Во СЈО преслушале над 500.000 разговори – 193.000 биле приватни!


Скопје, 16 март, 2018 - 15:12 (META) 

Класификацијата на разговорите што веќе е направена од СЈО за 85 отсто од разговорите што ги поседуваат, покажува на масовноста на кршењето на човековите права во земјава. Овој податок може да се најде во последниот шести по ред Извештај за работата на СЈО, пишува Теофил Блажевски во „Вистиномер.мк“.

Специјалното јавно обвинителство (СЈО) последните шест месеци – од септември 2017 г. до март 2018 г. ги оценува како потврда за добро извршената работа од формирањето во 2015 година до сега, бидејќи во Судот прифатиле најголем дел од нивните обвиненија и бидејќи се изречени и првите пресуди.

Ова се наведува во последниот, петти шест месечен извештај на Обвинителството (чие официјално име е Јавно обвинителство за гонење на кривични дела поврзани и кои произлегуваат од содржината на незаконското следење на комуникациите), кој е објавен согласно законската обврска на оваа институција да ја известува јавноста и Собранието за својата работа.

Во текот на Извештајниот период од страна на судот се целосно одобрени 15 обвиненија поднесени во месец јуни 2017 година. Во оваа смисла, петтиот извештаен период несомнено претставува потврда на целокупната работа на тимот на Јавното обвинителство за гонење на кривични дела поврзани и кои произлегуваат од содржината на незаконското следење на комуникациите од неговото започнување со работа и заклучно со поднесувањето на овој Извештај.

СЈО го истакнува и податокот и дека за 11 од обвинетите лица судовите веќе изрекле и пресуди.

Повеќе на оваа тема прочитајте на „Вистиномер.мк“.


СЈО отвори седум нови случаи: Странски служби, патни трошоци, набавка на опрема…


Скопје, 19 декември, 2017 - 15:14 (META) 

Специјалното јавно обвинителство денеска објави дека отвора седум нови истраги против 17 лица осомничени за злоупотреба на службената должност измами и други кривични дела.

Првиот случај е со кодно име „Странски служби“, рече обвинителката Фатиме Фетаи. Во него се осомничении две лица за злоупотреба на службена положба и овластувања едниот е тогашен началник на одделот а оперативна техника на УБК, а вториот помошник министер. Тие се осомничени дека извршиле набавка на опрема од странска компанија во рекордно време со која го оштетиле буџетот. Целта на набавката била да се потврди тезата на тогашниот владин врв за постоењето на странски служби кои вршат масовно прислушување.

Фетаи објасни дека постапката е почната по барање на второосомничениот, кој на 16 декември 2014, побарал набавка на предметната опрема, а првоосомничениот на 19 декекмври донел одлука, составил комисија и самоиницијативно подготвил три понуди како да се поднесени од  странски компании, а тие биле рачно пополнети од исто лице.

На 24 декември 2014 година е донесена одлука за најповолна понуда и е склучена со странската компанија која претходно го изготвила споменатиот извештај, односно со нејзин претставник кој, како случајно, баш тој ден бил во Скопје. Опремата била испорачана во мај 2015.

Вториот случај е под кодното име „Друмарина“ и е за над 100.000 евра незаконски земени пари за патни трошоци од поранешна пратеничка.  Како што рече Фетаи, пратеничката од 25 јуни 2011 до 26 декември 2015 поднесувала лажни фискални сметки, како да патувала за присуство на седници на парламентот. Но, од доказите што ги добило СЈО, излегува дека таа имала сместување во Скопје и не ги остварила патувањата, рече Фетаи.

Пратеничката доставила сметки за 843 патувања со сопствено возило, од местото на живеење по лични документи до Скопје.

– Доставената анализа покажува дека доколку патувањата биле реално остварени, нејзиното возило требало да измине 235.928 километри а реалната состојба е 133.520 километри за тој период. Ова е доказ дека не ги направила реално трошоците и противправно стекнала 5.920.000 денари, односно речиси 100.000 евра за патни трошоци – рече обвинителката.

