!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Заев во ниту еден момент не ги доведе во врска заканите со атентат со Русија, велат од Владата


Скопје, 9 ноември, 2017 - 18:48 (META) 

Изјавата на премиерот Зоран Заев за црногорискиот медиум се темели на искуствата од регионот и на реакциите на Руската Федерација при зачленувањето на други земји од регионот во НАТО, стои во соопштението на Владата по денешните реакции на Москва на изјавите на Заев за црногорското радио „Антена М“.

„Во интервјуто за црногорскиот медиум, претседателот на Владата, Зоран Заев, во ниту еден момент не ги доведува укажувањата за ликвидација кон него во било каква релација со Руската Федерација. Владата на Република Македонија останува целосно на заложбите за реализација на нашите евро-атлантски стремежи и не гледа судир на тие заложби со определбата да ги одржиме добрите односи и со Руската Федерација“, стои во соопштението.

Во него се наведува дека стратешка определба и интерес на Македонија е членството во НАТО-алијансата и во Европската Унија и дека во исто време Владата на Република Македонија е сериозно посветена и кон градење пријателски односи и соработка со Руската Федерација на принципиелно демократско ниво.

Заев за црногорското радио „Антена-М“ изјави дека очекува жестока реакција од Русија кога ќе дојде време за прием на Македонија во НАТО, а збoрувајќи во контекст на црногорското искуство, рече дека некои безбедносни аналитичари му кажале дека му е загрозена безбедноста и дека е потенцијална мета на атентат.

На изјавата на Заев денеска реагираше и руската амбасада, а темата се најде и на редовниот брифинг на портпаролката на Руското министерството за надворешни работи, Марија Захарова, која рече дека „ваквите изјави не само што претставуваат неосновани инсинуации и манијакални конструкции, туку во суштината наликуваат на обиди за само-прикажување како жртва“.


Под истрага не биле двајца „членови на Владата“ туку „претставници на власта“


Скопје, 1 ноември, 2017 - 16:50 (META) 

Владата денеска попладне испрати соопштение со појаснување и со делумна корекција на изјавата на премиерот Зоран Заев, дадена во рамките на неговото обраќање на панел-дискусијата на тема „Што научивме и како да ги применуваме најдобрите практики во Македонија и во регионот“ на Самитот „Македонија 2025“ што се одржува во Скопје.

Медиумите и агенциите пренесоа дека Заев рекол дека „двајца членови на Владата се под истрага поради корупција“.

Во соопштението на Владата, пак, се наведува дека премиерот во изјавата рекол дека „се води истрага против двајца високи претставници на власта“.

Инаку, Заев изјавата ја дал на англиски јазик, одговарајќи на прашања на учесниците на панел-дискусијата.

– Доколку ние ги фокусираме нашите напори да ја искорениме корупцијата, овој чекор ќе биде силен ветер во грб за целото општество. Но, исто така, транспарентноста е многу важна. Ова го кажувам првпат, јас постојано ги охрабрувам граѓаните на нашето општество да пријавуваат потенцијални случаи на корупција и како резултат на тоа, во моментов се води истрага по овие дојави за двајца високи претставници на власта, кои се на должност неколку месеци. Се разбира, ова е само истрага, не можеме да откриваме повеќе детали. Со ова сакам да кажам дека законот мора да важи еднакво за сите – изјавил Заев, пишува во соопштението на Владата.


ЕК: Новите градоначалници имаат чист мандат, лидерите да се однесуваат одговорно


Брисел, 30 октомври, 2017 - 19:25 (META) 

Локалните избори во Македонија им даваат чист мандат на новите градоначалници и советници за тоа како граѓаните сакаат да изгледаат локалните власти во нивните општини, оцени денеска портпаролката на Европската комисија, Маја Коцијанчич.

Според неа, акцентот сега треба да се стави на придвижување на реформската агенда насочена кон ЕУ преку инклузивен процес, во интерес на сите граѓани.

– Изборите беа набљудувани од Мисијата на ОБСЕ/ОДИХР, која во својата првична изјава оцени дека двата круга беа одржани во атмосфера на антпревар преку почитување на основните слободи, иако беа забележани одредени слабости. Сите чинители во државава треба да ги спроведат препораките од набљудувачите на ОБСЕ/ОДИХР, со што ќе им се овозможи на државните институции да ги зајакнат своите капацитети пред следниот изборен циклус. За оваа цел Европската Унија е подготвена да понуди поддршка – вели Коцијанчич.

Забелешките и жалбите од учесниците во изборите, според Коцијанчич, треба да се насочат кон релевантните државни институции, во согласност со установените процедури и во рамките на законските рокови.

– Важно е сите лидери да се однесуваат одговорно, за да ја зголемат довербата на граѓаните во државните институции и во политичките процеси – додава Коцијанчич.


