Атинскиот градоначалник за солунскиот колега: Бутарис е вистински патриот


Атина, 15 февруари, 2018 - 11:06 (META) 

Солунскиот градоначалник Јанис Бутарис откако се најде под жесток притисок за предлогот за евентуална промена на името на солунскиот аеродром „Македонија“, доби поддршка од својот атински колега Јоргос Каминис, кој на „Твитер“ го опиша како „вистински патриот“.

„Патриотизам е да се служи во интерес на граѓаните со реализам. Јанис Бутарис е вистински патриот“, напиша Каминис на „Твитер“ споделувајќи заедничка фотографија со солунскиот градоначалник.


Бутарис: Погрешно бев протолкуван, не предлагам промена на името на солунскиот аеродром


Солун, 13 февруари, 2018 - 15:52 (META) 

Погрешно беа протолкувани моите изјави, никогаш не предложив, ниту предлагам промена на името на аеродромот, вели солунскиот градоначалник Јанис Бутарис, по реакциите што ги предизвика велејќи дека треба да се размисли за промена на името на аеродромот во Солун кој се вика „Македонија“.

Бутарис, изрази жалење што, како што рече, бил изваден и објавен само еден дел од изјавите, а не ставовите во целост од вчерашниот состанок.

– Не предложив, не предлагам и нема да предложам промена на името, едноставно ја изразив мојата загриженост. Она што го кажав и не го одрекувам е дека во ова прашање имаме загубено, 130-150 земји, колку и да се, ја имаат признато земјата под името Македонија. И ние, за жал, со одговорност на грчките влади во последните 25 години, имаме загубено. И ова треба да не загрижува – рече Бутарис.

Во однос на телефонското интервју во утринската емисија на грчката телевизија „Скај“, во која го спомена името на грчкиот кошаркар Галис како можна варијанта за име на солунскиот аеродром, Бутарис вели дека спиел кога го побарале.

– Одеднаш, утрово ми се јавуваат од Скај, јас спиев и ме збунија. Не побарав никогаш промена на името „Македонија“. За Никос Галис, што беше споменато, ме праша една госпоѓа од „Скај“, не и го помнам името, кога би се предложило менување на името, што би предложил и нормално јас реков – Никос Галис – вели Бутарис.


Бутарис: Туристите мислат дека слетуваат во Скопје, а не во Солун


Солун, 13 февруари, 2018 - 9:45 (META) 

Градоначалникот на Солун, Јанис Бутарис изјави дека треба да се размисли за промена на името на солунскиот аеродром „Македонија“ бидејќи туристите кога слетуваат во Солун мислат дека доаѓаат во Скопје.

– Не велам дека треба да се промени, но само јавно прашувам, да размислиме за тоа бидејќи името „Македонија“ го подели светот, не подели нас и од тоа сите губиме – рече Бутарис во изјава за грчката телевизија „Скај“.

Според него, аеродромот би можел да го носи името на прославениот грчки кошаркар Никос Галис, кој, како што вели, е меѓународно призната личност и единствениот од Грција кој влезе во американската Куќа на славните.

Бутарис смета и дека не се реални грчките стравувања од Македонија и дека проблемот на Грција не е Скопје, туку Анкара, и се поголемото турско влијание во регионот.

Тој оценува дека сега има реална можност проблемот со името да се реши, а секое одолговлекување би одело на штета на Грција.

– Подобро да добиеме 50 отсто од нешто, отколку 100 проценти од ништо. Изгубивме во Хаг, не можеме да го задржиме ветото за НАТО – изјави Бутарис.


Бутарис: Терминот „Македонија“ не е закана за идентитетот на Грција


Солун, 21 јануари, 2018 - 20:31 (META) 

Градоначалникот на Солун, Јанис Бутарис, изјави дека Грците се слабо информирани и не разбираат дека Скопје нема да им го украде идентитетот ако името на земјата го содржи зборот Македонија.

