Грчките синдикати најавуваат 24-часовен штрајк на јавниот и приватниот сектор


Атина, 29 мај, 2018 - 10:38 (META) 

Најголемите грчки синдикати на вработените во јавниот и приватниот сектор за утре закажаа генерален 24-часовен штрајк, што ќе ја парализира цела Грција, јавува новинската агенција МИА.

Проблеми ќе има во авионскиот, железничкиот и бродскиот превоз, а нема да се емитуваат ниту вести и информативни емисии поради учеството на новинарите во штрајкот.

Грчките авиокомпании откажале или презакажале дел од летовите, а бродовите и возовите исто така нема да сообраќаат. Јавниот сектор нема да работи до четврток, а протести се закажани за утре во центарот на Атина.

Синдикатите ги повикуваат граѓаните да ги „обединат силите против мерките на штедење, невработеноста и прекумерните даноци“.


Вкупно 139.009 вработени во јавниот сектор


Скопје, 30 март, 2018 - 12:58 (META) 

Во државната администрација, во локалната самоуправа, во јавните претпријатија, во акционерските друштва во државна сопственост вкупно се евидентирани 139.009 вработени. Без привремените вработувања и без вработените во акционерските друштва, има 128.722 вработени во 1.299 институции, соопшти министерот за информатичко општество и администрација, Дамјан Манчевски, на денешниот брифинг.

Иако не е целосно функционален Регистарот на вработените во јавниот сектор, за чие воспоставување во 2014 и 2015 година се дадени 2,15 милиони евра, Министерството за информатичко општество и администрација (МИОА), бројките ги добило со вкрстување на податоците од Управата за јавни приходи (УЈП), Агенцијата за вработување, агенциите за привремени вработувања и Фондот за здравствено осигурување.

Граф

Без АРМ, МВР и Агенцијата за разузнавање, бројката на вработените од државата и локалните власти изнесува 109.304, додека во акционерските друштва во државна сопственост се вработени 8.633 луѓе од вкупната бројка.

Според податоците, од вкупната бројка од 139.009 луѓе кои добиваат плата од буџетот, 59,96 отсто се вработени на локално ниво, а 40,03 на централно. Од нив, 54 отсто се жени, а 46 отсто мажи.

По националност, 75,36 отсто се Македонци, 19,31 отсто Албанци, Турци се 1,84 отсто, Роми, 1,14 отсто. По образование, 42,45 се со факултетска диплома, со средно се 34,81 отсто, а со осново се 9,67 отст. Магистри се 4,45 отсто.

Најмногу вработени има во образованието – 32 отсто, во здравството се 18 отсто, а во државната управа се 15 отсто, додека во локалната власт се 5 отсто.

– Ова е првпат да се објави вкупната бројка на вработени во јавниот сектор, вклучително и оние привремено вработени и вработените во акционерските друштва во државна сопственост.  Притоа, со привремени вработувања сега се 1.624 луѓе, за разлика од април 2017 година, кога биле 2.064 – рече Манчевски.
Граф4

Тој и државниот секретар во МИОА, Јахи Јахија објаснија дека се очекува наскоро да профункционира целосно Регистарот на вработените во јавниот сектор, а според нив, доаѓањето до овие бројки не било лесно, затоа што голем број од корисниците на буџетот или не знаеле како да внесат податоци или пак не го сметале тоа за важно.

Како што рече Јахија, новите мерки да се ограничи исплаќањето на платата доколку не се достават податоците бил клучниот потег за да се дојде до податоците.

– Со молење, инспекции, стимулација и обука, притискавме да се достават податоци. Решението да се ограничи исплатата на платата е екстремно решение, но е единствениот начин – рече Јахија.

Граф2ж3

Според Манчевски, од стапувањето на новата власт, нема партиски вработувања и сега се вработува само според потребите на институциите, а не според потребите на партијата, поради што во текот на владеењето на ВМРО-ДПМНЕ се правеле и нелогични систематизации на работните места.

– Во текот на претходната власт, членовите на тогашните опозициски партии не смееја да помислат дека ќе бидат примени во јавниот сектор. За разлика од тогаш, сега шансите им се отворени да конкурираат, но истовремено се вработуваат и луѓе од ВМРО-ДПМНЕ – рече министерот.

Манчевски најави и дека во мај и јуни треба да почне создавањето на Централниот регистар на население, кој би профункционирал до крајот на годината.


Министерство за финансии: Ќе се почитуваат законите за исплата на платите во јавниот сектор


Скопје, 10 октомври, 2017 - 14:43 (META) 

Министерството за финансии реагира на пишувањата во дел од медиумите, во кои се вели дека нема пари за исплата на минимална плата, и истакнува дека во однос на исплатата на платите во јавниот сектор ќе ги почитува законите и прописите.

„Во однос на минималната плата, исплатите се вршат во согласност со законските решенија и со доставените барања од буџетските корисници.Кај дел од институциите веќе се префрлени средства за минимална плата и тие истата ја исплаќаат во согласност со законот. Би сакале да истакнеме дека законите еднакво важат за сите и тие во целост се почитуваат од страна на Министерството за финансии“, се вели во соопштението на министерството.


