!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Обвинувањата за руско мешање во Македонија не се неосновани


Скопје, 17 август, 2017 - 16:41 (META) 

Портпаролката на руското Министерство за надворешни работи, Марија Захарова, по повод интервјуто на  министерката за одбрана Радмила Шекеринска за агенцијата „Блумберг“ (во кое таа рече дека новата Влада ги зајакнува напорите за влез на Македонија во НАТО и дека членството во воената алијанса ќе ја заштити земјата од руското мешање), изјави:

Обвинувањата на сметка на Москва за наводното мешање во внатрешните прашања на Македонија се исконструирани и неосновани.

[Извор: Мета, датум: 15.08.2017]

ОБРАЗЛОЖЕНИЕ:

Оваа изјава на портпаролката на руското Министерство за надворешни работи, Марија Захарова, ја сметаме за невистинита.

Во изминатиот период се објавувани повеќе написи кои го демантираат тврдењето на Захарова дека „обвинувањата на сметка на Москва за наводното мешање во внатрешните прашања на Македонија се исконструирани и неосновани“а овде ќе наведеме само неколку.

Во јуни 2017 година видео-порталот НОВА ТВ објави заедничко истражување со партнерите „ОССРП“ (Мрежата за известување за оганизиран криминал и корупција OCCRP) и Српската мрежа за истражување кримнал и корупција – „КРИК“ во партнерство  со британскиот весник „Гардијан“, според кое:

Руски шпиони и дипломати биле вклучени во речиси децениски долги напори за ширење пропаганда и провоцириње раздор во Македонија како дел од пошироки регионални напори за спречување на балканските држави да му се придружат на НАТО.

Зклучоците кои произлегуваат од документите (од тајните македонски служби) кои повеќе недели ги анализирал и проверувал тимот новинари од четири држави, укажуваат дека:

Со употреба на сите техники и методологии на такаранечената мека моќ, како дел од стратегијата на Руската федерација на Балканот, целта е изолација на земјата (Македонија) од влијанијата на Западот“, се вели во еден од документите. „Уште повеќе, руската надворешна политика е во тесна врска со енергетската стратегија чија што цел е контрола врз стратешките енергетски ресурси преку партнерства со балканските држави“, пишува во еден од извештаите според коишто долгорочната цел на Русија е да ја смести Македонија во состојба на „ексклузивна зависност од руските политики“.

Настрана ова, туку документите објавени во ова истражување говорат и дека во изминатиот период во земјава се основани дури 30-ина македонско-руски асоцијации, што претставува значителна бројка, а толку билатерални пријателски асоцијации во Македонија нема со ниедна друга земја.

Понатаму, во мај 2017 година „Спутник Србија“ (регионалното претставништо руската информативна агенција основана и во сопственост на Кремљ), потпирајќи се на неофицијална информација од „Вечерње новости“ објави текст со наслов: „Во Македонија од Косово  влегле 800 вооружени ветерани на ОВК “ во кој тврди дека:

Српските служби за безбедност откриле дека околу 800 вооружени ветерани на озогласената терористичка организација ОВК од Косово влегле на територија на Македонија.

Овој маневар е извршен во два наврати, а според оперативните податоци албанските екстремисти биле опремени со автоматски пушки. На македонска територија влегле во групи, а тајно пренесувале и товари оружје

Со ова, државниот „Спутник“ влезе во кампањата која ја водеа проруските весници во Србија, но и некои во Македонија, објавувајќи вести за наводни стотици екстремисти на македонските западни и северо-западни граници, а кои во најголем број ги имаше пред настаните на 27 април во Собранието на РМ и насилството врз пратениците од новото владејачко мнозинство. Како што сега веќе знаеме, никакви вооружени екстремисти ниту имаше, а уште помалку тие влегоа на македонска територија.

На 06.04.2017 година „Спутник“ објави текст Косово плус Македонија – Голема Албанија, во кој пишуваше дека:

Сегашната криза во Македонија е подметната од странство, со цел земјата  да се федерализира со отцепување на  Албанците, што претставува последен чекор кон создавање на „Голема Албанија”, е заклучено во емисијата  „Светот со Спутник”.

Ова не се единствени примери во кои „Спутник“ подгреваше предвоена еуфорија во земјава. Се објавуваа написи со кои се навестуваше војна во Македонија и се цитираа изјави кои велеа дека „постои потенцијал да дојде до инцидентот  помеѓу припадниците на спротивставените страни, но и опасност да се случат организирани напади, како што беше оној во Куманово, во мај 2015 година“ (Стои ли ЦИА позади конфликтот во Македонија 26 април), создавајќи впечаток како да е таа „пред врата“.

