!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Труење или стомачен вирус испрати гости на струшки хотел в болница


Струга, 17 јули, 2017 - 15:23 (META) 

Гостин на хотелот „Изгрев“ на струшкото крајбрежје се пожали на „Мета“ дека попладнето во саботата, откако претходно појадувале во хотелот, тој и неговото семејство почнале да чувствуваат мачнина, а потоа почнале и да повраќаат, поради што побарале лекарска помош во Општата болница во Струга, каде разбрале дека имало и други туристи од хотелот „Изгрев“ со исти симптоми. Гостинот се сомнева дека во прашање е труење со храна. Но, како што дознаваме, причините би можеле да бидат и други, односно можно е и да станува збор за стомачен вирус, бидејќи во последниот период во Охридско-струшкиот Регион се забележани позначителен број вакви случаи.

Од Општата болница во Струга велат дека во текот на викендот примиле тројца странски државјани со симптоми што може да значат и труење, но и друго, на пример, стомачен вирус. Како што велат, за причините за симптомите, засега не можат да се изјаснат. Напоменуваат дека пациентите се соодветно третирани според симптомите.

Од хотелот „Изгрев“ ни рекоа дека и кујната и целиот хотел ги исполнуваат сите стандарди и дека секогаш се подготвени за соработка со властите доколку нешто треба да се утврдува. Сепак, и оттаму ни посочија дека е можно да станува збор за состојба поврзана со неприлагоденост на организмот на некои туристи кои доаѓаат од климатски постудени подрачја или, пак, за стомачен вирус. Велат и дека е можно, ако навистина станува збор за труење со храна, да е во прашање храна што туристите ја консумирале на друго место.

– Кај нас минатата недела санитарна инспекција изврши редовен надзор, ни провери сè и сè беше в ред. Имаме записник од тоа, сè е како што треба. Некои од луѓето пред да дојдат кај нас имаат поминато и во неколку други хотели. Ние имаме персонал 200 луѓе, а повеќе од 1.000 луѓе се во хотелот и нема други такви проблеми. Овие појави се можни затоа што минатата недела температурата на воздухот беше премногу висока, па се појавуваат стомачни вируси. Болниците во Охрид и во Струга се полни поради тие стомачни вируси, тоа е јавна тајна… Ние правиме сè што се бара, работиме законски, а нашата кујна работи по сите светски стандарди – изјави за „Мета“ Илија Џајковски од хотелот „Изгрев“.

За проверка со состојбата со стомачните вируси се јавивме и на инфективното одделение во Општа болница Охрид, каде началникот, д-р Лидија Љаткоска, појасни дека и кај нив викендот се примени и странци и македонски граѓани со симптоми на гастроентеритис. Вели дека бројката на вакви случаи, иако повисока од другите периоди на годината, е сепак во рамките на очекуваното за туристичката сезона, односно во последните десетина дена немало нагло зголемување на бројката на пациенти примени со симптоми на повраќање и со висока температура.


„Фибула груп“, во хотелот „Изгрев“, прослави 20 години од постоењето


Охрид, 6 април, 2015 - 11:30 (META) 

Изминатиов викенд, во хотелот „Изгрев“ кај Струга, туристичката мрежа „Фибула груп“ ја прослави 20-годишнината од постоењето. Присуствуваа претставници на националните канцеларии на „Фибула груп“ од шест земји во регионот: Турција, Босна и Херцеговина, Македонија, Косово, Романија и Србија.

Прославата на јубилејот беше конципирана и како презентација и промоција на македонските туристички можности, со учество и на партнерските туристички оператори на „Фибула“ од земјите во регионот. Беше тоа и промоција на хотелот „Изгрев“, можеби, во моментов, најлуксузниот на охридското крајбрежје. Паралено, се гради и голем хотелски комплекс во Охрид.

Пред присутните на прославата, официјално обраќање имаше Ајхан Мавису, претседател на одборот на директори на „Фибула груп“.

– Изминативе две децении, напорно работевме, континуирано вложувавме во капацитетите на нашите тимови и бевме иновативни во наоѓањето решенија за да ги промовираме туристичките капацитети во земјите во кои што функционира „Фибула груп“. За одбележување на 20 години постоење, ја избравме токму Македонија, заради значењето што го има за нашата мрежа, една од првите отворени канцеларии што придонесе за растење на мрежата, покажаниот нагорен тренд во туристичките потенцијали и вредната инвестиција што ја вложивме во реновирање на хотелот „Изгрев“. Цврсто веруваме дека овој успешен јубилеј е само мотив за сите национални канцеларии на туристичката мрежа да продолжат со веќе докажаните успеси и со одличната работа – рече Мавису.

Најголемата туристичка мрежа на Балканот, за прославување на својот дводецениски јубилеј ја избра Македонија и хотелот „Изгрев“, кој во 2014 година беше комплетно реновиран во хотел со пет ѕвезди, како целосна и самостојна инвестиција на групацијата.

„Фибула“ е основана во 1995 година, со седиште во Анталија. Веќе во 1998 година, генералниот менаџер, Ајхан Мавису, ја проширува мрежата во земјите на Балканот, а од 1999 година вклучувајќи ја и Македонија. Работејќи како туристички оператор во земјите од регионот веќе 20 години, со повеќе од 150 вработени, „Фибула“ во моментов е најголемата туристичка мрежа на Балканот.