Макрадули: Има мораториум на ДУП-от во Центар, зградата кај ГТЦ не може да се гради


Скопје, 30 ноември, 2018 - 14:05 (META) 

Заменик-министерот за животна средина Јани Макрадули, при денешната посета на Цементарница УСЈЕ во рамки на отворениот ден на компанијата, прашан за изградбата на висококатницата кај паркингот пред „Холидеј ин“, рече дека во овој момент ДУП-от има мораториум.

– Според изјавата на градоначалникот на Општина Центар не мислам дека е се поизвесно градењето на таа висококатница. Во овој момент, тој ДУП има мораториум и согласно тоа, во овој момент не постои начин како да се издаде дозвола за нешто што е во рамки на некој план кој има мораториум – одговори Макрадули на прашањето дали Министерството ќе реагира на оваа изградба.

Тој потсети дека лани се донел Законот за зеленилото, кое што треба да го има во процесот на градење на секој објект.

– Правилникот е готов и тој ќе биде објавен деновиве. Така што задачата на министерството да се грижи за бројот, површината и зеленилото ќе биде спроведувано согласно закон – додаде Макрадули.

Тој уште еднаш го повтори својот став дека главни причинители за загадувањето во Скопје и Битола се домаќинствата.

– Уште еднаш да повторам, може да се зборува и за мустаќите на заменик-министерот и за фотомонтажите, но она што е реалноста и науката го вели тоа, дека во Битола и во Скопје за загадувањето е виновно домашното затоплување. За жал, многу граѓани не од тоа што сакаат, туку заради социјалниот статус користат извори на затоплување кои не се еколошки. Тоа е наша задача, со средства од буџетот со партнерски однос со компаниите да им ги замениме, да не ги ставаме во дополнителен трошок – рече Макрадули.


Реџепи: Гасоводот преку Водно ќе се гради, се чекаат потребните дозволи


Скопје, 9 октомври, 2018 - 17:05 (META) 

Ќе продолжи ли изградбата на гасоводната траса преку Водно или ќе запре поради прекројувањето на државната каса со кое ќе има кратење на значителен дел од средствата наменети за инфраструктурни проекти, како што е гасификацијата?

Според Македонски енергетски ресурси (МЕР), претпријатие кое го реализира проектот на гасификација и кој ја гради и трасата на гасоводната делница 5, Скопје – Тетово – Гостивар, работите околу изградбата на другите делови од трасата се одвиваат непречено.

– Очекуваме да заврши процедурата во Министерството за транспорт и врски околу дозволата за изменетата траса преку Водно и кога ќе ја добиеме, работите на изградбата на гасоводот на тој потег треба да продолжат“, вели директорот на МЕР, Бајрам Реџепи.

Според него, изградбата на оваа гасоводна делница не е засегната од ребалансот на буџетот бидејќи парите за овој проект се одамна обезбедени.

Вчера, министерот за транспорт и врски, Горан Сугарески  рече дека, наспроти оптимизмот дека изградбата на гасоводот на Водно ќе се деблокира и дека парите ќе се искористат до крајот на годинава, тоа немало да се случи.


Општина Штип ќе внимава да нема проблеми со експропријација при гасификацијата


Штип, 8 октомври, 2018 - 13:04 (META) 

Општина Штип има план како ќе го реши проблемот со експропријација за потребите за изградба на гасоводот, информираат од таму за „Мета“. Од Општината додаваат дека, откако ќе биде прецизно утврдена трасата на гасоводот со Основниот проект, ќе се утврди дали има потреба од експропријација или не.

„Општината при проектирање на трасата на гасоводот ќе внимава трасата да се движи по државно земјиште, за да немаме високи трошоци за експропријација. Доколку одреден дел наиде на дел од приватно земјиште, тогаш ќе има потреба од експропријација“, велат од таму.

