Комисијата за уставни измени ги усвои сите нацрт-амандмани за промена на Уставот


Скопје, 12 ноември, 2018 - 9:43 (META) 

Комисијата за уставни прашања викендов го усвои и четвртиот нацрт амандман со што заврши расправата по нацрт-амандманите на Уставот согласно Договорот од Преспа, помеѓу Македонија и Грција. Пленарната седница на која ќе се разгледуваат нацрт-амандните е закажана за 1 декември 2018 година.

Расправата по амандманите во Комисијата почна на 7 ноември и беше предвидено да трае 12 дена, односно по три дена за секој од предложените амандмани.

Со првиот амандман се предлага замена на зборот Република Македонија со Република Северна Македонија секаде во Уставот, освен во член 36 каде има историски аспект, со вториот во Преамбулата на највисокиот правен акт одлуките на АСНОМ се заменуваат со Прогласот од АСНОМ и се додава Охридскиот рамковен договор, со третиот се додава нов став со кој се декларира почитување на суверенитетот, територијалниот интегритет и политичка независниот на соседните држави, додека со четвртиот амандман се предлага покрај потврдување на македонскиот идентитет, да стои дека Републиката ги штити правата и интересите на своите државјани кои живеат или престојуваат во странство и ги унапредува нивните врски со татковината.

Утврдувањето на нацрт амандманите на Уставот од страна на Собранието е втора фаза од постапката за измена на Уставот. Нацрт амандманите се утврдуваат со просто мнозинство или 61 глас, по што тие одат на јавна расправа.

Конечната одлука за усвојување на амандманите се носи со двотретинско мнозинство или најмалку 80 гласа. За амандманот на Преамбулата на Уставот освен двотретинско, е потребно и Бадентерово мнозинство.


Владата иницираше законски измени за решавање на проблемот со бездомните кучиња


Скопје, 7 ноември, 2018 - 11:09 (META) 

Владата на 101. седница иницираше измени на Законот за здравствена заштита и благосостојба на животните.

„Министерството за земјоделство, шумарство и водостопанство е задолжено заедно со Агенцијата за храна и ветеринарство, со ЗЕЛС, како и во соработка со граѓанските организации за правата на животните, во најкус период да подготви законски измени за да се надмине проблемот со бездомните кучиња“, се вели во соопштението на Владата.

Оваа реакција на Владата следуваше по маршот за похуман однос кон бездомните животни, но и трагедијата која се случи во Гостивар, кога 17-годишна девојка се удави во Вардар бегајќи од куче-скитник.


Даночните измени ќе удрат по штедачите, земјоделците, берзанските играчи, банките


Скопје, 5 ноември, 2018 - 10:52 (META) 

 

Министерството за финансии го објави предлог-законот за данок на личен доход со кој се воведува прогресивен наместо рамен данок кај повеќе категории обврзници односно се воведуваат големи промени во стапката на оданочувањето на различни видови доход кај граѓаните. Иако оттаму укажуваат дека станува збор за воведување праведен данок кој ќе ги опфати само лицата со високи примања, одредбите во самиот предлог-закон покажуваат дека непосредно или посредно даночните измени ќе ги почувствуваат штедачите, самостојните земјоделци, граѓаните кои остваруваат примања од вложување на берзата, граѓаните кои се осигуруваат, банките, осигурителните компании…

Даночните измени предвидуваат поделба на доходот на две групи – доход од труд и доход од капитал.  За доходот од труд (плати, пензии, договори за дело, доход од авторски права, доход од самостојна дејност), се воведува прогресивност, односно дополнителна стапка од 18 отсто за даночната основа која надминува 1.080.000 денари годишно, односно 90.000 денари месечно.

Конкретно, за даночна основа (т.е. бруто-доход, минус социјални придонеси, минус даночно намалување) до 90.000 денари месечно, даночната стапка останува 10 отсто.

„Тоа значи дека за најголем дел од населението номиналната даночна стапка останува иста. Стапката од 18 отсто ќе важи за износот над тоа. На пример, на месечна даночна основа од 100.000 денари, за 90.000 денари ќе се плаќа данок по стапка од 10 отсто, додека за 10.000 денари ќе се плаќа данок по стапка од 18 отсто“, информираат од Министерството.

