!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Собраниската комисија ќе ги разгледува извештаите на УБК и на АР за 2016 година


Скопје, 30 август, 2017 - 10:00 (META) 

По одморот, пратениците почнуваат со работа во Собранието на Република Македонија, каде за денеска е закажана седница на Комисијата за надзор над работата на Управата за безбедност и контраразузнавење (УБК) и на Агенцијата за разузнавање (АР).

Како што информираат од Собранието, на дневен ред на Комисијата се извештаите за работата на УБК и на АР за 2016 година.

За денеска попладне е закажана и средба на членовите на Комисијата за одбрана и безбедност со делегација од Велика Британија, предводена од вишиот советник за одбрана и безбедност на Одделението за стабилизација, Стивен Гловер.

Првата пленарна седница во Собранието по одморите е закажана за 4 септември, а на дневен ред, меѓу другите точки, е и предлогот на Владата за распишување оглас за именување нов државен јавен обвинител.


Собранието денеска ќе одлучува за продолжување на кризната состојба


Скопје, 29 јуни, 2017 - 10:13 (META) 

Собранието на Република Македонија денеска, со почеток од 11 часот, ќе одржи две седници. На дневен ред на седмата седница е предлогот на Владата за продолжување на кризната состојба, која беше воведена во август 2015 година поради мигрантската криза и големиот транзит на мигранти и на бегалци низ територијата на земјава.

На 30 јуни истекува важноста на одлуката за продолжување на кризната состојба, што беше донесена во октомври минатата година, а со новиот предлог Владата бара нејзино продолжување до 31 декември 2017 година.

По завршувањето на седмата, Собранието ќе ја продолжи петтата седница, на која пратениците ќе ги разгледаат годишните извештаи на повеќе институции за 2016 година, меѓу кои и извештаите на Државната комисија за одлучување во втор степен во областа на инспекцискиот надзор и прекршочната постапка, на Државната комисија за одлучување во управна постапка и постапка од работен однос во втор степен, на Дирекцијата за заштита на личните податоци, како и на Комисијата за заштита на правото за слободен пристап до информации од јавен карактер.


Закажани седници на пет собраниски комисии


Скопје, 20 јуни, 2017 - 10:31 (META) 

Во Собранието денеска закажани се седници на Комисијата за транспорт, врски и екологија, Комисијата за финансирање и буџет, Комисијата за труд и социјална политика, Комисијата за политички систем и односи меѓу заедниците и на Комисијата за надворешна политика.

Комисијата за транспорт, врски и екологија ќе ги разгледува предлог-одлуката за одобрување на финансискиот план на „Македонската радио-телевизија“ за 2017 година, годишните извештаи на Агенцијата за аудио и аудиовизуелни медиумски услуги и за работата на МРТВ за 2016 година.

На првата седница на Комисијата за финансирање и буџет, ќе се разгледуваат годишните извештаи за работењето на Народната банка на Република Македонија за 2016 година и на Државниот завод за ревизија во 2016 година.

Комисијата за труд и социјална политика ќе расправа за измените во Законот за работни односи, односно за предлогот за продолжување на породилното отсуство.

На седницата на Комисијата за политички систем и односи меѓу заедниците ќе се расправа за годишните извештаи за работата на Дирекцијата за заштита на личните податоци за 2016 година, Комисијата за заштита на правото за слободен пристап до информациите од јавен карактер и на Државната комисија за спречување на корупцијата.

Единствената точка на дневниот ред на седницата на Комисијата за надворешна политика ќе биде платформата за дипломатски активности на амбасадорот на Република Македонија при Европската Унија во Брисел.


Централен регистар известува за работното време за прием на годишни сметки и извештаи


Скопје, 22 февруари, 2017 - 17:02 (META) 

Централниот регистар ќе врши прием на годишни сметки и финансиски извештаи за 2016 година, на 25 февруари (сабота) од 8 до 16 часот, 27  февруари (понеделник) и на 28 февруари (вторник) од 8 до 20 часот.

– За микро и малите компании кои нема да достават годишна сметка во хартиена форма во законскиот рок, ќе имаат можност годишната сметка, во согласност со Законот за трговски друштва, да ја поднесат во електронска форма до 15 март – информираат од Централен регистар.

В понеделник и во вторник од 8 до 16 часот, Централниот регистар ќе овозможи прием на годишните сметки во хартиена форма за 2016 година за правните субјекти и во градовите каде што нема свои канцеларии.

Во Кратово и во Демир Хисар тоа ќе бидат општинските згради, а во Крушево – објектот на „Уни банка“.


Заев – Алтхаузер: Реформи во судскиот систем и СЈО целосно да си ја заврши работата


Скопје, 11 јануари, 2017 - 16:21 (META) 

Претседателот на СДСМ, Зоран Заев, денеска се сретна со амбасадорката на Германија во Македонија, Кристине Алтхаузер.

Тие разговарале за потребата од продолжување на демократските процеси во Македонија и за формирање нова и силна Влада, посветена на реформските приоритети.

На средбата, како клучни биле посочени препораките во извештаите на Европската комисија и на Рајнхард Прибе.

Заев и Алтхаузер разговарале и за потребата од реформа на судскиот систем, според најдобрите практики во регионот и во светот, како и околу потребата Специјалното јавно обвинителстви целосно да ја заврши својата работа, за да се обезбеди функционирање на правдата и на правната држава во земјава.


