!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Општините Сопиште и Чешиново-Облешево добија грантови од ИПА-програмата


Скопје, 22 јуни, 2017 - 12:56 (META) 

Општините Сопиште и Чешиново-Облешево денеска добија грантови во вкупен износ од 237.733 евра од ИПА-програмата на Европската Унија.

– Денеска потпишуваме договори за изградба на детска градинка во Општина Сопиште и за изградба на локални улици и за подобрување на водоснабдувањето во Општина Чешиново-Облешево. Изградбата на инфраструктура во руралните средини е еден од приоритетите на реформската влада. Вложувањата во изградба на градинки, училишта, патишта и во енергетика се вложувања во трајни добра од кои директна корист имаат граѓаните. Тие придонесуваат за одржлив економски и социјален развој и воедно ги намалуваат разликите помеѓу урбаните и руралните заедници – изјави министерот за финансии, Драган Тевдовски.

Тој додаде дека ИПА-програмата за рурален развој е од особена важност за Македонија, при што е предвидено е да бидат доделени 20,7 милиони евра во различни општини во земјава.

Тевдовски рече дека како министер за финансии ќе се заложи да има поголема искористеност на фондовите што Европската Унија ни ги дава на располагање.


Заев ја информирал амбасадорката Лисјен за проблемите со изградбата на автопатиштата


Скопје, 19 јуни, 2017 - 14:10 (META) 

Премиерот Зоран Заев денеска се сретнал со кинеската амбасадорка во земјава, Лин Лисјен, и ја информирал за проблемите во изградбата на двата автопатишта Миладиновци – Штип и Кичево – Охрид, во чијашто изградба учествува Кина.

Тој изјавил дека повеќемесечниот застој на изградбата на автопатиштата е предизвикан од грешки во проектирањето, ненавремено решавање на имотно-правни односи на автопатот кон Штип и од изместување на трасата кон Охрид.

За таа цел, Заев најавил средба во најскоро време со кинескиот изведувач и со другите вклучени страни во проектите, заради наоѓање брзо решение.

Кинеската амбасадорка Лисјен му врачила писмо на Заев од премиерот на НР Кина, Ли Кечијанг, во кое се порачува дека Кина во новата Влада гледа добар партнер и голем потенцијал за продлабочување на соработката помеѓу двете држави.


„Актор“: Судските власти во Скопје, предметот со автопатот го ставија во архива во 2014 година


Атина, 10 јуни, 2017 - 12:23 (META) 

Грчката компанија „Актор“ нема сознание за постоење кривично гонење во врска со договорот за изградба на автопатот Демир Капија – Смоквица, соопштуваат од компанијата.

Оттаму велат дека по извршената ревизија судските власти во Скопје, предметот го ставиле во архива во 2014 година. Според нив, договорт за изградба на автопатот е потпишан врз основна на добиен меѓународен тендер.

Грчките медиуми „Прототема“ и „Катимерини“ пишуваа дека Европската агенција за борба против корупција (ОЛАФ) ја обвини оваа компанија за измама и за перење пари во износ од 50 милиони евра при изградба на автопатот Демир Капија – Смоквица.

Од „Актор“ негираат дека се переле пари при изградбата на автопатската делница и посочуваат дека немало никаква измама при одвивањето на градежните работи.

На прашање на „Мета“, Основното јавно обвинителство за гонење организиран криминал и корупција пред две години изјави дека презема активности и прибира докази кои се неопходни за расветлување на случајот „Актор“.

„Со оглед на комплексноста на случајот, во надлежното обвинителство се преземаат дејства за прибирање докази, неопходни за утврдување на околностите на извршување на конкретниот кривично-правен настан“, одговорија на 24 март 2015 година од Обвинителство.


