Владата подготвува нов закон за градење


Скопје, 31 јануари, 2019 - 10:28 (META) 

Министерство за транспорт и врски преку Единствениот национален електронски регистар на прописи (ЕНЕР) објави дека подготвува нов предлог на закон за градење со образложение дека во постојниот закон постојат одредени недостатоци во областа на градењето.

Како главни цели на предлог-законот се наведени подобрување на решенијата во областа на градењето, правата и обврските на учесниците во изградбата, употребата и одржувањето на градбата и постапката на одобрението за градење.


И граѓаните и бизнисмените разочарани од рокот за изградба на автопатот Скопје – Блаце


Скопје, 29 јануари, 2019 - 17:11 (META) 

Најавата за изградба на автопатот Скопје – Блаце во две фази и за период од 54 месеци, предизвика бројни реакции во јавноста. Граѓани иронично коментираат дека автопатот побрзо би се изградил со копач и со лопата, додека претприемачите велат дека долгиот рок ќе им ја намали добивката и ќе ги зголеми трошоците, пишува Порталб.мк.

Во моментот на објавувањето на веста, граѓаните жестоко и со неверување реагираа на социјалните мрежи за долгиот временски рок.

– Срамота, срамота! 12 километри за пет години! Со копач и лопата ќе се направи побргу. Кој ја донесе таа одлука? Крадци, хохштаплери – вели С.И.

-Овој пат, како што знаеме, во западните земји би се реализирал за максимум две години, но навикнавме со нивните лаги – вели друг граѓанин.

-Подобро да не го изградите воопшто, дотогаш ќе патуваме со дронови – вели уште еден критичар.

Членот на Здружението на бизнимени на индустриската зона Визбегово, Нухи Алиу смета дека рокот од 54 месеци за изградба на автопатот Скопје – Блаце е многу долг, бидејќи патот од граничниот премин Блаце до Скопје не е планински, како што е патот Хани Елезит – Качаник, а и кај нас нема планински клисури.

– Не знам зошто ќе трае толку долго. Тука нема ни 12 километри пат. Тоа не е пат што е во планински области, со многу пречки, како што е патот Хани Елезит – Качаник. Мислам дека не треба да има толку долго инвестирање, бидејќи теренот е посоодветен – вели Алиу.

Директорот на Стопанската комора на Северозападна Македонија (СКСЗМ), Дрилон Исени исто така смета  дека работите за изградба на автопатот Скопје-Блаце треба да се одвиваат побргу.

-Нашите очекувања беа дека изградбата на овој сегмент ќе се одвива со многу побрза динамика. 54 месеци е, секако, многу долго време за бизнисот, затоа и доаѓа нашето барање да се ревидира временскиот рок, да се постави во приоритетните инфраструктурни проекти и овој временски рок значително да се скрати за да немаме предолги процеси, како што е случај  со другите патишта – вели Исени.

Одолговлекувањето на работите и според претприемачот Алиу, ќе го намали профитот на фирмите во економската зона Визбегово. Исени, пак, нагласува и дека изградбата на автопатот ќе го забави протокот на стока меѓу Македонија и Косово.

– Како резултат на тоа, компаниите што имаат трговски промет со Косово сигурно ќе имаат потешкотии во транспортот или забавување на движењето, и секако ваквото забавувањето значи зголемување на трошоците и пречка за работата на компаниите – додаде Исени.

На 11 јануари во Секретаријатот за европски прашања беа направени првите чекори за изградбата на автопатот.

Тој ќе биде долг 12,5 километри со четири тунела и 8 мостови, а ќе се реализира во две фази. Беше најавено и поставување на рампи за патарина. Автопатот ќе чини 110 милиони евра.


Повеќе од една милијарда евра инвестиции во патната инфраструктура најави Владата


Скопје, 22 јануари, 2019 - 14:41 (META) 

Една милијарда и 270 милиони евра се предвидени за инвестиции во патната инфраструктура, рече денеска премиерот Зоран Заев на прес-конференција која беше посветена на изградени патишта лани, проекти кои се во тек, но и изградба, рехабилитација и реконструкција на патишта за оваа година, во должина од 770 километри, а за кои, парите се веќе обезбедени.