На 21 мај 2017 година руската информативна агенција објави текст во кој вели:

Иако во Македонија веќе не постои вистинска патриотска партија, тоа не значи дека земјата нема патриоти.

Според  „Спутник“, „стотици илјади активисти на граѓанското општество кои учествуваа на демонстрациите за задржување на нивната сакана Обединета Македонија, како и некои познати новинари, би можеле да го сочинуваат јадрото на новата про–македонска партија“. Текстот дури и спомнува имиња на потенцијални лидери на таквата партија, при што станува збор за лица кои отоврено го напаѓаат НАТО и кои во минатото имаат изнесено про-руски ставови.

Така што,  наспроти тврдењето на  портпаролката на руското Министерство за надворешни работи,  Захарова , овие примери  говорат  дека „Обвинувањата на сметка на Москва за наводното мешање во внатрешните прашања на Македонија “, сепак, не се исконструирани и неосновани.

 


Вучиќ ја повика ЕУ да реагира на изјавите на Рама и на Тачи


Белград, 20 април, 2017 - 15:00 (META) 

Премиерот на Србија, Александар Вучиќ, денеска апелираше до политичките претставници на Албанците да не излегуваат во јавност со изјави дека е потребно сите Албанци во регионот да формираат единствена држава доколку биде запрен процесот на европските интеграции.

„Ние ги молиме, повторувам, ги молиме, бидејќи тоа не придонесува за добри односи во регионот, ниту за создавање атмосфера на соработка и за заедничка соработка на важните проекти“, рече Вучиќ пред новинарите во владата на Србија, додавајќи дека „такво нешто, без обзир на нечии желби, нема да биде дозволено“.

Вучиќ ги повика претставниците на Европската Унија да реагираат на ваквите изјави, истакнувајќи дека тој, кога би изјавил дека сите Срби треба да живеат во една држава, најверојатно ќе биде закачен во Брисел на јарбол, на местото на некое од знамињата што висат таму.

Премиерот на Албанија, Еди Рама, завчера изјави дека не исклучува унија на Косово и на Албанија, доколку ЕУ ја „затвори вратата“ за земјите од Западен Балкан, а претседателот на Косово, Хашим Тачи, вчера изјави дека во таков случај, сите Албанци од регионот ќе живеат во една единствена држава за да се продолжи со интеграцијата во европското семејство.


МНР го повика албанскиот амбасадор: Изјавите на Рама и на Бушати се сериозна провокација


Скопје, 4 април, 2017 - 10:18 (META) 

Амбасадорот на Албанија во Македонија, Фатос Река вчера бил повикан на разговор во Министерството за надворешни работи на земјава, по повод зачестените навредливи изјави и коментари на официјални лица на Република Албанија, насочени кон Република Македонија, соопшти денеска МНР.

„На средбата беше потенцирано дека изјавите на претседателот на владата (Еди Рама н.з.) и Министерот за надворешни работи на Република Албанија (Дитмир Бушати н.з.) за двонационалност и менување на уставното уредување на Република Македонија се отворено мешање во внатрешните работи на Република Македонија. Eтикетирањето на Македонците како „Славомакедонци“ е навредливо и дискриминаторски кон Македонците и сите граѓани на Република Македонија“, стои во соопштението на МНР.

На разговорот со албанскиот амбасадор било истакнато дека „ваквите пораки се сериозна провокација за добрососедството кое сакаме да го негуваме“ и дека прават „долгорочна штета на односите во регионот и потткнуваат екстремистичка реторика“.

„Она што ни треба во регионот, е обединување околу интеграцијата во Европската Унија, мир и економски напредок. Затоа, апелиравме да се прекине со провокациите, да се почитува сувереноста и да се работи на планот на добрососедството, за доброто на сите во регионот“, порачуваат од МНР.


Политичката и мигрантската криза во фокусот на утрешната средба меѓу Иванов и Туск


Скопје, 2 април, 2017 - 12:26 (META) 

„Во фокусот на разговорите на претседателот Иванов и на претседателот на Европскиот совет, Доналд Туск, ќе бидaт заканата од илегална миграција со која се соочува Европа и политичката криза во Македонија по изборите во декември 2016 година“, информираат од кабинетот на претседателот Ѓорге Иванов, кој утре ќе биде домаќин на претседателот на Европскиот совет, Доналд Туск, кој ќе престојува во работна посета на Македонија.

Според агендата на активности, во 13.55 часот се очекува пристигнувањето на Туск во кабинетот на претседателот. Во 14 часот ќе почне тет-а-тет средбата на Иванов и на Туск, а половина час подоцна е пленарниот состанок на двете делегации.