Грчки „Актор“ обвинет за перење на 50 милиони евра за автопатот Демир Капија – Смоквица


Атина, 8 јуни, 2017 - 10:18 (META) 

Европската агенција за борба против корупција (ОЛАФ) ја обвини грчката компанија „Актор“ за измама и за перење пари во износ од 50 милиони евра при изградба на автопатот Демир Капија – Смоквица, пишуваат грчките медиуми „Прототема“ и „Катимерини“.

Случајот се нашол под лупа на јавен обвинител по доказите што ги собрала ОЛАФ.

Грчката градежна фирма во 2012 година го доби тендерот за изградба на 28-километарската делница, а името на „Актор“ стана актуелно во 2014 година, кога СДСМ обвини дека од македонски банкарски сметки незаконски биле извлечени 3,5 милиони евра.

СДСМ презентираше документи и тврдеше дека грчки државјани, преку преставништвото на грчката фирма „Актор“ во земјава, подигале милиони евра во кеш од филијала на „Стопанска банка“ Скопје, во Неготино.

„Прототема“ исто така пишува дека некои од вработените подигале месечна плата од 110.000 евра.

На прашање на „Мета“, Основното јавно обвинителство за гонење организиран криминал и корупција пред две години изјави дека презема активности и прибира докази кои се неопходни за расветлување на случајот „Актор“.

„Со оглед на комплексноста на случајот, во надлежното обвинителство се преземаат дејства за прибирање докази, неопходни за утврдување на околностите на извршување на конкретниот кривично-правен настан“, одговорија на 24 март 2015 година од Обвинителство.

Пред две години, по налог на грчкото државно обвинителство, грчката финансиска полиција го уапси сопственикот на „Актор“, Леонидас Боболас, за даночно затајување и за долг кон државата.


ЛДП бара поништување на „скандалозниот“ договор за изградба на нов клинички центар


Скопје, 19 мај, 2017 - 19:26 (META) 

Никола Тодоров, Никола Груевски и Емил Димитриев денеска потпишаа и поддржаа скандалозен и бескруполозен договор за изградба на нов клинички центар во Скопје, свесно произведувајќи нови линии на поделба и беззаконие во Рeпублика Македонија, обвинуваат од Либерално-демократската партија (ЛДП).

Оттаму велат дека потпишувањето на ваков договор од страна на лице „кое не е ништо друго, освен пратеник во новиот собраниски состав“, е класично кршење на Уставот и на законите во државата.

„Прашуваме во кое својство Никола Тодоров потпишува милионски договори со поддршка на техничка Влада, која патем нема друга функција освен организирање избори. Или можеби провизиите се поважни од почитувањето на законите и владеењето на правото? ЛДП, како дел од новата влада, ќе го преиспита договорот и за истиот ќе има одговорност“, стои во соопштението на ЛДП.

Од партијата ги повикуваат надлежните институции да го поништат договорот, кој, како што велат од ЛДП, претставува преседан во секој поглед.

„И компаниите потписници на договорот би требало да знаат дека оваа техничка влада ниту имала, ниту има легитимитет да потпишува проекти, уште повеќе што се работи за изградба на клинички центар, кој е од голем национален интерес“, додаваат од ЛДП.


„Гранит“, „Бетон“ и италијанска компанија ќе го градат новиот клинички центар во Скопје


Скопје, 23 април, 2017 - 15:54 (META) 

Новиот клинички центар во Скопје во вредност од 72 милиони евра ќе го градат двете најголеми македонски градежни компании, „Гранит“ и „Бетон“, во соработка со една италијанска компанија, информираше денеска на прес-конференција министерот за здравство Никола Тодоров.

– Оваа понуда е избрана како најприфатлива за доделување на договорот за изведба, а истовремено ги исполнува сите услови што се предвидени за изградба на вакви комплексни објекти. Изборот е направен врз основа на добивање одобрување од страна на Банката за развој на Советот на Европа. Комисијата за секој чекор и одлука добиваше одобрение од стручен тим на Банката за развој на Советот на Европа – истакна Тодоров.