Коцијанчич: Одблиску ќе ги следиме изборите, тие се можност за нов почеток


Брисел, 9 декември, 2016 - 14:03 (META) 

Европската Унија одблиски ќе ги следи изборите в недела, а првата реакција околу исходот ЕУ очекува да ја има в понеделник, на 12 декември, попладне, изјави денеска портпаролката на Европската комисија, Маја Коцијанчич.­

– Во однос на тоа што ќе се случи како следен чекор, ние, се разбира, одблиску ќе ги следиме изборите, како што правевме и со целиот процес до изборите. Се разбира, ќе има и меѓународни набљудувачи на теренот и ние, исто така, ќе го чекаме нивниот извештај, по што очекувам дека ќе имаме реакција некаде попладнето в понеделник – рече Коцијанчич.

Таа истакна дека предвремените парламентарни избори во Македонија се можност земјата да направи нов почеток и да се врати на евроинтеграцискиот пат.

– Како што досега повеќепати сме кажале во однос на овие избори, тие се можност за земјата да направи нов почеток, да се обедини околу стратешките цели и да се врати на евроинтеграцискиот пат. Очигледно, ова е само еден чекор од еден многу подолг процес, како дел од процесот од Договорот од Пржино и јасно е дека ова што е договорено во рамки на овој договор, ќе треба да продолжи да се имплементира – истакна Коцијанчич.

­


Пратениците денеска во Собрание ќе им поставуваат прашања на членовите на Владата


Скопје, 29 септември, 2016 - 10:34 (META) 

Пратениците во Собранието денеска ќе ја одржат 121. седница.

Според дневниот ред на денешната пленарна седница, како што е вообичаено секој последен четврток од месецот, пратениците треба да им поставуваат прашања на членовите на Владата.

Во 12 часот е закажана расправа на Комисијата за политички систем и односи меѓу заедниците, на која пратениците треба да расправаат за извештаите за работата на Специјалното јавно обвинителство и на основните јавни обвинителства во Македонија.

Претседателот на комисијата, Влатко Ѓорчев, досега трипати ја одложи расправата за извештаите поради неприсуство на специјалната јавна обвинителка Катица Јанева, која во понеделникот ја напушти седницата со образложение дека пратениците ѝ прават мобинг.


10 години од основањето на Комисијата за заштита на правото на пристап до информации


Скопје, 28 септември, 2016 - 18:32 (META) 

Претседателот на Собранието, Трајко Вељаноски, денеска се обрати на одбележувањето на Меѓународниот ден на правото на пристап до информации од јавен карактер и 10-годишниот јубилеј од постоењето на Комисијата за заштита на правото на слободен пристап до информации од јавен карактер.

Сите ја знаеме онаа стара изрека дека оној кој ги има информациите тој владее со светот, рече денеска претседателот на Собранието Трајко Вељаноски на одбележувањето на Меѓународниот ден на правото на пристап до информации од јавен карактер и 10-годишниот јубилеј од постоењето на оваа Комисија во Македонија.

– Токму затоа правото на слободен пристап до информациите од јавен карактер денес претставува еден од носечките столбови на демократијата, а во исто време и значајна алатка со која јавноста може да врши општествена контрола врз власта. Комисијата за заштита на правото за слободен пристап до информациите од јавен карактер во изминативе десет години направи квалитетен чекор напред во остварувањето на еден од темелните демократски принципи, а тоа е слободниот пристап до информациите од јавен карактер. Тоа што особено сакам да го истакнам е фактот кој произлегува од вашите редовни извештаи, дека од минатата година се зголемува бројот на граѓани кои како поединец поднеле жалби за кршење на нивното право до слободен пристап на информации од јавен карактер – рече Вељаноски.

Според него, токму овие жалби покажуваат дека се зголемува свеста кај граѓанинот за индивидуалното право да биде информиран.

Вељаноски апелираше до сите институции, вклучувајќи го и Собранието, за доследно почитување на своите обврски кога станува збор за слободен пристап на информации од јавен карактер.


Продолжува седницата на собраниската комисија за извештаите на Јанева и на Зврлевски


Скопје, 23 септември, 2016 - 10:03 (META) 

Денеска во 13 часот треба да продолжи седницата на Комисијата за политички систем и односи меѓу заедниците, на која специјалната јавна обвинителка Катица Јанева треба да продолжи да одговора на прашањата на пратениците.

По два дена работа, синоќа на Јанева ѝ се слоши и таа ја напушти седницата.

По кратко време од Специјалното јавно обвинителство испратија соопштение во кое Јанева се извинува што ја напуштила седницата поради влошената здравствена состојба.

На седницата на собраниската комисијата, освен извештајот за работата на СЈО, на дневен ред е ставен и извештајот на Јавното обвинителство, каде одговорен е обвинителот Марко Зврлевски.


Најавена истрага за нападот со хлорин во Алепо


Дамаск, 8 септември, 2016 - 11:28 (META) 

Организацијата за забрана на хемиското оружје најави истрага околу употребата на гас хлорин во сирискиот град Алепо, наведувајќи дека информациите за користење на гасот се вознемирувачки, јавуваат светските агенции.

Се очекува и Советот за безбедност на Обединетите нации да ги разгледа извештаите на контролната група на ОН и Организацијата за забрана на хемиското оружје, кои ги обвинуваат сириските владини сили за напади со отровни гасови.

Сириската цивилна заштита, која е ангажирана во областите под контрола на опозициските сили, соопшти дека владини хеликоптери фрлиле буриња-бомби кои содржеле хлорин во Алепо, што предизвикало тешкотии со дишењето кај 80 лица, меѓу кои и деца.

Извори од сириската војска ги демантираат ваквите обвинувања и тврдат дека извештатите за употреба на отровен гас се „обид на бунтовниците да го тргнат вниманието од бројните порази“.