Од Општина се претпазливи бидејќи проблемот со експропријација се појави и при изградбата на гасоводот низ Скопје. Имено, и покрај убедувањата од страна на еко-активистите дека гасоводот наместо низ Водно може да поминува по друга траса, од Влада цврсто останаа на ставот дека тој ќе се гради таму, бидејќи доколку се гради на друга траса, можни се правни проблеми со експропријација на земјиште.

– Дефинирање целосно нова траса за овој гасовод не е можна, бидеjќи тоа ќе донесе неколкукратно поголеми проблеми и штети за државата и за граѓаните: губење време за реализација на гасоводот, правни проблеми со експропријација на земјиште, губење на заемот со исплата на дополнителни големи камати, сериозно одложување на реализација на еколошкиот проект-гасовод, и со тоа поттикнување натамошно греење со огревни дрва, наместо со гас, што ја загрозува животната средина – велат од Влада за опцијата гасоводот да се гради на друга траса, наместо на Водно.

Гасификација на Градот Штип е еден од најважните проекти кој беше најавен во изборната кампања на сегашната локална власт. Штип е и првиот град, кој по Струмица и Куманово, влезе во фаза на проект за гасификација. Главниот гасовод поминува покрај Штип, а градот немаше проект за гасификација и план како ќе се гасифицира со секундарната мрежа.

Одбрана е проектантска фирма која работи на планот за гасификација и до крајот на годината ќе има готова техничка документација. Следната година, ќе се одбере најповолниот модел, односно дали гасоводот ќе се гради преку јавно-приватно партнерство или ќе биде модел со кој градот ќе ја презеде обврската. А тоа значи, Јавното претпријатие кое веќе е формирано за таа намена да се стави во функција и Општината да инвестира со средства.

„Во моментот се врши геодетско снимање на трасата каде ќе поминува гасот низ градот, за потребите на Идејниот проект и истиот треба да биде готов до крајот на следниот месец, после што ќе следи изготвувањето на Основниот проект заедно со Проектот за инфраструктура. Очекуваме целокупната проектна документација да ни биде предадена до крајот на февруари 2019 год. Веднаш после тоа следи објавување на тендер за избор на најповолен изведувач“, велат од Општина Штип за „Мета“.

Гасификацијата ќе биде поделена во неколку фази, па така од Индустриската зона ќе се навлезе во централното градско подрачје, а потоа и кон станбените зони во градот.

disklejmer1-01


Сугарески: Патот Ранковце – Крива Паланка е од регионално значење за економијата


Крива Паланка, 25 септември, 2018 - 14:56 (META) 

Експресниот пат Ранковце – Крива Паланка кој е со вкупна должина од 25 километри почна да се гради јуни годинава и треба да биде завршен за три години, информираше министерот за транспорт и врски Горан Сугарески, кој денеска изврши увид во градежните работи.

– Експресниот пат Ранковце – Крива Паланка како дел од доизградбата на Коридор 8 е од особена економска важност за Македонија. Со него овозможуваме брза врска на пан-европскиот Коридор 8 кој нè поврзува со Бугарија, а со тоа отвораме можност за подобрување на економските врски со Европската Унија. Покрај регионално поврзување, со комплетирање на Коридор 8 и создавање на модерна патна мрежа ќе придонесеме за брз и безбеден транспорт на стоки и услуги и ќе им овозможиме на домашните компании полесно да се пробијат на нови пазари. Во таа насока го потпишавме и договорот со ЕБОР за реконструкција и проширување на патот од Крива Паланка до граничниот премин Деве Баир, со што создаваме комплетно нова патна делница на овој Коридор од значење не само за нашата земја, туку и за целиот регион – изјави Сугарески.

Вкупната вредност на инвестицијата изнесува 58,5 милиони евра.


Бочварски: Изградбата на автопатот Штип – Миладиновци е во самата завршница


Штип, 17 септември, 2018 - 12:40 (META) 

Изградбата  на автопатот Штип – Миладиновци е во самата завршница што е многу важно за целиот Источен регион, изјави денеска градоначалникот на Општина Штип, Благој Бочварски кој заедно со министерот за транспорт и врски Горан Сугарески извршија увид во градежните работи на оваа делница.