Тој нагласи дека прво ќе се обезбедат привремени пристапни патишта во рамки на Клиничкиот центар, како и трансфер на клиниките за неврологија, кожна и очна клиника во простор каде ќе ги извршуваат своите функции додека трае градбата.

– Рокот за завршување на градбата на новиот клинички центар е предвиден за 45 месеци. Вкупната новопроектирана нето-површина на оваа зграда изнесува 47.000 квадратни метри, околу 6.500 квадратни метри проодни тераси и покривни градини. Зградата се состои од едно подземно ниво, приземје, девет ката и современ хелиодром за транспорт на пациенти на десеттото ниво со површина од 531 квадратен метар – нагласи Тодоров.

Тој не зборуваше за италијанската компанија, но „Телевизија 24“ неодамна објави дека италијанската компанија „ИНСО Системи“, која заедно со двете македонски компании е носител на конзорциумот што го доби тендерот, во последните години работела со загуба, што било спротивно на условите од тендерската документација.


Општина Центар ја стопираше изградбата на спорната улица на кејот на Вардар


Скопје, 19 март, 2017 - 16:03 (META) 

Градежен инспектор на општина Центар, по налог на градоначалникот на општината, Андреј Жерновски, денеска наредил стопирање на градежните работи за изградба на спорната улица на Кејот 13 Ноември.

„На градилиштето нема информативна табла кој е инвеститор, изведувач и надзор, нема податоци за одобрена техничка документација и одобрение за подготвителни работи. Целата оваа документација е неопходно да се поседува и да биде јавно истакната на градилиштето. На ова градилиште недостига и елаборат за околчување на теренот од овластена геодетска фирма, лиценци за инженер за изведба, надзорен инженер и елаборат за заштита при работа. Затоа, овластениот градежен инспектор на Општина Центар ја издаде наредбата за стопирање на градежните активности на кејот на Вардар“, стои во соопштението од Општина Центар.

Од Општината денеска ги обвинија Градот Скопје и градоначалникот Коце Трајановски дека донеле незаконска одлука за изградба на сервисна улица, со која се узурпира шеталиштето на кејот. Оттаму велат дека во актуелниот Детален урбанистички план (ДУП) никаде не е предвидена изградба на ваква улица, туку подземна сервисна улица.

Од Градот Скопје ги отфрлаат ваквите наводи и тврдат дека изградбата на улицата не е во нивна надлежност и дека Градот само издал градежна дозвола, врз основа на деталниот урбанистички план донесен од Општина Центар во 2012 година.


Општина Центар: Во ДУП никаде не постои улица на кејот, Трајановски ги крши законите


Скопје, 19 март, 2017 - 11:40 (META) 

Град Скопје, под чија ингеренција е кејот, донесе незаконска одлука да го узурпира шеталиштето и да направи сервисна улица, која според актуелниот детален урбанистички план (ДУП) никаде не постои, велат од Општина Центар.

„Вчера, Град Скопје и ВМРО-ДПМНЕ повторно се обидоа да ги кршат законите и да ги манипулираат граѓаните, кои мора да ја знаат вистината за улицата што Град Скопје сака да ја прави на кејот на Вардар и чија е одговорноста за оваа незаконска одлука. Во постоечкиот ДУП за Мал Ринг, никаде нема предвидено таква улица, туку подземна сервисна улица, како што и јасно се гледа на планот. Лага е дека тоа ќе биде повторно шеталиште или дека улицата ќе биде само за достава. Ако е така, рестораните и сега го користат кејот за достава и затоа нема потреба ништо да се гради. Доколку е потребна сервисна улица за зградата на ‘Телеком’, таа мора да биде направена под земја, согласно важечкиот ДУП“, стои во соопштението од Општината.

Оттаму велат дека Општина Центар досега ја блокирала изградбата на улицата со сите расположливи механизми и дека ќе продолжи да го прави тоа, за да го заштити кејот на Вардар. Од Општината го повикуваат државниот инспекторат веднаш да го преиспита „незаконски издадено одобрение за градба од страна на Град Скопје“, кое градоначалникот Коце Трајановски го потпишал на 31 декември 2016 година.