-Многу сум разочаран што по 25 години спор за името ние сме во истата позиција. Психологијата и размислувањето на голем број грчки граѓани не е променето. Проблемот е во тоа што луѓето сметаат дека Скопје ќе ни го одзеде идентитетот, никој нема да го направи тоа. Тие не се закана за нас. Луѓето се слабо информирани и си замислуваат разни нешта што не се реални. Веруваат дека ќе ни биде украдена историјата – рече Бутарис за бугарската БГНЕС.

Изјавата следуваше по антимакедонските протести во Солун кон кои се приклучија илјадници Грци. Организатори на собирот беа грчки здруженија и организации од дијаспората, кои имаат поддршка и од политички партии, спортски и христијански здруженија, градоначалници и митрополити од различни општини. Преку протестот, бараа да не се користи терминот „Македонија“ во решението на спорот на нашата земја.


Бутарис: Прашањето за името е „надувано“ поради глупавоста на политичарите


Солун, 3 јануари, 2018 - 14:10 (META) 

Мора да имате добри односи со соседите. Прашањето за името е надувано пред се поради глупавоста на политичарите. Луѓето сакаат да си најдат идентитет. Со отстапки од двете страни, но и од опозицијата, подготвени се за компромис. Господинот Заев рече дека ќе го смени името на аеродромот, ќе ги смени таблите на улиците, вели солунскиот градоначалник Јанис Бутарис во интервју за радиото „Практорио ФМ“ на грчката новинска агенција АНА-МПА, одговарајќи на прашање за саботната неформална средба во Солун со македонскиот премиер Зоран Заев.

Истовремено, Бутарис во интервјуто вели дека е најголем Македонец, најверојатно посочувајќи со тоа на неговото раѓање во грчката област Македонија.

– Поголем Македонец од мене не постои, поради потеклото. Моето потекло и моето воспитување кажуваат сѐ, вели градоначалникот на Солун и објаснува дека „во Скопје првпат отишол во 1991 година, со Комората за трговија и индустрија“.

За саботната средба која се одржа по негова покана до Заев, Бутарис вели дека се разговарало за соработка.

– Имавме планирано приватна вечера. Го поканив да ја пречека Новата година во Солун. Неговиот брат и неговите пријатели секоја седмица се во Солун. Она што го финализиравме е да организираме спуштање со кајаци по Вардар, некаде во април. Можеби ќе имаме и мешан екипаж. Второ, се договоривме да правиме културни размени што ќе вклучуваат танц, музика и предавања. Еднаш во Скопје, еднаш во Солун. Разговаравме и за една стипендија што ќе ја даде општина Солун – објаснува солунскиот градоначалник во интервјуто за радиото на новинската агенција АНА-МПА.


Заев: Вечерата со Бутарис е порака дека постои волја за решавање на спорот за името


Скопје, 2 јануари, 2018 - 16:26 (META) 

Премиерот Зоран Заев бил на вечера со солунскиот градоначалник Јанис Бутарис за Нова година во Солун за да испрати позитивна порака дека постои волја за решевање на спорот со името. Ова денеска го изјави Заев, во својот прв коментар пред македонските новинари по вечерата со Бутарис.

Одговарајќи на прашања на новинарите во врска со посетата на Солун тој рече дека создадената атсмосфера на пријателство може да биде од корист за подобрување на околностите и изнаоѓање на решение за проблемот со името.

Заев рече дека за време на престојот во Солун имал телефонски разговор со грчкиот премиер Алексис Ципрас и министерот за надворешни работи на Грција, Никос Коѕиас.

– Создаваме пријателска атмосфера и предуслови за во првата половина од годината суштествено и на вистински начин да влеземе во решавање на проблемот. Убеден сум дека можеме да најдеме решение. За време на посетата се слушнав со министерот за надворешни работи и со Ципрас, но мора да разберете дека не е лесно и за грчката страна. Но, со пријателско однесување може да се најде решение за во 2018 година да добиеме покана за членство во НАТО и за отпочнување на претпристапните преговори за влез во Европската Унија – изјави Заев, одоговарајќи на новинарски прашања по состанокот со министерот за финансии, Драган Тевдовски околу реализацијата на капиталните инвестиции во 2017 година.


