Бошњаковски: Лидерската средба може да го одблокира формирањето на ДИК


Скопје, 17 јули, 2018 - 14:59 (META) 

Измените на Изборниот законик кои се веќе во собраниска процедура, и со кои изборот на членовите на Државната изборна комисија (ДИК) би се вршел со мнозинство од 61 пратеник, наместо двотретинско мнозинство како досега, ќе влезат во процедура ако утре на лидерската средба не се постигне политички консензус за ДИК, рече владиниот портпарол Миле Бошњаковски.

На редовната прес-конференција во Владата на која информираше за владиниот предлог-закон за измена на Изборниот законик, одговарајќи на новинарско прашање, Бошњаковски рече дека новиот состав на ДИК би се формирал во многу скоро време.

– Измените се доставени во Собранието, утре е лидерската среда. Да го видиме резултатот од неа, но мислам дека во многу скоро време може да очекува формирање на ДИК. Или утре ќе има политички консензус или измените влегуваат во процедура – рече Бошњаковски.


Данев: Власта без консултација со опозицијата подметнува измена на Изборниот законик


Скопје, 17 јули, 2018 - 14:43 (META) 

На почетокот на 53. седница на Собранието е објавена едночасовна пауза на барање од координаторот на пратеничката група на ВМРО-ДПМНЕ, Драган Данев кој реагираше на дополнувањето на дневниот ред со измени на Изборниот законик.

Данев рече дека веднаш откако еврокомесарот Јоханес Хан излегол од собраниската седница „била подметната измена на Изборниот законик“, што никогаш претходно во државава не се правело без консултација и согласност со опозицијата.

– Ова што го прави владејачкото мнозинство покажува каков демократски капацитет имаат. Во очи на формирање на ДИК, разгледување на Изборниот законик и на вака закажана седница на Собранието на РМ пред неколку дена, која беше закажана за денеска во 12 часот, во 12.38 доаѓа допис во кој се предлага промена или дополнување на дневниот ред и тоа ниту повеќе ниту помалку со измени на Изборниот закони. Никогаш во Македонија не се менувал и не се носел Изборен законик без консултации и поддршка од опозицијата – рече Данев.

Владата денеска до Собранието достави предлог измени на Изборниот законик во скратена постапка со кои предвидено е Државната изборната комисија наместо со двотретинско мнозинство да се бира со апсолутно мнозинство односно со 61 пратеник.


Собранието го донесе законот за ДИК со шестмесечен мандат


Скопје, 22 мај, 2018 - 15:19 (META) 

Со 80 гласа за, без гласови против, Собранието го донесе Предлог – законот за изменување на Изборниот законик, по скратена постапка, со кој ќе се воспостави привремен состав на Државната изборна комисија (ДИК).

Со овој закон, кој беше договорен од власта и од опозицијата, а беше поднесен од пратениците Томислав Тунтев, Драган Данев, Ејуп Алими и Африм Гаши, координатори на пратеничките групи на СДСМ, ВМРО-ДПМНЕ, ДУИ и Беса, се предвидува во ДИК во следните месеци да  нема членови – експерти, а мандатот на членовите да биде шест месеци, до есен, за кога се предвидуваат повеќе измени на закони што се однесуваат на изборите.

Образлагајќи ја потребата да се донесе законот по скратена постапка, Тунтев вчера рече дека тој е изготвен во договор и на власта и на опозицијата, со цел да се овозможи изјаснување на граѓаните. Тој појасни дека измените што заеднички ги доставуваат двете спротивставени страни е шестмесечен мандат за седум члена на ДИК, при што потпретседателот на ДИК и три члена ќе ги предлага власта, а претседателот и два члена опозицијата.


Радио „Скопје“ и ТВ „Нова“ го прекршиле изборниот молк, соопшти ААВМУ


Скопје, 30 октомври, 2017 - 15:36 (META) 

Агенцијата за аудио и аудиовизуелни медиумски услуги (ААВМУ) денеска соопшти дека првиот програмски сервис на „Македонско радио“ (Радио „Скопје“) и ТВ „Нова“ го прекршиле Изборниот законик во текот на вториот круг од локалните избори поради што ќе бидат поднесени барања до надлежен суд за поведување прекршочна постапка.

Според ААВМУ, во тек на изборниот молк, во емисија за земјоделците на Радио „Скопје“ биле емитувани изјави од министерот за земјоделство, шумарство и водостопанство, Љупчо Николовски.

