Владата бара да биде утврдена одговорноста за двегодишното прислушување на ОЈО


Скопје, 30 ноември, 2018 - 15:50 (META) 

Владата остро го осудува случајот со снимените телефонски разговори во Основното јавно обвинителство. Сметаме дека ваквите појави се рецидив од минатото и пракса на минатите владејачки недемократски структури, порача владиниот портпарол Миле Бошњаковски, реагирајќи по денешната информација од Јавното обвинителство дека во објектот во кој се наоѓа главното обвинителство и други обвинителства, е пронајдена опрема со која се прислушувало од крајот на септември 2016 година до вчера.

– Владата очекува дека институциите ќе посветат максимални капацитети во истрагата, дека ќе се расчисти настанот и дека јавноста ќе биде веднаш и целосно информирана. Тоа што можеме во моментов да го кажеме е дека Министерството за внатрешни работи целосно е вклучено во предистражната постапка. Одговорноста мора да биде идентификувана, утврдена и целиот случај да има ефикасна судска разрешница – рече Бошњаковски.


Јовески: Биле прислушувани фиксните телефони на Обвинителството


Скопје, 30 ноември, 2018 - 13:40 (META) 

Јавното обвинителство отворило предистражна постапка за сторителот на незаконско прислушување на фиксните телефоните во Обвинителство од 30 септември 2016 година до вчера.

Телефонските разговори биле снимени на два хард диска соопшти на брифинг со новинарите Јавниот обвинител Љубомир Јовески.

Ќе се прави вештачење за да се утврди кој снимал, со која цел и дали прислушуваните разговори биле изнесувани надвор и дали е нешто бришено во нив.

Телефонската централа била набавена преку тендер и била сместена во посебна просторија во Јавното обвинителство. Централата за фиксна телефонија била инсталирана во 2013 година.

Јовески, во интерес на истрагата, не сакаше да открие повеќе детали за овој случај.


Намален бројот на посебни истражни мерки во 2017 во споредба со 2016 година


Скопје, 20 ноември, 2018 - 12:40 (META) 

Јавното обвинителство на Република Македонија во 2017 година спровело Посебни истражни мерки (ПИ-мерки) против 289 лица и во 262 предмети со кривични дела, што  е намалување во однос на 2016 година, кога станувало збор за 374 лица и 454 предмети на кривично дело, се вели во годишниот извештај на ова обвинителство, кој денеска беше доставен до медиумите.

Обвинителството, изнесувајќи и други статистики за својата работа, соопшти дека минатата година сите обвинителства постапувале против 28.753 лица, што е за 340 лица помалку отколку во 2016.

Обвинителите се жалат и на недоволно кадар на речиси сите нивоа и бараат дополнителни средства за нови вработувања.


Владата подготвува нов закон за СЈО, за Јавното обвинителство и за кривична постапка


Скопје, 15 ноември, 2018 - 10:00 (META) 

Коинциденција или не, Владата реши да менува три клучни закони од областа на кривичниот прогон токму на 13 ноември, денот кога поранешниот премиер Никола Груевски објави дека пребегнал во Унгарија, каде што бара политички азил.

Министерството за правда токму на овој ден објави дека подготвува предлог закон за Специјалното јавно обвинителство кој треба да биде готов до крајот на месецот.

„Целта на законот е да се изврши уредување на материјата за статусот, надлежностите и други прашања поврзани со Специјалното јавно обвинителство. Во текот на подготовката на законот ќе бидат вклучени судии, јавни обвинители, меѓународни организации и надлежни институции“, соопшти Министерството.

Истовремено, Министерство за правда подготвува предлог закон за јавното обвинителство. Во образложението се вели дека законот за кривичната постапка е донесен во 2010 година, а започна да се применува од 2013 година и дека со него биле воведени значајни новини кои во најголем дел се однесуваат на јавното обвинителство.