Заев на предновогодишна вечера со Бутарис во Солун


Солун, 30 декември, 2017 - 21:35 (META) 

Премиерот Зоран Заев на „Твитер“ соопшти дека е во Солун, каде, како што претходно беше најавено, ќе ја дочека Новата година со градоначалникот Јанис Бутарис.

„Солун прекрасен како и секогаш, пријателски град од соседна Грција. На заедничка вечера со градоначалникот Бутарис разговараме за нештата кои нé поврзуваат, во позитивна атмосфера. Му се заблагодарив на гостопримството и ги споделивме очекувањата за успешна 2018 година“, напиша Заев на „Твитер“.

Заев ја прифати поканата да ја дочека Новата година во Солун која Бутарис му ја упати додека беше во работна посета на Скопје во ноември, кога се сретна со македонскиот премиер.


Заев за Нова година ќе биде во Солун кај Бутарис


Скопје, 23 декември, 2017 - 18:32 (META) 

Премиерот Зоран Заев, Нова година ќе ја дочека во Солун, каде домаќин ќе му биде градоначалникот на градот, Јанис Бутарис, пренесува порталот „Нова“.

Заев ја прифатил поканата која Бутарис му ја упати додека беше во работна посета на Скопје во ноември, и кога се сретнаа со македонскиот премиер.

Освен што го покани во Солун, во знакот на добрососедските односи, Бутарис истакна и дека ќе се залага, следната средба на премиерите Заев и Алексис Ципрас, да се одржи токму во Солун.

Премиерот во ноември рече дека со солунскиот градоначалник се согласиле дека политичарите од двете земји имаат обврска да ги отворат перспективите на граѓаните и додаде дека тие можат да излезат како победници ако изнајдат решение на повеќедеценискит спор со името.


Бошњаковски: Ако се постигне договор за името, ќе се организира референдум


Скопје, 20 декември, 2017 - 13:23 (META) 

Течат преговорите за спорот со името под закрила на Обединетите нации, но во моментов нема видливо решение, но секако кога ќе биде постигнат договор, ќе се организира референдум, рече портпаролот на Владата, Миле Бошњаковски на новинарско прашање на денешната прес-конференција дали има некаков исчекор во долгиот спор.

Прашан дали премиерот Заев ја прифатил поканата на солунскиот градоначалник Јанис Бутарис да ја дочека новата година во Солун, Бошњаковски рече дека нема дефинитивна одлука и дека во моментот се утврдуваат детали.


Димитров и Бутарис разговараа за зајакнување на соработката во културата и во образованието


Скопје, 16 ноември, 2017 - 19:55 (META) 

Шефот на македонската дипломатија, Никола Димитров, и градоначалникот на Солун, Јанис Бутарис, кој е во работна посета на Македонија, на денешната средба се согласиле дека комуникацијата меѓу граѓаните на двете земји е од извонредно значење за зајакнување на заемната доверба и разбирање, се наведува во соопштението на Министерството за надворешни работи.

На средбата, поконкретно, станало збор за прекуграничната соработка и за потребата од зајакнување на соработката во културата, образованието и меѓу невладините организации.

„Ова е втора средба меѓу министерот Димитров и градоначалникот Бутарис за помалку од два месеци, на која продолжија разговорите од Солун, за прашања од заеднички интерес, како и за можниот придонес на локалните власти во рамки на мерките за градење доверба и зближување на граѓаните од двете земји“, стои во соопштението на МНР.

Претходно денеска градоначалникот на Солун имаше средби со премиерот Зоран Заев и со претседателот на државата, Ѓорге Иванов.