СДСМ одлучи да не оди на предвремени парламентарни избори


Скопје, 13 февруари, 2019 - 9:22 (META) 

Извршниот одбор на СДСМ одлучи да нема предвремени парламентарни избори, заедно со претстојните претседателски избори, како што бараше опозицијата. Портпаролот Костадин Костадинов по завршување на седницата синоќа изјави дека, граѓаните бараат резултати во економијата, реформите и интеграциите.

„Државотворна партија на која на прво место и се интересите на граѓаните и државата не мисли на предвремени избори дури и кога рејтингот и поддршката од граѓаните е многу повисока од онаа на опозицијата. Како одговорна влада најавивме економска година, создавање силна економија која отвора шанса за сите. Економијата е раздвижена и стабилизирана, платите растат, се зголемуваат инвестициите, се отвораат нови работни места, се повеќе пари завршуваат кај граѓаните.Тоа е добра основа за засукување на ракавите и посветување на резултат што го бараат граѓаните, на се она што е потребно за подобар животен стандард на сите наши граѓани“, рече Костадинов.

За претседателските избори тој додаде дека Република Северна Македонија ја очекуваат кристално чисти, фер и  демократски претседателски избори на кои ќе победат граѓаните, ќе победи СДСМ.

„Извршниот одбор на СДСМ го овласти претседателот на партијата, генералниот и организациониот секретар, да направи консултации со коалициските партнери како и со други парламентарни и вонпарламентарни партии, за да дојдеме до консензуален кандидат за претседател на државата, заеднички да застанеме зад кандидат за кој што ќе застанат граѓаните“, додаде Костадинов.


Изборот на новите антикорупционери денеска на комисија, па на собраниска пленарка


Скопје, 8 февруари, 2019 - 10:40 (META) 

Во собраниската Комисија за прашања на изборите и именувањата денеска ќе се утврди предлог-листата за именување на претседател и членови на Државната  комисија за спречување на корупцијата, односно за новите антикорупционери.

Потоа таа листа ќе оди на гласање во Собранието.

Во Законодавно-правната комисија ќе се дискутира и за предлог на закон за изменување и дополнување на Законот за класифицирани информации, по скратена постапка, во второ читање, а во таа комисија  и во Комисијата за политички систем и односи меѓу заедниците, во второ читање, ќе биде Предлог на закон за изменување и дополнување на Законот за слободен пристап до информации од јавен карактер, по скратена постапка.

Се очекува и денеска претседателот на Собранието да ги распише претседателските избори.


ДИК: До петок подигнете ги личните карти и пасошите или нема да бидете во Избирачкиот список


Скопје, 6 февруари, 2019 - 15:35 (META) 

Државната изборна комисија (ДИК) на прес-конференција денеска порача дека согласно Изборниот законик, МВР наредниот ден од  денот кога се  распишани изборите е должно до Државната изборна комисија да ги достави податоците на граѓаните кои потоа ќе бидат запишани во Избирачкиот список. Тоа може да бидат само лица со наполнети 18 години живот, кои на денот на изборите имаат важечка лична карта или пасош. Без важечки документ, граѓанинот не може да биде внесен во Избирачкиот список.

Затоа граѓаните треба да ги подигнат новоизготвените лични документи најдоцна до петок.

– Бидејќи за важечки документ се смета само издаден документ, ДИК ги повикува сите граѓани кои сакаат да го остварат своето избирачко право на престојните претседателски избори, да ги подигнат изготвените лични документи (лични карти и патни исправи) од Управните служби на МВР. Апелираме граѓаните тоа да го сторат до петок, 8 февруари. Доколку не ги подигнат своите документи, овие граѓани нема да бидат запишани во Избирачкиот список кој ќе биде ставен на јавен увид  – предупреди ДИК.

Одделението за управни работи-Скопје и отсеците за управни работи во Битола, Велес, Куманово, Охрид, Струмица, Тетово и Штип работат секој работен ден од 7 до 21 часот и секоја прва сабота во месецот од 8 до 16 часот, а подрачните единици под нивна надлежност од 7.30 до 16.30 часот.


Алијанса за Албанците: Одлуката на ДУИ да излезе со свој кандидат е за поздравување


Скопје, 31 јануари, 2019 - 10:20 (META) 

Алијанса за Албанците (АА) денеска ја поздрави вчерашната одлука на Централното претседателство на Демократската унија за интеграција (ДУИ) да излезе со свој кандидат на претседателските избори.

АА порача дека „ДУИ го прифати предизвикот на Зијадин Села за претседателските избори“ но ја поттикна владејачката партија да го прифати и предизвикот за парламентарни избори“.

