ВМРО-ДПМНЕ: Оставки на Заев, Спасовски и Царовска за фер предвремени избори


Скопје, 4 октомври, 2018 - 10:09 (META) 

На вчерашната седница на Извршниот комитет на ВМРО-ДПМНЕ биле прифатени предлозите на претседателот на партијата Христијан Мицкоски за формирање Анкетна комисија во Собранието која би ги истражувала нерегуларностите и неправилностите на референдумот, како и барање за разрешување на Јавниот обвинител, Љубомир Јовески.

Како што информираше ноќеска потпретседателот на ВМРО-ДПМНЕ, Александар Николоски, жа пратеничката група е единствена во ставот дека не треба да се поддржи Договорот со Грција.

– Извршниот комитет донесе заклучок со кој овој референдум го прогласи за неуспешен, имајќи во предвид дека на истиот излегоа само 36 проценти од гласачите што ја покажува јасната волја на народот против прифаќање на овој договор. Референдумот беше и со бројни нерегуларности. Констатиравме дека согласно анализата направена од нашиот тим преку 50 илјади ливчиња беа уфрлени во гласачките кутии, понатаму се заплашуваа граѓани, имаше обид за поткуп, влијание врз гласачи, кршење на молк и други нерегуларности со што бевме сведоци на едни целосно недемократски и криминален процес и затоа целата постапка на референдумскиот резултат ја прогласуваме за голем фалсификат и резултатот на референдумот не го признаваме – рече Николоски.

Потпретседателот на ВМРО-ДПМНЕ рече дека е донесен заклучок дека треба да се смени Јавниот обвинител оти „не ја извршува својата задача согласно ингеренциите и должностите односно замижува пред очигледниот криминал и нерегуларности пред, на денот и после референдумот“.

Николоски нагласи дека во вакви услови мора да се почитува законот за избори и веднаш да се формира техничка влада според Пржинскиот модел, која ќе има мандат од 100 дена.

– Тоа значи оставки на Заев, Спасовски и Царовска и министри за внатрешни и за труд и социјала од ВМРО-ДПМНЕ 100 дена. Само тоа ќе е предуслов за колку толку фер избори – рече Николоски.

Тој одговарајќи на новинарско прашање посочи дека партијата ги почитува сите пораки од меѓународната заедница како пријателски пораки.

– Сметаме дека тие се пријателски пораки, дека се пораки кои и мислат добро на Република Македонија, но овде проблемот не е ни ВМРО-ДПМНЕ ниту меѓународната заедница, е Зоран Заев и Никола Димитров кои што потпишаа договор кој што не можат да го реализираат. Затоа што не одговара на Република Македонија и е против интересите на граѓаните на Република Македонија, таа волја беше искажана на референдум и ние ја почитуваме – рече Николоски.


Во Дебар тројно убиство на сопружници и нивната малолетна ќерка


Дебар, 27 август, 2018 - 9:11 (META) 

Основното јавно обвинителство Гостивар соопшти дека врши увид во приватна куќа во Дебар каде што се пронајдени безживотни тела на три лица.

Според првичните сознанија на обвинителството, станува збор за тројно убиство, а жртвите се семејство – маж, жена и нивната ќерка на возраст од околу 13 години, кои времено живееле во Италија. Сторителот засега е непознат.

Надлежен јавен обвинител е на терен и работи на откривање на сторителот и на утврдување на мотивите. Издадени се серија наредби за прибирање траги од лице место, вештачења и претреси.

Според СВР Охрид, случајот во полиција бил пријавен вчера во 20.45 часот како убиство, а убиените се А.П.(54), неговата сопруга Н.П.(53) и нивната 14-годишна ќерка.


Обвинителство ќе продолжи да го истражува случајот за поткуп за посвојување


Скопје, 27 јули, 2018 - 15:30 (META) 

Oсновното јавно обвинителство Скопје соопшти дека ја продолжува постапката за обвинувањата за поткуп при посвојување деца, која ја почна по допрен глас. Станува збор за случајот за кој беше направен телевизиски прилог, во кој оштетената објави дека и бил побаран поткуп за да посвои дете, а откако одбила да го направи тоа, била експресно обвинета и осудена за семејно насилство.

Обвинител при истрагата ја прибрал целокупната документација од Меѓуопштинскиот центар за социјална работа Скопје, како и релевантна документација од Геронтолошкиот завод „13 Ноември“ – Скопје. Како сведоци биле сослушани 11 лица, меѓу кои и претставници на Меѓуопштинскиот центар за социјални работи, Геронтолошкиот завод, поранешен министер за труд и социјална политика, како и вработена од детска градинка во која престојувало детето.

