Тригодишнина од првата „бомба“: Разговорите кои ја потресоа и ја променија Македонија


Скопје, 9 февруари, 2018 - 14:01 (META) 

Со објавувањето на првиот комплет прислушувани разговори на 9 февруари 2015 година, по долго најавување во претходниот период, претседателот на тогаш опозициската партија СДСМ, Зоран Заев, предизвика лавина на настани и политички поместувања што после 11 години, минатата година ја симна од власта ВМРО-ДПМНЕ.

Додека уште траеше објавувањето на бомбите, СДСМ почна да поднесува кривични пријави против државни функционери почнувајќи од премиерот и претседател на ВМРО-ДПМНЕ, Никола Груевски, и министри и функционери на партијата, како и против директори на јавни претпријатија.

  • Од 20 до 22 април, од 3 до 5 мај, од 17 до 20 мај, на 19 јуни 2015 година групата експерти предводена од поранешниот директор на Директоратот за Западен Балкан, Рајнхард Прибе, по теренските посети на земјата го објави својот прв извештај. 
  • На 19 мај преговорите помеѓу Груевски и Заев завршуваат со неуспех. Во текот на мај се одржани две неуспешни лидерски средби.
  • На 11 јуни 2015 година во Брисел се одржани неуспешни преговори за излез од политичката криза во земјата помеѓу еврокомесарот Јоханес Хан, амбасадорите на ЕУ и САД во Скопје, и лидерите на македонските партии.
  • На 2 јуни се одржува лидерската средба на Никола Груевски, Зоран Заев, Али Ахмети и Мендух Тачи во Пржино, при што е составен Договорот од Пржино.
  • На 15 јули со ставање потписи на протоколот се официјализира Договорот од Пржино. Потоа следуваат средби на работни групи на партиите кои ги договараат деталите за точките на договорот, под водство на белгискиот олеснувач Петер Ванхауте.
  • На 1 септември 2015 опозицијата предводена од СДСМ се врати во Собранието.
  • На 15 септември Собранието го донесе законот за Специјално јавно обвинителство. Истиот ден, Советот на јавните обвинители ја избра Катица Јанева за прв човек на новоформираната институција.
  • Во Владата на 11 ноември 2015 година влегуваат двајца министри од СДСМ и тројца заменици министри, кои се во неа до 18 мај 2016.
  • На 15 јануари 2016 година Никола Груевски поднесува оставка на премиерската функција. Таа е прифатена од Собранието на 18 јануари, а на неговото место како технички премиер застанува Емил Димитриев.
  • Кон средината на јануари 2016 година, во Пржино е одржана повторна средба помеѓу лидерите на четирите најголеми политички партии во Македонија, со посредство на еврокомесарот Јоханес Хан.
  • На 12 февруари 2016 година СЈО отвори истражна постапка за својот прв случај, под кодно име „Титаник“, за изборни нерегуларности.
  • На 12 април 2016 претседателот на државата, Ѓорге Иванов, прогласи амнестија. По протестите, на 27 мај претседателот ја повлече одлуката за помилување за 22 најекспонирани политичари, а на 6 јуни и сите преостанати одлуки за помилување.
  • Една година по првиот договор од Пржино, на 20 јули 2016 четирите политички партии одржаа втора средба, наречена Пржино 2.
  • На 2 септември 2016 година во техничката влада влегуваат повторно министри од опозицијата.
  • На 18 октомври 2016 година претседателот на Собранието Трајко Вељаноски распишува предвремени парламентарни избори.
  • Изборите се одржуваат на 11 декември 2016 година, по што лидерот на СДСМ, Зоран Заев, формира парламентарно мнозинство помеѓу партиите СДСМ, ДУИ, Беса и Алијанса за Албанците.
  • Претседателот на Република Македонија, Ѓорге Иванов, му го дава мандатот на Никола Груевски во јануари 2017 година, но тој долго време не успева да формира коалиција. Иванов одбива да го даде мандатот на Заев, но по долги притисоци тоа се случува на 17 мај 2017 година.
  • Вечерта пред полноќ на 31 мај 2017 година Собранието на Македонија со 62 гласа „за“ ја избра владата на Заев.
  • На 1 декември 2017 година Никола Груевски ја најавува и оставката на претседателското место во ВМРО-ДПМНЕ.
  • На 23 декември на партискиот конгрес во Валандово, Христијан Мицкоски е избран за нов претседател на ВМРО-ДПМНЕ.

