ги чува  – рече Јовески.

Но, и покрај овие информации пренесени и од албанските медиуми во Македонија – дека снимките не се добиени – медиумот не објавил нова информација за овој случај, а и текстот нема детално образложение како се одвивала постапката, ниту пак посочува извор од институцијата од каде потенцијално е преземена оваа „информација”.


Обвинителство: Војминовски беше во домашен притвор поради здравствени проблеми


Скопје, 17 јануари, 2019 - 13:56 (META) 

Од Јавното обвинителство порачаа дека домашен притвор за сега избеганиот Никола Војминовски, кој беше осуден на 13 и пол години затвор за обид за убиство на Зијадин Села при насилствата во Собранието на 27 април 2017 година, бил побаран поради здравствената состојба на осудениот.

Војминовски во домашен притвор ја исчекуваше правосилноста на пресудата. По него е распишана потерница.

Од обвинителството потсетуваат дека за обидот на убиство се осудени на затвор сите седуммина обвинети.

„Во текот на кривичната постапка, присуството на сите обвинети лица од нивното лишување од слобода беше обезбедено со мерка притвор, меѓу кои и на обвинетото лице кое сега е во бегство. За ова лице, одбраната во текот на главната расправа поднесе предлог за укинување на мерката притвор и нејзина замена со мерка куќен притвор или мерки на претпазливост, а притоа како аргумент ја наведе влошената здравствена состојба предизвикана од кардиоваскуларни проблеми на обвинетиот. Кривичниот совет на Судот го прифати овој предлог и на лицето му определи мерка куќен притвор на почетокот на мај 2018 година. Судот ја прифати наведената причина од страна на одбраната во која и јавноста неспорно можеше да се увери кога на 18.04.2018 година обвинетиот колабираше на едно од рочиштата и интервенираше итната медицинска помош“, велат од Јавното обвинителство.

Во соопштението се вели дека по изрекувањето на пресудата надлежниот јавен обвинител побарал продолжување на домашниот притвор поради тоа што здравствената состојба на Војминовски и понатаму била лоша. Обвинителот во таа фаза, ниту пак претходно или потоа, немал никакви информации за „евентуално бегство“. Дополнително, за следење на мерките што се применуваат кон осудениот надлежен е судот, а не обвинителот, се правдаат од Обвинителство.


Истражување: Нема реформа на правосудството без политичка волја


Скопје, 14 јануари, 2019 - 14:57 (META) 

Мора да има политичка волја за реформи во правосудството и цврсто опстојување на имплементацијата на законските реформи, со што ќе се демонстрира дека политичката елита цврсто стои зад принципот на поделба на власта во земјата.

Ова е најважната препорака од истражувањето на Фондацијата „Метаморфозис“, во рамките на регионален проект за оцена на исполнувањето на политичките критериуми за пристапување на земјите од Западен Балкан кон Европската унија.

Ова второ по ред истражување од големиот проект беше посветено на реформите во правосудството и како тие би можеле да се подобрат. Главниот заклучок наведен погоре произлегува од општо констатираниот факт на експертите, дека и најдобриот закон може да биде потиснат од носителите на политичката или од други центри на моќ.

Препораките произлезени од истражувањето се следни:

