Адвокатите во „Тенк“ побараа изземање на обвинителите, Јанева ги одби


Скопје, 8 мај, 2018 - 16:14 (META) 

Обвинителот од Специјалното јавно обвинителство (СЈО) Стевчо Донев на попладневното продолжение на рочиштето за предметот „Тенк“ до Кривичниот суд достави известување од специјалната обвинителка Катица Јанева дека нема законска основа за барањето на одбраната за изземање за него и за обвинителката Ленче Ристоска.

Обвинителот ваквото барање го оквалификува како чекор на адвокатите да се одложува јавната расправа и предложи судењето да продолжи. Судијката по неговото излагање сепак даде пауза, за да може одбраната да ги разгледа поднесоците од СЈО.

Одбраната го побара изземањето на Донев и на Ристоска во претпладневното продолжение на судењето, откако адвокатката Сања Алексиќ, која го брани Никола Груевски, ги прочита писмените докази на одбраната. Веднаш по барањето за нивно изземање, обвинителите Ристоска и Донев побараа пауза, а одбраната реагираше дека обвинителите немаат право да бараат пауза до донесување на одлуката за инивно изземање.

Судијката Добрила Кацарска сепак даде пауза до 14 часот, со што заврши претпладневниот дел од денешното рочиште.

На судењето присуствуваат обвинетите Никола Груевски и поранешниот помошник министер во МВР Ѓоко Поповски. Во „Тенк“ е обвинета и поранешната министерката за внатрешни работи Гордана Јанкулоска, но постапката за неа е издвоена поради „ризична бременост“.

Тројцата се обвинети за набавката на луксузниот мерцедес од речиси 600.000 евра.


Врховен и Апелација одлучија да не се изземат судиите во „ТНТ“ и „Насилство“


Скопје, 27 април, 2018 - 13:09 (META) 

Врховниот суд постапувајќи по барање на одбраната во предметот на Специјалното јавно обвинителство „ТНТ“ за изземање на в.д. претседателот на Апелациски суд Скопје, Лидија Димчевска и нејзиниот заменик, на 16 овој месец донел решение со кое барањето за иземање се одбива како неосновано.

Решението преку Апелациски суд Скопје е доставено до Основниот суд Скопје 1.

Како што соопшти овој суд, врз основа на ова решение, а постапувајќи по барање на одбраната во предметот „ТНТ“ за изземање на претседателот на Основниот суд Скопје 1 Иван Џолев и неговиот заменик, Апелациски суд Скопје на 20 април 2018 година донел решение со кое барањето на одбраната се отфрла како недозволено. Решението е доставено до Основен суд Скопје 1.

По добиена надлежност за постапување, претседателот на овој суд, постапувајќи по барање на одбраната за изземање на судечкиот совет кој постапува во предметот „ТНТ“ на 23 овој месец донел со кое барањето за изземање се одбива како неосновано.

По барање на одбраната во предметот од обвинителството „Насилство општина Центар“ за изземање на претседателот на Основниот суд Скопје 1 Иван Џолев и неговиот заменик, како и в.д. претседателот на Апелацискиот суд и неговиот заменик, претседателот на судот донел решение со кое барањето се отфрла како недозволено.

За барањето на одбраната во истиот предмет за изземање на судијата поединец кој постапува по предметот, судот исто така донесе решение со кое барањето се одбива како неосновано.


Судењето за „Шамарите во Центар“ презакажано за 1 јуни, одбраната бара изземање на судија


Скопје, 19 април, 2018 - 11:39 (META) 

Претседателот на Основниот суд Скопје 1, Иван Џолев, не бил во можност за време на паузата да одлучи за барањето за изземање на судијата Душан Јосифов, па судењето за предметот на СЈО „Шамарите во Центар“ е одложено и ќе продолжи во јуни.

Поради зафатеноста на адвокатите, судијата Душан Јосифов, закажа две рочишта за 1 и 6 јуни, кога ќе се сослушуваат сведоци на СЈО.

Барањето на почетокот на рочиштето го поднесе одбраната на обвинетите, поради изјавата на јавната обвинителка Катица Јанева дека одредени судии се опфатени во прислушуваните разговори.

На рочиштето на кое исказ требаше да дадат двајца сведоци, присуствуваа сите обвинети, нивните бранители со исклучок на Милан Андонов и Митко Печков, кои се адвокати на Никола Груевски и Миле Јанакиески.