„Секое вложено евро во автопатишта враќа три евра во бизнисите и во економијата, што значи дека ова е вистински начин и за развој на економијата, за привлекување инвестиции, домашни и странски, со што ќе го заживееме целиот регион. Вториот аспект е безбедноста, којашто исто така е многу важна, бидејќи Македонија мора да го спушти нивото на сообраќајни незгоди, како што е тоа во Европска Унија, а токму тоа се постигнува со изградба на нови автопатишта“, изјави Бочварски.

Тој додаде дека со забрзана динамика се работи на патната инфраструктура, како на овој автопат, така и на експресните патишта од Штип до Радовиш и од Штип до Кочани.

Атопатот Миладиновци – Свети Николе – Штип е во должина од 47 километри, а вкупната вредност за изградба е 226 милиони евра.


Автопатот Скопје – Блаце ќе почне да се гради догодина и ќе чини околу 100 милиони евра


Скопје, 10 септември, 2018 - 13:57 (META) 

Изградбата на автопатот Скопје – Блаце ќе стартува на пролет, следната година и ќе се одвива во две фази, информираше министерот за транспорт и врски Горан Сугарески при работната посета на Општина Арачиново.

Во првата фаза ќе се градат 1,6 километри, а потоа ќе се допроектира останатиот дел од десетина километри, по што ќе се работи паралелно.

Вицепремиерот за европски прашања Бујар Османи неодамна изјави дека изградбата на автопатот ќе чини 100 милиони евра, но ресорниот министер истакнува дека не сака да шпекулира и оти точната сума ќе се знае кога ќе се заврши проектирањето.

Првиот дел од автопатот ќе се финансира од Јавнотот претпријатие за државни патишта, а останатиот дел со помош на Европската банка за обнова и равзој. На трасата се превдидени четири тунели и девет мостови.


Владата најавува интензивна изградба на автопатот Кичево – Охрид


Скопје, 6 септември, 2018 - 13:01 (META) 

Владата денеска усвои предлог-закон за нов анекс на Договорот за изградбата на автопатот Кичево – Охрид во должина од 57 километри со кинески „Синохидро“. На овој начин се овозможува ослободување на 205 милиони евра од претходно обезбедените финансии за проектот, со што ќе се интензивираат градежните активности на терен и ќе се овозможи исплата на домашните компании ангажирани како подизведувачи.

Со предлогот е предвидено со нов, трет анекс, пак, што би се склучил околу 10 следниот месец, да се утврдат цените за дополнителните градежни работи, неопходни за одблокирање на проектот што беше во застој поради проблеми со проектната документација, несоодветни геомеханички испитувања, нерешена експропријација на земјиштето.

Вицепремиерот за економски прашања Кочо Анѓушев и министерот за транспорт и врски Горан Сугарески по денешната седница на Владата најавија дека законот уште денеска ќе биде испрати во Собранието.

Со тоа, како што истакнаа, почнува да се решава проблемот за овој капитален проект, кој заедно со планираното интензивирање на работите за железничката делница Куманово – Бељаковце и за гасоводот треба да овозможи подобрување на состојбите во градежништвото по големиот пад во изминатиот период.

Сугарески информираше дека за изградбата на автопатската траса во должина од 57 километри ќе треба да се примени целосно нова технологија за изградба на тунелот кај Врбјани  во должина од четири километри, кој со првиот проект бил предвиден за градба на земјиште со прва категорија, наместо со шеста, односно на меко змејиште а не на карпест дел како што се препорачува од експретите. Воедно ќе треба да се градат девет нови клучки и регионални патишта, бидејќи со постојниот проект не е предвидено поврзување на околните населени места со автопатската делница.

Изградбата на автопатот стартуваше во февруари 2014 година и според постојниот договор требаше да чини  околу 400 милиони евра. Со продолжувањето на рокот за изградба автопатот треба да биде готов до средината на 2021 година.


