!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

СДСМ: Груевски земаше милиони евра провизии за автопатиштата


Скопје, 19 август, 2017 - 18:09 (META) 

Лицемерно и очајнички е Никола Груевски, човекот што ја презадолжи државата за остварување на сопствени лукративни интереси, денес да глуми загриженост за состојбата во економијата, се вели во реакцијата на СДСМ, на изјавата на лидерот на ВМРО-ДПМНЕ, Никола Груевски дека економијата стагнира.

Од партијата исто така велат дека „лицемерно и очајнички е човекот што договараше и земаше милиони евра провизии за автопатиштата, денеска да зборува за нивната изградба.“

„Владата предводена од СДСМ ја унапредува инфраструктурата и ги санира милионските штети на автопатиштата што се директна последица на неспособноста на претходната Влада и на криминалните апетити на Груевски. Преку одговорното работење на Владата, државата се раздолжува, а парите на граѓаните наместо за барок, палми, тркала и споменици, се користат за поголема минимална плата, повисоки пензии, за помош за стечајците и за зголемена финансиска поддршка на домашните претпријатија“, се додава во соопштението.


ВМРО-ДПМНЕ: Владата ја потврдува стратегијата за трајно населување на мигранти


Скопје, 9 август, 2017 - 19:48 (META) 

Владата на СДС со секој свој чекор ги потврдува своите стратегија и план за трајно населување на Република Македонија со илјадници мигранти, велат од ВМРО-ДПМНЕ.

Од партијата додаваат дека владата на ВМРО-ДПМНЕ не изградила никаков објект за населување на мигранти.

„Неосновани се обвинувањата на СДС и мафтање со дописи од 2012 година, кои првенствено се однесуваат за изградба на социјални станови, за социјално необезбедени или лица кои се раселени во Република Македонија, а потекнуваат од косовскиот конфликт од 90-тите години на минатиот век, а не за мигранти од Сирија, случаи кои тогаш и не беа проблем како што се сега“, се вели во соопштението на ВМРО-ДПМНЕ.


Граѓани утре ќе протестираат против спорниот хотел во Лагадин


Охрид, 3 август, 2017 - 14:10 (META) 

Со почеток точно напладне, утре пред градилиштето на спорниот хотел во охридската населба Лагадин и во непосредна близина на планираната локација за Медитеранска плажа, група граѓани ќе одржат протест за одбрана на Лагадин и на охридското крајбрежје од понатамошна урбанизација и девастација.

И покрај тоа што повод за овој мирен протест е изградбата на спорниот хотел, протестот има цел да го сврти вниманието на институциите и на јавноста кон сите обиди за уништување на крајбрежјето, езерото и на Националниот парк Галичица, кои најчесто се прават под превезот на развојот и на унапредувањето на туризмот.

„Ги повикуваме сите што не се согласуваат со урбаното, еколошко, звучно и секакво друго насилство врз Охридскиот Регион, да дојдат и заедно со нас, преку еден симболичен чин, гласно да ги повикаат добрите духови на езерото и на планината, во одбрана на автентичното природно, културно и амбиентално богатство на Охрид и на крајбрежјето“, велат граѓаните во своето соопштение.


Автопатот Миладиновци – Штип ќе „изеде“ уште 20 милиони евра


Скопје, 27 јули, 2017 - 14:14 (META) 

Завршувањето на автопатот Миладиновци – Штип ќе значи трошок од уште 20 милиони евра, поради проблемите во изградбата. Претходниот министер за транспорт и врски, неколку дена пред заминувањето од власт на владата на ВМРО-ДПМНЕ, доставил информација до владата за тоа, но, како што рече министерот за транспорт и врски, Горан Сугарески, тоа досега се криело од јавноста.

Сугарески изјави дека тоа го утврдиле новите анализи на документацијата, кои покажале дека Владимир Мисајловски, во последните денови од мандатот, во април годинава, до владата доставил информација за склучување анекс на договорот за изградба на автопатот, со кој би продолжила изградбата.

Како што рече министерот за транспорт и врски, оваа влада ќе ги реши проблемите и автопатиштата што се почнати мора да бидат завршени.