„По повеќемесечното интензивно постапување во предметот и прибирање на материјалните и вербални докази, како и нивно разгледување и анализа, надлежниот обвинител цени дека во моментов не се создадени услови за финално донесување на јавно обвинителска одлука“, соопштија од обвинителството, напоменувајќи дека поради сериозноста на наводите, истрагата ќе продолжи.


Полицијата открила 15 мигранти во близина на Гевгелија


Гевгелија, 3 февруари, 2018 - 12:44 (META) 

Патрола од Полициска станица за Граничен премин и граничен надзор Богородица открила 15 мигранти кај селото Милетково, гевгелиско, информираат од МВР.

Мигрантите биле откриени во товарно моторно возило „фиат-дукато“ со бугарски национални ознаки управувано од М.Д.(28) од Струмица.

„Од страна на полициските службеници бил извршен  преглед на возилото при што се пронајдени 15 мигранти, од кои осум сириски, пет пакистански и двајца ирачки државјани, кои биле приведени. За настанот бил известен Јавен обвинител. М.Д. бил лишен од слобода и предаден во Полициска станица Гевгелија, а мигрантите се задржани во Полициската станица за Граничен премин и граничен надзор Богородица, за понатамошна постапка“, се вели во билтенот на МВР.


Тешко повредени тројца велешани откако на нив налетал автомобил


Велес, 1 јануари, 2018 - 13:32 (META) 

Во тешка сообраќајна несреќа што се случила ноќеска во 3.30 часот близу Градската библиотека во Велес, тешки телесни повреди задобиле тројца тинејџери, од кои двајца потоа се пренесени во Ургентниот центар во Скопје во животозагрозувачка состојба.

Како што извести СВР Велес, околу 03.30 часот на улицата „Алексо Демниевски“, Т.Т (33) од Велес изгубил контрола над автомобилот „фиат пунто“ со велешки таблички и удрил во К.К (19), Б.Д (18), Ф.К(18), кои во тој момент ја преминувале улицата, а потоа и во ѕид од камења.

Со возило на Итна медицинска помош во Општа болница Велес пренесени се К.К и Ф.К. Откако таму се констатирани тешки телесни повреди, тие се препратени во Клиничкиот Центар – Скопје и се наоѓаат во животна опасност.

Екипа на СВР Велес извршиле увид според инструкции од јавен обвинител, кој исто така издал наредби за прибирање на траги од местото на настанот и за вршење на анализа на крв и урина од возачот.


Такси-возач загина во верижен судир на булевар Србија


Скопје, 29 декември, 2017 - 11:03 (META) 

Едно лице загина, а друго е тешко повредено во сообраќајна несреќа што ноќеска, околу еден часот по полноќ се случила на булеварот Србија во Скопје, а во која учествувале повеќе возила.

Како што информираат од МВР, несреќата се случила кога автомобил, марка „ауди а4“, управувано од 28-годишниот Ѓ.Д. се судрил со возило „пежо 206“, а потоа преку тревникот преминало на коловозните ленти од спротивата насока, по што удрило во оградата на бензинска пумпа, а потоа во такси-возило. По незгодата, аудито се запалило и целосно е опожарено.

Во незгодата загинал возачот на такси-возилото, 58-годишниот Т.Ј. Тешка телесна повреда – фрактура на колено, била констатирана кај сопатникот во „аудито“, 21-годишниот Б.М. од селото Сопиште.

Увид на местото извршиле јавен обвинител и екипа од СВР Скопје. По наредба на јавниот обвинител телото на починатиот било предадено на обдукција.

Поради несреќата, сообраќајот на булеварот Србија, на делот од крстосницата со булевар Јане Сандански до крстосницата со булевар Трета Македонска Бригада, бил во прекин во двате насоки од 1.30 часот до 5.30 часот.


Полицијата и демонстрантите во Албанија се судрија поради изборот на јавен обвинител


Тирана, 18 декември, 2017 - 14:45 (META) 

Албанската полиција се судри со приврзаниците на опозицијата кои се обидоа на сила да влезат во парламентот и да го спречат изборот на привремениот државен обвинител.

Пред зградата на парламентот се собраа околу три илјади демонстранти кои се обидоа да го пробијат полицискиот кордон, при што фрлале димни бомби. Според локалните медиуми има и повредени.

Пратениците од опозицијата фрлале димни бомби во самата зграда на парламентот, но привремениот обвинител, Арта Марку сепак е избранa и положи заклетва.

Корупцијата во правосудството ги загрозува демократските процеси во земјата. Реформата во правосудството беше усвоена минатата година, а требаше да осигура независност на судиите и обвинителите.