ВМРО-ДПМНЕ: Конфузна и незрела изјава на Димитров предизвика лавина реакции


Скопје, 14 јуни, 2017 - 10:07 (META) 

„Една конфузна и незрела изјава на новиот министер за надворешни работи, Никола Димитров, во „Фајненшл тајмс“, предизвика лавина реакции во меѓународните медиуми кои сериозно ги подриваат тешко градените позиции во спорот со Грција“, се вели во редовното утринско соопштение на ВМРО-ДПМНЕ.

Во него се додава дека „Фајненшл тајмс“, „Гардијан“ и „Тагесцајтунг“ се само дел од влијателните светски медиуми што пишуваа дека Македонија е подготвена и размислува за промена на името.

„Истите позиции ги пренесуваат и други весници, а сето тоа се злоупотребува од нашите соседи. Бугарскиот историчар Божидар Димитров срамно лицитира со имиња од типот „југозападна Бугарија“, а СДС упорно молчи наместо да ги штити угледот и честа на македонскиот народ и држава“, се вели во соопштението на ВМРО-ДПМНЕ.

Од партијата велат дека сега, бидејќи ги води владата и Министерството за надворешни работи, СДСМ има обврска да се бори и да го брани македонскиот идентитет.


Јанакиески очекува СЈО да му поднесе обвинение и да оди на суд


Скопје, 9 јуни, 2017 - 14:48 (META) 

Специјалното јавно обвинителство продолжува да работи како експозитура на СДСМ и да води политичка хајка против функционери на ВМРО-ДПМНЕ, рече поранешниот министер за транспорт и врски и функционер на ВМРО-ДПМНЕ, Миле Јанакиески по излегувањето од просториите на СЈО, каде се задржа помалку од половина час.

„Денеска бев осомничен затоа што сум ставил параф на некој договор,“ рече Јанакиески.

Тој го повика СЈО да почне да работи предмети против СДСМ за да докаже дека не е нивна партиска експозитура.

„Нивниот рок е при крај и тие одлучија да се занимаваат со функционери на ВМРО-ДПМНЕ. Ние ќе ја докажеме нашата невиност во судска постапка. Велам судска постапка, затоа што очекувам да поднесат обвинение,“ рече Јанакиески.

Тој не кажа зошто толку кратко се задржа во СЈО, но најверојатно како генералниот секретар на ВМРО-ДПМНЕ и поранешен технички премиер Емил Димитриев и пратеничката на ВМРО-ДПМНЕ, Даниела Рангелова и тој побарал да добие увид во доказите и потоа да даде исказ пред обвинителите на СЈО.


Неумесно е Иванов да бара милост од Собранието за тепачите на пратениците


Скопје, 19 мај, 2017 - 10:47 (META) 

Изјавата на шефот на државата, Ѓорѓе Иванов, во која тој практично се заложи Собранието да направи амнестија на осомничените и на обвинетите за крвавиот инцидент во Собранието на 27 април, „Вистиномер“ ја смета за несоодветна и ја оценува за недоследна.

„Иванов, барајќи од новиот собраниски состав – новото Собрание „да им помогне на луѓе кои ги завела толпата, кои се повеле од емоции“, свесно го минимизира срамниот инцидент во Собранието. Притоа, ја намалува тежината на стореното злодело кон пратениците, новинарите, полицајците, а првенствено кон Собранието како институција“, појаснува „Вистиномер“.

Според „Вистиномер“, Иванов, всушност, го релативизира и тепањето и обидот за уривање на Собранието како претставнички дом на граѓаните и како носител на законодавната власт. „Тој со невидена леснотија им простува на тепачите и сугерира истото да го направи и Собранието!“, се констатира во анализата на „Вистиномер“.

„Само, во конкретниот случај не станува збор за „луѓе кои ги завела толпата и се повеле од емоции“, туку за луѓе кои свесно дошле да тепаат! Како може некого да го „завела толпата“, ако тој дошол „подготвен“ со качулка?!“, прашува „Вистиномер“.

(Целиот текст од „Вистиномер“ можете да го прочитате и да го преземете ТУКА)


Германско МНР: Неумесна е изјавата на Иванов за амбасадорката Алтхаузер


Скопје, 18 мај, 2017 - 12:24 (META) 

Германското Министерството за надворешни работи денеска ја оцени како неумесна изјавата на претседателот Ѓорге Иванов дека амбасадорката на Германија, Кристине Алтхаузер, пренесува лажни информации во Берлин.

„Се радуваме што претседателот Иванов по долго размислување дојде до вистинска одлука и се откажа од ставот на блокирање. Обвинувањата упатени кон германски дипломати и кон други пријателски држави се неумесни. Како што е познато, проценките кои ѝ се пренесуваат на земјата – домаќин, секогаш се договараат во тесна координација меѓу Министерството за надворешни работи и Амбасадата“, стои во реакцијата на германското МНР.