Брнабиќ: Интеграцијата на земјите од Западен Балкан во ЕУ е важнa за иднината на регионот


Давос, 25 јануари, 2018 - 10:35 (META) 

Европската интеграција на земјите од Западен Балкан е важен фактор за иднината на регионот, изјави претседателката на Владата на Србија, Ана Брнабиќ на состанокот на групата „Нови лидери за Европа“, на Светскиот економски форум во Давос.

Таа истакнала дека Србија длабоко и искрено е посветена на европските интеграции затоа што како што рече „ги делат европските вредности и идеи за долгорочен мир, просперитет и стабилност“.

Брнабиќ додадал дека, минатогодишните избори во Германија, Франција и Холандија покажале дека најголем дел од граѓаните се посветени на европските вредности како и на економски и внатрешен развој на Унијата.

Српската премиерка се надева дека и покрај сите предизвици за оваа година, Европската Унија ќе биде посилна и поконкурентна.


Нова рунда на преговори за формирање на владејачка коалиција во Германија


Берлин, 7 јануари, 2018 - 18:11 (META) 

Германската канцеларка Ангела Меркел, почна нова рунда на преговори за формирање на коалиција, за да се стави крај на политичката криза во таа држава, објавија светските медиуми.

Во преговорите учествуваат Христијанско-демократската унија, Христијанско-социјалната унија и Социјалдемократската партија на Германија.

„Мислам дека може да успееме. Имаме цел да работиме посветено и интензивно, имајќи предвид што граѓаните на Германија очекуваат од политичарите кои ги претставуваат. Во преговорите влегувам оптимистички, иако знам дека наредните денови не очекува многу работа, но решени сме да оствариме резултат“, изјави Меркел.

Во Германија, нова влада не е избрана повеќе од три месеци по одржувањето на изборите на 24 септември.


Путин ја предаде неговата кандидатура за претседателските избори


Москва, 27 декември, 2017 - 14:41 (META) 

Претседателот на Русија, Владимир Путин и ја предаде на Централната изборна комисија документацијата за поднесување на кандидатура за претстојните претседателски избори.

Централната изборна комисија во понеделникот одби да ј регистрира кандидатурата на лидерот на опозицијата Алексеј Навални. Него кандидирањето му е оневозможено затоа што во 2013 година кривично е осуден за проневера од 16 милиони рубљи или околу 236.000 евра.

Путин на годишната конференција за медиумите во Москва одржана на средината на декември најави дека на изборите ќе излезе како самостоен кандидат.

Според истражувањата на јавното мислење во Русија, Путин моментално има поддршка од околу 80 отсто од граѓаните.

Претстојните избори за претседател на Русија ќе се одржат на 18 март, а предизборната кампања официјално започна на 18 декември.


Навални денеска ќе поднесе кандидатура за претседателските избори во Русија


Москва, 24 декември, 2017 - 14:59 (META) 

Лидерот на опозицијата во Русија, Алексеј Навални денеска ќе поднесе документи за кандидатура за претседателските избори во Русија во 2018 година.

Централната изборна комисија потоа ќе одлучи дали тој ги исполнува условите за кандидатура.
Околу 800 поддржувачи на Навални денеска се собраа на формален состанок и изразија поддршка за неговата кандидатура.

Навални е најсилниот противкандидат на Владимир Путин за претседател на Русија.

Меѓутоа, Навални е кривично осуден па Централната изборна комисија би можела да му забрани да учествува во изборите. Пресудата негова може да се повлече или да добие посебна дозвола за учество.

И покрај неговата кампања, околу 80 отсто од Русите го поддржуваат Путин, што го прави сигурен победник во изборите закажани за март следната година.