Албанија е членка на НАТО од 2009 година, а од 2014 година има статус на кандидатка за членка на ЕУ, а следната година би требало да ги почне претпристапните преговори.


ВМРО-ДПМНЕ нема да учествува на седницата за избор на јавен обвинител


Скопје, 15 декември, 2017 - 12:31 (META) 

Пратеничката група на ВМРО-ДПМНЕ нема да учествува на денешните три собраниски седници меѓу кои е и седницата за избор на нов државен јавен обвинител, изјави пратеничката на ВМРО-ДПМНЕ, Ане Лашкоска.

– Нема да учествуваме поради тоа што парламентарното мнозинство не создава и не сака да создаде демократски услови за работа, затоа што се врши политички прогон на политички неистомисленици, со апсење на пратеници, со апсење на уметници, со апсење на луѓе кои што си ја сакаат Македонија – вели Лашкоска.

Таа потенцираше дека пратеничката група редовно има активности и средби со амбасадорите на кои што ги информираат за актуелната политичка ситуација и додаде дека и понатака ќе продолжат со ваквите активности.


Собранието ја почна, па ја прекина расправата за именување на јавниот обвинител


Скопје, 25 ноември, 2017 - 19:16 (META) 

Собранието попладнево ја почна расправата за именување на Љубомир Јовески за нов државен јавен обвинител, но по образложението на предлогот од заменик-министерот за правда, Оливер Ристовски, и говорот на пратеникот на ВМРО-ДПМНЕ, Илија Димовски, претседателот на законодавниот дом, Талат Џафери, ја прекина седницата и за нејзиното продолжение рече дека дополнително ќе извести.

Заменик-министерот за правда во образложението наведе дека Јовески целата кариера ја градел во правосудните институции, односно во судот, јавното обвинителство и како член на Советот на јавни обвинители и дека неговото професионално искуство и неговите високи морални квалитети биле главните причини Владата да го предложи за оваа функција.

– Неговата биографија е гаранција за успешно вршење на функцијата јавен обвинител, пред која се исправени голем број предизвици – рече Ристовски.

Пратеникот и координатор на една од десетте пратенички групи на ВМРО-ДПМНЕ, Илија Димовски, во својот говор не го проблематизираше предлогот Јовески да биде именуван за оваа функција, туку побара јавниот обвинител да го предлага опозицијата и тој да се избира со двотретинско мнозинство. Димовски рече дека Собранието наскоро ќе мора да отвори дебата и за, како што нагласи, концентрираната моќ во Јавното обвинителство како институција.

Претходно, на денешната 22. седница, Собранието по скратена постапка ги донесе измените на законот за здравственото осигурување, на законот за придонеси од задолжително социјално осигурување и измените на законот за акцизите, со кои акцизата за дизел-горивото се зголемува за три денари, односно од сегашните 12,1 денар ќе биде 15,1 денар.


Собранието денеска треба да го именува новиот јавен обвинител


Скопје, 25 ноември, 2017 - 10:15 (META) 

Собранието денеска ќе ја одржи 22. седница, на која прва точка на дневен ред е именувањето на нов државен јавен обвинител, функција за која Владата го предложи Љубомир Јовески, актуелен член на Советот на јавни обвинители.

На оваа седница, покрај именувањето на јавниот обвинител, на дневен ред се уште седум точки, меѓу кои се и измените на Законот за заштита на сведоци, што ги бараше Специјалното јавно обвинителство, со кои треба да му се овозможи да одлучува кој ќе биде заштитен сведок во постапките што се под негова надлежност. Измените на Законот за заштита на сведоци, како што е наведено, треба да бидат донесени по скратена постапка.

Покрај овие, на седницата ќе се расправа и за измените на Законот за Судскиот совет, за престанок на важењето на Законот за Советот за утврдување факти и за поведување постапка за утврдување одговорност за судија, за измените на Законот за пензиското и инвалидското осигурување, за здравственото осигурување, за Законот за придонеси од задолжително социјално осигурување и за измените на Законот за акцизите – сите по скратена постапка.

Инаку, за денеска се предвидени уште две пленарни седници. Пратениците треба да ја продолжат работата по 8. седница, на која е предлог-одлуката за именување заменици на генералниот секретар на Собранието и пет законски измени предложени од пратениците на ВМРО-ДПМНЕ.

Потоа треба да продолжи 12. седница на која пратениците расправаат за утврдување на бројот на потпретседателите на Собранието и за измени на законите за исплата на платите во Република Македонија, за извршување и за издавање на вредносни бонови, предложени од пратеници на опозициската ВМРО-ДПМНЕ.