Обвинетите во овој случај, поранешниот премиер Никола Груевски, поранешниот министер за транспорт и врски Миле Јанакиески, пратеничката на ВМРО-ДПМНЕ Даниела Рангелова и уште девет лица пред Судот се изјаснија дека не се чувствуваат виновни.

На претходните рочишта за овој предмет, вина признаа четвртообвинетиот Томислав Лазаров и петообвинетиот Јордан Ристевски и добија условни казни.

Обвинетите во предметот „Насилство во Центар“ се товарат за поттикнување на насилството што се случи при протестите пред општина Центар во јуни 2013 година.


Одбраната побара изземање на судиите во „Траекторијa“


Скопје, 17 април, 2018 - 14:28 (META) 

Одбраната на обвинетите во судењето „Траекторија“, по обвинение на Специјалното јавно обвинителство (СЈО) на денешното рочиште побара изземање на Судечкиот совет, како и на претседателот на Кривичен суд, Иван Џолев, и на судии од Апелацискиот суд.

Адвокатот Еленко Миланов рече дека изземањето го бараат поради информации и изнесени од специјалната обвинителка Катица Јанева на една телевизија дека во снимените аудио материјали кои се во СЈО има и судии и обвинители.

Со истото образложение, адвокатите на обвинетите, поранешни високи државни функционери, бараше изземање на судиите и во други случаи на СЈО.

Претседателот на Судечкиот совет Горан Бошевски рече дека барањето за изземање на Џолев и на судии од Апелација е неосновано и се отфрла. Барањето, пак, за изземање на членовите на Судечкиот совет ќе биде доставено на одлучување до претседателот на Кривичен суд Иван Џолев. Тој треба да се произнесе најмногу за три дена.

Во „Траекторија“ обвинети се поранешниот премиер Никола Груевски, поранешниот вицепремиер Владимир Пешевски, екс-министерот за транспорт и врски Миле Јанакиески и поранешниот директор на Агенцијата за државни патишта, Љупчо Георгиевски. Тие денеска дојдоа во Кривичниот суд.

Обвинети се дека во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатите Миладиновци – Штип и Кичево – Охрид ги искористиле и пречекориле своите овластувања.


Адвокатите побараа изземање на судиите за „Тенк“ поради обвинувањата од Катица Јанева


Скопје, 10 април, 2018 - 12:22 (META) 

Судењето за случајот „Тенк“, односно за набавката на „мерцесдесот“ од 600.000 евра за потребите на поранешниот премиер Никола Груевски, е прекинато на еден час, бидејќи одбраната на обвинетиот побара изземање на судечкиот совет, јави „Павосудство.мк“.

Адвокатите на обвинетите во предметот „Тенк“ на Специјалнотo јавно обвинителство побараа изземање на судискиот совет и на судиите од Апелација поради интервјуто на Катица Јанева дадено на 26 март, во кое таа тврди дека меѓу прислушуваните телефонски разговори има разговори и меѓу судии кои постапуваат по предмети на СЈО.

Ова е трет случај во кој се бара изземање на судиите, по „Топлик“ и „ТНТ“.


Судот не знае како обвинетите во „Титаник“ дознале кои судии ќе одлучуваат за притворите


Скопје, 7 јули, 2017 - 15:22 (META) 

Обвинетите во случајот „Титаник“, меѓу кои и лидерот на ВМРО-ДПМНЕ, Никола Груевски, барале изземање на еден од тројцата судии од кривичниот совет што одлучуваше по барањето на Специјалното јавно обвинителство да им биде одреден притвор, потврди денеска Основниот суд Скопје 1.

Како обвинетите и нивната одбрана дознале кои судии го сочинуваат советот, од судот велат дека тоа не му е познато и не можат да дадат одговор ниту коментар за случајот.

Од судот ги отфрлаат како шпекулации наводите што вчера ги објави порталот „Сакам да кажам“, кој повикувајќи се на анонимни извори од судот објави дека Груевски, како и другите обвинети во „Титаник“ – Гордана Јанкулоска, Мартин Протогер, Миле Јанакиески и Кирил Божиновски од тричлениот кривичен совет првично добиле притвор. Како што објави порталот, претседателката на советот веднаш му јавила на претседателот на Основниот суд Скопје 1, Стојанче Рибарев, за соодносот на гласовите од 2 – 1 за одредување притвор, по што од советот незаконски бил отстранет еден од судиите.

Во соопштението на Кривичниот суд се наведува дека првично во советот што одлучувал за притворите, биле определени судиите Билјана Коцевска, Дарко Тодоровски и Диана Груевска-Илиевска. Судијата Билјана Коцевска, поради здравствени проблеми, велат од судот, била спречена да учествува во одлучувањето, поради што на нејзино место, како член на советот, била определена судијката Џенета Бектовиќ.

