Субвенции за тутунот од реколтата 2017 ќе се исплаќаат од следната недела


Скопје, 8 мај, 2018 - 14:13 (META) 

Денеска во Службен весник се објавија измените и дополнувањата на Законот за земјоделство и рурален развој, со што, се создадоа законски услови за навремена исплата на субвенциите, меѓу кои е и исплатата на субвенциите за тутунот од реколтата 2017, информираат од Министерство за земјоделство, шумарство и водостопанство (МЗШВ).

„Дел од измените на овој закон предвидуваат одложување на важноста на условите за подмирени обврски кон Управата за јавни приходи, што изминатите години беше пречка за исплата на субвенциите. Од денеска до крајот на оваа недела, Платежната агенција ќе ги спроведе законските контроли во откупните претпријатија, по што ќе следува обработка на решенијата за исплата на субвенциите за тутунот“, се вели во соопштението.

Според податоците, зголемени субвенции за тутунот од реколтата 2017 ќе добијат над 23.400 тутунари.

„Со новиот начин на зголемено субвенционирање во три нивоа кој започнува со реколтата 2017, субвенцијата за прва класа тутун е 80 денари, за втора класа 70 денари и 60 денари е третото ниво за трета и четврта класа како и за дополнителни класи. Целта на новиот модел на субвенционирање е да се поттикнат тутунарите да произведуваат поквалитетен тутун за да добијат повисока субвенција“, додаваат од МЗШВ.

Тутуно-производството е значајна гранка за македонското земјоделство, која што носи девизен прилив од околу 100 милиони евра годишно.


Почнува подготовката на измените на законот за квалитетот на воздухот


Скопје, 27 февруари, 2018 - 16:37 (META) 

Министерството за животна средина и просторно планирање од денеска почнува со подготовка на измени на Законот за квалитетот на амбиенталниот воздух.

Целта на Законот, кој како што е наведено на Единствениот национален електронски регистар на прописи (ЕНЕР), треба да биде готов до крајот на април оваа година, е да се воспостави едноставна процедура на подготовка на плановите за квалитет на воздухот и на краткорочните акциски планови, како и ефикасно спроведување на мерките за подобрување на квалитетот на воздухот.

„При анализа на состојбата со управување со квалитетот на воздухот во Република Македонија се увиде дека постоечкиот начин на подготовка на плановите за квалитет на воздух на ниво на зона/агломерација создава тешкотии, бидејќи на ниво на зона се вклучени поголем број на општини со различни проблеми и извори на загадување на воздухот. Начинот на усвојување на планските документи на ниво на Единиците на локалната самоуправа (ЕЛС) и проверка и одобрување на истите од страна на централната власт не се јасно прецизирани“, стои во информацијата за подготовка на предлог на измените.

Во информацијата се наведува и дека пропишаните краткорочни мерки на локално ниво, како и оние предложени од интерсекторската работна група и усвоени од Владата се спроведуваат со потешкотии.

Анализата утврдила дека контролата на имлементацијата на краткорочните мерки од инспекциските служби се спроведува делумно, а констатиран е и недоволен број на државни инспектори и овластени инспектори за животна средина кои вршат контрола на спроведувањето на мерките.

Инаку, состојбата со квалитетот на воздухот во Скопје и уште во неколку други градови во земјава е алармантна, поради енормното загадување, што беше причина за протести организирани од повеќе граѓански здруженија за изнаоѓање на решенија за овој проблем.


Економските промотори нема да бидат под Агенцијата за странски инвестиции


Скопје, 16 февруари, 2018 - 11:12 (META) 

Економските промотори повеќе нема да бидат под надлежност на Агенцијата за странски инвестиции и промоција на извозот на Република Македонија, предвидуваат измените на Законот за Агенцијата, чија подготовка, според „Единствениот национален електронски регистар на прописи – ЕНЕР“, е почната вчера.

Измените на Законот треба да бидат готови до 15 март.

„Со Предлог на законот за изменување на Законот за основање на Агенција за странски инвестиции и промоција на извозот на Република Македонија се брише одредбата за економските промотори, со оглед на тоа дека истите нема да бидат повеќе во надлежност на Агенцијата. Воедно се брише одредбата со која еден од условите предвидени за директорот на Агенцијата се психолошки тест и тест за интегритет“, стои во образложението.