Во 15 часот се предвидени изјави за медиумите од претседателот Ѓорге Иванов и од претседателот на Европскиот совет, Доналд Туск. Во 15.30 часот е предвиден работен ручек, на кој освен Иванов и Туск ќе бидат и членовите на делегациите.


Вучиќ: Јас да дадам изјава како Хашим Тачи, странците би ме обесиле на Теразије


Белград, 3 март, 2017 - 16:13 (META) 

Премиерот на Србија, Александар Вучиќ, денеска ја обвини меѓународната заедница за двојни стандарди бидејќи, како што изјави, не ги третира на ист начин изјавите на водечките политичари од Србија и од другите земји во регионот.

По состанокот со високата претставничка за надворешна и за безбедносна политика на Европската Унија, Вучиќ се осврна на изјавата на претседателот на Косово, Хашим Тачи, кој рече дека Албанците во Македонија треба да ја земат судбината во свои раце и оцени дека слична изјава од страна на Вучиќ не би била толерирана од меѓународната заедница.

Тој потсeти дека во Босна и Херцеговина или во Црна Гора има околу 30 отсто српско население и праша каква би била реакцијата на меѓународната заедница доколку тој изјави дека Србите во овие земји треба да ја земат судбината во свои раце.

– Да кажев јас дека Србите во Босна треба да ја земат судбината во свои раце, ќе ме обесеа на Теразије – рече Вучиќ, додавајќи дека очигледно станува збор за двојни стандарди, на кои ѝ укажал и на Могерини, за време на средбата, на која во најголем дел се разговарало за ситуацијата во регионот.

Вучиќ рече и дека некои политичари од соседните земји „не се однесуваат цивилизирано“ и дека е загрижен бидејќи нема никакви реакции, додавајќи дека во случај тој да даде такви изјави, на Србија ќе ѝ воведат санкции.


Груевски на Хан му задоцни 40 минути, не сакаше да го снимаат и не даде изјава


Скопје, 9 февруари, 2017 - 23:44 (META) 

Лидерот на ВМРО-ДПМНЕ, Никола Груевски, вечерва не даде изјава за медиумите по средбата со еврокомесарот за проширување и добрососедска политика, Јоханес Хан, како што тоа претходно го направија сите други политички лидери по средбите со еврокомесарот.

Според најавите, за деталите од средбата на Груевски со Хан и за ставовите на партијата околу актуелната политичка ситуација за состав на влада, ВМРО-ДПМНЕ ќе информира преку соопштение.

Инаку, Груевски на средбата со Хан доцнеше околу 40 минути, а на негово барање, на снимателите не им беше дозволено да направат инсерти од состанокот.

Еврокомесарот Хан, кој денеска учествуваше на шестиот министерски состанок на земјите од Западен Балкан, посветен на регионалната соработка во областа на енергетиката, попладнево се сретна со лидерите на СДСМ, Беса, Алијанса на Албанците, ДУИ и на ДПА.

По завршувањето на конференцијата, а во пресрет на средбите со политичките лидери, Хан изјави дека дошол да ги слушне ставовите на лидерите на политички партии, но не и да им дава насоки и препораки што да одлучат, во контекст на актуелните прашања за формирање на новата влада.

Тој рече дека е неопходно е што побргу да се формира нова влада, која ќе се справи со предизвиците, како што е спроведувањето на Договорот од Пржино и ќе се фокусира на евроинтеграциите.


Попоски: Дачиќ добро знаеше во која земја е дојден


Скопје, 9 февруари, 2017 - 14:41 (META) 

Српскиот министер за надворешни работи, Ивица Дачиќ, добро знаеше во која земја доаѓа, изјави шефот на македонската дипломатија, Никола Попоски, одговарајќи на новинарско прашање дали Дачиќ знае која земја ја посетува.

– Да, добро знаеше каде дошол и не е единствениот во Србија што знае која е оваа земја. Ги поканувам да дојдат и да ја посетат Македонија затоа што Македонија има што да понуди да се види – рече Попоски.

На прашањето дали добил појаснување од Дачиќ за неговите изјави, Попоски истакна дека тоа не било ништо поинакво од претходните изјави.

– Објаснувањето не беше ништо поинакво, но ја разбираме чувствителноста што ја имаат, особено пред гласањето за влезот на Косово во УНЕСКО. Сепак, ние сме одлучни да продолжиме со регионалната соработка и да ја продлабочуваме – додаде Попоски.

Дачиќ во новогодишното интервју изјави дека во Србија биле „будали“ кога ја признале Македонија под уставното име, како и дека во понатамошните мултилатерални односи ќе го користат акронимот БЈРМ.