„Според списите од предметот, од страна на обвинетите лица истиот ден (сабота, 1 јули), во 17.20 часот, во судската писарница е поднесено барање за изземање на судијата Дарко Тодоровски од одлучување по тој предмет. Како дознале обвинетите лица и одбраната за составот на советот, не ни е познато и не можеме да дадеме одговор ниту коментар“, стои во соопштението од судот.

Оттаму објаснуваат дека доколку работата по предметот не е завршена, во согласност со членот 37 од Законот за кривична постапка (ЗКП), судијата чие изземање се бара е „должен да престане со работење по предметот и за тоа да го извести претседателот на судот кој е должен да одлучи по барањето“.

Судијата Дарко Тодоровски дал изјава за поднесеното барање за негово изземање и в.д. претседателот на Кривичниот суд, Стојанче Рибарев, го иззел судијата Тодоровски, а за нов член на советот го определил судијата Марин Станевски, кој во саботата вечерта, околу 23.30 часот, дошол во судот.

„Доколку по конкретниот предметот веќе било одлучено, ќе бил подготвен записник за советување и за гласање и судијата Дарко Тодоровски ќе дал изјава со таква содржина, а барањето за изземање ќе било отфрлено. При составувањето на советот е постапувано итно, за да се овозможи почитување на рокот од 24 часа во кој треба да се одлучи по барањето за притвор“, велат од Кривичниот суд.

Оттаму додаваат дека кој судија како гласал при донесувањето на одлуката е забележано на записник, кој е таен и може да му биде достапен само на повисокиот суд при одлучување по жалба.

Инаку, кривичните совети на Основниот суд Скопје 1 како неосновани ги отфрлија сите 18 барања за притвор што ги поднесе Специјалното јавно обвинителство и бараната мерка ја замени со мерки за претпазливост, односно одземање на пасошите и обврска за јавување во судот еднаш неделно.


Вангеловски: Неделкова е изземена од предметите на СЈО бидејќи син ѝ таму е ангажиран


Скопје, 27 април, 2017 - 14:28 (META) 

Врховната судијка Лидија Неделкова била изземена од одлучувањето за предметите на Специјалното јавно обвинителство поради „состојба на блискост“, односно затоа што нејзиниот син бил во некаков работен однос во СЈО, рече претседателот на Врховниот суд, Јово Вангелвоски, на денешниот бирфинг со новинарите.

Станува збор за случаите за апсењето на градоначалникот на општината Пустец во Албанија, Едмонд Темелко, во случајот „Титаник“ и за притворот на бизнисменот Сеад Кочан, осомничен во „Труст“.

Барањето за изземање на Неделкова, до Вангеловски го поднеле адвокатите на Темелко и на Кочан, а причината била сомневањето во непристрасноста на Неделкова, поради ангажманот на нејзиниот син во СЈО. Како доказ тие доставиле снимка од телевизијата „Телма“, на која случајно во кадарот бил „уловен“ синот на Неделкова, како излегува од просториите на СЈО.

Вангеловски, наведе и друг пример, како „доказ“ дека синот на Неделкова е ангажиран во СЈО.

– Од Врховниот суд беше пратено писмо до СЈО, на кое службено лице на приемното одделение ставило приемен печат и се потпишало на доставницата дека писмото е примено. Тоа лице што го примило писмото и се потпишало врз печатот е Давид Неделков, според потписот на доставницата, која стигна во судот – вели Вангеловски.


Врховниот суд официјално кажа дека одбил буквално сè, но не и зошто


Скопје, 11 април, 2017 - 16:26 (META) 

Врховниот суд попладнево и официјално соопшти дека ги одбил сите барања и приговори што беа на дневен ред на денешната општа седница.

Имено, на седницата се одбиени барањето на Специјалното јавно обвинителство (СЈО) за изземање на претседателот на Врховниот суд, Јово Вангеловски, приговорот на судијката на Врховниот суд, Лидија Неделкова, и приговорите на 17-те судии од Основниот суд Скопје 1 против годишниот распоред на работа, што го донесе в.д. претседателот на судот, Стојанче Рибарев.

Во соопштението на Врховниот суд не е наведено никакво образложение зошто и врз основа на што се одбиени барањата и приговорите.