Во истрагата „Рентген“, е осомничен тогашниот министер за здравство за злоупотреба при набавка на рентген и други радиолошки апарати за 4 институции. Во текот на оваа постапка, фаворизирал една од фирмите, и пред официјалниот почеток на постапката, овозможил таа фирма да добие детални инсајдерски информации за јавната набавка. Во јануари 2015 беше објавено дека станува збор за фирма на една новинарка и за нејзината мајка.

Осомничениот наместо да ја поништи постапката ја продолжил и спротивно на законот за јавни набавки склучил договор со второпласираниот на тендерот за 860.000 евра.

Следната истрага е „Продуцент“, во која има сомневање дека од 2009 до 2012 година тогашниот министер за земјоделство склучил договор со „Смарт Центар“ ДООЕЛ Скопје за 50.000 евра за продукција на емисијата „Бојата на парите“ на телевизија „Сител“.

– Договорот е без постапка за јавна набавка, а ваков продуцентски пакет без јавна набавка може се нарача единствено од радио или телевизиска куќа – рече Фетаи.

Парите се исплатени, без доказ за извршена услуга, на  „Смарт Центар“ ДООЕЛ Скопје.

Истрагата „Лидери“ е отворена од прислушуваниот разговор помеѓу двајца лидери на политички партии, за договарање за уривање бесправни објекти. Осомничен во овој случај е инвеститорот на објектот, односно куќата изградена меѓу ноември 2011 и септември 2013 спроти Амбасадата на САД.

Шестиот случај кој денеска го објави СЈО е „Тарифа 2“, и се однесува на злоупотреба околу инсталирањето на софтверот во ЕЛЕМ. Истрагата е против истото лице од предметот„ Тарифа“, но за други две дела на злоупотреба на службата. Вкупната штета по двете дела е 218.880 евра, кои биле исплатени на фирма од Чешка.

Седмиот и последен случај објавен денеска е „Транспортер 2“, во кој повторно се осомничени поранешниот градоначалник на Битола, Владимир Талески, секретарот на општината, петмина превозници и тројца директори на основни училишта, кои не се дел од првиот „Транспортер“.

Според Фетаи, тие во учебната 2009-2010, овозможиле еден превозник незаконски да стекне корист од 230.000 денари, а за учебната 2010-2011 година, овозможиле пет превозници незаконски да си наплатат 1.643.583 денари на име превоз на ученици.


Бројките и податоците од извештајот на СЈО


Скопје, 16 март, 2017 - 17:00 (META) 

Специјалното јавно обвинителство вчера го објави новиот шестмесечен извештај во кој бројките доста пластично го опишуваат обемот на работа на Катица Јанева и на нејзиниот тим.

Еве некои од поинтересните податоци:

brojki i podatoci od izvestajot na sjo


Јанева: Од 2008 до 2015 година огромни суми од буџетот се одлеале во приватни џебови


Скопје, 14 април, 2016 - 15:00 (META) 

„Има сериозни индиции дека од 2008 до 2015 година, на незаконски начин од буџетот во приватни џебови се одлеале огромни суми пари. Во овој момент нема да кажам за колкави суми станува збор, но станува збор за вртоглави износи“, рече на денешната прес-конференција специјалната јавна обвинителка, Катица Јанева.

Таа истакна дека никој не може да го задржи незаконски стекнатиот имот, дека тој подлежи на Законот за конфискација и дека за него не важи никаква аболиција или помилување.

Како што подвлече Јанева, СЈО води повеќе финансиски истраги за незаконски стекнат имот, кои ќе продолжат и понатаму.

Во тој контекст, таа додаде дека ќе има и проширување на истрагата за случајот „Титаник“, бидејќи во сомневањата за изборни манипулации има и наводи за нелегално финансирање на политичка кампања.


СЈО: Отворени истражни постапки за Јанкулоска, Јанакиески и за Божиновски за фалсификување на изборите


Скопје, 12 февруари, 2016 - 12:08 (META) 

Специјалната обвинителка Катица Јанева денеска одржa прес-конференција на која ја најави првата акција под името „Титаник“.