„Посакуваме кандидатот за претседател од редовите на ДУИ да биде Албанец! Не би сакале да веруваме дека оваа нивна одлука дојде како последица на затворената врата и презир кон ДУИ во однос на нивната лажна идеја за консензуален кандидат, денес со СДСМ, вчера со ВМРО-ДПМНЕ“, вели АА.


Игор Јанушев – шеф на изборниот штаб на ВМРО-ДПМНЕ за претстојните избори


Скопје, 25 јануари, 2019 - 11:22 (META) 

Извршниот комитет на ВМРО-ДПМНЕ на вчерашната седница за претседател на Унијата на млади сили на партијата го избрал Јован Јаулески, а за шеф на изборниот штаб за претстојните претседателски избори бил избран генералниот секретар Игор Јанушев, соопшти партијата.

За советник за меѓународна политика на претседателот Христијан Мицкоски е избран Стефан Андоновски, додека за советник за меѓусоседска политика е избран Тони Димитриевски.

На седницата на Извршниот комитет беше дискутирано и за подготовките за конвенцијата за избор на кандидат за претседател на ВМРО-ДПМНЕ, која ќе се одржи во Струга на 16 февруари.

Од партијата информираат дека на Извршниот комитет се дискутирало и за актуелната политичко-економска ситуација во државата и, како што велат, хаосот кој го предизвикала власта.

„ИК заклучи дека Македонија не смее да продолжи да губи и тоне поради неспособноста на власта, која ги распродава националните интереси на сметка на ситни партиски поени. Кратењето на пензиите, ударот врз пазарџиите, поскапувањето на здравствените услуги, хаосот со епидемијата на морбили, од една страна и зголемувањето на платите на вицепремиерите и вработувањето на блиски роднини во државните компании се најдобар доказ за аздисаноста на власта и нивниот единствен интерес за лично богатење, информираат од партијата.

Од ВМРО-ДПМНЕ констатираат дека најбрз и најефективен излез се предвремени парламентарни избори, кои е потребно да се одржат заедно со претседателските.


Заев: За десет личности се прават анкети кој би бил најдобар кандидат за претседател


Скопје, 22 јануари, 2019 - 14:08 (META) 

Централниот одбор на СДСМ ќе се одржи во петок, а дебатата за консензуален кандидат е во тек, одговори денеска на новинарско прашање премиерот Зоран Заев во врска со името за консензуален претседател, на прес-конференцијата во Владата посветена на проекти во патната инфраструктура.

Тој додаде дека, како партија и коалиција која сака да победи на претседателските избори, прават анкети кој кандидат најдобро ќе помине кај граѓаните и дека тој треба да биде прифатлив за сите.

„За повеќе од десет имиња се прави истражување. Одиме чекор по чекор, дебатираме, го слушаме ставот на граѓанските организации, на граѓаните за да најдеме личност која е најприфатливо решение за сите“, рече Заев.

Тој додаде дека доколку се оди само на претседателски избори тие треба да поминат покомфорно за граѓаните, за да не се наршат процесите што течат во државата. Премиерот го повтори неговиот познат став дека лично е против парламентарни избори заедно со претседателските.

„Изминатиот период донесовме тешки одлуки, и граѓаните сега треба да ги соберат плодовите од тие одлуки. Но треба да се слушне и партијата, сите анкети покажуваат дека СДСМ и Коалицијата е во предност и оттука избори ни одговараат. Тоа значи обезбеден четиригодишен мандат, мнозинство во парламентот, но ќе трпи државата“, рече Заев и додаде дека сигурно е дека заедно со претседателските избори ќе има локални за избор на градоначалник во Охрид, Ново Село и Дебар.

Прашан за Законот за јазици кој е даден на Венецијанска комисија, премиерот одговори дека како и до сега сите препораки ќе бидат имплементирани за да се отстрани секој сомнеж на граѓаните.


Мицкоски побара вонредни парламентарни избори заедно со претседателските


Скопје, 11 јануари, 2019 - 20:43 (META) 

Во првата изјава по усвојувањето на измените на Уставот во Собранието со 81 глас „за“, лидерот на опозициската ВМРО-ДПМНЕ, Христијан Мицкоски, побара распуштање на Собранието и одржување на вонредни парламентарни избори заедно со претседателските избори.

Мицкоски рече дека не ја поддржува промената на Уставот за промена на уставното име и дека со договорот од Преспа се нанесува огромна штета и неправда.

– ВМРО-ДПМНЕ бара веднаш распуштање на парламентот и одржување на вонредни парламентарни избори заедно со претседателските избори, според законските прописи, и врз основа на минатото искуство, и на овие избори ВМРО-ДПМНЕ ќе победи – рече Мицкоски.


