!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Децата со попреченост се креативни, покажа проектот „Креираме заедно“


Тетово, 14 мај, 2017 - 16:25 (META) 

Фотографии и видеозаписи изработени од ученици со и без попреченост денеска беа преставени пред тетовската публика во Центарот за култура „Иљо Антески – Смок“ во Тетово, во рамки на проектот „Креираме заедно“.

– Станува збор за фотографии и за видеозаписи кои, меѓу другото, се изработени и од деца од инклузивни училишта од Струмица, Тетово и од Скопје. Добивме одлични записи – објасни Мимоза Петровска, претседателка на „Сината птица“, здружение за подршка на деца и млади со различности, кое беше вклучено во проектот подржан од Европската Унија и од УНИЦЕФ.

Целта на проектот е уште повеќе да ја разбуди креативноста на децата со пречки, вели модераторот на денешниот настан, Драги Неделчевски.

– Јас имам дете со попреченост и знам колку е важна креативноста кај овие деца. Многу луѓе сметаат дека ако некои деца имаат пречки, не треба ова или она да го работат или, пак, не се креативни. Напротив, со овој проект се уверивме дека овие деца се креативни и треба повеќе да се работи со нив на вакви проекти – изјави Неделчевски.

Проектот „Креираме заедно“ е дел од проектот „Заштита на децата од насилство и унапредување на социјалната инклузија на децата со попреченост од Западен Балкан“.


Изложба на фотографии на тема „Победата над фашизмот“


Охрид, 8 мај, 2017 - 15:40 (META) 

Денеска во Центарот за култура „Григор Прличев“ во Охрид беше отворена изложбата „Победата над фашизмот“, по повод Денот на победата над фашизмот, 9 Мај.

– Преку 30 фотографии е претставен денот на ослободувањето на различни градови низ Европа, во кои учествувала и руската армија. Ова е еден наш придонес во севкупното одбележување и манифестаците кои се одвиваат во Македонија и во светот по повод овој значаен историски датум – рече на отворањето почесниот конзул на Руската Федерација, Велимир Стојковски.

Првиот секретар во Амбасадата на Руската Федерација во Македонија, Александар Алексеев, рече дека експонатите, фотографирани во време кога не постоела современа технологија, се реален израз на луѓето кои со голема радост ја дочекале слободата.

– А, за оние кои се подготвуваат или имаат намера да го реинкарнираат фашизмот, ова треба да биде знак и јасен сигнал каков крај ќе го дочека таквиот обид да се внесе хаос и немир во светот – подвлече Алексеев.

Организатори на изложбата се Амбасадата на Руската Федерација во Македонија, почесниот конзулат на Руската Федерација во Охрид и Општина Охрид.


Се преуредува Куќата на Робевци во Охрид


Охрид, 23 април, 2017 - 11:29 (META) 

Националната установа Завод за заштита на спомениците и музеј – Охрид работи паралелно на три значајни проекти: конзервација на фасади на неколку објекти во Охрид и во Струга, заштита и конзервација на фрескоживописот од црквата „Свети Ѓорѓи“ во Струга, а во завршна фаза е и проектот за адаптација на галеријата во Куќата на Робевци во Охрид.

– Продолжува постапката за валоризација и за ревалоризација на движно и на недвижно културно наследство. Се работи на конзервација на дрвени предмети од историското депо, накит и лични предмети од етнолошката збирка, како и на елаборат за валоризација на археолошки предмети од праисторијата – објаснува директорката на установата, Тања Паскали-Бунташеска.

Заедно со галерискиот простор во Куќата на Робевци, овој објект непосредно пред почетокот на летната сезона ќе биде отворен за туристи, а ќе биде повторно овозможено организирањето на традиционалните изложби.