Со законот се предвидува и оданочување на доходот од капитал (закуп и подзакуп, дивиденди, капитални добивки, добивки од игри на среќа) и другиот доход со единствена стапка од 15 отсто.

„Поради нередовноста на овој доход, во пракса е поедноставно тој да се оданочува со единствена стапка отколку со прогресивни стапки. Ваква е практиката и во земјите од регионот (Хрватска, Словенија, Албанија, Србија). Поради тоа што овој доход во најголема мера завршува кај најдоходовните сегменти од популацијата, со цел да се обезбеди поправедна дистрибуција на доходот, избрана е стапка која е повисока од основната стапка на данокот на доход од труд“, велат од Министерството.

Со новата регулатива се воведува и оданочување на капиталните добивки од хартии од вредност и на каматите од орочени депозити со стапка од 15 отсто, со одложена примена од почетокот на 2020 година. На доход од камати до 250 евра годишно, нема да се плаќа данок. Сепак, воведувањето ваков данок сериозно може да го дестимулира штедењето во банките, што на своевиден начин е голем удар за банкарскиот сектор чиј главен извор на финансии и давање кредити се токму штедните влогови на граѓаните.

Со новиот закон се предвидува и оданочување на доход од осигурување се подразбира односно премијата за осигурување на живот уплатена од правно лице или обврзник кој остварува доход од самостојна дејност, премијата за неживотно осигурување уплатена од правно лице или обврзник кој остварува доход од самостојна дејност, придонеси во доброволен пензиски фонд уплатени од правно лице или обврзник кој остварува доход од самостојна дејност, исплатената осигурана сума, освен надоместокот на штета, исплатениот пензиски надоместок од доброволно капитално финансирано осигурување и освен пензискиот надоместок исплатен преку програмирани повлекувања.

Од Министерството за финансии велат дека промените се воведуваат со цел да се адресира постоечката регресивност кај данокот на доход, како и да се обезбедат дополнителни буџетски средства за обезбедување квалитетни јавни услуги.

„Најдоходовните 1 отсто од луѓето во Македонија во 2017 година заработувале во просек 4.486 евра месечно, што е 14,4 пати повеќе од просечниот доход на граѓаните во државава. Ова ја става Македонија на прво место во Европа по социјалната нееднаквост. Со реформата очекуваме да обезбедиме дополнителни 25 милиони евра. Средствата ќе бидат искористени за борба против сиромаштијата. Оној кој има доход повисок од 90.000 денари, ќе плати нешто повеќе, за да му дадеме можност на својот сограѓанин да оди напред“, изјави министерот за финансии Драган Тевдовски при презентацијата на даночните измени.


ЗНМ: Измени на Кривичниот законик за поголема заштита на новинарите


Скопје, 19 октомври, 2018 - 14:40 (META) 

Претставници на Здружението на новинарите на Македонија учествувале на работната група за измени и дополнувања на Кривичниот законик, каде биле разгледани препораките на ЗНМ за измена на Кривичниот законик во делот на заштита на новинарите и медиумските работници при вршење на нивната професионална должност.

Директорот на ЗНМ, Драган Секуловски побарал воведување на нови кривични дела во Кривичниот законик како што се „Спречување на новинарите во извршувањето на професионалните задачи“ и „Напад врз новинарите во извршувањето на професионалните обврски“ односно дополнување на постојните членови во законот кои се однесуваат на закани и физички напад вклучувајќи и убиство.

„Со овие предлог измени, секое лице кое ќе се закани или ќе нападне новинар, медиумски работник или нивно блиско лице поради извршување на професионални новинарски задачи ќе добие поголема казна од страна на судот. Освен ова, за дел од овие повреди на права во иднина обвинителството ќе презема мерки по службена должност наместо праксата на приватни тужби од страна на новинарите како што е тоа во моментов. Целта на овие измени на Кривичниот законик е да се воспостави поефикасен систем на заштита на новинарите, а во исто време да се одвратат потенцијалните напаѓачи во иднина“, информираат од ЗНМ.