ВМРО-ДПМНЕ бара поддршка за законот за зголемување на платите во јавниот сектор


Скопје, 3 август, 2017 - 13:47 (META) 

ВМРО-ДПМНЕ ги повикува министерот Драган Тевдовски, Владата на СДСМ и Зоран Заев, заедно со пратениците на СДСМ, да го поддржат предлогот за зголемување на платите во јавниот сектор за пет проценти, изјави на прес-конференција Владимир Ѓорчев, пратеник и член на извршниот комитет на ВМРО-ДПМНЕ.

Тој рече дека тие пари се за војската, полицијата, вработените во здравството, во образованието, во јавните претпријатија на локално и на државно ниво.

– Значи, бараме да се зголемат платите во Македонија за пет проценти. Ветувањата со кои СДС дојде на власт, за просечна плата од 30.000 денари, подразбира секоја година, четири години по ред, платите да се зголемуваат најмалку 10 проценти. А, кога имаме конкретен прв предлог-закон за зголемување на платите од пет проценти, тој предлог веднаш се одбива. Не е доцна. На Комисијата за труд и социјална политика го изгласавме зголемувањето на платите. Сега тој предлог ќе дојде на пленарна седница – додаде Ѓорчев.


Поднесен предлог-закон за зголемување на платите во јавниот сектор


Скопје, 2 август, 2017 - 12:43 (META) 

Водени од реалните потреби на вработените во јавниот сектор, пратениците на ВМРО-ДПМНЕ и на Коалицијата за подобра Македонија во Собранието поднесоа предлог-закон за зголемување на платите во јавниот сектор за пет проценти, изјави денеска на прес-конференција Зекир Рамчиловиќ, член на ИК на ВМРО-ДПМНЕ.

Тој рече дека овој закон предвидува зголемување на платите во јавниот сектор за пет проценти во 2018 година и дополнително зголемување од пет проценти во 2020 година.

– Со овој предлог-закон се предвидува зголемување на платите на вработени во државната и во јавната администрација, значи здравство, образование, полиција, војска и јавни претпријатија. Истиот закон претставува изборно ветување на ВМРО-ДПМНЕ и претставува реална потреба за вработените – изјави Рамчиловиќ.

Тој додаде дека од ВМРО-ДПМНЕ се задоволни што овој закон поминал на собраниската Комисија за труд и социјална политика, каде што добил поддршка и од пратеници кои не се дел од нивната коалиција.

– Предлог-законот наскоро ќе се најде и на собраниска седница и ВМРО-ДПМНЕ искрено се надева дека СДС ќе се надмине себе си и партиските интереси и ќе даде поддршка за истиот – нагласи Рамчиловиќ.


Манчевски: Ќе има детален извештај за новите вработувања во Владата


Скопје, 24 јули, 2017 - 18:34 (META) 

Министерот за информатичко општество и администрација, Дамјан Манчевски, денеска изјави дека во текот на оваа недела, Владата ќе соопшти детали за сите нови вработувања, но дека ќе излезе и со извештај за, како што рече, измамата околу вкупниот број на вработени во јавната администрација.

– Во текот на оваа недела, многу побргу од предвидениот рок, ќе доставиме детална информација за сите вработувања. Ќе се види дека се создава фама околу нешто што е апсолутно согласно закон и не постои никакво гломазно вработување. Но, исто така, ќе излеземе и со детални информации за сите илјадници незаконски вработувања во периодот од распишување на парламентарните избори до креирањето на новата влада, како и со многу детален извештај за измамата околу вкупниот број на вработени во јавниот сектор – изјави Манчевски, одговарајќи на новинарско прашања при промоцијата на новата инвестиција „Ин плејер“.

Во врска со поставувањето нови кадри на клучни позиции во власта, тој рече дека за разлика од претходната влада, оваа влада не поставува кадри насилно во еден ден, туку дека ги наоѓа соодветните луѓе што треба да ги исполнат соодветните услови за да може соодветно да одговорат на задачите. Тој појасни дека станува збор за процес во кој сите коалициски партнери во Владата наоѓаат соодветни кадри за соодветна позиција.

Вчера од ВМРО-ДПМНЕ ја обвинија Владата дека почнала со реализација на планот да ја направат партијата држава, а државата партија.

– Деца на коалициони партнери на Заев, комедијанти кои глумеле објективни критичари, граѓани кои глумеле независни и невладини корективи на власта – сите денес се вработени во Владата и се платени со стотици милиони денари пари на граѓаните. Без квалификации и без критериум, освен тоа дека одработувале на интересите на Заев и ги манипулирале граѓаните. Стотици милиони денари од буџетот секоја година наместо да се трошат за нови училишта, за болници и за градинки, Заев ќе ги троши за вработувања партиски војници и профитери од граѓанскиот сектор – изјави Колариќ.


Синдикатите и јавниот сектор во Грција денеска излегуваат на 24-часовен генерален штрајк


Атина, 8 декември, 2016 - 9:46 (META) 

Грција денеска ќе биде парализирана од генерален 24-часовен штрајк на работничките синдикати и на јавната администрација. Илјадници членови на синдикатите се очекува да излезат на масовниот протест во центарот на Атина, за да го изразат своето незадоволство од владините мерки кои влијаат на социјалните и на финансиските можности на граѓаните на Грција.

