!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Американски воен авион се урна кај Окинава


Окинава, 22 ноември, 2017 - 9:50 (META) 

Авион на американската воена морнарица, кој носел 11 патници и членови на екипажот, се урна во море, источно од Окинава, јавува „Би-би-си“.

Веста, како што наведува британскиот јавен сервис, ја потврдиле воени претставници на американската воена морнарица.

Авионот бил на пат да слета на носачот на авиони „УСС Роналд Реган“.


Тројца загинати во тајфун во Јапонија


Токио, 23 октомври, 2017 - 11:18 (META) 

Најмалку три лица загинаа во тајфунот Лан, кој вчера ја погоди Јапонија, јавија локалните медиуми.

Јавниот сервис НХК јавува дека најмалку две лица се потешко повредени, едно се води како исчезнато, а околу 90 добиле полесни повреди.

Властите наредија евакуација на околу 80.000 лица во Коријама, град кој се наоѓа северно од Токио, поради поплавите и свлечиштата предизвикани од тајфунот.

Јапонскиот премиер Шинѕо Абе вчера ги повика властите да преземат чекори за што повеќе да се намали заканата по човечките животи.


Коалицијата на премиерот Шинзо Абе пред убедлива победа на изборите во Јапонија


Токио, 22 октомври, 2017 - 16:42 (META) 

Владејачката коалиција на јапонскиот премиер Шинзо Абе доби најголема поддршка од гласачите на предвремените парламентарни избори што денеска се одржаа во Јапонија, покажуваат резултатите од излезните анкети, јавуваат светските агенции.

Јапонските медиуми ги објавиле проекциите на резултатите за кратко време по затворањето на избирачките места во 20 часот по локално време.

Според извештаите на медиумите, владејачката коалиција на Шинзо Абе ќе добие 311 места во долниот дом на парламентот, кој има вкупно 465 пратенички места.

Абе пред три недели го распушти долниот дом на парламентот, со очекување дека неговата Либерално-демократска партија во овој момент може да оствари добар резултат на избори, откако најголемата опозициска Демократска партија се распадна кон крајот на септември, а неговиот рејтинг се зголеми.


Јапонскиот цар ќе абдицира во март 2019 година, јавуваат јапонските медиуми


Токио, 20 октомври, 2017 - 10:45 (META) 

Јапонскиот цар Акихито ќе абдицира на 31 март 2019 година, објави денеска весникот „Асахи Шимбун“ повикувајќи се на извори од јапонската влада. Тоа ќе биде прво абдицирање на јапонски цар во последните 200 години.

Премиерот Шинѕо Абе ќе се сретне со претставници и со членови на царското семејство во ноември, пред одлуката да биде официјално соопштена.

Портпаролот на царското семејство засега не го потврдува ваквите информации, додавајќи дена „ништо не е одлучено“.
Царот Акихито (83) во август минатата година изрази желба да абдицира поради старост.

Парламентот во јуни годинава усвои закон кој би овозможил абдицирање.

Нарухито, најстариот син на Акихито, е прв во редот наследници на тронот.


Еруптира вулканот Шинмоедаке во Јапонија, наредена евакуација на населението


Мијазаки, 11 октомври, 2017 - 11:42 (META) 

Вулканот Шинмоедаке во јужниот дел на Јапонија еруптираше првпат во последните шест години, исфрлајќи облаци пепел во висина од неколку стотина метри, јавуваат светските агенции.

Јапонските власти веднаш издале предупредување и го повикале населението во близина на вулканот на евакуација.

Вулканската пепел достигнала висина од 300 метри кога почнала ерупцијата, која најверојатно ќе продолжи и ќе стане поинтензивна, навеле од јапонската метеоролошка агенција.

Пепелта била распослана во круг од повеќе од два километри околу кратерот на вулканот. Нивото на предупредување е подигнато на трет степен, што значи забрана за приближување до вулканот.

Јапонија лежи на познатиот Пацифички огнен појас и има неколку активни вулакни кои неретко предизвикуваат и земјотреси. Во септември 2014 година вулканот Онтаке по 90 години ненадејно еруптиташе, при што загинаа 63 лица.