Со предложените измени новинарските екипи ќе добијат зголемена заштита во извршувањето на професионалните обврски, нешто слично како и службените лица. Таквата заштита ќе биде во согласност со меѓународните и европските стандарди и практика на Европскиот суд за човекови права, а во нашиот локален контекст ваквата заштита е повеќе од потребна.

Работната група за измени на Кривичниот законик е во рамки на Министерството за правда и е предводена од академик Владо Камбовски. Во идниот период се очекува да има дополнителни средби на кои ќе усогласат измените и дополнувањата на овој закон.


Ќе почекаме за пониски тарифи од извршителите и нотарите


Скопје, 19 октомври, 2018 - 10:59 (META) 

Предлог-измените на Законот за извршување и Законот за нотаријатот со кои меѓу другото се предвидува и намалување на тарифите за услугите на извршителите и нотарите останаа заглавени во Собранието, кое во изминатиов период се посвети на спроведување на референдумот и на процедурата за уставни промени. Се додека не бидат донесени измените на законот во Собранието не може да се направат и соодветните измени во тарифите кои се носат како подзаконски акт.

Тоа го потврдуваат и од Комората на извршители од каде што велат дека допрва претстои усогласување со претставниците на власта.

„Процесот на промена на тарифите е во фаза на подготовка. Се очекуваат средби со претставници на Министерството за правда на која ќе бидат прецизирани новите одредби“, велат од Комората.

На предлог на министерството за правда, Владата на 90 седница одржана на 25 септември, годинава ги прифати предлог-законите за изменување и дополнување на законот за извршување.

„Главната цел на овие измени е намалување на трошоците на најсиромашните граѓани кои не можат да си ги платат сметките за комунални трошоци и кои земаат мали потрошувачки кредити. Во постапката пред извршителите, според измените на законот, дури 16 ставки за кои досега граѓаните плаќаа одредена сума, со новата тарифа тие ќе бидат целосно бесплатни. Со предлог-законот за изменување и дополнување на законот за извршување, воедно се имплементираат стратешките приоритети на државата определени во Стратегијата за реформа на правосудниот сектор, особено во правец на намалување на трошоците за граѓаните во сите постапки, вклучувајќи ја и прекршочната“, соопшти тогаш Владата.

Се предвидува дека за веќе почнатите постапки доколку не се наплатени одредени трошоци ќе важат новите тарифи, а за она што веќе е платено нема да може да се побарува ретроактивно.


Собраниската седница за уставни измени почна


Скопје, 15 октомври, 2018 - 11:59 (META) 

Почна собраниската пленарна седница на која на дневен ред e Предлогот на Владата за уставни измени кои произлегуваат од Договор со Грција. Владиниот предлог за уставни измени ќе го образложи премиерот Зоран Заев.

На седницата се присутни пратениците на ВМРО-ДПМНЕ помеѓу кои е и поранешниот премиер Никола Груевски, кој утрово побара одложување на денешното судско рочиште на СЈО, „Т.Н.Т“ за да биде присутен на седницата. Седницата започна со задоцнување поради координација на пратеничката група на ВМРО-ДПМНЕ.

Пред почетокот на седницата, пратеникот на ВМРО-ДПМНЕ Илија Димовски побара предлогот за уставни измени да се симне од дневен ред, бидејќи како што рече, Собранието нема изборен легитимитет да одлучува за овие измени.

„Ниту еден пратеник од ова Собрание не даде ветување за промена на Уставот“, рече Димовски.

Предлогот на Димовски беше отфрлен со 39 гласа „ЗА“ и 67 „против“.

Пред Собранието се одржува протест на десетина граѓани во организација на Здружението на граѓани „Преродба“ од каде што најавија протести и блокади пред Собранието секој ден со почеток во 10.00 часот.