Инаку, германската амбасадорка Кристине Алтхаузер прашана за коментар на изјавата на Иванов, денеска изјави дека лично има одлични професионални односи со претседателот и дека нејзината работа е високо ценета во Берлин.

– Лично имам одлични професионални односи со претседателот, како и со другите политичари во оваа земја. Мојата работа е високо ценета во Берлин, од министерот за надворешни работи и од канцеларот и сум во постојан контакт со властите во Берлин – изјави Алтхазуер, која денеска присуствуваше на конференцијата за соработка меѓу Вишеградската група и земјите од Западен Балкан, што се одржа во Скопје.

Таа не сакаше да коментира повеќе околу изјавата на Иванов и само ја сподели изреката „Колку повеќе непријатели, толку поголема чест за мене“.

Претседателот Иванов обвини дека амбасадорката испраќала лажни вести во Берлин, поради што, наводно, германската канцеларка морала да се извинува за неточните информации што ги добивала од Скопје.


Ромео: Се надеваме дека новата влада ќе работи на воведување реформи


Скопје, 17 мај, 2017 - 15:08 (META) 

„Искрено се надеваме дека оваа долготрајна политичка криза ќе заврши, пред сè поради граѓаните, затоа што тие тоа го заслужуваат“, одговори италијанскиот амбасадор Карло Ромео на новинарско прашање за доделувањето на мандатот од страна на претседателот Ѓорге Иванов на лидерот на СДСМ, Зоран Заев, при денешната посета на Штип.

– Се надеваме дека новата влада ќе работи на подобрување на политичката ситуација, на воведување реформи што ќе доведат до политичка интеграција на Македонија во Европската Унија – изјави амбасадорот Ромео.


Заев: Новата влада ќе гради граѓанска, унитарна и европска Македонија


Скопје, 17 мај, 2017 - 13:10 (META) 

„Мандатот го добив и очекувам многу наскоро да ја составам новата влада. Како мандатар и иден премиер, се обврзувам дека новата влада ќе гради граѓанска, унитарна и европска Македонија. Сите сили ќе ги насочиме кон тоа да изградиме праведна и правна држава“, рече лидерот на СДСМ, Зоран Заев, во изјава откако го доби мандатот за составување на новата влада од претседателот на државата Ѓорге Иванов.

– Убава симболика имаме денеска. 17 мај пред две години ја испрати пораката од граѓанска Македонија дека независно од политичките, етничките и од какви било други определби и припадности, граѓаните се подготвени заедно да работат на демократските вредности. Имавме надеж и верба дека гласот на обединета, шарена Македонија е гласот на единствена Македонија и денеска ја имаме потврдата за тоа. Демократија не се создава преку ноќ, таа е процес на кој макотрпно се работи. Ве повикувам сите да работиме заедно зашто сме потребни во овој процес, нашата иднина е во прашање. Ќе работам со целото срце, верувајќи во сплотеноста и затоа испраќам порака да ги оставиме разликите, изолацијата, омразата, нетрпението, деструктивните политики што ни ги уништија животите. Новата влада ќе биде влада на сите граѓани. Заедно ќе создадеме правна и правична држава на слободни граѓани – рече Заев.

Тој додаде дека преговорите за составување на новата влада со ДУИ, Алијансата на Албанците и со Беса ќе почнат веднаш и дека ќе се потрудат и за помалку од 10 дена да се формира новата влада.

Заев како одговор на новинарско прашање рече дека не постои проблем и пред новата влада да се изгласа во Собранието, да се променат законите за локалните избори за тие да се одржат на 15 октомври.


Србија ќе се обрати во ОН поради изјавите на Вокер за Голема Албанија


Белград, 10 мај, 2017 - 13:26 (META) 

Србија ќе се обрати во Обединети нации поради изјавите на поранешниот шеф на верификационата комисија на ОБСЕ на Косово, Вилијам Вокер, дека работи на проектот за создавање на „голема Албанија“.

Ставовите на Србија ќе ги пренесе министерката за правда, Нела Кубуровиќ, која на 16 мај ќе учествува на седница на Советот за безбедност на ОН, на која ќе биде разгледан редовниот тримесечен извештај за работата на Мисијата на ОН на Косово.

Влијам Вокер пред три дена, во Приштина, на прославата на годишнината на Алијансата, за иднина на Косово рече дека има проект за обединување на Албанците на Косово, Албанија и во дијаспората.

На изјавата остро реагираше и српскиот премиер во заминување, Александар Вучиќ. Тој рече дека таа изјава е доказ дека Вокер е големоалбански лобист и дека од почетокот се залагал за остварување на тој проект и додаде дека ќе инсистира за таа изјава да се разговара на „сите нивоа во Европа и во светот“.

И министерката задолжена за европска интеграција, Јадранка Јоксимовиќ, денеска изјави дека Србија ќе се обрати во ОН поради изјавата на Вокер затоа што „проблемот на „голема Албанија“ не е само проблем на Србија туку вклучува територии на неколку земји на Балканот“.