– Ќе се заврши комплетно со осовременувањето, односно замената, на старите изложбени витрини со нови, но и со градежните интервенции во внатрешноста на овој објект. Музејот со овие зафати ќе добие три целосни комплексни поставки, и тоа етнолошка, археолошка и уметничка, во кои ќе биде изложено вредно културно наследство – додава Паскали-Бунташеска.

Таа уверува дека до крајот на 2018 година комплетно ќе заврши возобновувањето на Светиклиментовиот универзитет на Плаошник.


Изложба во Охрид за историјатот на украсувањето велигденски јајца во Русија


Охрид, 7 април, 2017 - 12:12 (META) 

Изложба насловена „Историјат на украсување и на бојадисување велигденски јајца во Русија од древноста до колекцијата ’Фаберже’“, денеска ќе биде отворена во НУБ „Григор Прличев“ во Охрид.

Изложбата е посветена на празникот Велигден, а посетителите ќе имаат можност да слушнат и предавање за историјата и за современите тенденци на уметноста на украсување јајца.

Исто така, публиката ќе може да учествува во работилницата за уметничко украсување велигденски јајца.


Изложба за Борис Чипан, основоположник на заштитата на македонското градителско наследство


Скопје, 30 март, 2017 - 11:05 (META) 

„По трагите на еден модернист“ е насловот на изложбата за познатиот македонски архитект Борис Чипан, по потекло од Охрид. Вечерва во 20 часот, во  Музеј на град Скопје, изложбата ќе ја отвори проф. д-р Минас Бакалчев, декан на Архитектонски факултет при УКИМ.

Изложбата се содржи од материјали од професионалната оставина донирана од семејството Чипан на Музејот на град Скопје. „Збирката на архитект Борис Чипан“ содржи повеќе од 500 предмети, меѓу кои оригинални проекти, цртежи, скици, студии, ракописи, белешки, фотографии, исечоци од весници, дигитални записи, награди, плакети, книги и други предмети.

На Борис Чипан, автор, меѓу другото, и на проектот за објектот на МАНУ во Скопје, му припаѓа едно од најзначајните места во историјата на македонската современа архитектура. Како творец, еднакво суверено се реализираше во областа на архитектонското проектирање, заштитата на градителското наследство, архитектонското образование и архитектонската публицистика.

Борис Чипан (27 март 1918 – 31 март 2012) е роден и израснат во Охрид, градот кон кој чувствуваше огромна љубов, од кој ја црпеше инспирацијата и на кој му се навраќаше целиот свој живот.

По дипломирањето архитектура на Техничкиот факултет во Белград, се враќа во Охрид, а работи и во Битола и во Охрид и се смета за основополжник на заштитата на македонското градителско наследство.
Од 1949 година е првиот директор на нововостановениот Републички завод за заштита на културно-историски споменици.

Чипан е еден од првите ентузијасти кој работеше на конзервацијата на „Света Софија“, катедралниот храм на Охридската архиепископија, како и на „Света Богородица Перивлепта“ и на многу објекти од градската архитектура во Охрид.

Надвор од Охрид, работеше на конзервацијата на црквата „Свети Пантелејмон“ во Нерези, Даут-пашиниот амам и Куршумли ан во Скопје, како и на многу други објекти.


Изложба на костими од стари претстави во Штип за Светскиот ден на театарот


Штип, 24 март, 2017 - 19:45 (META) 

Изложба на театарски плакати и на костими од стари и играни претстави, пред публиката ќе ги приреди Народниот театар од Штип в понеделник, на Светскиот ден на театарот. Ова е само дел од одбележувањата на театарскиот празник во Штип.

– Почнуваме со крводарителска акција, па следи изложба на постери, рекламен материјал и на фотографии од стари и од актуелни претстави, како и изложба на костими од претстави. Потоа, за најмладите, ќе одиграме детска претстава. Во 20 часот ќе бидат прочитани меѓународната и македонската порака за Светскиот ден на театарот, по што ќе ја одиграме претставата „Хотел ни на небо, ни на земја“ – ја соопшти програмата Миле Вртеовски, актер и директор на Центар на култура „Ацо Шопов“ од Штип.