Трнлив и долг е патот до промени на Уставот (инфографик)


Скопје, 8 октомври, 2018 - 16:41 (META) 

Промената на Уставот со уставни амандмани не е ни малку лесна и едноставна процедура. На предлагачот на измените, во овој случај на Владата, во два наврати и е потребно двотретинско мнозинство. Еднаш за да го отвори и еднаш за да го затвори Уставот, процедура која трае неколку месеци.

Според Уставот, одлука за пристапување кон измена на Уставот донесува Собранието со двотретинско мнозинство гласови од вкупниот број пратеници. Нацртот за измената на Уставот го утврдува Собранието со мнозинство гласови од вкупниот број пратеници и го става на јавна дискусија. Одлука за измена на Уставот донесува Собранието со двотретинско мнозинство гласови од вкупниот број пратеници. Измената на Уставот ја прогласува Собранието.

Деловникот на Собранието е поконкретен и детално во 10 членови ја објаснува процедурата и чекорите кои треба да се поминат за да се измени Уставот со амандмани:

  • Предлог за пристапување кон измена на Уставот на Република Македонија можат да поднесат претседателот на Републиката, Владата, најмалку 30 пратеници или 150.000 граѓани.
  • Предлогот за пристапување кон измена на Уставот, претседателот на Собранието го доставува до пратениците и до претседателот на Републиката и до Владата, кога тие не се подносители на предлогот.
  • По предлогот за пристапување кон измена на Уставот на седницата на Собранието се води претрес во целина кој може да трае најмногу десет работни дена.
  • Претресот по предлогот за пристапување кон измена на Уставот во Комисијата за уставни прашања може да трае најмногу десет работни дена.
  • Одлуката за пристапување кон измена на Уставот, Собранието ја донесува со двотретинско мнозинство гласови од вкупниот број пратеници.
  • По донесувањето на одлука за пристапување кон измена на Уставот, Собранието со заклучок утврдува рок во кој подносителот на предлогот за пристапување кон измена на Уставот изготвува текст на нацртот на амандманите на Уставот.
  • Текстот на нацртот на амандманите на Уставот со образложение, предлагачот го доставува до претседателот на Собранието кој го доставува до пратениците и до претседателот на Републиката и до Владата, кога не се предлагачи, најдоцна 30 дена пред одржувањето на седницата на Собранието.
  • Претресот во Собранието се води по текстот на нацртот на секој амандман одделно и може да се дадат мислења и предлози. Претресот може да трае најмногу три работни дена по текстот на нацртот на секој амандман одделно.
  • Претресот во Комисијата за уставни прашања и во Законодавноправната комисија може да трае најмногу три работни дена по текстот на нацртот на секој амандман одделно.
  • Собранието со мнозинство гласови од вкупниот број пратеници, го утврдува нацртот на секој амандман на Уставот одделно.
  • Нацртот на амандманите Собранието го става на јавна дискусија.
  • Собранието определува рок за спроведување на јавната дискусија, начинот на објавувањето на нацртот на амандманите и рок во кој предлагачот како носител на јавната дискусија до Собранието поднесува извештај за резултатите од јавната дискусија и текст на предлогот на амандманите на Уставот.
  • На текстот на предлогот на амандманите на Уставот, предлагачот, секој пратеник, работно тело и Владата кога не е предлагач, можат да поднесат амандмани најдоцна осум дена пред седницата на Собранието на која ќе се усвојуваат амандманите на Уставот.
  • Комисијата за уставни прашања и Законодавно-правната комисија по текстот на предлогот на секој амандман на Уставот водат општ претрес и претрес по текстот, кој може да трае најмногу три работни дена.
  • По текстот на предлогот на секој амандман на Уставот се води општ претрес и претрес по текстот кој може да трае најмногу три работни дена.
  • Собранието се изјаснува одделно за секој амандман на текстот на предлогот на амандманите на Уставот, со мнозинство гласови од вкупниот број пратеници.
  • Амандманите за измена на Уставот се донесуваат со двотретинско мнозинство гласови од вкупниот број пратеници.

