До крајот на месецов тендер за компанијата што ќе ја спроведе анализата за Попова Шапка


Тетово, 4 март, 2019 - 12:07 (META) 

Тендерот за компанија што ќе ја спроведе анализата за Попова Шапка, треба да се отвори во текот на месецот, изјавија од  „ЕЛЕМ турс“. По завршувањето на анализата, се очекува да се донесе одлука за тоа, што ќе се случи понатаму со управувањето со овој скијачки центар, известува „Порталб.мк“.

„Анализата е во почетна фаза и дека подготовката трае до три месеци. Откако ќе се одбере компанијата што ќе ја спроведе оваа анализа, во текот на следните три месеци се очекува резултатот. Конкретни мерки ќе се преземат по завршување на анализата“, велат од „ЕЛЕМ турс“

„ЕЛЕМ турс“ е ДООЕЛ (Друштво со ограничена одговорност) и затоа има право да отвори тендер во предизборниот период, нешто што е забрането според Изборниот законик за државните компании.

Попова Шапка во последно време се соочува со многу проблеми: недостаток на инвестиции, недостаток на жичара со шест седишта, недостаток од простор за паркирање, нерегулирана инфраструктура како и неотстранети отпадоци.  Ваквата состојба ја натера Граѓанската иницијатива „Да ја спасиме Попова Шапка“ да преземе поригорозни чекори.

Оваа иницијатива организираше протести при што бараше ЕЛЕМ да се повлече од управувањето со центарот, бидејќи долгогодишното лошо управување ја уништи Попова Шапка.

Од друга страна, премиерот Заев пред извесно време информираше дека сега веќе се подготвува физибилити студија, која ќе одговори на прашањата за потребниот начин на управување и искористување на капацитетите без да им се нанесе штета на природните убавини во овој дел од Северна Македонија.

Граѓанската иницијатива „Да ја спасиме Попова Шапка“ инсистира на повлекување на ЕЛЕМ од овој ски центар и велат дека нема да се откажат се додека тоа не се случи.


Хајредини: ДУИ и осумтемина „одметнати“ ќе ги деактивираат и СЈО и бомбите


Владиниот коалициски партнер ДУИ е непремостива пречка за постоењето на Специјалното јавно обвинителство и понатамошното објавување на „бомбите“, смета аналитичарот и колумнист Џевдет Хајредини, кој додава дека судбината на СЈО ја запечатуваат и осумтемина пратеници „одметнати“ од ВМРО-ДПМНЕ.

Власта, нагласува Хајредини, ниту без едните, ниту без другите нема да може да спроведе ниедна реформа за која е потребно двотретинско мнозинство во Собранието.

– Потенцијална „бомба“ за реформите кои треба да се спроведат, за сите закони за чие носење е потребно двотретинско мнозинство, нема да се надмине отпорот на коалицискиот партнер ДУИ кон продолжувањето на работата на Специјалното јавно обвинителство – смета Хајредини.

Тој потсетува дека формирањето на СЈО било најтешката тема на преговорите за Пржинскиот договор, и оти ова обвинителство било формирано со обврска да престане понатамошното јавно објавување на „бомбите“, односно нелегално прислучуваните разговори.

Според Хајредини, запечатувањето на судбината на СЈО е услов за гласовите на ДУИ во реформите на администрацијата, правосудството, но и Изборниот законик.

– За такви реформи се потребни 80 пратеници, од ДУИ не ќе може воопшто да се очекува да се сложат „бомбите“ да се објават од било која страна, а се заканува опасност да се појават од разни страни – вели Хајредини.

Дополнителна пречка за понатамошното постоење на СЈО, смета Хајредини, се и осумтемина „одметнати“ пратеници од ВМРО-ДПМНЕ.

– Многу од овие работи им одговараат и на тие осум пратеници – вели тој.

Хајредини потсетува дека меѓународната заедница постојано ја нагласува важноста на работата на СЈО и потребата почнатите истраги да добијат ефективни затворски казни. Тоа го нагласи и државниот министер за европски прашања во МНР на Германија, Михаел Рот, кој порача дека мора да продолжат истрагите поврзани со прислушуваните разговори и Специјалното јавно обвинителство, поради неизвесноста неговиот мандат да се продолжи со двотретинско мнозинство, да се интегрира во редовните структури на Обвинителството.

На 30 јануари Врховниот суд на општа седница утврди начелно правно мислење дека СЈО не може да постапува по „трокот на траење“ од 18 месеци, предвиден со законот со кој е формирано. Судот расправал за СЈО по иницијатива на адвокатите Боро Тасевски и Еленко Миланов.