ССК бара да не се укинуваат веќе донесените ДУП-ови, бидејќи компаниите трпат штети


Скопје, 19 јули, 2018 - 14:59 (META) 

Да не се укинуваат веќе донесените детални урбанистички планови (ДУП), бидејќи на тој начин се доведува во прашање правната сигурност на инвеститорите во градежниот сектор кои трпат големи финансиски штети.

Ова денеска на прес-конференција го истакна претседателот на Градежната комора на Македонија при Сојузот на стопански комори (ССК), Ивица Јаќимовски.

Тој додаде дека „самиот процес на прекин на градба значи финански товар и за останатите 26 гранки поврзани со градежништвото, граѓаните кои одлучиле да инвестираа во стан, за самите општини и државата“.

– Инвеститорот започнува со градба на претходно донесен ДУП, од страна на општините, Град Скопје и Министерството за транспорт и врски, поточно градежната компанија не учествува во донесување на ДУП-овите. Укинување на ДУП на готов објект, во кој вложиле и компаниите и граѓаните и сите вклучени во процесот значи огромен финансиски товар. Врз онова на проценките на Градежна комора на Македонија, со моментот на укинување на ДУП-ови делот на мораторим на ДУП-ови кој се води, државата претрпува штета поголема од една милјада евра, како и сите чинители инволвирани во процесот. Донесување на нов ДУП, е сложен процес кој трае повеќе од две години во зависност од носителот на ДУП – вели Јаќимовски.

Тој додаде дека доколку се укине одреден ДУП за изградба на станбен објект, по автоматизам се блокираат сите процеси кои се поврзани со делот на градење.

Градежната комора на Македонија бара внимание за во иднина при донесување на деталните урбанистички планови, бидејќи секое стопирање кога веќе започнал процесот на градба значи штета која не може да се надомести.


Анѓушев: Гасоводот мора да поминува низ Водно, но ќе има нова траса


Скопје, 10 јули, 2018 - 12:49 (META) 

Вицепремиерот за економски прашања Кочо Анѓушев и директорот на Македонски енергетски ресурси (МЕР), Бајрам Реџепи, заедно со претставници од иницијативата „Го сакам Водно“ денеска ја поминаа трасата по која треба да поминува гасоводот, за лично да се уверат каква шума и зеленило ќе бидат уништени.

Анѓушев вели дека слушал различни спротивставени ставови за тоа колку шума треба да се исече и низ кои предели поминува проектот за гасоводот, и затоа сакал да ја види ситуацијата на терен.

– Jа поздравувам иницијативата на невладините организации, тие се коректор на политиките на секоја влада и како такви и денеска се уверивме дека делумно или во најголем дел биле во право во своите барања. Службите во МЕР напорно работеа заедно со невладините организации и мислам дека во најголем дел таа траса се искорегира. Можете да го видите проектот каде што таа претходно била замислена и како сега сите делници каде што може да биде уништена шума се избегнати. Но, и покрај тоа што е направено максимално избегнување каде што може, во еден дел мора да се помине низ шума. Таму ќе се користат шумските патеки кои се веќе постојни, за да се направат минимални оштетувања кои може да настанат. Се надевам дека ќе дојдеме до заеднички јазик како оваа делница да се изгради – рече Анѓушев.

Тој уште еднаш повтори дека, ако се пролонгира градењето на гасоводот тоа ќе значи дека многу домаќинства ќе продолжат да се греат на дрва и во наредните пет години.

– Во тој случај несразмерно многу шума ќе се исече за греење од тоа што тука би се оштетила, а тоа сега ќе биде минимално. Ги охрабрив во МЕР и како Влада им наложивме да направат максимални напори, секое дрво кое може да се избегне за да биде исечено, тоа да биде така направено. Мислам дека веќе се постигна оптимална траса низ која што ќе има минимални оштетувања. Се работи за 70 отсто помалку оштетувања од тоа што беше првобитно замислено. Доколку и понатаму имаме желба да направиме еколошки потфат, како што е градењето на гасоводот, треба да бидеме согласни да продолжиме – додаде Анѓушев.