Во неа, како што информираа од Специјалното обвинителство, биле отворени истражни постапки против поранешните министри Гордана Јанкулоска и Миле Јанакиески, како и против секретарот на Владата, Кирил Божиновски, за злосторничко здружување, повреда на избирачко право, повреда на слободата на гласање, поткуп и за уништување избирачки материјал, а сè за фалсификување на изборите.

Во сала преполна со новинари и странски набљудувачи, прес-конференцијата ја започна Специјалната јавна обвинителка, Катица Јанева . Јанева не говореше за детали по отворените истражни постапки туку се заблагодари за добиената поддршка од меѓународната заедница и рече правдата ќе победи наспрема заканите.

– Правдата ќе победи и покрај тешкотиите и заканите кои доаѓаат од одредни политички партии и конструираните кривични пријави против мене и моите соработници. Ме охрабрува поддршката од меѓународната заедница, а поддршка добивам и од правната струка. Ќе отворам постапки за 10 кривични предмети од областа на изборите, човековите права и слободи – рече Јанева на почетокот и ја напушти прес-конференцијата.

По завршувањето на излагањето на двете обвинителки, Ленче Ристовска и Фатиме Фетаи, новинарите речиси и се скараа меѓусебе кој прв да постави прашања.

Во тензична атмосфера, дел од новинарите ја прашуваа Ристовска за имотот на Јанева, за транспарентноста на трошењето на парите на Специјалното јавно обвинителство и за примопредавањето на материјалите од прислушкуваните разговори.


САД ја повикаа ВМРО-ДПМНЕ јавно да ги поддржи Катица Јанева и ДИК


Виена, 5 февруари, 2016 - 0:57 (META) 

Кејт Брнс, претставничка на САД во Постојаниот совет на ОБСЕ во Виена, ја повика ВМРО-ДПМНЕ јавно да ја поддржи работата на специјалната обвинителка во сите фази на нејзината работа, објави „НоваТВ“.

„САД ги поздравува напорите за примена на Договорот од Пржино кој е најдобриот пат за Македонија за излез од политичката криза. Исто така ја поздравуваме оставката на премиерот Никола Груевски како камен темелник на примената на Договорот од Пржино. Многу важни обврски од Договорот од Пржино сепак не беа остварени. На пример, работата на Анкетната комисија која треба да предложи реформи за разузнавачките служби и која останува нереализирана. Кога ќе бидат комплетирани, тие реформи треба да воведат политичка одговорност за сите оние за кои ќе се открие дека незаконски постапувале.

Изјавите на една политичка партија, ВМРО-ДПМНЕ, и нејзините лидери кои ја напаѓаат работата на Специјалната обвинителка се уште еден извор на загриженост. Ние ги повикуваме сите политички партии, кои едногласно се договорија за именувањето на г-ѓа Катица Јанева, јавно да ја поддржат работата на Специјалната обвинителка во сите фази на нејзината работа. Ние исто така ги охрабруваме сите партии да ја поддржат работата, и јавно и приватно, на независната Државна изборна комисија за да се обезбеди таа да има доволно персонал, ресурси и пристап до информациите кои ѝ се потребни за да води својата работа во првата темелна анализа на изборната листа на земјата.

САД се загрижени поради недостигот на напредок за препораките на Канцеларијата на ОБСЕ за демократски институции и човекови права дадени во 2014 година. Во нив се содржани: пречистување на изборниот список, реформа на медиумите за да се обезбеди еднаков пристап за сите алтернативни ставови, одвојување на државата од партијата, спречување на заплашувањето на гласачите и притисок. Како клучни олеснувачи на Договорот од Пржино, САД и ЕУ ќе направат анализа на напредокот околу овие прашања пред распуштањето на парламентот на 24 февруари за да се определи дали условите кои треба да водат до кредибилни избори на 24 април се исполнети како што тоа го предвидува Договорот од Пржино“, рекла Брнс во Виена.