„Оваа година ќе има засилени активности на автопатот Кичево- Охрид, во должина од 60 километри за кој се надминати проблемите. Изградбата на автопатот Миладиновци – Штип е на крај и до Штип ќе се стигнува за помалку од 40 минути. Се гради и автопатот Скопје-Блаце, така што кон Приштина ќе се патува за 45 минути. Експресниот пат од Ранковце кон Крива Паланка ќе обезбеди безбедно и брзо патување до Бугарија. Квалитетните и нови патишта се важни за безбедноста на граѓаните и за економски раст“, рече Заев.

Прашан, дали доколку се одржат парламентарни избори, овие проекти ќе се реализираат премиерот рече дека проектите не може да бидат стопирани бидејќи се испланирни со програма и е предвиден буџет за нив.

Вицепремиерот за економски прашања Кочо Анѓушев потенцираше дека изградбата на патиштата ќе го заживее градежништвото, за кое има реални очекувања дека ќе даде сериозен инпут во зголемување на домашниот бруто-производ (БДП).

„Лани сите сектори остварија раст освен градежништвото. Лани беа завршени 193 километри во вредност од 30 милиони евра. Тоа е малку, но не ја изгубивме годината, туку подготвени се проекти за реализација на една милијарда и триста евра инвестиции во 987 километри патна инфраструктура. Имаме проекти кои се во тек во износ од една милијра и 35 милиони евра во должина од 363 километри. Започнувме нови 420 километри“, рече Анѓушев и додаде дека овие бројки му даваат за право да верува дека градежништвото ќе постигне добри резултати.

Според директорот на Јавното претпријатие за државни патишта (ЈПДП) Зоран Китанов, во оној момент кога ќе се создадат временски услови ќе може да почне да се работи на патиштата, за што ќе бидат ангажирани сите домашни градежни компании, а се очекува да работат 10.000 луѓе.

Парите за изградба на патиштата се обезбедени од сопствени средства на ЈПДП, кредити преку ова претпријатие.

Исто така, планирано е и воведување на електронска наплата на патарините, градење на два нови моста и реконструкција на 12.

Според министерот за транспорт и врски Горан Сугарески, целта е да нема отсечено место во државата, а со проект преку Светска банка, треба да се градат и локалните и рурални патишта.


Во Кавадарци се изработува физибилити студија за гасификација на градот


Кавадарци, 22 јануари, 2019 - 11:03 (META) 

Во Кавадарци се предвидува изградба на 22-километарска гасоводна линија, за што е потребна изработка на физибилити студија која треба да биде готова за неколку месеци.

Откако ќе се изработат идејниот и основниот проект, кој треба да помине на Советот на општинат, ќе следи формирање на јавно претпријатие за гасификација, најави градоначалникот Митко Јанчев.

На поврзувањето на магистралниот гасовод од Неготино преку Кавадарци, Прилеп па се до Битола, во должина од 92 километри, веќе има околу 40 проценти реализација на градежните работи.

Приклучувањето на Кавадарци кон гасоводот може да се очекува во 2021 година.


Реџепи: До 2025 година поголемиот дел од градовите и општините ќе бидат гасифицирани


Скопје, 31 декември, 2018 - 8:00 (META) 

Владата најавува засилени градежни активности за изградбата на гасоводот во 2019 година и за оваа намена во буџетот се предвидени 1 милијарда и 557 милиони денари. Директорот на Македонски енерегетски ресурси (МЕР), Бајрам Реџепи во интервју за „Мета“ вели дека нивниот преносен систем ќе биде оперативен за брзо време. Мерно- регулационата станица (ГМРС) Штип ќе може да опслужува во текот на вториот квартал од 2019. ГМРС Неготино во текот на третиот квартал следната година, кога се планира приклучување на ТИР-зоните во Штип, во тој период. Сите други станици, во Пелагониски и Полошки регион ќе бидат оперативни до средината на 2020 година.

Владата го задолжи Министерството за економија да формира работна група која ќе одлучува за најефикасниот модел за развој на системи за дистрибуција на природниот гас во Македонија. Од какво значење е формирањето на овие дистрибутивни центри за забрзување на гасификацијата?

– Проектот за гасификација е приоритет во работата на оваа влада.Оваа работна група ќе треба да предложи до владата модел за развојот на дистрибутивната мрежа на природен гас во државата, со јасно дефинирани цели и очекувања.Односно, да овозможи приклучок до секој краен корисник во целата територија на државата и да се реализира брза и ефикасна гасификација, посебно во регионите каде што нивото на загаденост на воздухот е загрижувачко. За да се постигнат овие цели, ќе треба да обезбедиме евтин приклучок до секое семејство и секој краен корисник, евтина цена по метар кубен гас и да им помогнеме на домаќинствата во прилагодување на внатрешните инсталации преку субвенции или евтини заеми.