„Затоа е потребно Законот за јавното обвинителство да се усогласи со соодветните решенија пропишани во Законот за кривичната постапка. Целта на Законот е да се изврши усогласување со меѓународните стандарди и да се усогласи со соодветните решенија пропишани во Законот за кривичната постапка“, информираат од Министерството.

Освен овие два закони, во тек е подготовка и на предлог закон за кривичната постапка. Во образложението од Министерството за правда се вели дека во периодот на неговата примена биле лоцирани одредени недостатоци кои е потребно да се отстранат.

„Дополнително, потребно е усогласување на законот со најновите меѓународни стандарди во оваа област. Целта на Законот е да се изврши усогласување со меѓународните стандарди и да се надминат лоцираните слабости во неговата примена“, објаснуваат од Министерството.


ВМРО-ДПМНЕ: Се гонат неистомислениците на Заев, а соработниците се оставени на мир


Скопје, 9 август, 2018 - 10:40 (META) 

Обвинителството се претвори во партиска испостава на СДСМ, која служи за монтирање на обвиненија против политичките неистомисленици на Зоран Заев и СДСМ, а за криминалите на неговите соработници не реагира, обвини ВМРО-ДПМНЕ.

Опозициската партија, велејќи дека Македонија е единствена во 21. век во Европа што има политички затвореници, обвини дека и судот изрекува пресуди по директиви на Заев, за тој да се пресмета со неговите политички противници.

„До обвинителството не допира гласот на јавноста за обидот за грабеж на  45 милиони евра државни пари преку разни криминални тендери и грантови кои служеа за исплата на партиските послушници на СДСМ, но затоа допира гласот на Зоран Заев и нарачката за прогон на неговите неистомисленици. До ОЈО не допре ниту случајот со злоупотребата на службена должност кога министерката за одбрана Радмила Шекеринска додели грант од половина милион денари во невладина организација каде членува и таа самата“, се вели во соопштението од ВМРО-ДПМНЕ.


Сашо Сенков, обвинет за обид за убиство врз Зијадин Села, од денеска е слободен граѓанин


Скопје, 6 јуни, 2018 - 12:34 (META) 

Обвинителството го повлече обвинението за еден од обвинетите за нападот на пратеникот Зијадин Села, за време на нередите во Собранието од 27-ми април, минатата година. Како што информираат од Јавното обвинителство на Република Македонија, одлуката е донесена по анализа на нова снимка и сите досега изведени докази.

Притоа утврдено е дека Сашо Сенков не го сторил делото кое му се става на товар.

За две други лица, Ц.Ѓ. и С.П., обвинението е преквалификувано, од обид за убиство во кривично дело „насилство“. За седум од вкупно 10 лица, останува обвинението за обид за убиство.

Врз основа на дополнителните сознанија, обвинителството презема и понатамошни дејствија за целосно расветлување на настанот во поглед на оштетениот Зијадин Села.


Одложен изборот на првите луѓе на дваесетина јавни обвинителства


Скопје, 4 јуни, 2018 - 15:22 (META) 

Советот на јавни обвинители ја одложи денешната седница на која требаше да се изберат шефови во дваесетина обвинителства во земјава, вклучувајќи ги и Обвинителството за гонење организиран криминал и корупција и Основно јавно обвинителство Скопје, кои водат повеќе од 2/3 од вкупниот број на предмети во цела земја.

Причина за одлагањето е што на членовите на Советот им требале дополнителни документи за одредени кандидати, па седницата со ист дневен ред ќе се одржи следната среда.

– Седницата беше одложена од причина што членовите на советот со оглед на бројот на кандидати пријавени за постапката за избор на на јавни обвинители и со оглед на потребните проверки, треба да се прибават уште некои податоци кои се од значење за носење одлука за избор на обвинителите – рече Коле Штериев, Претседател на Советот на јавни обвинители.