ТВ „Нова“, според ААВМУ, на двапати, на 26 и 27 октомври, последни денови од надзорот на изборната кампања, ги прекршила лимитите за платено политичко рекламирање. ТВ „Нова“ емитувала повеќе од дозволените осум минути за платено политичко рекламирање на реален час емитувана програма за политичките партии во опозиција.

ААВМУ најавува дека кон крајот на неделава ќе бидат објавени извештаите за начинот на известување на радиодифузерите за време на изборната кампања во вториот круг.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


„Цивил“ бара политичките партии, кандидатите и институциите да ги почитуваат законите


Скопје, 14 октомври, 2017 - 11:45 (META) 

Невладината организација „Цивил“ упати барање до политичките партии да го почитуваат Изборниот законик, Уставот и законите на Република Македонија, да го почитуваат изборниот молк и да ги сопрат евентуалните планови, ако такви постојат, за изборен поткуп, притисоци и за манипулација на гласачите.

„Бараме од родителите и од наставниот кадар да ги почитуваат децата и да ги остават надвор од политиката. Секој обид да се наруши изборниот молк и да се прекршат законите поврзани со изборниот процес, веднаш да бидат сопрени и санкционирани. Не смее да има толеранција за каков и да е притисок, закана или корупција (купување гласови). Бараме од Државната изборна комисија и ја охрабруваме да ги искористи сите свои законски ингеренции до максимум за да спроведе законит, демократски, фер и слободен изборен процес. Ингеренциите на ДИК се највисоки од сите досегашни состави на оваа институција и таа се наоѓа на врвот на изборниот процес. ДИК не мора да чека приговори и жалби, туку може да дејствува според сопствени наоди и мислење“, велат од невладината.

„Цивил“ ги повика граѓаните да гласаат слободно, според сопственото убедување, а оние кои нема да се најдат на Избирачкиот список, тоа да го пријават. Невладината организација апелираше до медиумите да бидат непристрасни и професионални, да бидат на висина на својата задача и да манифестираат максимална професионална и морална одговорност.


ААВМУ: Вечерва на полноќ почнува изборниот молк


Скопје, 13 октомври, 2017 - 10:35 (META) 

Денеска на полноќ завршува изборната кампања во првиот круг од локалните избори, по што почнува изборниот молк, кој трае до 19 часот в недела, кога завршува гласањето на избирачките места, соопшти Агенцијата за аудио и аудиовизуелни медиумски услуги (ААВМУ).

За време на изборниот молк се известува за изборите и за текот на гласањето, но престануваат сите облици на изборно медиумско претставување.

„Според Изборниот законик, за прекршување на изборниот молк ќе се смета емитување на какви било информации, фотографии, аудио и аудиовизуелни материјали поврзани со или во кои учествуваат учесници во изборите, какви било облици на медиумско известување кои се отворено или прикриено во функција на нечија изборна кампања и можат да влијаат врз одлуката на избирачите, податоци со кои се открива идентитетот на политичките субјекти и/или на поединци вклучени во инциденти или други неправилности на денот на гласањето, како и изјави од кандидати во изборниот процес, од учесниците во изборна кампања, од претставници на политички партии и од носители на функции во органите на власта“, стои во соопштението на ААВМУ.

Агенцијата ги потсетува радиодифузерите дека треба да ја прилагодат својата програма веднаш по почнувањето на изборниот молк за да избегнат какво било прекршување на изборниот молк бидејќи, во согласност со Изборниот законик, единствена мерка е поведување прекршочна постапка пред надлежен суд.


ААВМУ поведе прекршочни постапки против ТВ „Нова“, „Алсат-М“ и „Телевизија 24“


Скопје, 4 октомври, 2017 - 15:20 (META) 

Агенцијата за аудио и аудиовизуелни медиумски услуги (ААВМУ) поведе прекршочни постапки против „ТВ Нова“, „Алсат-М“ и „Телевизија 24“.

Постапките, како што соопштија од Агенцијата, се поведени врз основа на извештаите од надзорот на медиумското известување за изборните, а во согласнот со Изборниот законик.

ААВМУ повела прекршочна постапка против „ТВ Нова“ и „Алсат-М“ поради надминување на лимитот за платено политичко рекламирање, додека постапката против „Телевизија 24“ е поради непочитување на правилата за објавување резултати од анкети.