„Повикуваме на протест како реакција на континуираната политика на казнено штедење, сиромаштија и целосно истоштување на народот. Проблемите и предизвиците со кои се соочуваат вработените се многу и постојани и уште еднаш се наоѓаме соочени со нелогичните барања на кредиторите. Реагираме против секакво размислување кое има цел да ја зголеми невработеноста, да ја укине социјалната правда и безбедност“, се вели во соопштението на работничкиот синдикат – ГСЕЕ, со кое се повикува на штрајк.

На протестот му се приклучува и целиот државен сектор, поради што нема да работат болниците, бидејќи докторите и медицинскиот персонал штрајкуваат против мерките во здравството, а прекини во работата ќе има и во јавниот превоз.

Целосно парализиран ќе биде морскиот сообраќај и нема да сообраќа ниту еден патнички брод. Кон штрајкот се приклучува и дел од приватниот сектор, односно вработените во банките.


Европските кредитори бараат нови построги мерки за штедење од Грција


Атина, 1 декември, 2016 - 9:58 (META) 

Грција ја очекуваат нови отпуштања во јавниот сектор и итна приватизација на државни компании доколку грчката влада се согласи на барањата на кредиторите за кои се преговара, пренесува весникот „Та неа“. Потенцијалниот договор со кој би се затворила втората проценка на сработеното од грчката влада, се оценува дека ќе донесе ново финансиско стегање на ременот за грчките граѓани.

Според „Та неа“, доколку се постигне договор, бројката на масовни отпуштања ќе се зголеми од 5 на 10 отсто, а воедно и ќе се укине административното одобрување за масовни отпуштања и таа улога ќе ја добие Високиот совет за труд, кој, во суштина, нема да може да ги одбива одлуките за масовни отпуштања туку само ќе може да го провери легитимитетот на одлуката.

Одлуките за протести, наместо со најава од 24 часа, ќе мора да се најават 48 часат пред протестот, со што автоматски се влијае на работничкото право на протест и на штрајк. Ќе мора да се воведат шест нови патарини со кои дополнително ќе поскапи патувањето низ Грција, и тоа кај Солун, Аспровалта и Кавала.

Една од мерките ќе биде и итно вработување нови советници за приватизација на државната компанија „Хеленик петролеум“, компанијата за вода, гас, телекомуникации и 30 отсто од атинскиот аеродром и итна продажба, до крајот на годината, на дел од компанијата за електродистрибуција.

Приватизацијата сè уште е една од најболните точки на сите грчки влади. Државата доживеа нов неуспех на овој фронт бидејќи пропадна договорот за продажба на мнозинските акции од една од државните компании за гас ДЕСФА, која требаше да ја преземе азербејџанскиот гигант за природен гас „Сокар“, кој го обезбедува и гасот за Трансјадранскиот гасовод.


Кирацовски: Администрацијата во Охрид е уценувана да присуствува на протестот на ГДОМ


Скопје, 20 април, 2016 - 14:02 (META) 

Вчера и денеска, во Општина Охрид се вршат масовни притисоци врз вработените во институциите на јавниот сектор, за да присуствуваат на собирот на ГДОМ, вели дополнителниот заменик-министер за информатичко општество и администрација, Александар Кирацовски.

„На вработените во јавниот сектор во Охрид им се врши политички притисок и им се закануваат со дисциплински постапки, отказни решенија, слаби оценки преку оценувањето на администрацијата итн. Целта е под присила да присуствуваат на денешниот собир во организација на ГДОМ. Заканите одат до таа мера што се бара цели семејства да присуствуваат на собирот под притисок дека ќе бидат евидентирани со фотографирање“, се вели во соопштението на Кирацовски.

Дополнителниот заменик-министер апелира сите одговорни и раководни лица, како и партиските моќници од локалната власт во Охрид, веднаш да престанат со притисоците, уцените и со заканите кон вработените во институциите на јавниот сектор, затоа што, како што вели, ќе следат соодветни санкции кон секој што го прекршил законот.


Преговорите за К15 во јавниот сектор ќе почнат по изборите


Скопје, 11 февруари, 2016 - 14:36 (META) 

Преговорите за задолжителниот регрес за годишен одмор (К15) во јавниот сектор ќе почнат веднаш штом ќе биде формирана нова влада по изборите, најави денеска претседателот на Сојузот на синдикати на Македонија (ССМ), Живко Митревски.

Според анализите на ССМ, околу 15 проценти од компаниите не ја исполниле законската обврска и на работниците не им исплатиле К15.

– Сакам да укажам на фактот дека ССМ успеа да го задржи ова право да биде задолжително, а таму каде што имаше проблеми, заедно со синдикатите се утврдуваше дали тие проблеми се реални, кои во одредени гранкови синдикати придонесоа да дојде и до намалување на висината на регресот за годишен одмор. Но, морам да ви кажам дека тоа беа исклучително мал број на претпријатија – изјави Митревски.