Централното претседателство на ДУИ во проширен состав заседава во Мала Речица


Тетово, 28 јануари, 2017 - 14:18 (META) 

Централното претседателство на ДУИ во проширен состав се собра денеска во седиштето на партијата во Мала Речица, за да решава за можната коалиција со ВМРО-ДПМНЕ за состав на влада.

Од ДУИ засега не ги пуштаат новинарските екипи да снимаат ниту, пак, најавуваат дали ќе дадат изјава или ќе има соопштение во врска со одлуката за можна коалција.

Голем број новинарски екипи се собрани во една од просториите на објектот на ДУИ во Мала Речица и очекуваат каква било информација.

Портпарол на ДУИ, Бујар Османи, синоќа изјави дека најважно е одлуката да биде добра, наместо навремена.

– Ние сме свесни за роковите, за целата ситуација, и посакуваме да се најде решение за да постигнеме политичка стабилност, но првично и важно е одлуката да биде добра, наместо навремена – изјави Османи.

Синоќа во Мала Речица претседателот на ДУИ, Али Ахмети, разговараше со потпретседателите, по што разговорите продолжуваат и денеска.

Рокот за состав на нова влада истекува утре (29 јануари), кога мандатарот, лидерот на ВМРО-ДПМНЕ, Никола Груевски, треба да соопшти дали и со која партија ќе формира коалиција.


ВМРО-ДПМНЕ ја осудува изјавата на Павлопулос за името на државата


Скопје, 13 јануари, 2017 - 17:24 (META) 

Во отсуство на реакција на опозицијата и на државните институции, ВМРО-ДПМНЕ најостро ја осудува изјавата на грчкиот претседател поврзана со името на нашата држава, се вели во реакцијата на ВМРО-ДПМНЕ на изјавата на грчкиот претседател Прокопис Павлопулос.

– Однесувањето на претседателот на Грција и давањето иритирачки, навредувачки и потценувачки пораки до македонскиот народ и држава очигледно е смислена стратегија за зголемување на конфликот помеѓу двете земји. И наместо да се реши спорот, тој се усложнува со измислување наводна опасност дека името го гледаат како закана по нивните граници – се вели во реакцијата на ВМРО-ДПМНЕ.

Во неа, исто така, се додава дека „изјавите кои наликуваат на оние во раните деведесетти години од минатиот век нема да нè однесат кон решение на проблемот, туку ќе нè вратат токму таму, во 1991 година“.


СЈО: Не ги коментираме изјавите на Груевски, очекуваме да ни се продолжи мандатот


Скопје, 10 јануари, 2017 - 16:45 (META) 

Специјалното јавно обвинителство не сака да ги коментира „политичките“ изјави на лидерот на ВМРО-ДПМНЕ и мандатар за формирање на новата влада, Никола Груевски, кој во интервју за „Дневник“ категорично вели дека неговата партија нема да поддржи продолжување на мандатот на СЈО.

„Повеќепати имаме истакнато дека не коментираме политички изјави. Што се однесува до Вашето второ прашање, нашите очекувања се следни: продолжување на мандатот и изгласување на законот за заштитени сведоци“, стои во одговорот на СЈО на нашите прашања „кој е ставот на СЈО и како ги коментираат изјавите на Никола Груевски?“ и „кои се очекувањата на СЈО од новиот состав на Собранието?“.

Груевски во интервјуто за „Дневник“, објавено вчера, недвосмислено вели дека ВМРО-ДПМНЕ нема да се согласи на продолжување на рокот на СЈО, дека „од авион се гледа дека обвинителството работи под сугестија на некои амбасади и очигледно е дека некому надвор му треба СЈО за продолжување на кризата во Македонија и за држење во заложништво на една политичка партија во Македонија“, како и дека „со пролонгирање на роковите за СЈО, со сигурност ќе се пролонгира кризата“.

Од Европската комисија, во врска со изјавата на Груевски, за „Мета“ велат дека, покрај брзо формирање на нова широка владина коалиција, Брисел очекува и целосно овозможување на сите услови за работа на СЈО.

– Европската Унија се надева на брзо формирање на нова широка владина коалиција и ја очекува нејзината програма. Континуираната примена на сите делови од Договорот од Пржино и реформските приоритети се клучни во овој поглед. Специјалното јавно обвинителство е составен дел од Договорот од Пржино и мора да му се овозможат услови и да му се даде времето што му е потребно за да ја заврши својата важна работа – рече портпаролката на Европската комисија, Маја Коцијанчич, за „Мета“.