Охридските советници утре ќе избираат в.д. градоначалник


Охрид, 24 декември, 2018 - 16:39 (META) 

Општина Охрид испратила известување до Министерството за локална самоуправа кое пак ја известило Владата за престанок на функцијата градоначалник на Охрид поради ненадејната смрт на градоначалникот Јован Стојаноски.

Во моментов во општината нема овластен потписник и администрацијата не може да прими плата. За да може опшината да функционира ќе се избира в.д. градоначалник.

За утре во 11 часот претседателката на Советот, Живка Ангелоска, свика вонредната седница на Советот на општината. На дневниот ред е само една точка односно „Избор на вршител на должноста градоначалник на општина Охрид“.

Избори за градоначалник распишува Собранието кое Освен за Охрид треба да распише избори и за Дебар и Ново Село.


Истражување: Изборниот систем e сериозен извор на кризи во Македонија


Скопје, 19 ноември, 2018 - 16:54 (META) 

Изборниот систем, ваков каков што е сега, е сериозен извор на кризи во земјава. Ова е генералниот заклучок од истражувањето на Фондацијата „Метаморфозис“ во рамките на регионален проект за оцена на исполнувањето на политичките критериуми за пристапување на земјите од Западен Балкан кон Европската Унија.

Истражувањето, кое е правено врз база на претходно развиена прецизна методологија и со помош на интервјуа со експерти, посочува дека во изборниот систем во Македонија треба да се сменат повеќе работи – од промена на моделот на шест изборни единици во една, преку промени во начинот на оформување на избирачкиот список, до промени во делот медиуми и избори, вграден во изборното законодавство.

Препораките произлезени од истражувањето се следни:

  •     Промена на изборниот модел – една наместо шест изборни единици и отворени листи, со соодветен изборен праг достижен и за помалите партии или независните кандидати;
  •     Промена на начинот на регистрацијата на избирачите во Избирачкиот список;
  •     Зајакнување и прецизирање на казнената политика за притисоци врз избирачи и за клиентелизам;
  •     Зајакнување и прецизирање на казнената политика за злоупотреба на државни ресурси и административни капацитети за изборни кампањи;
  •     Зајакнување на казнените одредби и глоби за финансирањето на кампањите, т.е. за изготвувањето на финансиските извештаи;
  •     Зајакнување на капацитетите на ДИК (Државната изборна комисија) и трансформација на ова тело или во професионално или во мешовито (професионално политичко);
  •     Зајакнување и прецизирање на законските и подзаконските акти што ја гарантираат транспарентноста на изборниот процес, особено во делот на приговорите и жалбите;
  • Доуредување на законската рамка за обврските на медиумите во текот на избори, кратење на времето што им е обврска за платени политички кампањи и нова проценка преку јавна расправа за користењето јавни пари во медиумите.

Истражувањето е прво од петте што се планирани в рамките на регионалниот проект „Западен Балкан и процесот на пристапување во ЕУ: Примена на политичките критериуми“, што го води Центарот за демократска транзиција од Подгорица, Црна Гора. Следните истражувања ќе се однесуваат на реформите во правосудството, на борбата против организираниот криминл и корупцијата, на реформата во медиумскиот сектор и на реформата во јавната администрација.

Проектот е подржан од Амбасадата на Кралството Норвешка во Белград, и од Балканскиот фонд за демократија, проект на Германскиот Маршалов фонд на САД.

Целосното истражување можете да го погледнете на следниот линк.


Aхмети: На претседателските избори ќе бараме консензуален претседател


Скопје, 8 ноември, 2018 - 12:28 (META) 

Лидерот на ДУИ, Али Ахмети, на гостување во емисијата „Клан дебат“ на телевизијата „Клан Македонија“, кажа дека на следните претседателски избори кои треба да се одржат ќе побараат консензуален претседател.

На прашање дали на претседателските избори ДУИ повторно ќе игра на картата на консензуален претседател Ахмети изјави дека тој е нивен став кој го објавиле и ќе го бранат.

– Секако ова е еден од ставовите кои сме ги објавиле и ќе го браниме со фанатизам и ќе го промовираме на сите простори тука во Македонија. Ние сакаме консензуален претседател, да седнеме, да разговараме, да се усогласиме – рече Ахмети.

Ахмети исто така кажа дека веќе има и имиња за кандидати консензуален претседател, но се уште е рано да се збори за тоа.

– Секако дека може да зборуваме и со имиња, но се уште е рано за тоа – рече Ахмети.