Kолку вакви дистрибутивни центри се потребни, за секоја општина или би функционирале на ниво на региони?

– Сегашниот Закон за енергетика, овозможува либерален пазар за дистрибутивните оператори на природен гас. Според физибилити студијата, вкупната инвестиција е проценета да биде околу 250 милиони евра. Гледајќи ја финансиската моќ на нашите општини, расположливиот стручен кадар и фактот дека секоја општина посебно ќе треба да гради диспечерски центар, скада систем за надзор, билинг систем, одржување и ред други фиксни трошоци, јас лично апсолутно сум убеден дека тоа нема да функционира и нема да се постигнат очекуваните цели. Гледајќи ги најдобрите европски пракси и причините зошто бил неуспешен повикот во 2013 за воспоставување на јавно-приватно партнерство (тогаш биле поделени три концесиски подрачја: Источен, Западен и Скопски регион), мислам дека треба да се воспостави јавно-приватно партнерство со сериозен приватен партнер. Тој треба да има големо искуство, да биде со голема финансиска моќ, кој ќе има обврска да ја развие мрежата во целата територија на државата и да има обврска во рок од 3-4 години да овозможи евтин приклучок на секој заинтересиран краен корисник, како во најзагадените региони, така и во сите други градови во државата. Во исто време, не нарушувајќи го либералниот пазар, секој друг оператор кој ќе сака да гради и да оперира со дистрибутивна мрежа во одредени региони или градови, тоа да му биде овозможено во рамките на законот.

Изградбата на кракот Скопје – Гостивар е важен и за Интерконекцискиот вод со Грција и за него веќе имате аплицирано за грант заедно со Грција, односно грчкиот оператор. Кои ќе бидат придобивките за државата и што конкретно овој вод значи за нас?

– Изградбата на интерконекцискиот вод со Грција е наш врвен приоритет, заради диверсификација и конкурентност на нашите извори на снабдување со природен гас, тоа е наша надлежност. Да појасниме дека со новиот Закон за енергетика и обврската за раздвојување на дејностите, оперирањето со дистрибутивните мрежи не е во наша надлежност. Но, за нас е многу битно за да не дојдеме во ситуација после вложување на големи средства, да нема кој да ги користи нашите услуги и нашата инфраструктура за пренос на природен гас. Јас сум оптимист дека до крајот на наредна година ние ќе завршиме со проектирање на Интерконекцискиот вод, потребните студии итн, и да стигнеме до одобрение за градење. Секако ќе се затвори финансиската контрукција за да може да се објави повик за да се ангажираат оператори за градба и реално е да се очекува до крајот на 2022 овој интерконектор да биде оперативен.

За трасата Скопје – Гостивар најавивте дека треба да биде завршена кон крајот на следната или почетокот на 2020 година, бидејќи се појавила потреба од голем број на измени при градбата. На какви измени конкретно мислите?

– Точно е дека на овој лот се појави потреба од неколку нужни измени на трасата, од различна природа. Една од нив е измената на Водно, заради барањето на граѓанските здруженија. Другите се заради тоа што откако е дефинирана трасата се додека се почнало со реализација на терен повеќе општини носеле детални урбанистички планови, дале одобренија за градба, легализации, концесии на самата траса итн.

Кога се очекуваат конкретни резултати од сите овие активности со гасификацијата кои ги најавувате дека ќе завршат следната и кон средината на 2020 година? Односно кога домаќинствата и компаниите ќе бидат гасифицирани?

– Нашиот преносен систем ќе биде оперативен брзо. ГМРС Штип (мерно-регулациона станица) ќе може да опслужува во текот на вториот квартал 2019 година. ГМРС Неготино во текот на третиот квартал 2019 година. Планираме да го приклучиме ТИРЗ Штип, во тој период. Сите други станици, во Пелагониски и Полошки регион ќе бидат оперативни до средината на 2020 година. Многу е важно, да имаме сериозни оператори за дистрибуција, за дотогаш да завршат со проектирање и да обезбедат одобренија за градба, за да можат да почнат со градежни активности. Јас сум оптимист дека во текот на 2020 година, ќе почнат градежните активности во поголемиот дел од градовите и општините, и до 2025 да бидат целосно покриени. Освен огромните економските бенефити, целосно ќе биде решен и проблемот со загадувањето на воздухот.

