!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Јапонски воен авион исчезна со четиричлен екипаж


Токио, 15 мај, 2017 - 15:35 (META) 

Јапонското министерство за одбрана испратило авиони и хеликоптери за да пронајдат авион со четиричлен екипаж, кој денеска исчезна на северот на Јапонија.

Извидувачкиот авион исчезнал од радарите во близина на аеродромот Јакадате, на островот Хокаидо, додека се обидувал да собере пациент во Хакодате, на барање на градоначалникот на градот, соопшти портпаролот на министерството.

– Пративме четири хеликоптери и два авиона да го пронајдат исчезнатиот авион. Засега немаме најдено никакви траги – рече портпаролот, додавајќи дека временските услови се многу лоши, особено по планините.

Исчезнатиот авион требало да превезе пациент од болница во Хакодате го градот Сапора, главен град на префектурата Хокаидо, за посебен медицински третман.


Абе сака да го реши спорот со Русија


Токио, 29 април, 2017 - 17:05 (META) 

Премиерот на Јапонија, Шинзо Абе, вели дека земјата сака да го реши територијалниот спор, кој фрли сенка на односите со Русија по завршувањето на Втората светска војна.

– Мировниот договор помеѓу Јапонија и Русија сè уште не е заклучен, дури и 70 години по завршување на Втората светска војна. Ова е крајно необична ситуација – им рече Абе на новинарите во Лондон, каде што се сретна со британската премиерка Тереза Меј.

Абе смета дека „конструктивниот ангажман“ на Русија е од суштинско значење за решавање на глобалните предизвици.

– Мојата намера е да се продолжи дијалогот со рускиот претседател Владимир Путин, за да се координираме во врска со овие предизвици – додаде Абе.

Русија и Јапонија не потпишаа официјален мировен договор при завршувањето на Втората светска војна поради несогласување околу Курилските Острови, кои се под управа на Русија од крајот на војната.


Јапонија се подготвува за прием на бегалци ако дојде до корејска криза


Токио, 18 април, 2017 - 14:07 (META) 

Владата на Јапонија работи на планови за непредвидени ситуации во случај кризата на Корејскиот Полуостров да доведе до бранови бегалци во Јапонија, изјави јапонскиот премиер Шинзо Абе.

Тој на седница на парламентот рече дека јапонската влада формулира мерки, кои вклучуваат заштита на странци, процедури за слетување, изградба и функционирање на засолништа, како и проверка на баратели на азил. Абе појасни и дека владата изработува планови за евакуација на околу 60.000 Јапонци од Јужна Кореја во случај да избие воена криза.

Абе и потпретседателот на САД, Мајк Пенс, кој ќе допатува од Јужна Кореја, ќе разговараат за разгорувањето на ситуацијата со Северна Кореја, по презентацијата на нови крстосувачки ракети и неуспешното лансирање ракета во Северна Кореја.


Јапонија го прифати биткоинот како средство за плаќање


Токио, 3 април, 2017 - 10:24 (META) 

Криптовалутите, од кои најпознат е биткоинот, од вчера се официјално средство за плаќање во Јапонија. Парламентот на Јапонија вчера изгласа закон за валутна регулација, во кој стои дека криптовалутата има функција на валута во Јапонија, но дека официјална парична единица е само јенот.

За редица прашања што оваа измена ги отвора засега нема одговор. Тие се однесуваат главно на даночните обврски и на постапките при користење на виртуелната валута.

Според институтот „Фуџи кајмера“, обемот на користење на криптовалутите во Јапонија во 2015 година изнесува 1,67 милијарди долари. Експерти сметаат дека до 2020 година, тој износ ќе се зголеми десеткратно, а според проценките, најмногу ќе се зголеми износот на мобилни плаќања во интернет-продавниците.


Трговска војна помеѓу ЕУ и САД би била штетна за двете страни, смета Јункер


Брисел, 18 март, 2017 - 17:52 (META) 

Трговска војна помеѓу Соединетите Американски Држави и Европа би била штетна за двете страни, вели претседателот на Европската комисија, Жан-Клод Јункер, во интервју за викенд-изданието на германскиот весник „Билд“, јавуваат светските агенции.

Прашан дали Европа може да издржи трговска војна со САД, Јункер вели дека „трговска војна не би била во интерес ниту на ЕУ, ниту на САД“.

Претседателот на ЕК нагласил дека е потребно сериозно да се сфатат протекционистичките коментари на Доналд Трамп и дека треба да се биде подготвен.

Американскиот министер за финансии, Стивен Менучин, во четвртокот, во Берлин изјави дека САД не бараат почнување трговска војна, но инсистираше дека некои од договорите мора да се модифицираат за да бидат „повеќе избалансирани“.

Јункер во интервјуто истакнал дека е задоволен што во вторник следната недела, ќе се сретне со премиерот на Јапонија, Шинзо Абе, бидејќи кон крајот на оваа година сака да биде заклучен договорот за слободна трговија меѓу Европската Унија и Јапонија.

Трамп претходно ја обвини Јапонија дека го искористува слабиот јен за да му даде на својот извоз неправедна трговска предност. Главниот советник на Трамп, Питер Наваро, во слична изјава ја обвини Германија дека го користи претерано потценетото евро како конкурентска предност.