Тој вели дека ќе инсистира невладините организации и еколошките здруженија до крај да бидат вклучени во проектот, односно да бидат надзор.

– Покрај градежниот надзор, кој ќе постои согласно закон, и ќе биде ангажиран од страна на МЕР, ќе барам здруженијата да бидат дополнителен надзор на градењето на оваа траса. Се што може да се измени и прилагоди, за да има што е можно помал импакт на животната средина – додаде тој.

Андреа Јанков од иницијативата „Го сакам Водно“ вели дека ова се некои начелни, прелиминарни проекти кои се прават од изведувачите на основниот проект.

– Останува да продискутираме за овие дадени предлози со кои навистина се намалува импактот врз Водно. Од претходните четири километри шумски појас уништување, сега се намалува на два, се јавува теснење односно користење на постоечки патеки. Но, останува да продолжиме со разговорите, за да добиеме адекватно решение со кое сите би биле задоволни – вели Јанков и додава дека нивната работа допрва започнува со будење на граѓанската свест, за да ги натераат граѓаните да учествуваат во овие случувања, за да ги освестат, за тоа што значи Водно за нив.

Во однос на користење на друга траса за изградба на гасоводот и комплетно избегнување на Водно, директорот на МЕР, Реџепи вели дека „ги разгледале опциите и направиле длабока анализа, но биле врзани со рокови.“

– Имаме договори спрема банки и други субјекти, поднесовме анализа до Влада, но ќе имаше одложување на проектот три до четири години минимум. Заради другите обврски што ги имаме Владата одлучи да одиме по постоечката траса – додаде Реџепи.

Тој потсети дека идејниот проект за овој гасовод бил изготвен во 2010 година и дека во 2016 година било дадено одобрението за градба.


Китанов: Капиталните инвестиции во патишта 3,5 милиони евра повеќе од лани


Скопје, 6 јули, 2018 - 13:26 (META) 

Директорот на Јавното претпријатие за државни патишта, Зоран Китанов денеска информираше дека во првата половина на 2018 година, реализирани се капитални инвестиции 3,5 милиони евра повеќе од лани.

– ЈП за државни патишта во вториот квартал од 2018 година има остварено инвестиции во вкупен износ од 2.217.070.250 денари или 36 милиони евра, што е зголемување од 37 проценти од лани. Споредбено за првото полугодие од 2018 година во однос на истиот период лани има реализација на инвестиции за 6,82 проценти повеќе, или 3,43 милиони евра – истакна Китанов.

Тој додаде дека овие средства се обезбедени од кредити од меѓународни финансиски институции, како и од сопствени средства на ЈП за државни патишта.

– Со околу 20 милиони евра, буџетски средства и со средства на ЈПДП, веќе се работи на рехабилитација на регионални патишта во должина од 230 километри. Со 86 милиони евра средства обезбедени од Европската банка за обнова и развој се планира рехабилитација на 26 патни правци во должина од 422 километри. Со 14 милиони евра од Светска банка се работи на рехабилитација на 13 патни правци во должина од околу 150 километри – додаде Китанов.

Инаку, за  оваа година се обезбедени вкупно 270 милиони евра за изградба на нови патишта, за реконструкција, рехабилитација и за обнова на повеќе од 60 патни правци ширум Македонија во должина од околу 800 километри. Дел од овие средства се од државниот и од буџетот на ЈПДП, а дел се обезбедени преку заем од Светска банка, ЕБОР и ИПА2.

Тој информираше и за приходот на патарините, кој во првата половина на годинава е зголемен за 54 милиони денари повеќе од лани, како резултат на како што рече, зголемениот обем на сообраќај и на подобрата организираност.

– Целта на ЈПДП и на Владата е да се реализираат програмските одредници „Македонија без црни точки” и инфраструктурно поврзување кое ќе овозможи пристигнување од еден до друг град за помалку од 90 минути – објасни Китанов.