–  Јавното обвинителство за гонење на кривични дела поврзани и кои произлегуваат од содржината на незаконското следење на комуникациите може да покрене обвинение или да нареди запирање на истражната постапка во период не подолг од 18 месеци од денот на преземањето на предметите и материјалите од негова надлежност, како кумулативен услов, кој не може да биде пречекорен сметано од денот на прием на материјалите од неовластено следење на комуникации од член 2 од Законот за Јавното обвинителство за гонење на кривични дела поврзани и кои произлегуваат од содржината на незаконското следење на комуникациите, и по истекот на тој рок од 18 месеци, не е овластен тужител за преземање на јавнообвинителски работи на предистражни и истражни дејствија, предвидени со Законот за кривичната постапка – соопшти Врховниот суд.


ЗНМ: Измените на законот за медиуми оставаат простор за манипулации


Скопје, 5 февруари, 2019 - 12:22 (META) 

Здружението на новинарите на Македонија реагира на последните измени на Законот за аудио и аудиовизуелни медиумски услуги (ЗААМУ) и на Изборниот законик, кои на четврти февруари беа усвоени во скратена постапка од страна на Собранието, без притоа да биде консултирана новинарската заедница.

„Измените на ЗААМУ кои се однесуваат на членот 102 во делот на забрани за рекламирање даваат можност на јавните институции на централно и локално ниво да продолжат да ги финансираат радиодифузерите доколу со истите имаат потпишано договори за соработка кои се важечки и после стапување на сила на овој закон. Ова остава простор овој член од законот лесно да се злоупотреби и јавни средства да бидат исплаќани и во иднина на медиумите и покрај декларативната забрана на истите. Потсетуваме дека за истиот член од Законот со измените од 31.12.2018 година, ЗНМ исто така имаше критика, каде според новата дефиниција јавните институции не треба да планираат средства за приватните медиуми, но не и да имаат изричита забрана за користење на јавни пари во медиуми. Со ова се остава можност за продолжување на клиентилистичкиот однос на централната и локалната власт кон медиумите, особено земајќи во предвид дека не се предвидува казна за прекршување на овој член“, се вели во соопштението на ЗНМ.

Од таму додаваат дека „последните измени го потврдуваат сомнежот на ЗНМ дека Владата и понатаму има намера да финансира приватни радиодифузери без никакви критериуми со што се става под знак прашалник и независноста на уредувачката политика на овие медиуми“.

„Потсетуваме дека и изборниот законик во делот на изборните кампањи, предвидува политичките кампањи да бидат платени на приватните медиуми директно од буџетот. Ставот на ЗНМ е конзистентен и јасен, дека се додека со јавни пари се плаќаат кампањи на политички партии, се загрозува независноста на медиумите и начинот на кој тие ќе ги претставуваат кандидатите пред јавноста во изборната кампања, а ова може да влијае и на самиот изборен резултат“, се додава во соопштението.

Истовремено, ЗНМ ги поздравува измените во Изборниот законик кои се однесуваат на онлајн медиумите, со кои и се одзема надлежноста на Државната изборна комисија да ја мониторира работата на онлајн медиумите за време на изборна кампања. Овие измени се во согласност со претходните препораки на ЗНМ, но и на Советот на Европа, според кои не постои методологија според која може државата да цени дали онлајн медиумите се (не)професионални во начинот на кој тие известуваат за изборните процеси.


ЗНМ: Власта не го исполни ветувањето за укинување на платената пропаганда


Скопје, 12 ноември, 2018 - 15:56 (META) 

Здружението на новинарите на Македонија (ЗНМ) денеска реагираше на последните измени и дополнувања на Изборниот законик (ИЗ), коишто по скратена постапка се предложени од власта и опозицијата во Собранието, а во кои не е предвидено и бришењето на спорниот член за финансирање на политичката пропаганда на партиите за време на изборна кампања.

„Разочарани сме што Владата не ги исполнува јавните ветувања пред македонската јавност и меѓународните партнери дека по референдумот ќе ја укине можноста јавни пари да се трошат за плаќање на политичка пропаганда во медиумите“, се вели во реакцијата од новинарското здружение.

ЗНМ потсетува дека на почетокот на септември годинава, Владата писмено одговори до платформата на Советот на Европа за промоција и заштита на новинарството и безбедноста на новинарите, која во август објави предупредување во врска со спорните измени на Изборниот законик. Владата притоа вети дека при наредните измени и дополнувања на Изборниот законик ќе ги земе предвид и укажувањата на новинарската заедница.

ЗНМ предупредува дека со ваквото решение, ќе продолжи практиката на контрола на власт врз медиумите.

„Ако остане решението со јавни пари да се финансира политичката пропаганда во приватните медиуми нема да прекинат старите клиентелистички односи меѓу политичките партии и медиумите. Преку ваквите коруптивни односи што претходната власт ги воспостави со владините реклами, власта ја купуваше наклонетоста на медиумите и ги претвори нив во инструмент за ширење политичка пропаганда“, вели ЗНМ.


Европските колеги ги поддржаа новинарските здруженија против измените на Изборниот законик


Скопје, 14 август, 2018 - 16:28 (META) 

Европската федерација на новинарите (ЕФН) даде силна поддршка на Здружението на новинарите на Македонија (ЗНМ), Самостојниот синдикат на новинарите и медиумските работници (ССНМ) и на Советот за етика во медиумите на Македонија (СЕММ), кои се спротивставија на последните измени на Изборниот законик.

