!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

СДСМ: Пред 11 години долгот изнесуваше 1,8, а денес повеќе од 5 милијарди евра


Скопје, 19 мај, 2017 - 17:07 (META) 

„Следува период во кој новата влада ќе ги преиспита сите задолжувања што ги направи досегашната власт изминативе години на крајно нетранспарентен начин,“ велат од СДСМ.

Од партијата најавуваат дека ќе биде спроведена и темелна ревизија на сите нетранспарентни трошења на пари на граѓаните од буџетот на државата.

„Никола Груевски и неговите соработници заминуваат од власт оставајќи јавен долг во висина од речиси пет милијарди евра. Пред 11 години, во 2006 година јавниот долг изнесуваше 1,8 милијарди евра. На девизната депозитна сметка Груевски затекна над 250 милиони евра. За сите злоупотреби на пари на граѓаните ќе следува одговорност. Новата и одговорна влада ќе ја подигне економијата и транспарентно и отчетно ќе раководи со јавните финансии“, стои во соопштението на СДСМ.


СДСМ: Ќе има ревизија на сите трошења на пари на граѓаните од Груевски и од соработниците


Скопје, 17 мај, 2017 - 16:43 (META) 

„Граѓаните набргу ќе ја добијат новата реформска влада, која детално ќе ги преиспита сите задолжувања што беа направени на крајно нетранспарентен начин изминативе години, а исто така ќе направи и детална ревизија на сите нетранспарентни трошења на парите од буџетот“, се вели во реакцијата на СДСМ на текстот „СДСМ наследува полн буџет од 180 милиони евра кеш за трошење, во 2006-та ВМРО-ДПМНЕ наследи само 1 милион евра и блокирана сметка“, објавен на порталот „Курир“.

Во реакцијата се вели дека досегашната власт на Никола Груевски го издигна јавниот долг на историски највисоко ниво, во висина од најмалку 4,7 милијарди евра.

„Пред 11 години, во 2006 година, јавниот долг изнесуваше само 1,8 милијарди евра. Новата реформска влада транспаретно и отчетно ќе раководи со јавните финансии и граѓаните ќе ги добијат сите потребни информации за нетранспарентните задолжувања и трошења направени изминативе години“, се додава во реакцијата на СДСМ.


СДСМ: Миноски без потреба ги задолжи граѓаните за уште 6,56 милиони евра


Скопје, 28 март, 2017 - 15:59 (META) 

„Министерството за финансии денеска ги задолжи граѓаните со нов нето-долг од 6,56 милиони евра. Техничкиот министер за финансии во заминување, Кирил Миноски, ќе мора да објасни пред граѓаните зашто ги задолжи со нови 6,56 милиони евра, ако се знае дека оваа недела нема доспеани обврски за враќање“, порача СДСМ.

Партијата вели дека е недозволиво да се врши неконтролирано и нетранспарентно задолжување во период на формирање на нова влада и порача дека „новата реформска влада“ детално ќе ги преиспита нетранспарентните задолжувања и посветено ќе работи на стабилизација на нивото на јавен долг.


ВМРО-ДПМНЕ: Долгот е намален во последниот квартал на 2016 година


Скопје, 1 февруари, 2017 - 15:27 (META) 

„СДСМ секогаш кога манипулира, тоа го прави на штета на македонската економија и на граѓаните. Јавниот и државниот долг се намалени во последниот квартал на 2016 година“, се вели во реакцијата на ВМРО-ДПМНЕ на соопштението на СДСМ дека долгот е сè уште на критичното ниво над 50 проценти од домашниот бруто-производ.

Во него се додава дека „СДСМ со своите лаги и кодошење на Македонија, на нејзините граѓани во случајот со издавањето на еврообврзницата им направи директната штета од 25 милиони евра, што е рамно на финансиски тероризам“.

– Истите финансиски терористи од СДСМ им нанесоа штета на граѓаните од 4 милиони евра врз основа на камати на предвреме повлечени депозити поради кревањето на лажната паника за девалвација на денарот – се вели во соопштението на ВМРО-ДПМНЕ.

Оттаму додаваат дека „СДСМ се води по логиката „колку полошо за Македонија, толку подобро за СДСМ“ и со ниту едно лажно соопштение не можат да го покријат фактот дека Македонија сè уште е меѓу најмалку задолжените земји во Европа“.


СДСМ: Миноски лажел, јавниот долг е сè уште повеќе од 50 проценти


Скопје, 1 февруари, 2017 - 11:17 (META) 

Досегашната власт остава во наследство на граѓаните и на Република Македонија јавен долг поголем од 50 отсто од БДП, покажуваат вчера објавените податоци од извештајот на Министерството за финансии, за состојбата на јавниот долг заклучно со 31 декември 2016 година, реагираше денеска СДСМ.

„Тоа значи дека министерот за финансии во заминување, Кирил Миноски, во изборната кампања ги лажел граѓаните дека јавниот долг е намален за 1,4 отсто! Долгот е сè уште на критичното ниво над 50 отсто, како што предупредија и меѓународните финансиски институции. Граѓаните се тие кои ќе ги враќаат огромните долгови во милијарди евра, со камати, што ги направи досегашната неодговорна власт и тие имаат право да знаат колкав е јавниот долг на државата“, се вели во соопштението од СДСМ.

Партијата порачува дека новата влада „според мнозинската волја на граѓаните ќе води реални одговорни политики и посветено ќе работи на стабилизирање на нивото на јавниот долг“.

„Како што се обврзавме во „Планот за живот“, јавниот долг ќе мора да се објавува целосно и редовно, без исклучоци и политички калкулации. Криењето на јавниот долг ќе биде кривично дело. Сите кои правеле злоупотреби на парите на граѓаните ќе одговараат“, порачаа од СДСМ.