„Врховниот суд на Република Македонија ја информира јавноста дека денеска беше одржана општа седница на Врховниот суд на Република Македонија, на која: Барањето за изземање на претседателот на Врховниот суд на Република Македонија, поднесно од Јавното обвинителство за гонење кривични дела поврзани и кои произлегуваат од содржината на незаконското следење на комуникациите, беше одбиено; Приговорот на судија на Врховниот суд на Република Македонија (Лидија Неделкова, н.з.) изјавен против одлуката за изменување и за дополнување на одлуката за распоредот за работа на судиите и судската администрација во Врховниот суд на Република Македонија за 2017 година, беше одбиен; Сите 17 приговори на судиите на Основен суд Скопје 1 изјавени против годишниот распоред за работа на судиите на Основен суд Скопје 1 за 2017 година, се одбиени“, стои во соопштението на Врховниот суд.

Претседателот на Врховниот суд треба да одлучува по барањето за заштита на законитоста што на 27 март оваа година го поднесе Републичкото јавното обвинителство, со кое се бара поништување на одлуките на Основниот суд Скопје 1 и на Апелацискиот суд Скопје, а со кои му беше одреден притвор на бизнисменот Сеад Кочан, осомничен во случајот „Труст“ на СЈО,  и кој веќе месец и пол е во бегство.

Специјалното јавно обвинителство бараше изземање на Вангеловски, бидејќи е дел од прислушуваните разговори што ги објави СДСМ, а кои биле снимени во период кога тој, исто така, ја извршувал функцијата претседател на судот. Според СЈО, тој разговор ја доведува во прашање непристрасноста на судијата Јово Вангеловски.


Врховниот суд го одби барањето на СЈО за изземање на Вангеловски


Скопје, 11 април, 2017 - 15:55 (META) 

Врховниот суд на денешната општа седница го одбил барањето на Специјалното јавно обвинителство (СЈО) за изземање на претседателот на судот, Јово Вангеловски, од Кривичниот совет, кој треба да одлучува за притворот на бизнисменот Сеад Кочан, осомничен во случајот „Труст“ што го отвори СЈО.

Од Врховниот суд сè уште нема официјална потврда за одлуката за Вангеловски.

Специјалното јавно обвинителство бараше изземање на претседателот на Врховниот суд, Јово Вангеловски, бидејќи е дел од прислушуваните разговори што ги објави СДСМ, а кои биле снимени во период кога тој, исто така, ја извршувал функцијата претседател на судот. Според СЈО, тој разговор ја доведува во прашање непристрасноста на судијата Јово Вангеловски.

Претседателот на Врховниот суд треба да одлучува по барањето за заштита на законитоста што на 27 март оваа година го поднесе Републичкото јавното обвинителство, со кое се бара поништување на одлуките на Основниот суд Скопје 1 и на Апелацискиот суд Скопје, а со кои му беше одреден притвор на Кочан, кој веќе месец и пол е во бегство.

На седницата бил одбиен и проговор на судијката на Врховниот суд, Лидија Неделкова, поради, како што пренесуваат медиумите, одлуката на Вангеловски да ја тргне од Кривичниот совет што треба да одлучува за притворот на Кочан, иако овој предмет со електронска распределба на предмети ѝ се паднал нејзе.

Врховниот суд на денешната седница треба да одлучи и по приговорите на судиите од Основниот суд Скопје 1 на годишниот план за работа, што на крајот на минатиот месец го донесе в.д. претседателот на судот, Стојанче Рибарев.


Врховниот суд денеска ќе одлучува по барањето на СЈО за изземање на Вангеловски


Скопје, 11 април, 2017 - 10:02 (META) 

Врховниот суд денеска на општа седница во 11.30 часот, ќе одлучува по барањето на Специјалното јавно обвинителство за изземање на претседателот на судот, Јово Вангеловски.

На седницата ќе се резгледуваат и ќе се одлучува и по приговорите на судиите од Основниот суд Скопје 1 за годишниот план за работа, што на крајот на минатиот месец го донесе в.д. претседателот на судот, Стојанче Рибарев.

Специјалното јавно обвинителство бара изземање на претседателот на Врховниот суд, Јово Вангеловски, бидејќи е дел од прислушуваните разговори што ги објави СДСМ, а кои биле снимени во период кога тој, исто така, ја извршувал функцијата претседател на судот. Како што појаснуваат од СЈО во барањето, тој разговор ја доведува во прашање непристрасноста на судијата Јово Вангеловски.

Според последните информации од минатата недела, во Врховниот суд беа пристигнати 17 приговори, но не се исклучува можноста нивниот број да е поголем.

Седницата е затворена за јавноста.