Цената за приклучување на гас во Општина Куманово изнесуваше 800 евра, но со субвенции од општината, цената за приклучок по домаќинство е намалена на 650 евра. Тоа за просечно семејство е скапо, како ќе се изнајдат начини, гасот да е лесно достапен до граѓаните?

Тарифата за пренос кај дистрибутивните оператори ја одредува Регулаторната комисија, а тарифата за приклучок ќе зависи од пазарните услови. Само за споредба, просечната цена за приклучок во земјите од регионот е десет пати поевтина отколку во Струмица и Куманово. Според методологијата за пресметување на оваа цена, зголемувањето на количините или бројот на корисници, ќе влијае за драстично намалување на цената.

Во буџетот се предвидени средства за експропријација, дали тоа значи дека се надминати сите проблеми од овој вид и кои би биле главните пречки поради кои роковите би биле пробиени?

-Голема грешка била направена, кога во 2017 не биле издвоени средства за експропријација. Затоа во 2018 имавме и во 2019 имаме предвидени средства за оваа намена. Јас затекнав ситуација со ниту еден решен предмет за експропријација, а имаме неколку илјади такви. Јас сум задоволен од текот на решавањето во изминативе шест-седум месеци. Во Лот 2 ( Неготино – Битола) е решена над 80 проценти од експоријацијата и очекувам дека брзо ќе биде решена целосно. Во Лот 5 (Скопје -Гостивар) заради поголемиот број на предмети, поради измените и застојот во неколку други институции, имаме побавно темпо на решавање. Поголемиот дел од пречките се веќе надминати и очекувам дека и во овој лот брзо ќе ја завршиме целата експропријација.

Според активистите за заштита на Водно, таму се работи без правосилно решение за измени во тек на градба, затоа што новопроектираната траса се уште е одобрена. По која траса работите, по новата или по старата?

– Го повторувавме ова неколку пати. Одобрение за градба има за целиот проект. Измената на Водно е од 20 до 24 километар. Ние таму не работиме се додека нема да имаме ново одобрение за таа измена, а тоа ќе биде брзо. На Водно ја отворивме трасата од 24 до 27 километар, и планот беше да се отвори и од 17 до 19 километар, но за да стигнат градежните машини до 19 километар на терен се јави потреба од порамнување на неколку места. Машините се движеле по новата траса каде што чекаме одобрение, а не по старата каде што имаме одобрение по основен проект. Тоа го планиравме од многу практична причина, за да нема порамнување на старата траса која што нема да се користи. Тука беше недоразбирањето со активистите, што за мене е ирационално, но сепак одлучивме да го чекаме одобрението за измената. Само да повторам, Водно не само што нема да изгуби од овој проект туку ќе има големи придобивки.

Кој контролира како се работи, има ли надзор врз работата на Водно?

-Секако дека има. Надзорот е присутен во целиот тек на градбата и во секое градилиште.


Сериозна градежна патна и железничка инфраструктура најавува Анѓушев за 2019


Скопје, 27 декември, 2018 - 12:32 (META) 

Во организација на Канцеларијата на премиерот се одржа неформална предновогодишна средба и дружба на економскиот тим министри во Владата со претседателите на стопанските комори и претставници на бизнис-секторот.

Во рамките на оваа средба, вицепремиерот за економски прашања и координација со економските ресори, Кочо Анѓушев стави акцент на плановите за четирите клучни области, индустријата, трговијата, градежништвото и земјоделството кои имаат сериозно учество во севкупниот раст на бруто домашниот производ.

„Покрај автопатот Кичево – Охрид кој ќе продолжи да се гради, се градат експресните патишта, Штип – Радовиш, се гради Штип – Кочани, се гради излезот кај Куманово кон Крива Паланка, се гради излезот од Градско кон Прилеп, ќе се гради Скопје – Блаце. Ова се проекти од една груба бројка, од над една и пол милијарда евра заедно со железницата од втората фаза, којашто сега се тендерираше и сега е во фаза на евалуација, далекуводот од Македонија кон Албанија во вредност од 50 милиони евра кој е проектиран, а ќе се распише во јануари. Преку Законот за енергетика ќе се отвори простор за инсталација на 200 мегавати фотоволтаици кои ќе бидат распишани во две фази, првата ќе биде во првиот квартал во 2019“, соопшти Анѓушев.

