Јавните тоалети во Охрид повторно надвор од употреба, обиени автоматите за наплата


Охрид, 6 ноември, 2018 - 11:28 (META) 

Не престануваат континуираните оштетувања на јавните тоалети поставени во централното градско подрачје во Охрид. Овој пат насилно се исечени автоматите за влез во јавните тоалети поставени кај малиот плоштад.
И овој случај на уништување на јавните добра е пријавен во полиција и се` додека не се санира штетата тоалетите ќе бидат надвор од употреба.

Пред два месеци беа обиени автоматите за влез во двата јавни тоалети кои се поставени во стариот дел од градот кај Горна Порта, додека ова е второ уништување на автоматите за влез во јавните тоалети поставени кај малиот плоштад кај Т.Ц.АМАМ.

Охриѓани и туристите со децении чекаа градот да ги добие јавните тоалети, а ваквите вандалски чинови најмалку одат во прилог на угледот на најголемиот туристички центар со оглед на тоа што во градот се уште има туристи.


НСДП: Преговорите на партиите да бидат јавни и да се водат во Собранието или на МРТВ


Скопје, 19 јули, 2016 - 15:45 (META) 

Преговорите меѓу претставниците на четирите политички партии потписници на Договорот од Пржино, наместо во актуелниот формат, зад затворени врати, да бидат јавни и по можност да се водат или во Собранието или во студио на националниот радиодифузен сервис – МРТВ, бараат од Нова социјалдемократска партија (НСДП).

Оттаму велат дека водењето на преговорите зад затворени врати не „доведе до разврска на политичката криза“, а секој од учесниците „го соопштуваше и го соопштува само својот став и го напаѓа ставот на другите учесници“, поради што македонската јавност, особено оној дел кој не е поддржувач на ниту една од партиите учесници во преговорите, „не можеше и не може јасно да го дознае и препознае ставот на ниту една страна“.

„За македонската јавност да може реално да ги увиди и согледа ставовите на политичките партии во преговорите, НСДП смета дека по едногодишните неуспешни преговори зад затворени врати, созреани се условите за продолжувањето на дијалогот на отворена, јавна сцена. Колку и да се има разбирање за потребата од тајни преговори, бидејќи станува збор и за отворање на прашање од суптилна природа, кои допираат до меѓуетничките односи и до криминалната сфера, по истекот на една година сметаме дека своите политички одлуки и ставови учесниците во преговорите треба да ги изложат јавно, на отворена маса. Нема подобар судија од македонската јавност, за тоа кој ги брани националните и државни, а кој партиските и личните интереси. Продолжувањето на дијалогот на јавна сцена може да се организира или во Собранието на Република Македонија или во студио на јавниот радиодифузен сервис – МРТВ“, стои во соопштението на НСДП.

Оттаму додаваат отворањето на преговарачкиот процес кон јавноста, ќе доведе до зајакнување на чувството на одговорност на учесниците и до брзо решение за излез од ситуацијата.