Советот на Европа алармира за рестриктивните измени за медиумите во Изборниот законик


Стразбур, 10 август, 2018 - 13:48 (META) 

Советот на Европа вчера на својата платформа за заштита на новинарството и безбедноста на новинарите објави јавно предупредување за измените и дополнувањата на Изборниот законик, кои можат да имаат негативно влијание врз слободата на медиумите во Македонија. Во предупредувањето стои дека македонската држава е изворот на ваквото загрозување на слободата на медиумите, информираат од Здружението на новинари на Македонија,

Предупредување следи по барање на ЗНМ до платформата на Советот на Европа, која во нејзината реакција се повикува на заедничкото соопштение на ЗНМ, Независниот синдикат на новинари и Советот за етика.

„Измените на Изборниот законик беа усвоени на 25 јули 2018 година од страна на македонскиот парламент во брза постапка, како резултат на политичкиот договор меѓу водачите на четирите главни политички партии. Еден од амандманите на Изборниот законик ја овластува Државната изборна комисија да ги регистрира и следи известувањето на онлајн медиумите за време на изборите. Покрај тоа, членот 181a од законот предвидува казни до 4.000 евра за традиционалните и онлајн медиумите за „неизбалансирано или непристрасно известување”, стои во предупредувањето на платформата на Советот на Европа.

Предупредувањето е упатено до Собранието на Македонија, кој во наредниот период има обврска да ги објасни овие измени кои што ја ограничуваат слободата на медиумите.


Изгласан новиот состав на ДИК и законите договорени на лидерската средба


Скопје, 25 јули, 2018 - 20:19 (META) 

Собранието попладнево без образложение и расправа ги избра новиот состав на Државната изборна комисија – ДИК и измените на законите кои беа договрени на лидерската средба во понеделникот.

Членовите на ДИК беа избрани со 100 гласа „за“ без ниту еден пријавен за збор.

Претседател на Комисијата ќе биде Оливер Дерковски од ВМРО-ДПМНЕ, а потпретседател Дитмире Шеху од ДУИ. Во комисијата членуваат Елизабета Постоловска од ВМРО-ДПМНЕ, Борис Кондарко, Јанакие Витановски и Радица Ристевска од СДСМ; Енвер Салиу од Беса.

Со 99 гласа „за“ и без пријавени пратеници за дискусија беа изгласани измените на Изборниот законик, на Законот за Влада и Законот за финансирање на политички партии.

Во Изборниот законик измените се однесуваат на делот за финансирањето на политичките партии, во Законот за финансирање на партиите има намалување на сумите кои можат да ги донираат физички и правни лица на партиите. Во Законот за Влада пратениците донесоа одлука измените да бидат во делот на предизборниот период каде ќе се избира техничка влада според пржинскиот договор, меѓу пратениците од опозицијата и власта.


Во Собрание неизвесно спроведувањето на договореното од лидерската средба


Скопје, 24 јули, 2018 - 9:38 (META) 

Иако најавена, синоќа во Собранието на Република Македонија не се одржа седницата на која треба да се спроведе договореното на лидерската средба за изборот на членови на Државната изборна комисија, и за измените на законите за финансирање политички партии и за Влада со кои се предвидува техничка влада пред изборите според пржинскиот принцип.

Собраниската Комисија за прашања на изборите и именувањата со која претседава Илија Димовски од ВМРО-ДПМНЕ, вчера по лидерската средба ја почна постапката за избор на членови на ДИК со доставување на списокот кандидати кои се пријавија на огласот, до претседателот на Собранието Џафери, кој пак побара од партиите да се изјаснат кои кандидати ќе ги поддржат.

До полноќ иако најавуваа, формално список со свои кандидати до кабинетот на Џафери не доставила опозициската ВМРО-ДПМНЕ со што не можеше да продолжи постапката за избор на членови на ДИК која треба да го спроведе референдумот за Договорот со Грција.

Официјално, никој од партиите не соопштува зошто не се одржа седница за да се изгласа она што беше договорено на лидерската средба.

По вчерашната лидерска средба, премиерот Зоран Заев изјави дека иако нема договор за референдумот, ќе се почитува договореното за законите за влада односно и за финансирање на партиите, како и за изборот на ДИК.