СДСМ: Расипничкото трошење на Груевски ни остави јавен долг од 4,7 милијарди евра


Скопје, 1 декември, 2016 - 11:09 (META) 

„Расипничкото трошење на буџетските пари од страна на ВМРО-ДПМНЕ резултираше со историски највисок јавен долг во висина од 4,7 милијарди евра“, обвини денеска Социјалдемократскиот сојуз на Македонија.

Според СДСМ, огромниот јавен долг и непродуктивното задолжување се единственото наследство од десетгодишното владеење на Никола Груевски и на ВМРО-ДПМНЕ.

„Додека илјадници млади ја напуштаа земјата, а граѓаните преживуваа, Никола Груевски, Зоран Ставрески и Кирил Миноски неконтролирано ја задолжуваа државата за да си ги задоволат сопствените желби и каприци. Наместо да спроведуваат издржани економски политики, тие десет години се занимаваа со задолжување и со криење на долгот кон домашните компании. Груевски и ВМРО-ДМНЕ ја донесоа економијата пред бездната, а со расипничкото задолжување ги заглавија идните генерации да ги враќаат долговите направени заради популизам“, велат од СДСМ.

Оттаму истакнуваат дека новата влада предводена од СДСМ со буџетот ќе раководи транспаретно и одговорно, а криењето на јавниот долг ќе биде кривично дело.

„Ќе формираме независен фискален совет кој ќе обезбеди транспарентност во фискалната политика и кој ќе биде составен од независни експерти кои ќе се избираат во Собранието. Како најважна мерка против задолжувањето, ќе биде ставањето крај на непродуктивното задолжување. Никогаш повеќе Македонија нема да се задолжува за градење споменици, галии и панорамски тркала. Никогаш повеќе нема да се задолжува за да се финансираат скапи и неодржливи проекти“, стои во соопштението од најголемата опозициска партија.


Европската комисија ја намали проекцијата за економскиот пораст на 2,1 отсто


Брисел, 10 ноември, 2016 - 11:50 (META) 

Европската комисија предвиде помал пораст за македонската економија и од 3,7 проценти ја намали на 2,1 отсто во есенската економска прогноза за земјите членки и за земјите кандидати за членство во Европската Унија.

Како причина за намалување на прогнозата се наведуваат поплавите и политичката криза.

Во првата половина на годината економијата имала забавен пораст, а се очекува подобрување по одржувањето на изборите на 11 декември.

Се очекува следната година порастот на производството да има основа во поглемите инвестициите и потрошувачка на домаќинствата, под услов политичката криза да заврши.

Европската комисија во овој извештај прогнозира дека јавниот долг ќе продолжи да се зголемува. Тој годинава изнесува 40,5 отсто, а во наредните две години ќе достигне 43 отсто.


Ново задолжување од 61,3 милиони евра кај домашните банки


Скопје, 1 ноември, 2016 - 9:54 (META) 

Државата денеска ќе се задолжи со 61,3 милиони евра кај домашните банки и осигурителни компании.

Според Министерството за финансии, околу 10,5 милиони евра од вкупната сума се со рок на достасување од шест месеци, 39,9 милиони евра доспеваат за една година, 5,5 милиони евра за две години, а 5,7 милиони евра за 15 години.

Врз основа на доспеани обврски, утре државата треба да врати 49,26 милиони евра, а за четири дена уште 12,21 милион евра.

Министерството за финансии вчера објави дека со третиот квартал од годинава јавниот долг достигна 4,76 милијарди евра, што е 50,6 отсто од домашниот бруто-производ (БДП).

Дополнителниот заменик-министер за финансии, Кире Наумов, реагираше дека владината политика на континуирано задолжување ги турка сегашните и идните генерации во должничко ропство.


Наумов: Јавниот долг ги надмина критичните 50 проценти од БДП


Скопје, 31 октомври, 2016 - 15:40 (META) 

Министерот за финансии, Кирил Миноски, и официјално објави дека јавниот долг изнесува 4 милијарди и 760 милиони евра или 50,6 проценти од домпашниот бруто-производ (БДП), се вели во соопштението од кабинетот на дополнителниот заменик-министер за финансии, Кире Наумов.

– За само девет месеци, јавниот долг е зголемен за 532 милиони евра. Во текот на 2016 година, јавниот долг дневно се зголемувал за 2 милиони евра. Владината политика на континуирано задолжување ги втурна сегашните и идните генерации во должничко ропство – се додава во соопштението.

Во него, исто така, се вели дека иако црвениот аларм е одамна вклучен и веќе требаше да почне долго најавуваната фискална консолидација, министерот Миноски за утре распиша ново задолжување на домашниот пазар на износ од 61,5 милиони евра.


Јавниот долг изнесува 50,6 проценти од БДП, објави Министерство за финансии


Скопје, 31 октомври, 2016 - 15:25 (META) 

Министерството за финансии денеска ги објави податоците за државниот и за јавниот долг, кои изнесуваат 41,9 отсто и 50,6 проценти за третиот квартал од 2016 година.

Како што велат од Министерството за финансии, зголемувањето на државниот и на јавниот долг во однос на вториот квартал се должи на издавањето на еврообврзницата во јули 2016 година, која е наменета за покривање на буџетскиот дефицит во 2016 и во 2017 година.

– Со еврообврзницата ќе се покријат повеќе обврски кои доспеваат во текот на оваа и на наредната година, како отплата на 130 милиони евра која ќе се изврши во ноември врз основа на доспеан кредит – велат од Министерство за финансии.