  • Континуирано изразување на силна политичка волја за промени во законите што ќе гарантираат независност, непристрасност и ефикасност на правосудниот систем, но и доследна имплементација на законските решенија без обиди за злоупотреби;
  • Обезбедување цврсти законски инструменти и нивна имплементација со кои ќе се спречи политичката корупција во Јавното обвинителство;
  • Обезбедување континуитет на автономноста на Специјалното јавно обвинителство;
  • Обезбедување силни законски инструменти и политичка волја за нивна имплементација за да се спречи политичката корупција во основните судови и фактичката корупција, за која, за дел од нашите експерти, нема дилема дека постои кај апелациските судови;
  • Промена на законската рамка за темелна проверка на вистинитоста на анкетните листови на судиите и обвинителите и нејзино доследно спроведување;
  • Задржување на концептот за именување судија или обвинител само преку Академијата за судии и јавни обвинители, како најмалку штетен модел од другите што се во опција, преку интерни именувања, преку Собрание, итн.;
  • Натамошна професионализација на судиите и јавните обвинители преку континуиран систем на обуки и образование;
  • Унапредување на Информациско-комуникациските технологии во правосудството, обединување на информацискиот систем на судството со обвинителството и централните регистри и други дигитални бази на податоци, унапредување на функционалноста на е-судството, што подразбира и поголеми вложувања на државата и во судството и во обвинителството, зголемена транспарентност при објавувањето и достапноста на судските одлуки и на записниците од рочиштата;
  • Промена на законските решенија за помилување и нивна доследна имплементација, со цел, амнестиите или аболициите да не се злоупотребуваат во мерка што ќе го загрози интегритетот на правосудството или на важењето на принципот на еднаквост на законите за сите и на владеење на правото;
  • Промена на мрежата на судството и преиспитување на потребата од постоење на Вишиот управен суд;
  • Отворена јавна расправа за влијанието на меѓуетничките (кадровски) политики врз судството, кои штетно влијаат врз правната држава.

Истражувањето е второ од петте што се планирани во рамките на регионалниот проект „Западен Балкан и процесот на пристапување во ЕУ: Примена на политичките критериуми“, што го води Центарот за демократска транзиција од Подгорица, Црна Гора.

Следните истражувања ќе се однесуваат на реформите во борбата против оргaнизираниот криминaл и корупцијата, на реформата во медиумскиот сектор и на реформата во јавната администрација.

Целосното истражување можете да го погледнете на следниот линк.

Проектот е подржан од Амбасадата на Кралството Норвешка во Белград, и од Балканскиот фонд за демократија, проект на Германскиот Маршалов фонд на САД.


Јовески: СЈО постави нови стандарди, но важно е кој ќе го надгледува


Скопје, 3 јануари, 2019 - 10:04 (META) 

Државниот јавен обвинител Љубомир Јовески во интервју за МИА вели дека суштествено е да се одлучи кој ќе го врши надзорот над работата на Специјалното јавно обвинителство.

– Со Стратегијата за реформи на правосудниот систем на Владата, предвидено е СЈО да стане дел од обвинителскиот систем. И јас се залагам да има единствен закон во кој ќе се инкорпорира и работата на СЈО како посебно обвинителство во мрежата на Јавни обвинителства. Работната група која работеше на подготовка на Законот изготви ваква верзија – истакнува Јовески.

Според него, мора да се вреднува и да се земе предвид дека Специјалното јавно обвинителство, постави нови стандарди и нова перцепција за обвинителството, пред се во истражувањето на предметите и изборувањето за целосна финансиска независност.

– СЈО наметна и поинаков начин на работење, како што е транспарентноста во работењето и покрај тоа што со одредени постапки не се согласувам. Моја заложба е СЈО во делот на кривичните дела за кое е основано да ја задржи досегашната самостојност за тие кривични дела, а со оглед дека му се додава нова надлежност за кривични дела од областа на корупцијата од избрани и именувани лица и потешки кривични дела, за таа надлежност да важат општите правила како и за другите обвинителства. Се разбира дека за определени постапки треба  да се определи негова самостојност, но особено сметам дека е суштествено да се одлучи кој ќе го врши надзорот над работата на ова обвинителство – вели во интервјуто за МИА јавниот обвинител Јовески.


Во Јавно обвинителство пристигнале вкупно 66 барања за амнестија


Скопје, 27 декември, 2018 - 17:06 (META) 

Јавното обвинителство извести дека пристигнале вкупно 66 барања за амнестија доставени согласно Законот за амнестија од страна на Основниот суд Скопје 1 Скопје.

„Во Основното јавно обвинителство за гонење на организиран криминал и корупција пристигнаа 29 барања, од кои до овој момент е дадено позитивно мислење за 12. Во Основното јавно обвинителство Скопје пристигнати се 37 барања за амнестија. Поднесените барања се доставени до надлежните обвинители кои постапувале по предметите. По нивното разгледување, ќе биде доставено соодветно мислење до судот“, се вели во соопштението на ОЈО.