– Надзорот врз „Алсат–М“, пожажа дека на 26 и на 28 септември 2017 година, на еден реален час емитувана програма, одвоено е повеќе од законски дозволеното време за политичките партии во Собранието на РМ што немаат пратеничка група. Со надзорот, пак, врз ТВ „Нова“, кој се однесува на периодот 28 септември и 1 октомври 2017 година, се утврди дека на еден реален час емитувана програма, емитувано е повеќе од дозволеното време за политичките партии во опозиција. Прекршочна постапка за „Телевизија 24“ е поведена поради непочитување на правилата за објавување резултати од испитување на јавното мислење, во прилогот насловен „Седми ден кампања за локалните избори“, емитуван на 1 октомври 2017 година – стои во соопштението од ААВМУ.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ – Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка од „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


СДСМ најави пријава против Јакимовски поради кршење на Изборниот законик


Скопје, 13 септември, 2017 - 18:00 (META) 

Социјалдемократскиот сојуз на Македонија денеска најави дека ќе поднесе „соодветна пријава“ против градоначалникот на општина Карпош, Стевчо Јакимовски, поради кршење на Изборниот законик со поставувањето камен-темелник за нова градинка во општината.

„Откако СДСМ вчера ги обелодени лошите услови во градинката „Мајски цвет“ и беше обелоденето дека Стевчо Јакимовски со години ги лажеше граѓаните и им ветуваше изградба на нова градинка во населбата Бардовци, продолжената рака на Никола Груевски и градоначалник во заминување, денеска побрза да удри камен-темелник на новата градинка „Аврам Писевски“ во оваа населба“, велат од СДСМ.

Според партијата, ваквите активности на Јакимовски се спротивни на членот 8-а од Изборниот законик.

„Јакимовски нема да успее да ги прикрие штетите што им ги нанесе на граѓаните со неговото неодговорно, расипничко и коруптивно владеење со општина Карпош“, порачуваат од СДСМ.


Шилегов: Со измените на Изборниот законик, Беса ќе стане дел од ДИК


Скопје, 11 септември, 2017 - 16:11 (META) 

Петре Шилегов, пратеникот од редовите на СДСМ во Собранието, денеска на прес-конференција соопшти дека парламентарните политички партии постигнале договор да се измени Изборниот законик, односно да може претставник на Беса да седне на столчето во ДИК наместо претставникот на ДПА.

Според измените, составот на ДИК ќе се усогласува со пратеничките групи во Собранието, односно со воведените одредби ќе може да се разрешат политичките претставници во ДИК.

– Во составот на ДИК се двајца претставници од најголемата владејачка партија, еден претставник од втората владејачка партија, двајца претставници од најголемата опозициска партија и еден претставник од втората по големина опозициска партија, во случајот претставник што ќе треба во понатамошниот дел, пред почнување на изборната постапка, да го именува Движењето Беса. Тоа е суштината на овие измени. Во претходниот текст на Изборниот законик не постоеја одредби со кои Собранието можеше по пат на разрешување и именување да изврши ваква усогласеност на составот на ДИК, па имавме конфликт во делот што кажува како е составена ДИК, односно кои се нејзините претставници. Де факто, по завршувањето на изборите на 11 декември, составот на ДИК беше спротивен на резултатите од изборите – рече Шилегов.

По ова се очекува да следува разрешување на Бедредин Ибраими како член на ДИК предложен од ДПА.


Џафери ја помести седницата за 15 часот, Димовски најавува „повеќе реакции“


Скопје, 17 август, 2017 - 11:37 (META) 

Наместо во 11 часот, како што утрово првично беше најавено од стручните служби на Собранието, првата пленарна седница денеска ќе почне во 15 часот. Според новото соопштение од Собранието, распоредот за работа нема да се смени – првин ќе се одржи продолжението на 8-та седница, на чиј дневен ред се 12 точки, меѓу кои и изборот на заменици на генералниот секретар на Собранието, но и измените на законот за зголемување на минималната плата.

Потоа пратениците ќе го почнат  13-то продолжение на 6-тата седница, на кое би требало да се гласа за разрешувањето на Јавниот обвинител на Република Македонија Марко Зврлевски.
Претседателот на парламентот вчера најави дека денеска ќе се гласа за предлогот на владата за разрешување на Зврлевски, откако попладнето пратениците на опозициската ВМРО-ДПМНЕ ја напуштија седницата повикувајќи се на писмото од Антикорупциската комисија која смета дека во периодот пред изборите не треба да се расправа и да се разрешуваат државни функционери.

Илија Димовски вчера изјави дека таквото постапување е спротивно на Изборниот законик. Денеска за „Мета“  тој најави дека ќе уследат повеќе реакции од ВМРО-ДПМНЕ „за грубо кршење на законот“.