Силен земјотрес во Јапонија


Токио, 6 октомври, 2017 - 11:24 (META) 

Силен земјотрес со јачина од 6,3 степени според Рихтеровата скала денеска го погоди источниот брег на Јапонија, соопшти Американскиот геолошки завод.

Земјотресот го погодил подрачјето на околу 300 километри источно од Ивакија, на Хоншу, на длабочина од 77,8 километри.

Засега нема информации за евентуални жртви, ниту за причинета материјална штета.


Јапонскиот премиер го распушти парламентот, избори на 22 октомври


Токио, 28 септември, 2017 - 10:24 (META) 

Премиерот на Јапонија, Шинзо Абе, официјално го распушти долниот дом на јапонскиот парламент, за да се одржат предвремени избори на 22 октомври.

Откако претседателот на парламентот, Тадамори Ошима, го прочита писмото на Абе за распуштање на парламентот, пратениците ги подигнале рацете и три пати го повториле традиционалниот јапонски израз „банзаи“, со значење „вечен нека е“.

По распуштањето на парламентот, Абе им се обрати на членовите на неговата партија и им рече дека на претстојните избори ќе станува збор за заштита на Јапонија, човечките животи и мирното секојдневие.

– Изборите се за иднината на нашите деца – изјави Абе.

Владата го одобри 22 октомври како датум кога ќе бидат одржани вонредните парламентарни избори за долниот дом на парламентот.


Северна Кореја тестираше уште една ракета над Јапонија


Пјонгјанг, 15 септември, 2017 - 10:18 (META) 

Северна Кореја испукала уште еден проектил од близината на Пјонгјанг. Американците и Јужнокорејците ги анализираат податоците од оваа проба. Јапонија тврди дека една ракета го прелетала островот Хокаидо, а потоа паднала во Тихиот Океан.

Јужнокорејскиот совет за национална безбедност одржа итна седница веднаш откако беше објавена веста за новиот ракетен тест на режимот во Пјонгјанг.

Јапонскта телевизија НХК објави дека проектил го прелетал островот и се урнал во Тихион Океан, околу 2.000 километри источно од брегот на Јапонија.

Ракетата е лансирана еден ден откако Пјонгјанг се закани дали ќе ја „потопи“ Јапонија и во САД ќе донесе „пепел и мрак“ поради новата поддршка на пакетот санкции на Советот за безбедност на ОН против Северна Кореја.

Претходното тестирање проектили, Пјонгјанг го изведе кон крајот на август, кога севернокорејска ракета исто така прелета над Хокаидо пред да се урне во океанот.


Кина ја повика Јапонија да не му воведува нови санкции на Пјонгјанг


Пекинг, 2 септември, 2017 - 16:55 (META) 

Кина ја повика Јапонија да не ѝ воведува еднострани санкции на Северна Кореја поради лансирање на севернокорејската ракета преку јапонската територија, соопшти кинеското Министерство за надворешни работи.

Министерот Ванг Ји вчера изјави дека едностраните санкции не се во духот на резолуцијата на Советот за безбедност и дека за нив нема основа во меѓународното право и дека затоа Јапонија не треба да донесе погрешна одлука.

Тој додаде дека се надева дека Јапонија ќе работи на подобрување на билатералните односи со обновување на меѓусебната доверба и градење пријателство.


САД тестираше пресретнување балистички ракети


Вашингтон, 30 август, 2017 - 16:51 (META) 

Eден ден откако Северна Кореја лансираше ракета која прелета над Јапонија, американската војска изведе проба за пресретнување балистички ракети кај брегот на Хаваи, соопшти Американската агенција за ракетна одбрана.

Во соопштението се наведува дека Агенцијата за ракетна одбрана, заедно со маринците, успешно пресретнала балистички ракети со среден домет од разорувачот „Џон Пол Џон“.

Директорот на агенцијата, генерал потполковник Сем Грејвс, вели дека тестот претставува клучна пресвртница.

– Продолжуваме да развиваме одбрана од балистичка ракетна технологија за да се справиме со заканите – вели Грејвс.

Северна Кореја во вторникот истрела ракета која прелета над северот на Јапонија и падна во водата на Тихиот Океан кај островот Хокаидо.