Со измените, се додава, треба да се допрецизираат одредени одредби и да се усогласат со одредбите на Законот за административни службеници.


Отказ за судијата кој не носи тога, предвидуваат новите законски решенија


Скопје, 31 јануари, 2018 - 10:38 (META) 

Судија освен за партиска и политичка активност ќе може да биде разрешен од функцијата и за неноносење судска тога, како „потешка дисциплинска повреда“. Ова го предвидуваат новите измени на Законот за судовите, објавени на Единствениот национален електронски регистар на прописи (ЕНЕР), како дел од реформите во правосудството од планот „3-6-9“ на Владата.

Судиите и досега, со актуелното законско решение, ризикуваа да добијат дисциплинска мерка за неносење судска тога, но, санкцијата за тоа беше писмена опомена, јавен укор и намалување на платата за 15 до 30 отсто во период од еден до шест месеци.

„Примање подароци и други користи во врска со судиската работа“ и со новите измени останува да се санкционира со дисциплинска мерка – опомена, укор, намалување на платата и „упатување на дополнителни часови за стручна обука во Академијата за судии и јавни обвинители“, која е нова одредба.

Со измените се менуваат и условите за судиите-поротници. Поротник ќе може да се стане и со средно образование, наместо со високо, како што е сега. Останува обврската за обука на поротниците во Академијата за судии и јавни обвинители, но, со измените нема да мора да полагаат завршен испит, туку ќе им се издава сертификат за завршена обука.

„Досегашното решение со кое се бараше високо образование за судија поротник како и полагањето на дополнителни испити се покажа како неефикасно и доведе до недостаток од судии-поротници во сите судови во државата“, стои во образложението на предлог-измените.

Измени има и во возрасната граница – поротник може да биде лице кое не е постаро од 60 години, наместо 64 како што е во актуелниот закон.

Со новите предлог-решенија, Министерството за правда ќе врши надзор над спроведувањето на Судскиот деловник, конкретно на функционирањето на Автоматизираниот компјутерски систем за управување со судските предмети (АКМИС).

Надзорот ќе го врши постојана комисија, што ќе работи по годишен план. Во комисијата ќе бидат двајца „дипломирани правници со најмалку 10 години стаж на правни работи по полагање на правосуден испит и двајца информатичари обучени за работа на АКМИС.

Предвидена е и можност министерот за правда, кога ќе оцени дека е потребно, да формира комисија од надворешни експерти за проверка на функционалноста на АКМИС.

Изманите предвидуваат и Министерството за правда да биде корисник на статистичките податоци од базите на податоци од информатичките системи во правосудството, „согласно неговата надлежност за подготвување на закони од областа на правосудството, прибирање на статистички податоци за работата на правосудните институции, надзор над ажурното вршење на работите во судот и спроведувањето на судскиот деловник“.

Инаку, законот е уште во фаза на подготовка, кој заврши на 30 јануари 2018 година и допрва треба да биде утврден од Владата и усвоен од Собранието.


Постои шанса САД да се вратат на договорот за климатските промени, вели Трамп


Вашингтон, 28 јануари, 2018 - 10:39 (META) 

Претседателот на САД, Доналд Трамп би бил подготвен да го потпише Парискиот договор за климатските промени, но само доколку во документот бидат внесени значајни измени, јавуваат светските агенции.

Во интервју, кое во целост ќе се емитува на британската телевизија „Ај-ти-ви“, Трамп рекол дека „ако биде постигнат добар договор, секогаш постои шанса САД се вратат“.

Трамп ги повторил претходно изнесените тврдења дека догорот е „ужасен“ и „неправеден“ за САД, се наведува во деловите од интервјуто.

Американскиот претседател на 1 јуни 2017 година изјави дека САД се повлекуваат од договорот и дека прекинуваат со примената на одредбите од документот.

– Ако некој ни каже да се вратиме на договорот, тој би морал да биде целосно поинаков, затоа што договорот што сега го имаме е ужасен – вели Трамп, додавајќи дека би сакал да биде во ситуација САД повторно да пристапат кон договорот.