„Градоначалникот Коце Трајановски и неговата партија мора да разберат дека од пролетта 2013 година, општина Центар престана да биде полигон за незаконски и криминални активности. Инспекциските служби на Општина Центар ќе направат увид во постоечката документација и ќе го информираат државниот инспекторат, за истиот да се произнесе за оваа незаконска градба“, нагласуваат од Општина Центар.

Вчера, на Кејот 13 Номеври почнаа градежните работи за изградба на спорната улица што наиде на силно негодување и кај сопствениците на околните угостителски објекти, кои излегоа на протест.


Град Скопје: Ние не носиме ДУП и не ја градиме улицата на Кејот


Скопје, 18 март, 2017 - 18:36 (META) 

Град Скопје не е институцијата што го донела деталниот урбанистички план и не ја гради сообраќајницата на Кејот 13 Ноември, се вели во реакцијата на Град Скопје на прес-конференцијата на претседателот на општинската организација на СДСМ во Центар, Саша Богдановиќ.

Од Градот велат дека изјавите на Богдановиќ се невистини и манипулации и дека темата околу изградбата на сообраќајницата подолг период се злоупотребува од „одредени институции, политичари и политички партии“ за дневно-политички цели.

„Градот Скопје сака да ја информира јавноста дека изградбата на оваа пристапна улица со посебен сообраќаен режим е предвидена со детален урбанистички план донесен од Општина Центар, а истата ја гради приватен инвеститор. Град Скопје не е институција што ја има вцртано оваа улица и Град Скопје не е тој што ќе ја гради. Градот Скопје, врз основа на валиден документ, детален урбанистички план, кој е донесен од Општина Центар, е законски обврзан да издаде градежна дозвола за тоа. Доколку не го стори тоа, Градот Скопје може да биде тужен од инвеститорот и да сноси финансиски последици“, стои во соопштението од Град Скопје.


Богдановиќ: Трајановски да ја повлече одлуката за изградба на улица на Кеј 13 Ноември


Скопје, 18 март, 2017 - 17:07 (META) 

Социјалдемократскиот сојуз на Македонија денеска го повика градоначалникот на Скопје, Коце Трајановски, да ја повлече одлуката и одобрението за изградба на сообраќајница на Кејот 13 Ноември.

– Изминатиот период донесовме една одлука како Општина Центар, каде што законски успеавме да ја спречиме изградбата на оваа улица, но сепак со измени на законот, Градот ни ги одзеде ингеренциите во тој дел – изјави денеска претседателот на општинската организација на СДСМ во Центар, Саша Богдановиќ.

Тој рече дека за понеделник е договорена вонредна седница на Советот на Општина Центар, на која, како што рече, ќе бидат преземени сите законски мерки за да се спречи да продолжи изградбата на спорната улица.

– Сакаме да апелираме и до инвеститорот, односно изведувачот на улицата, веднаш да престане бидејќи ќе се соочи со санкции. Го повикуваме и градоначалникот на Град Скопје, Коце Трајановски, да ја повлече одлуката за изградба на оваа улица, односно одобрението за градба. Ако тоа не се случи, како Општина Центар ќе преземеме соодветни мерки – рече Богдановиќ.

Одговарајќи на новинарско прашање, какви мерки планира да преземе Општина Центар, Богдановиќ рече дека „најрадикалното“ нешто што ќе го преземат, а го најавиле  и претходно, е тоа што ќе бараат отфрлање на актуелниот детален урбанистички план (ДУП) и враќање на претходниот.

– Ќе го вратиме ДУП во првобитна состојба, каде што беше предвидена изградба на подземна сообраќајница и со тоа ќе ја спречиме изградбата на оваа улица – изјави Богдановиќ.