Отсега и Јапонците во балканската туристичка тура


Берлин, 12 март, 2017 - 18:33 (META) 

Агенцијата за промоција и за поддршка на туризмот на Република Македонија и ЏИКА – Јапонската агенција за меѓународна соработка, потпишаа меморандум за соработка, со кој нашата земја, заедно со Албанија, Србија, Црна Гора и со Босна и Херцеговина, ќе го промовираат Балканот во Јапонија.

Тоа значи дека отсега и Јапонците ќе бидат дел од таканаречената балканската туристичка тура, во која се вклучени Скопје и Охрид. Преку оваа тура изминативе години низ нашата земја поминаа бројни туристи од Кина, Јужна Кореја и од други земји на Далечниот Исток.

Меморандумот е потпишан во Берлин, во рамките на еден од најголемите туристички саеми на светот, кој завршува денеска. На саемот беше претставен и Охрид, заедно со другите места во Македонија, додека акцентот на промотивните активности беше ставен на активниот туризам, како и на културните и на природните туристички знаменитости на Македонија.


Хеликоптер се урна за време на тренинг во Јапонија, три лица загинаа


Токио, 5 март, 2017 - 14:57 (META) 

Три лица загинаа, а четири се водат за исчезнати откако спасувачки хеликоптер, за време на тренинг-лет, се урна на планината Хачибусе, во централниот дел на Јапонија.

Како што јавуваат локалните медиуми, две лица се пронајдени без свест.

Полицијата на префектурата Нагано соопшти дека три тела се извлечени од остатоците на леталото, при што е констатирана нивната смрт. Полициските власти претпоставуваат дека исчезнатите се под остатоците на хеликоптерот.

Засега не се знае причината за уривањето на хеликоптерот, но истрагата е во тек.
Според медиумските извештаи, во леталото имало седум пожарникари, двајца пилоти и еден инженер.


Состанок на Советот за безбедност на ОН поради ракетните тестови на Северна Кореја


Њујорк, 13 февруари, 2017 - 9:37 (META) 

Соединетите Американски Држави, Јапонија и Јужна Кореја денеска побараа итни консултации во Советот за безбедност на Обединетите нации за севернокорејското лансирање на нов тип балистичка ракета со среден до долг дострел, соопшти денеска претставник на мисијата на САД во ОН.

Како што соопшти јужнокорејската војска, Северна Кореја користела систем „студено исфрлање“, каде проектилот го покрева компресиран гас. Јужнокорејската војска наведе дека станува збор за тип ракети со среден дострел.


Северна Кореја истрела балистичка ракета кон Јапонското море


Пјонгјанг, 12 февруари, 2017 - 10:05 (META) 

Северна Кореја истрела балистичка ракета, соопшти министерството за одбрана на Јужна Кореја, оценувајќи дека станува збор за провокација кон новата администрација на американскиот претседател, Доналд Трамп.

Ракетата, како што пренесуваат светските медиуми, била лансирана во 7.55 часот според локално време од базата Бангјон во западниот дел на Северна Кореја и летала на исток, кон Јапонското море, каде паднала.

Проектилот поминал 500 километри пред да падне во морето, но од министерството за одбрана во Сеул навеле дека сè уште не се знае за каков тип на ракета станува збор.

Претседателот на САД, Доналд Трамп кој во тој момент се наоѓал на Флорида заедно со јапонскиот премиер Шинзо Абе, кој се наоѓа во посета на САД, кратко изјавил дека Јапонија има 100 отсто поддршка од САД и дека тестирањето на ракетата од страна на Пјонгјанг е „апсолутно недозволиво“.

Северна Кореја од 2006 година изведе пет нуклеарни проби и серија тестирања на балистички ракети поради што на земјата и беа воведени строги меѓународни санкции кои во март 2016 година беа дополнително заострени.


Кина ги обвини САД дека го дестабилизираат Азиско-пацифичкиот Регион


Пекинг, 4 февруари, 2017 - 11:35 (META) 

Официјален Пекинг денеска го обвини Вашингтон дека со изјавите и постапките на неговите високи официјални претставници го дестабилизира Азиско-пацифичкиот Регион.

Реакцијата на Кина доаѓаа по денешната изјава на американскиот секретар за одбрана Џејмс Матис во Токио дека САД остануваат посветени на американско-јапонскиот договор за одбрана, кој се однесува и на заштитата на суверенитетот на Јапонија над островите Сенкаку, кои официјален Пекинг ги смета за свои и ги нарекува Дјаијо.

Кинеското министерство за надворешни работи, коментирајќи ја изјавата на Матис, истакна дека јапонско-американскиот договор за одбрана е рецидив од Студената војна, кој не треба да ги засега територијалниот суверенитет на Кина и нејзините законски права.

– Ја повикуваме американската страна да манифестира одговорно однесување, да престане со неточните изјави за суверенитетот на островите Дјаијо и да се воздржи од дополнително усложнување на спорот, со што ја дестабилизира состојбата во регионот – соопштија од кинеското МНР.