Министерство за правда ги одложи измените на Законот за референдум


Скопје, 23 јануари, 2018 - 15:30 (META) 

Министерството за правда вчера го објави предлог-законот за референдум на Единствен национален електронски регистар на прописи на Република Македонија (ЕНЕР), а денеска го повлече, откако медиумите почнаа да објавуваат дека не се предвидува јавна расправа и беше поставен многу краток рок – до крајот на месецот.

Попладнево Министерството за правда соопшти дека со решението што беше објавено „не се менувале суштината на Законот за референдум, туку се вршело усогласување на термини со други закони“, како Изборниот законик и се напуштале одредени застарени решенија. Новиот предлог-закон исто така имал за цел да се изврши усогласување со Законот за судовите.

„Во прилог на наведеното нагласуваме дека со предложените измени во Законот за референдум и други облици на непосредно изјаснување на граѓаните се врши уредување на прашања кои се од значење за практичното спроведување на законот и техничко доуредување на текстот на истиот“, се вели во соопштението од Министерство за правда.

Оттаму не прецизираа кога ќе биде објавена поправената верзија на предлог-законот за референдум.


Од Стопанска комора бараат законски измени за вработувања во комуналните претпријатија


Скопје, 22 јануари, 2018 - 14:46 (META) 

Здружението на комуналните дејности при Стопанската комора бара измени на законските прописи кои го регулираат вработувањето работници во комуналните претпријатија на локално и на државно ниво.

– Постојните закони го отежнуваат вработувањето во еден дел, пред се при ангажирање сезонски работници, но и во други услови кога е потребно да се направат одредени поместувања поради работните активности на одредени работни позиции во компаниите – информираше претседателот на Здружението, Звонко Јованоски.

Од таму исто така ќе бараат интервенција во Законот за јавни набавки и активно вклучување во изработка на новиот закон за управување со отпад.

– Здружението ќе се вклучи во активностите околу донесувањето на новиот закон за управување со отпад кој е во почетна фаза и согласно укажувањата на Министерството за животна средина треба да се донесе до октомври годинава. Здружението има забелешки и на постојниот Закон за јавни набавки, согласно кој голем дел од тековните работи на комуналните претпријатија се отежнуваат. Проблемот е во понудената најниска цена која не соодветствува со квалитетот, како и во лимитот од 500 евра согласно кој може да се вршат интервентни набавки, што е многу мал износ – додаде Јованоски.


Полна собраниска агенда: Избор на нов јавен обвинител, уставни судии, закон за јазиците


Скопје, 25 декември, 2017 - 10:03 (META) 

Собранието денеска на пленарна седница закажана во 11 часот треба да гласа за именувањето на нов државен јавен обвинител, функција за која Владата го предложи Љубомир Јовески, член на Советот на јавни обвинители.

Расправата за изменувањето на новиот државен јавен обвинител заврши на 15 декември. За избор на Јовески е потребно просто мнозинство, односно 61 глас.

Покрај оваа точка, на дневен ред на оваа седница се и измените на Законот за Судскиот совет, измените на Законот за заштита на сведоци што ги бараше СЈО и законот за укинување на Советот за утврдување на факти и покренување на постапка за утврдување одговорност за судија, предложени по скратена постапка.

По оваа, Собранието ќе ја почне 27. седница, на која пратениците, според најавениот дневен ред, треба да расправаат за именување на двајца судии во Уставниот суд, за разрешување и за именување на член на Регулаторната комисија за енергетика, а последна, односно 35. точка на оваа седница е Законот за употреба на јазиците во второ читање.

За нови членови на Уставниот суд се предложени, универзитетскиот професор Осман Кадриу и Дарко Костадиновски, советник за надворешна политика во кабинетот на претседателот, Ѓорге Иванов.

Кадриу и Костадиновски се предложени од Иванов, а треба да седна на местата на Наташа Габер – Дамјановоска и Гзиме Старова, чиј деветгодишен мандат како членови на Уставниот суд истече на почетокот на октомври, оваа година.


