!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

92-годишен прилепчанец измамен за 17.000 евра


Прилеп, 6 јануари, 2018 - 12:00 (META) 

Ѓ.А. (92) во Полициската станица во Прилеп, пријавил дека вчера околу 13 часот на плоштад „Александар Македонски“ бил измамен од две непознати лица.

„Лицата го пресретнале и почнале раговор со него, по што му дале еден машки часовник, за кој му рекле дека вреди многу пари и дека некој им го продава. Ѓ.А. им рекол дека тој има евра и отишол во банка и подигнал 17.000 евра, кои им ги дал на двете лица. Тие му кажале да ги почека за да и ги покажат парите на некоја жена, која ги чека во возило и дека ќе се вратат за пет минути, по што заминале во непознат правец. По извесно време, откако лицата не се вратиле, Ѓ.А. сфатил дека е измамен, по што го пријавил настанот“, се вели во билтенот на МВР.

Се преземаат мерки за пронаоѓање на лицата и за целосно расчистување на случајот.


Косовец платил 8.000 евра за лажно помилување од претседателот Иванов


Скопје, 31 јули, 2017 - 14:59 (META) 

Двајца скопјани добија кривични пријави за измама оти излажале Косовец кој бил во македонски затвор дека може да му издејствуваат помилување од претседателот на Република Македонија и за тоа му зеле вкупно 8.000 евра.

СВР Скопје поднел кривична пријава против А.Т. (37) и З.П. (46) и ги товари дека од мај 2014 г. до март 2015 година го довеле Косовец во заблуда дека може да обезбедат помилување за остатокот од неговата затворска казна.

Откако му зеле вкупно 8.000 евра, 37-годишниот измамник му врачил фалсификувано решение за помилување и други документи, наводно потпишани од претседателот Ѓорге Иванов.


ЕУИСС: Кинеските инвестиции во Западен Балкан ја поттикнуваат корупцијата


Брисел, 24 јули, 2017 - 16:42 (META) 

Кинеските инвестиции во инфраструктурата во земјите од Западен Балкан ја поттикнуваат корупцијата во регионот, пишува во анализата на Институтот за безбедносни истражувања на ЕУ (EUISS).

Во извештајот пишува дека инвестиции во патишта и во железници во вредност од 5,5 милијарди евра има во Македонија, Србија, Црна Гора и во БИХ, а Кинезите работата ја добивале директно преку владини претставници, а не преку тендери.

Во оваа анализа е спомнат и случајот со изградбата на автопатот Кичево – Охрид, со што буџетот на Македонина е оштетен за 155 милиони евра, а се спомнува дека во случајот се вмешани политичари и еден поранешен премиер за кој Специјалното јавно обвинителство отвори случај.

Во анализата се наведува дека кинеската компанија „Синохидро“, која ги гради македонските автопатишта, во 2016 година беше на црниот список на Светска банка за корупција и за измама.


Измамник од Неготино во Охрид посредувал и нудел вработување во Германија


Охрид, 11 април, 2017 - 13:20 (META) 

СВР од Охрид поднесе кривична пријава против Д.К. (27) од Неготино, за кого се сомнева дека извршил измама, соопшти портпаролот на секторот, Стефан Димоски.

Пријавениот, во периодот од февруари до мај минатата година, со намера за себе да прибави противправна имотна корист, ги довел во заблуда Ј.С. и З.Р., двајцата од Охрид.

Најнапред објавил оглас на „Реклама 5“, по што лажно прикажувал факти дека посредува и нуди вработување во Германија.

На телефонските повици, пријавениот лажно се претставувал, кажувајќи дека се вика Дарко од Скопје и дека успешно посредува за добивање работа во Германија.

По неколку телефонски разговори, оштетениот Ј.С. на трансакциска сметка од пријавениот, уплатил сума од 37.000 денари за вработување во Германија.

По истек на договорениот рок, Ј.С. не добил никакво известување за тоа кога ќе биде работно ангажиран, велејќи му дека биле потребни уште пари за да се завршела веќе почнатата постапка.

На истиот начин, пријавениот го сторил кривичното дело доведувајќи го во заблуда и З.Р. од Охрид.

Во мај минатата година, сега пријавениот, на З.Р. му ветил работа во Германија, а за таа услуга побарал и добил 53.400 денари.


Лажел дека вработува во странство и добро заработил


Охрид, 27 март, 2017 - 15:00 (META) 

Маж од Неготино доби кривична пријава за измама, откако двајца охриѓани го пријавиле дека ги измамил оти ќе им најде работа во странство.

Како што соопшти СВР Охрид, Д.К. (30) од Неготино во февруари и март минатата година на интернет-огласник објавил оглас дека нуди вработување во странство. Се претставувал дека е друго лице од Скопје, по што двајца охриѓани контактирале со него и му уплатиле по 90.400 денари на неговата трансакциска сметка.