Што сè ни се случи по 11 декември: Година на избори, протести, пресврти, крв и оставки


Скопје, 11 декември, 2017 - 13:40 (META) 

Наврши една година од последните парламентарни избори, што беше исполнета со извонредно крупни настани во политичкиот живот во Македонија, од кои еден со крајно брутално насилство, кога пратеници и новинари беа брутално истепани.

11 декември 2016 годинаДеветти парламентарни избори во Република Македонија, истовремено и четврти предвремени парламентарни избори. ВМРО-ДПМНЕ и коалицијата освои 51 пратеничко место, СДСМ и коалицијата 49 мандати, ДУИ 10 пратенички места, БЕСА 5 мандати, Алијанса за Албанците 3 и ДПА 2 мандати.

glasanje-izbori-2016-a

15 декември – Пред Државната изборна комисија (ДИК) при одлучувањето за приговорите почнува протест на ВМРО-ДПМНЕ. Тоа се повторува и во следните денови, при што партискиот лидер ги напаѓа  амбасадорите и невладините организации дека се мешаат во државните работи на Македонија и работат против државата.

23 декември – Претседателот на СДСМ Зоран Заев ги повика албанските партии да не коалицираат со Груевски.

7 јануари 2017 – Партиите од албанскиот блок ДУИ, Движење Беса и Алијанса за Албанците соопштија дека усвоиле заедничка платформа, која ќе биде нивна основа во преговорите за учество во новата влада.

9 јануари – Претседателот Иванов му го додели на претседателот на ВМРО-ДПМНЕ, Груевски, мандатот да формира влада.

30 јануари – Лидерот на СДСМ, Заев изјави дека очекува Иванов да му го додели мандатот за формирање на нова влада, бидејќи Груевски во изминатите 20 дена не успеа да состави владина коалиција

1 февруари – Иванов соопштува дека ќе го додели мандатот само на  партијата или коалицијата која ќе му докаже дека  обезбедила мнозинство во Собранието, односно ќе достави собрани потписи од мнозинство од пратеници.

27 февруари – Заев објавува дека собрал 67 потписи и очекува Иванов да му го додели мандатот.

Za zaednick Makedonija

27 февруари – Почнуваат протестите на иницијативата „За заедничка Македонија“ против политичката платформа на албанските политички партии. Од таму побараа Иванов да не го дава мандатот на Заев.

1 март  – Иванов објавува дека нема намера да му довери мандатот на Заев, велејќи дека нема да даде мандат на човек или партија кој има платформа за уривање на суверенитетот, интегритетот и на самостојноста на Македонија.

Март и април – Продолжува статус-кво ситуацијата. Иванов не го дава мандатот. Во меѓувреме речиси секојдневно се одржуваат протестите на „За заедничка Македонија“

Sobranie-7

27 април -Упад во Собранието, односно „крвав четврток“. Пратениците на ВМРО-ДПМНЕ со долги дискусии блокираа да се дојде до точката за избор на претседател на новиот парламентарен состав. Откако парламентарното мнозинство составено од СДСМ, ДУИ и БЕСА во собраниската сала го избра Ферид Мухиќ за претседавач на седницата за избор на нов претседател по завршувањето на редовната седница, по што тој за свои заменици ги избра Горан Мисовски и Џевад Адеми,  пратеникот Талат Џафери од ДУИ беше  избран за претседател на Собранието. Потоа демонстрантите од „За заедничка Македонија“ влегоа во Собранието откако им беа отворени вратите од страна на некои пратеници и почна брутално тепање на пратениците и на новинари со неколкумина сериозно повредени.

30 април – 1 мај – Заменик-помошникот државен секретар за Европа и за Евроазија на САД, Хојт Брајан Ји пристигна во Скопје на дводневни средби со претседателот Ѓорге Иванов и со претседателите на политичките партии од македонскиот и од албанскиот блок. Тој го осуди насилството во Собранието и порача дека е избран нов претседател на парламентот и дека собраниското мнозинство има одговорност да формира нова влада.

17 мај – Претседателот Иванов му го даде мандатот за состав на нова влада на Зоран Заев.

19 мај – Првите официјални преговори на Заев со Ахмети и другите лидери за формирањето на новата влада.