Тој посочи дека со овие активности кои што се во тек, во 2019 започнува еден сериозен градежен процес на патна, железничка и енергетска инфраструктура кој на месечно ниво се очекува да има реализација од околу 50 до 60 милиони евра што ќе го подигне градежништвото на ниво на кое заедно со приватните градби ќе генерира раст.


Изградбата на гасоводот од Штип до Неготино ќе заврши кон крајот на јануари


Неготино, 23 декември, 2018 - 10:56 (META) 

Изградбата на гасоводната мрежа од Штип до Неготино е во завршна фаза, комплетно ќе заврши кон крајот на јануари или кон средината на февруари и веднаш потоа ќе се пушти во употреба, информираше министерот за транспорт и врски Горан Сугарески кој заедно со директорот на Македонски енергетски ресурси (МЕР), Бајрам Реџепи извршија увид во финализирањето на градежните работи на оваа гасоводната делница.

– И во делот на краците кои што одат до Битола и до Гостивар во 2019 година очекуваме сериозна динамика. Гасификацијата е стратешки приоритет на Владата, а тоа се потврдува, бидејќи во буџетот за 2019 се предвидени 1 милијарда и 557 милиони денари. Согласно потпишаните договори кои ги имаме со изведувачите, дел од нив ќе завршат кон крајот на 2019 година, дел и во 2020 година – рече Сугарески.

Тој додаде дека надминати се речиси сите проблеми и со финализирање на процесот на експропријација на земјишта. Дополнително, Сугарески информираше дека на претпоследната седница на Влада, Министерството за економија се задолжи да формира работна група која ќе одлучува за најефикасниот модел за развој на системи за дистрибуција на природниот гас во Македонија.

–  Многу е важно во овој процес забрзано да работат и општините за да може паралелно да ги градат општинските дистрибутивни мрежи, за што побрзо гасот да го донесеме до домовите и компаниите.Уште еднаш сакам да упатам апел до општините, најбрзо да работат на проектите, на документација, да одвојуваат средства од буџетот за да бидат приклучени сите градови околу кои се работи – додаде Сугарески.

Директорот на МЕР, Реџепи информираше дека должината на делницата во завршна фаза од Штип до Неготино е 36 километри, а инвестицијата е вредна 15, 8 милиони евра.Главната мерна регулациона станица Неготино е предвидена да биде со максимален капацитет за опслужување на природен гас од 7.000 метри кубни на час.

– Овој е последниот градежен зафат во лот 1, од делницата од Штип до Неготино во вкупна должина од 36 километри. Нискиот дел е комплетно завршен, направен е успешен хидротест и очекувам до крајот на следниот месец или првата половина на февруари да има употребна дозвола, да биде во можност да се наполни со гас и да опслужува кон дистрибутивните оператори – рече Реџепи.

Тој додаде дека и во другите два лота има интензивни градежни активности, и во втората половина од оваа година имало задоволително ниво на реализација на проектите.

– Паралелно се работи и на поврзување на магистралниот гасовод од Неготино преку Кавадарци, Прилеп па се до Битола, во должина од 92 километри. На овој потег веќе има околу 40 проценти реализација на градежните работи. Со инвестиција од 29 милиони евра, интензивно се работи и на делницата од Тетово до Гостивар, со околу 35 проценти реализација на градежните работи – рече Реџепи.

Реџепи очекува дека во првиот квартал во 2020 година делницата од Неготино кон Битола ќе биде завршена. Додека за делницата од Скопје до Гостивар се очекува да биде завршена до крајот на наредната година или може да има продолжување од три месеци, поради како што рече, големиот број измени кои во тек на градба се појавиле и се покажале неминовни да се направат.

Тој додаде дека оваа гасоводна делница е многу битна затоа што ќе биде јазол не само за приклучување кон лот 2 туку и за приклучување кон интерконекцискиот вод со Грција.

– Со задоволство информирам дека е направена физибилити студијата заедно со грчкиот оператор и аплицирано е за грант за градба. При крај се преговорите со значителни европски финансиски институции за финансирање на оваа делница и очекувам дека брзо ќе имаме конкретен договор за финансирање. Оваа интерконекција ни е најважна, бидејќи не само што ќе добиеме конкурентен и стабилен систем за снабдување, туку ќе имаме и диверзификација на сите наши извори за снабдување со природен гас – додаде Реџепи.