„Горе длабоко – Долу високо“, ликовна изложба на Масин во Белград


Охрид, 2 март, 2017 - 20:25 (META) 

Од денеска до 25 март, во павилјонот „Цвијета Зузориќ“ во Белград, ќе биде поставена заедничка изложба на Стојан Ѓуриќ и на охридскиот сликар Мирослав Масин, со наслов: „Горе длабоко – Долу високо“.

Мирослав Масин пред неколку години дел од својот циклус на дела „Горе длабоко – Долу високо“ претстави на реномираниот фестивал „Охридско лето“, како и на Научната и културна визита, организирана од МАНУ во Куќата на Уранија во Охрид.


Вечерва промоција на документарниот филм „Танцот со пастрмките“


Охрид, 17 јануари, 2017 - 10:23 (META) 

Вечерва, од 19 часот, во Центарот за култура „Григор Прличев“, ќе биде промовиран документарниот филм „Танцот со пастрмките“, на кој во изминативе неколку години работеа членови на Нуркачкиот центар „Амфора“, од Охрид.

– Филмот е сниман пет години во водите на Охридско Езеро, за време на мрестот на пастрмката. По промоцијата на филмот, ќе следи и изложба на подводни фотографии. Собраните средства од продажбата на фотографиите ќе бидат наменети за социјално загрозените граѓани – вели Милутин Секулоски од „Амфора“.

Освен филм, ќе се одржи и изложба на атрактивни досега неприкажани подводни фотографии, која е од продажен и хуманитарен карактер.

Со овој настан почнуваат активностите за одбележување на големиот верски празник Богојавление – Водици, во четврток на 19 јануари, кога во Охрид се очекуваат и голем број гости од земјава и од странство.

Од 7 часот почнува богослужба во сите парохиски храмови, а во 8.30 часот ќе почне светата божествена литургија, по што во 9.45 часот ќе следи поаѓање на литијата кон градското пристаниште, каде во 10 часот ќе се фрла крстот во осветените езерски води.


„Сон кој живот значи“ – ликовна изложба во Охрид


Охрид, 21 декември, 2016 - 10:56 (META) 

Во изложбениот салон при Центарот за култура „Григор Прличев“ во Охрид синоќа е отворена изложбата „Сон кој живот значи“.

Владимир Темков, Драган Најденовски и Владимир Симоновски, низ својата заедничка изложба, го оживуваат сонот на секој што има храброст да погледне во својата душа, да живее во мигот кој значи живот, да сонува и да создава трајни и непроценливи вредности.

„Големината на човекот е во видливоста, сензибилноста, грандиозноста, трајноста, безвремената сила и во неговите дела. Сонот може да биде јаве само тогаш кога неговиот запис живее, отелотворен во поединецот кој низ него ја храни сопствената душа, својот ум, го трасира личниот пат“, стои во најавата за изложбата.


Млади балкански дизајнери со изложба во Скопје


Скопје, 10 ноември, 2016 - 12:30 (META) 

Една од најзначајните изложби „Млади балкански дизајнери“ (Young Balkan Designers) која го обединува секторот за дизјан од регионот, ќе биде повторно претставена за време на одржувањето на „Скопска недела на дизајнот“ (Skopje Design Week) од 23 до 27 ноември во „Јавна соба“.

Темата на изложбата оваа година е со наслов „Њу аналог“ (New Analogue) и ќе донесе продукти што го содржат човечкиот допир со процесот на дизајнирање и производство, поврзувајќи го со материјалите, занаетите и со техниките на изработка што се дел од културната традиција на Балканот.

На изложбата ќе бидат претставени 15 иновативни решенија на младата дизајнерска сцена.

Пред да биде изложена на „Недела на дизајнот Скопје“, изложбата беше претставена на фестивалот „Индиго“ во Љубљана.