31 мај –Пред полноќ, со 62 гласа „за“ е изгласана новата влада предводена од Зоран Заев, која веднаш потоа положи заклетва.

1 јуни – Претседателот Иванов ја прими новата влада.

план 3-6-9 plan 3-6-6

5 јули – Премиерот Заев го презентираше „Планот 3-6-9“ за брзи реформи за брзо добивање препорака за преговори со ЕУ.

6 август – Во Собранието е изгласан ребалансот на буџетот за 2017 година.

17 август – Собранието го разреши Јавниот обвинител на Република Македонија, Марко Зврлевски.

15 октомври – Прв круг од локалните избори.

29 октомври – Втор круг на локалните избори.

28 ноември – Приведени се, а подоцна и притворени дваесетина лица меѓу кои поранешниот министер за внатрешни работи и директор тна Бирото за јавна безбедност (БЈБ), Митко Чавков, организаторите на протестите „За заедничка Македонија“ и шестмина пратеници во Собранието од ВМРО-ДПМНЕ, поради насилствата во Собранието од 27 април. Обвинителството  за организиран криминал и корупција соопшти дека против нив, односно против вкупно 36 лица отворило истрага и ги товари за терористичко загрозување на уставниот поредок и безбедноста на државата.

10 декември – Никола Груевски поднесе неотповиклива оставка на местото претседател на ВМРО-ДПМНЕ.

 


Груевски: Ќе си поднесам оставка, се надевам дека тоа ќе помогне за разврска на кризата


Скопје, 1 декември, 2017 - 15:17 (META) 

Без разлика каков ќе биде исходот од анализата на изборите, јас ќе поднесам оставка пред органите на партијата, изјави денеска лидерот на опозициската ВМРО-ДПМНЕ, Никола Груевски, во интервју за „Курир“.

– Вечерта по првиот круг на изборите, јас јасно кажав дека претседателот на партијата носи најголема одговорност. Потоа во телевизиско интервју појаснив дека секогаш во еден тим кој се натпреварува, било политички, спортски, бизнис или на кое и да е поле, најголемата одговорност по дефиниција ја носи првиот човек. Тие што добро ме познаваат и тие што добро разбираат политички пораки, ме разбраа. Независно каков ќе е исходот од анализата на изборите, дури и ако објективно мојата вина е мала или најмала или дури ако се утврди дека немам објективна вина за поразот, јас ќе поднесам оставка пред органите на партијата – вели Груевски.

Тој вели дека овој чекор е дел од неговите основни принципи и вредности. Според него, ВМРО-ДПМНЕ ќе организира вонреден конгрес, на кој покрај усвојувањето на извештајот за анализата на изборите, ќе се избере и претседател на ВМРО-ДПМНЕ.

– Тоа го мислев и тогаш, вечерта на 15 октомври, но поради актуелноста на изборите, го кажав со политички речник, а тоа го мислам и сега и бидејќи двата круга на изборите поминаа, емоциите од кампањата стивнаа, можам да го кажам и најдиректно и понепосредно – додаде Груевски, кој вели дека за анализата од изборите ќе бидат потребни уште една-две седмици, а неговата оставка не е поврзана со нејзиниот исход.

Еве го делот од интевјуто за „Курир“ во кој се спомнува оставката:

Во јавноста главното прашање е дали Никола Груевски ќе остане претседател на ВМРО-ДПМНЕ или не. Дали тоа ќе зависи од исходот на таа анализа?

Груевски: …Независно каков ќе е исходот од анализата на изборите, дури и ако е таков дека објективно мојата вина е мала или најмала или дури ако се утврди дека немам објективна вина за поразот, јас ќе поднесам пред органите на партијата оставка. Партијата, согласно статутот ќе оргазнизира вонреден конгрес, на кој освен извештајот за анализта на изборите, ќе се избере и претседател на ВМРО-ДПМНЕ. Тоа го мислев и тогаш на 15ти октомври вечерта, но заради актуелноста на изборите го кажав со политички речник. Тоа го мислам и сега, и бидејќи двата круга на изборите поминаа, емоциите од кампањата стивнаа, и  можам да го кажам и најдиректно и понепосредно. Овој чекор е дел од моите основни принципи и вредности. Покрај ова се надевам дека тоа ќе помогне и во разрешувањето на целокупната политичка атмосфера.