Откако поминал рокот во кој охриѓаните требало да бидат известени кога ќе заминат во странство на работа, а измамникот не контактирал со нив, тие го пријавиле во охридската полиција.


Саркози се соочува со судење за нелегално финансирање на кампањата во 2012 година


Париз, 7 февруари, 2017 - 11:35 (META) 

Поранешниот претседател на Франција, Николас Сакрози, треба да седне на обвинитела клупа во судски процес против него за нелегално финансирање на неговата изборна кампања во 2012 година, пренесува „Би-би-си“, повикувајќи се на судски извори.

Саркози се соочува со обвинение дека неговата партија ги фалсификувала сметките за да сокрие 22,5 милиони евра од трошоците за кампањата за претседателските избори во 2012 година.

Поранешниот франциски претседател неколкупати претходно изјави дека, наводно, не знаел за прекумерното трошење.

Тој на претседателските избори во 2012 година загуби од Франсоа Оланд, а неуспешен беше и неговиот обид за влез во изборната трка на претседателските избори што оваа година треба да се одржат во Франција.

Случајот за кој на Саркози му се заканува судење е познат и како афера „Бигмалион“, во чиј центар се тврдењата дека партијата на Саркози, тогаш позната како УМП, соработувала со пријателска компанија за да ги сокрие вистинските трошоци за неговата изборна кампања.

Франција има ограничувања за тоа колку пари смеат да се потрошат за потребите на изборна кампања, поради што фирмата „Бигмалион“ фактурирала средства на име на партијата на Саркози, а не за кампањата, со што ѝ овозможила на УМП да ги зголеми трошоците и да потроши повеќе пари во изборната кампања.

Вработени во „Бигмалион“, како што пренесува „Би-би-си“, признале дека знаеле за измамата, а против неколкумина членови на УМП веќе се поднесени обвиненија.


Кљусев се изјаснил за виновен за нелегална дистрибуција на наркотици


Хартфорд, 30 ноември, 2016 - 23:23 (META) 

Људмил Кљусев, син на првиот премиер на независна Македонија, Никола Кљусев, пред Окружниот судија Алвин Томпсон во Хартфорд се изјаснил за виновен за нелегална дистрибуција на наркотици, како и за вршење измама со здравствена заштита, велат во соопштение за „Мета“ од Министерството за правда на САД.

Според судските документи и изјави дадени во суд, Кљусев, кој имал психијатриска установа во Милфорд, ги препишувал лековите „адерал“ и „занекс“ на пациенти кои за рецептите плаќале во готово.

„Истрагата, која вклучува доверливи сведоци и полицаец на тајна задача кој се претставувал како пациент, откри дека Кљусев ги препишувал лековите без целосен медицински преглед на пациентите, препишувал рецепти без потврда на состојбата која бара медицински третман со овие лекови и издавал рецепти во замена за пари на пациенти кои покажувале злоупотреба на дроги и зависничко однесување. Тој, исто така, им наредувал на вработени да потпишуваат рецепти од него, кога тој бил надвор од земјата. Во 2014 и 2015 година, Кљусев незаконски фактурирал од приватни здравствени осигурителни компании околу 76.983 долари за извршени медицински услуги кога тој бил надвор од земјата“, се вели во соопштението.

Кљусев се изјаснил за виновен дека имал намера да дистрибуира наркотици, што носи максимална казна затвор од 20 години и за измама со здравствена заштита за што е предвидена максимална казна затвор од 10 години. Кљусев се наоѓа во притвор откако беше уапсен на 12 ноември 2015 година.

– Овој доктор продавал строго контролирани лекови за пари како да е обичен дилер на дрога. Откривме дека видот на апчињата што тој ги препишувал придонесуваат за смртни случаи предизвикани од предозирање. Тие се многу опасни ако не се земаат соодветно и се практично токсични ако се мешаат со опијати – вели државниот правобранител за дистриктот Конектикат, Деирдре Дали.

Страните се согласиле дека соодветната казна затвор во овој случај е помеѓу 26 и 77 месеци. Кљусев се согласил да му ја одземат ординацијата. Од неговата канцеларија на денот на апсењето биле запленети 173.095 долари. Тој, исто така, се согласил да се откаже од дополнителни 117.431 долари кои биле на неговата службена сметка, и да плати надомест во износ од 76.983 долари.

Судијата Томпсон закажа изрекување на пресудата на 22 февруари следната година.


ОЈО Велес: Обвинетата за измама нè лажела дека е портпарол во Министерството за култура


Велес, 29 ноември, 2016 - 16:03 (META) 

Вработената во Министерството за култура против која велешкото основно јавно обвинителство поднесе обвинение за измама, лажела дека работи како портпарол во кабинетот на заменик-министерот за култура, Драган Недељковиќ.

Јавното обвинителство, кратко по соопштението за поднесеното обвинение, информираше дека попладнево добиле известување од Министерството за култура од каде биле информирани дека „обвинетата Д.Н.К. е вработена во Министерството за култура, но не е ниту портпарол, ниту воопшто е распределена на работно место во кабинетот на заменик-министерот за култура“.