Обвинение против 13 лица за убиството во Мала Речица


Скопје, 23 мај, 2018 - 12:11 (META) 

Основното јавно обвинителство Тетово поднесе обвинение против 13 лица за учество во вооружениот инцидент во Мала Речица, во кој на 5 април годинава беше убиен кумановецот Наип Реџепи, а двајца беа повредени.

Против четири лица е поднесен обвинителен акт со предлог за продолжување на мерката притвор, со кој едно лице се товари за убиство и за неовластено изработување, држење, посредување и тргување со оружје. Три лица се товарат за обид за убиство и за неовластено изработување, држење, посредување и тргување со оружје. Надлежен јавен обвинител до Основниот суд Тетово предложи на тројцата обвинети кои се уапсени, како и на еден обвинет кој и натаму е во бегство да им биде продолжен притворот до правосилноста на пресудата против нив.

Против останатите девет лица Основното јавно обвинителство Тетово поднесе обвинителен предлог за учество во тепачка. За осуммина обвинети е доставен предлог за определување мерки на претпазливост, додека за едно лице е предложен притвор до правосилност на пресудата, бидејќи станува збор за државјанин на Република Албанија.

„Во текот на истрагата, јавниот обвинител утврди дека обвинетите лица биле дел од две меѓусебно спротивставени групи, кои по претходен договор и заради претходна меѓусебна нетрпеливост, со возила дошле на местото на инцидентот во Мала Речица. Петмина, меѓу кои и починатото лице, биле вооружени со пиштоли, по што дошло до меѓусебна вербална расправија која прераснала во тепачка и употреба на огнено оружје. Освен пиштоли, во тепачката биле користени бејзбол палки, секира, нож и други предмети“, соопшти обвинителството.


„Лов на вештерки“ ја документира војната на ВМРО-ДПМНЕ со граѓанските организации


Скопје, 28 март, 2018 - 20:32 (META) 

Периодот од декември 2016 до мај 2017, кога власта на ВМРО-ДПМНЕ презеде низа акции за притисок кон 23 граѓански организации преку вонредни инспекции од Управата за јавни приходи (УЈП) и истраги од Јавното обвинителство, МВР и Финансиската полиција на Република Македонија, отпочнати од Антикорупциска комисија, е тема на новиот документарец на Телевизијат 24.

„Лов на вештерки“, детално, преку изјави на раководни лица на некои од граѓанските организации ја отсликува голготата на невладините, меѓу кои и на Фондацијата за интернет и општество „Метаморфозис“ во офанзивата во која се вклучија и медиумите блиски до тогаш владејачката ВМРО-ДПМНЕ.

– Речиси секоја недела имавме луѓе од УЈП, или тука или кај нашиот сметководител. Се обидоа преку медиумите и институциите да создадат конфузија и слика дека граѓанските организации се непријатели на државата – вели извршниот директор на „Метаморфозис“, Бардил Јашари.

Дури во 13 од организациите, влегла и Управата за финансиска полиција, истражувајќи текови на пари од УСАИД.


Јавното обвинителство отворило предистражна постапка за рудникот Казандол


Скопје, 6 март, 2018 - 11:00 (META) 

Јавното обвинителство за гонење организиран криминал и корупција отворило предистражна постапка во која се бараат дополнителни докази за начинот на кој е издадена концесијата за експлоатација на бакар во рудникот Казандол, објави „Призма“.

„Побарано е од МВР да преземе одредени дејствија и активности во насока на обезбедување на докази и утврдување на одредени околности наведени во кривичната пријава во врска со овој случај. Потоа Јавното обвинителство ќе одлучи дали предистражната постапка ќе доведе до отворање на истрага“, велат од Јавното обвинителство.

Оваа кривична пријава е поднесена на почетокот на јануари годинава, и се однесува на „основано сомнение дека група од повеќе сторители се здружиле со цел на незаконски начин да овозможат компанијата „Сардич МЦ“ противправно да добие Договор за експлоатација на бакар, злато и сребро“.