Кога очекувате дека ќе заврши анализата и дали оставката ќе уследи по неа?

Груевски: За анализата веројатно ќе треба уште недела до две, а оставката може и не мора да е поврзана со нејзиното завршување, бидејќи не е поврзана со нејзиниот исход.


Меј ја обвини Москва за мешање во британските избори


Лондон, 14 ноември, 2017 - 10:17 (META) 

Премиерката на Велика Британија, Тереза Меј ја обвини Москва дека се мешала во британските парламентарни избори, што се одржаа на почетокот на јуни, оваа година и дека вршела кибер-шпионажа, пренесува „Би-би-си“.

Во обраќање пред бизнисмените на собир во Лондон, Меј рекла дека владата на рускиот претседател, Владимир Путин се обидува да ги „поткопа слободните општества“.

Меј истакнала дека Русија „посејала лажни приказни“ за да го „ожнее неединството на Западот“.

Британските медиуми коментираат дека ваквите наводи на британската премиерка се во голема спротивност со оние на американскиот претседател, Доналд Трамп, кој минатата недела изјави дека му верува на својот руски колега, Владимир Путин, кој повторно истакна дека Русија не се мешала во претседателските избори во САД, минатата година.

Инаку, шефот на британската дипломатија, Борис Џонсон следниот месец треба да ја посети Русија.


АВМУ ги обжалила казните за изборни прекршоци на радиодифузерите како „недоволни“


Скопје, 9 ноември, 2017 - 16:25 (META) 

Во извештајот на ОБСЕ и ОДИХР од 29 октомври 2017 година се вели дека Основниот суд донел одлуки во два случаи од првиот изборен круг, пресудувајќи казни пониски од пропишаните во Изборниот законик (ИЗ) за прекршување на изборениот молк и неизбалансирано известување.

Во првичните наоди и заклучоци на ОБСЕ и ОДИХР се вели дека иако ИЗ пропишува парична казна од 8.000 евра и 4.000 евра за вакви прекршоци, биле пресудени казни од само 4.500 евра, односно 2.250 евра.

Агенцијата за аудио и аудио-визуелни медиумски услуги (ААВМУ) поведе две прекршочни постапки против некои радиодифузери во тек на вториот круг. Случаите за однесуваат на кршење на одредбите од ИЗ за лимитите за платено политичко рекламирање и за неизбалансирано известување. Основниот суд донесе одлуки во два случаи од првиот круг, пресудувајќи казни пониски од пропишаните во ИЗ. Обете беа обжалени од ААВМУ врз основа на недоволноста на казните. Судовите допрва треба да решаваат за ова во жалбена постапка.

Зоран Трајчевски, директорот на ААВМУ, ги потврдува овие наводи, но вели дека не станува збор само за две обжалени постапки, туку дека ААВМУ „ги обжалила сите одлуки на судот“.

Трајчевски укажа и на некои чудни образложенија на судот за ниските казни, односно дека „една телевизија имала дури 17 казни, па затоа и е пресудена пониска казна“.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Управен суд утре ќе ги соопшти одлуките за тужбите за приговорите што не ги прифати ДИК


Скопје, 4 ноември, 2017 - 20:34 (META) 

Управниот суд денеска разгледал десет од 16 тужби поднесени од политичките партии Алијанса на Албанците, Беса и Народно движење за Македонија, но одлуките ќе ги соопшти утре.

Незадоволни од неприфаќањето на нивните приговори поднесени до ДИК, партиите поднесоа тужби, и тоа Алијанса за Албанците – 11, Беса поднесе четири тужби, а НДМ – една тужба, односно вкупно 16 тужби се поднесени до 10 часот денеска.

Останатите шест тужби Управниот суд ќе ги разгледува утре. Тој има обврска да донесе одлука по жалбите во рок од 48 часа по нивниот прием.