„Обвинетата во текот на целата постапка пред надлежен јавен обвинител се претставува како вработена на работно место портпарол во кабинетот на заменикот-министер за култура“, стои во исправката на Обвинителството.

Како што соопшти денеска јавното обивнителство, обвинетата Д.Н.К. во текот на август и на почетокот од септември им ветила на татко и на ќерка дека за одреден паричен надомест може да го вработи нивниот син, односно брат во МВР, преку огласот за прием на полицајци, кој бил во тек.

„Притоа таа се повикувала на блиски пријателски односи со влијателни луѓе од актуелната власт и од МВР, со што ги навела оштетените да ѝ исплатат вкупен паричен износ од 183.500 денари (околу 3.000 евра н.з.) и тоа етапно, како што течеле активностите околу конкурсот за вработување“, стои во соопштението од Обвинителството.

Три дена по последната уплата на парите, се додава во соопштението, таткото и ќерката, откако биле известени по телефон од портпаролката, отишле во Центарот за обуки на МВР во Идризово за да потпишат договор за вработување, но оттаму им било кажано дека не е организирано потпишување договори и дека нивниот син, односно брат, воопшто не е примен на огласот за обука на полицијаци.


ОЈО Велес поднесе обвинение за измама против портпаролка во Министерството за култура


Велес, 29 ноември, 2016 - 13:44 (META) 

Велешкото Основно јавно обвинителство по спроведената истрага до Основниот суд поднело обвинителен предлог против портпаролката во кабинетот на заменик-министерот за култура, Драган Недељковиќ, за кривични дело измама.

Како што соопшти денеска јавното обивнителство, обвинетата Д.Н.К. во текот на август и на почетокот од септември им ветила на татко и на ќерка дека за одреден паричен надомест може да го вработи нивниот син, односно брат во МВР, преку огласот за прием на полицајци, кој бил во тек.

„Притоа таа се повикувала на блиски пријателски односи со влијателни луѓе од актуелната власт и од МВР, со што ги навела оштетените да ѝ исплатат вкупен паричен износ од 183.500 денари (околу 3.000 евра н.з.) и тоа етапно, како што течеле активностите околу конкурсот за вработување“, стои во соопштението од Обвинителството.

Три дена по последната уплата на парите, се додава во соопштението, таткото и ќерката, откако биле известени по телефон од портпаролката, отишле во Центарот за обуки на МВР во Идризово за да потпишат договор за вработување, но оттаму им било кажано дека не е организирано потпишување договори и дека нивниот син, односно брат, воопшто не е примен на огласот за обука на полицијаци.

„Во текот на истрагата беа испитани оштетените лица и сведоци, а беа прибрани и повеќе материјални докази во поткрепа на обвинителниот предлог“, велат од Јавното обвинителство.


Нови кривични пријави за туристичката агенција што измами Македонци од САД


Скопје, 21 септември, 2016 - 15:25 (META) 

Поради основан сомнеж за сторена измама, СВР – Охрид поднесе кривична пријава против Ј.Ч. (29) од Прилеп. Пријавената, со намера да прибави противправна имотна корист, со лажно прикажување, односно со прикривање факти, ги довела во заблуда лицата Д.Н. од Охрид и Л.А. од струшкото село Ложани, ветувајќи им евтини повратни авионски билети од САД до Република Македонија.

Од нив, пријавената побарала и добила вкупно 779.000 денари, по што на Д.Н. му обезбедила билети само во еден правец, а Л.А. воопшто не добила авионски билети. Во март годинава, сега оштетениот Д.Н., кој моментно живее во САД, на сметка на пријавената уплатил вкупно 4.140 американски долари за купување на пет повратни билети на релација Чикаго – Виена – Скопје. По остварен контакт меѓу пријавената и сега оштетената Л.А. во Струга, било договорено купување на 12 повратни авиобилети од САД за Република Македонија. По извесно време од средбата и направениот договор, сега оштетената Л.А. на сметка на пријавената уплатила 283.200 денари, но договорените 12 повратни авионски билети воопшто не ги добила.

Како што веќе пишуваше „Мета“, повеќе од 30 тужби поднеле Македонци кои живеат во САД, против сопственичката на прилепската туристичка агенција „Сториа травел“, обвинувајќи ја за измама со евтини авиобилети.

Македонци, иселеници, обвинуваат за измама со ветување дека купиле евтини авиобилети до скопскиот аеродром. Целата ујдурма настанала за време на новогодишните прослави за Македонците во дијаспората, кога пејачката, Елена Јовчевска, која ги забавувала, а е по потекло од Прилеп, им понудила евтини авиобилети до Македонија преку австриската авионска компанија „Aустриан ерлајнс“. Тие парите, пак, ѝ ги исплаќале директно на сопственичката на туристичката агенција „Сториа травел“, Јасмина Јорданоска-Чебренска.