– Покрај 206 милиони евра, колку што би требало да чини изградбата на овој автопат, проценките сега се дека ќе бидат потребни уште 20 милиони евра за негово завршување. Сепак, и овој и проблемите со автопатот Кичево – Охрид, каде 32 отсто од работите се незавршени, оваа Влада ќе ги реши – рече Сугарески.

Во однос на автопатот Кичево – Охрид, за чие завршување ќе бидат потребни дополнителни 100 милиони евра, министерот за транспорт и врски посочи дека компанијата што ги гради, кинеската „Синохидро“, побарала продолжување на рокот за уште една година, односно наместо на 1 мај годинава, да го заврши на 1 мај следната година.

– Се сомневам и дека на 1 мај 2018 година овој автопат ќе биде готов. Сепак, ќе продолжиме со нивната изградба, иако за тоа, бидејќи се градат според посебни закони, ќе мора да се направат посебни анекси – рече Сугарески на прес-конференцијата во Владата.

Во однос на изградбата на автопатот Демир Капија – Смоквица, Сугарески посочи дека може да се очекува тој да биде пуштен во употреба до крајот на годинава.


ЕУИСС: Кинеските инвестиции во Западен Балкан ја поттикнуваат корупцијата


Брисел, 24 јули, 2017 - 16:42 (META) 

Кинеските инвестиции во инфраструктурата во земјите од Западен Балкан ја поттикнуваат корупцијата во регионот, пишува во анализата на Институтот за безбедносни истражувања на ЕУ (EUISS).

Во извештајот пишува дека инвестиции во патишта и во железници во вредност од 5,5 милијарди евра има во Македонија, Србија, Црна Гора и во БИХ, а Кинезите работата ја добивале директно преку владини претставници, а не преку тендери.

Во оваа анализа е спомнат и случајот со изградбата на автопатот Кичево – Охрид, со што буџетот на Македонина е оштетен за 155 милиони евра, а се спомнува дека во случајот се вмешани политичари и еден поранешен премиер за кој Специјалното јавно обвинителство отвори случај.

Во анализата се наведува дека кинеската компанија „Синохидро“, која ги гради македонските автопатишта, во 2016 година беше на црниот список на Светска банка за корупција и за измама.


СДСМ: Заради криминални тендери, ВМРО-ДПМНЕ сакаше да го уништи Скупи


Скопје, 16 јули, 2017 - 19:32 (META) 

„Додека ВМРО-ДПМНЕ ги подметнуваше новокомпонираните барокни градби како културно наследство, вистинското културно и историско наследство скапуваше и се распаѓаше. Додека ВМРО-ДПМЕ ги трошеше парите на граѓаните на стиропор и на лажен барок, најзначајните културно-историски објекти, како античкиот локалитет Хераклеја, скопскиот Аквадукт, археолошките остатоци на Плаошник, фреската „Ангелот од Курбиново“ во црквата „Свети Ѓорѓија“ и други, свесно и намерно беа загрозувани и запуштени“, одговори СДСМ на денешната прес-конференција на Владимир Атанасов во седиштето на ВМРО-ДПМНЕ.

„Локалитетот Скупи, за кој денес ВМРО-ДПМНЕ лицемерно прикажува загриженост, беше во опасност од уништување само заради остварување на криминални интереси на ВМРО-ДПМНЕ. СДСМ долго време предупредуваше дека ВМРО-ДПМНЕ преку таканеречена обнова и преку криминален тендер со набилдани цени сакаше противправно да гради сала со 9000 седишта и со тоа да го уништи археолошкиот локалитет Скупи. За разлика од криминалното владење на ВМРО-ДПМНЕ, СДСМ навистина ќе се грижи и ќе го заштити културното и историско наследство. За конкретниот случај со Скупи, одобрени се средства за да се доврши конзервацијата и таа е завршена. Нема да се дозволи остварување на криминални интереси и продолжување во следни фази на таканаречена обнова, бидејќи таков термин не постои во Законот“, се вели во реакцијата.


ВМРО-ДПМНЕ: Алаѓозовски и СДСМ го блокираат античкиот театар во Скупи


Скопје, 16 јули, 2017 - 17:34 (META) 

Со ребалансот на буџетот се спречува изградбата на античкиот театар во Скупи, а овој проект важен за граѓаните го блокираат министерот за култура Роберт Алаѓозовски и СДСМ, обвини Владимир Атанасов на прес-конференција во седиштето на ВМРО-ДПМНЕ. Тој рече дека со ребалансот се укинати над 80 отсто од парите предвидени за овој проект.