Општина Центар го продолжи мораториумот за градби до април 2019


Скопје, 14 декември, 2018 - 12:19 (META) 

Советот на Општина Центар на вчерашната седница го продолжил мораториумот за градби на територија на општината, односно повторно ја донел одлуката за запирање на спроведувањето на деталните урбанистички планови.

„Мораториумот за градби за првпат беше донесен на 27 декември минатата година и продолжувањето е со важност до 30 април 2019. Со мораториумот, 31 ДУП се враќаат на повторна доработка, а истовремено се забранува издавање на одобренија за градби на територија на општината, со што идејата на општината е да воведе ред во урбанистичкото планирање, но и да придонесе кон намалување на загадувањето на околината и атмосферскиот воздух“, се вели во соопштението на Општина Центар.

На предлог на советничката група на ВМРО-ДПМНЕ, додадена беше и точката за поддршка на семејствата на бранителите – учесници во конфликтот од 2001 година.

„Градоначалникот Саша Богдановиќ, во консултација со советниците, материјалот го даде на понатамошна обработка и точката за поддршка на бранителите ќе се најде на дневен ред на некоја од идните седници“, се додава во соопштението.


Макрадули: Има мораториум на ДУП-от во Центар, зградата кај ГТЦ не може да се гради


Скопје, 30 ноември, 2018 - 14:05 (META) 

Заменик-министерот за животна средина Јани Макрадули, при денешната посета на Цементарница УСЈЕ во рамки на отворениот ден на компанијата, прашан за изградбата на висококатницата кај паркингот пред „Холидеј ин“, рече дека во овој момент ДУП-от има мораториум.

– Според изјавата на градоначалникот на Општина Центар не мислам дека е се поизвесно градењето на таа висококатница. Во овој момент, тој ДУП има мораториум и согласно тоа, во овој момент не постои начин како да се издаде дозвола за нешто што е во рамки на некој план кој има мораториум – одговори Макрадули на прашањето дали Министерството ќе реагира на оваа изградба.

Тој потсети дека лани се донел Законот за зеленилото, кое што треба да го има во процесот на градење на секој објект.

– Правилникот е готов и тој ќе биде објавен деновиве. Така што задачата на министерството да се грижи за бројот, површината и зеленилото ќе биде спроведувано согласно закон – додаде Макрадули.

Тој уште еднаш го повтори својот став дека главни причинители за загадувањето во Скопје и Битола се домаќинствата.

– Уште еднаш да повторам, може да се зборува и за мустаќите на заменик-министерот и за фотомонтажите, но она што е реалноста и науката го вели тоа, дека во Битола и во Скопје за загадувањето е виновно домашното затоплување. За жал, многу граѓани не од тоа што сакаат, туку заради социјалниот статус користат извори на затоплување кои не се еколошки. Тоа е наша задача, со средства од буџетот со партнерски однос со компаниите да им ги замениме, да не ги ставаме во дополнителен трошок – рече Макрадули.


Реџепи: Гасоводот преку Водно ќе се гради, се чекаат потребните дозволи


Скопје, 9 октомври, 2018 - 17:05 (META) 

Ќе продолжи ли изградбата на гасоводната траса преку Водно или ќе запре поради прекројувањето на државната каса со кое ќе има кратење на значителен дел од средствата наменети за инфраструктурни проекти, како што е гасификацијата?

Според Македонски енергетски ресурси (МЕР), претпријатие кое го реализира проектот на гасификација и кој ја гради и трасата на гасоводната делница 5, Скопје – Тетово – Гостивар, работите околу изградбата на другите делови од трасата се одвиваат непречено.

– Очекуваме да заврши процедурата во Министерството за транспорт и врски околу дозволата за изменетата траса преку Водно и кога ќе ја добиеме, работите на изградбата на гасоводот на тој потег треба да продолжат“, вели директорот на МЕР, Бајрам Реџепи.

Според него, изградбата на оваа гасоводна делница не е засегната од ребалансот на буџетот бидејќи парите за овој проект се одамна обезбедени.

Вчера, министерот за транспорт и врски, Горан Сугарески  рече дека, наспроти оптимизмот дека изградбата на гасоводот на Водно ќе се деблокира и дека парите ќе се искористат до крајот на годинава, тоа немало да се случи.