Царовска: Направени се законски измени за поголеми права на лицата со попреченост


Скопје, 3 декември, 2017 - 17:17 (META) 

На одбележувањето на Меѓународниот ден на лицата со попреченост, министерката за труд и социјална политика, Мила Царовска, рече дека се направени законски измени за поголеми права на лицата со попреченост, како што е персоналната асистенција.

– Долги години сме сведоци дека нашите сограѓани кои се соочуваат со попреченост беа дискриминирани, немаа пристап до соодветни здравствени и образовни услуги и немаа пристап до вработување, а сето тоа поради негрижата на државата. Но, тоа се менува бидејќи оваа влада е иклузивна и секојдневно дискутира за проблемите на овие лица – порача Царовска.

Таа додаде дека за овие лица се подготвува програма која треба да се реализира во 2018 година. Годинава, Меѓународниот ден на лицата со попреченост се одбележува под мотото „Транасформација кон одржливо и прилагодливо општество за сите“.


Сигналот за прислушување ќе оди во новата агенција (ОТА), а не во УБК


Скопје, 27 ноември, 2017 - 11:34 (META) 

Контроверзниот член 175 од Законот за електронски комуникации станува член 60 од новиот Закон за следење на комуникациите, со новите измени што треба да го регулираат прислушувањето и да го заштитат од злоупотреби, во согласност со препораките од извештатите на експертската група на Рајнхард Прибе.

Членот 175, кој беше воведен во 2014 година, ги обврза телекомуникациските оператори да ги обезбедат сите неопходни технички услови за да ѝ овозможат на УБК да ги следи комуникациите во нивните мрежи. Уставноста и законитоста на членот беа оспорени и пред Уставниот суд, кој летово реши да поведе постапка за негово укинување, но не донесе конечна одлука. Во меѓувреме Владата побара од Уставниот суд да ја запре постапката, со образложение дека  веќе работи на реформи во безбедносниот систем.

Со измените, овој член сега се брише од Законот за електронски комуникации, но одредбите од него нема да исчезнат, туку прецизирани се пресликани во сосема новиот Закон за следење на комуникации.

Членот 60 од новиот Закон за следење на комуникации, во најголем дел е истиот член 175, со безмалку истите одредби, а главната новина и прецизирањето во него е воведувањето на Оперативно-техничката агенција (ОТА).

Ова значи дека сега ОТА ќе биде органот, а не УБК, кон кој операторите ќе имаат обврска:

  • Да ги обезбедат сите неопходни технички услови за да овозможат следење на комуникациите во нивните мрежи;
  • На сопствен трошок да обезбедат и одржуваат опрема, да воспостават електронски комуникациски водови за пренос до OTA, за да се овозможи спроведување на мерките за следење на комуникациите во нивната мрежа;
  • На сопствен трошок да обезбедат и да одржуваат опрема и соодветни медијациски уреди, кои овозможуваат рефлектирање на сигналот во ОТА;
  • Во случај кога операторите имаат воведено компресија или крипто-заштита на комуникацискиот сообраќај, должни се да ја отстранат, пред да ја достават содржината на следената комуникациска услуга до ОТА;
  • Операторите имаат обврска да ѝ овозможат на ОТА, спроведување на мерките за следење на комуникациите во реално време. Информацијата за следената комуникација треба да биде на располагање веднаш по завршувањето на комуникацијата, а следењето на комуникацијата треба да биде непрекинато за цело време на нејзиното траење;
  • Операторите имаат обврска да обезбедат точно и еднозначно поврзување на информацијата за следената комуникација со содржината на комуникацијата која се следи;
  • Операторите треба да обезбедат лицето чии комуникации се следат или друго неовластено лице да не забележи каква било промена во квалитетот на комуникациската услуга која може да биде предизвикана со спроведување на мерките за следење на комуникациите;
  • Функционирањето на следената комуникациска услуга треба да остане непроменето за лицето чии комуникации се следат;
  • Операторите треба да обезбедат иста или поголема сигурност и квалитет на следената комуникациска услуга од сигурноста и квалитетот на комуникациските услуги кои му се овозможени на лицето чии комуникации се следат.

Новиот закон за следење на комуникациите и измените на Законот за електронски комуникации,  како што е предвидено, треба да стапат на сила најдоцна до ноември 2018 година.