– За жал на граѓаните, а за волја на вистината, ова ќе биде најнеуспешната влада која неинвестирала во културата.Овој антички театар од римско време е еден од најголемите и најзначајните објекти на балканот и пошироко, кој со конзервација и реставрација ќе се возобнови и повторно ќе може да прими од 8 до 10 000 гледачи. СДС очигледно нема елементарни познавања за важноста на овој проект. Тие по секоја цена продолжуваат со деструктивноста, блокирањето и укинувањето на проектите кои се од огромно значење за граѓаните – обвини Атанасов.


Мисајловски: Власта да продолжи веднаш со изградбата на патиштата


Скопје, 7 јули, 2017 - 15:51 (META) 

Проектите од сферата на инфраструктурата почнати од владата на ВМРО-ДПМНЕ се од витално значење за Република Македонија и не смеат да трпат застои или одложувања, a окрај тоа сите тие пред да почнат со градба се добро подготвени со претходни анализи и мислења, порача Владо Мисајловски од ВМРО-ДПМНЕ, поранешен министер за транспорт и врски.

Тој го обвини СДСМ дека „си игра со големите инфраструктурни проекти од значење за државата“ и дека единствениот проблем со кој се соочуваат изградбата на автопатот Кичево – Охрид и експресниот пат Прилеп – Градско е „неспособноста на СДС“.

– Големите инфраструктурни проекти се проекти кај кои секаде во светот се јавуваат одредени пречки во текот на градбата, но напоменуваме дека решенијата за истите  се решаваат со работа и не се предизвици поради кои треба да запре изградбата – рече Мисајловски.


Бројките што ги споменува Сугарески се лага и конструкција, реагира ВМРО-ДПМНЕ


Скопје, 2 јули, 2017 - 15:33 (META) 

Министерот Горан Сугарески наместо да лиферува лажни бројки и да креира конструкции треба да ги засука ракавите и да почне да си ги врши должностите, се вели во реакцијата на ВМРО-ДПМНЕ на изјавата на министерот за транспорт и врски за пропустите во изградбата на автопатот Кичево – Охрид.

Од ВМРО-ДПМНЕ велат дека бројките што ги споменува Сугарески се лага и конструкција и дека нивната цел е да внесат забуна и да го девалвираат проектот.

„Главната борба на владата на СДС се криминалните побуди, тие во изградбата на патиштата гледаат можност за екстра криминална заработка преку кочење и избор на нови фирми, кои граѓаните ќе ги чинат многу повеќе и поскапо. Сугарески денеска си даде автогол. Ако има отстапки од самите проекти, тогаш за тоа единствено треба Сугарески да побара вина во неговата партија, чија влада ги изготви тие проекти и никогаш не ги реализира, затоа што немаше доволно капацитет и компетентност за тоа“, стои во соопштението на ВМРО-ДПМНЕ.


Општините Сопиште и Чешиново-Облешево добија грантови од ИПА-програмата


Скопје, 22 јуни, 2017 - 12:56 (META) 

Општините Сопиште и Чешиново-Облешево денеска добија грантови во вкупен износ од 237.733 евра од ИПА-програмата на Европската Унија.

– Денеска потпишуваме договори за изградба на детска градинка во Општина Сопиште и за изградба на локални улици и за подобрување на водоснабдувањето во Општина Чешиново-Облешево. Изградбата на инфраструктура во руралните средини е еден од приоритетите на реформската влада. Вложувањата во изградба на градинки, училишта, патишта и во енергетика се вложувања во трајни добра од кои директна корист имаат граѓаните. Тие придонесуваат за одржлив економски и социјален развој и воедно ги намалуваат разликите помеѓу урбаните и руралните заедници – изјави министерот за финансии, Драган Тевдовски.

Тој додаде дека ИПА-програмата за рурален развој е од особена важност за Македонија, при што е предвидено е да бидат доделени 20,7 милиони евра во различни општини во земјава.

Тевдовски рече дека како министер за финансии ќе се заложи да има поголема искористеност на фондовите што Европската Унија ни ги дава на располагање.