Според измените, и во приватните медиуми ќе се спроведува платено политичко рекламирање во изборна кампања платено од државата, а дополнително и Државната изборна комисија (ДИК) ќе ги оценува онлајн медиумите во текот на изборите. Исто така, партиите самите ќе креираат медиа-план по кој ќе се спроведува платеното политичко рекламирање. Според новинарските здруженија, тоа е мешање на власта во слободата на медиумите и независноста на уредувачката политика.

„Овие штетни измени на Изборниот законик не придонесуваат во ситуација кога имаме блокирани медиумски реформи и несомнено ќе влијаат и во работата на медиумите и во севкупниот демократски амбиент за време на предизборните кампањи во негативен правец“, се вели во соопштението на ЕФН, која за несогласувањето ја известила и Платформата за заштита на новинарството при Советот на Европа.


Советот на Европа алармира за рестриктивните измени за медиумите во Изборниот законик


Стразбур, 10 август, 2018 - 13:48 (META) 

Советот на Европа вчера на својата платформа за заштита на новинарството и безбедноста на новинарите објави јавно предупредување за измените и дополнувањата на Изборниот законик, кои можат да имаат негативно влијание врз слободата на медиумите во Македонија. Во предупредувањето стои дека македонската држава е изворот на ваквото загрозување на слободата на медиумите, информираат од Здружението на новинари на Македонија,

Предупредување следи по барање на ЗНМ до платформата на Советот на Европа, која во нејзината реакција се повикува на заедничкото соопштение на ЗНМ, Независниот синдикат на новинари и Советот за етика.

„Измените на Изборниот законик беа усвоени на 25 јули 2018 година од страна на македонскиот парламент во брза постапка, како резултат на политичкиот договор меѓу водачите на четирите главни политички партии. Еден од амандманите на Изборниот законик ја овластува Државната изборна комисија да ги регистрира и следи известувањето на онлајн медиумите за време на изборите. Покрај тоа, членот 181a од законот предвидува казни до 4.000 евра за традиционалните и онлајн медиумите за „неизбалансирано или непристрасно известување”, стои во предупредувањето на платформата на Советот на Европа.

Предупредувањето е упатено до Собранието на Македонија, кој во наредниот период има обврска да ги објасни овие измени кои што ја ограничуваат слободата на медиумите.


ЗНМ: Го злоупотребуваат референдумот за да ги вратат владините кампањи во медиумите


Скопје, 9 август, 2018 - 16:05 (META) 

Делегација на Здружението на новинарите на Македонија се сретнала со претставници на набљудувачката мисија на ОБСЕ/ОДИХР, со кои разговарале за измените на Изборниот законик и референдумот, кои имаат директно влијание врз работата на медиумите, информираат од ЗНМ.

Претседателот на ЗНМ, Насер Селмани, истакнал дека власта и опозицијата го злоупотребуваат референдумот за да обезбедат финансирање на нивната политичка пропаганда за изборна кампања со јавни пари предизвикувајќи огромни штети врз слободата на медиумите и професионалното новинарство.

Селмани оценил дека „законското решение ги враќа на голема врата владините кампањи од времето на режимот на Груевски, кога со јавни пари власта спроведуваше медиумски кампањи за наводните успеси во работата.“

Тој смета дека „плаќање на политичка пропаганда во медиумите со пари на граѓаните ќе ги зајакне коруптивните врски на медиумите со партиите и ќе влијае на нивното известување за политичките процеси во земјата“. Според него, меѓународната заедница треба да направи притисок врз власта по одржувањето на референдумот, овие измени да се избришат од Изборниот законик.

За Селмани апсолутно е неприфатливо владини претставници да прават политички и финансиски притисок врз Македонската радио-телевизија во време кога декларативно се залагаат за реформа на јавниот сервис.

Директорот на ЗНМ, Драган Секуловски, го критикувал однесувањето на Државна изборна комисија, која спротивно на добрите европски практики, се обидува да преземе надлежности од Агенцијата за медиуми со регистрација онлајн медиумите. Секуловски смета дека ДИК не може да го оценува известувањето на онлајн медиуми за референдумот и да ги казнува за наводно незибалансирано известување.


ААВМУ: Скандалозни решенија во измените на Изборниот законик


Скопје, 26 јули, 2018 - 15:22 (META) 

Агенцијата за аудио и аудиовизуелни медиумски услуги (ААВМУ) ги осудува усвоените измени во Изборниот Законик кои беа донесени вчера во Собранието, по скратена постапка. Смета дека некои од решенијата се скандалозни.

Првата забелешка е на промената со која платеното политичко рекламирање, кое досега партиите и кандидатите го плаќаа од свој џеб, сега се префрла на товар на државниот буџет, а ќе се плаќа од Министерството за финансии, односно од парите на граѓаните.

„Во европската пракса постојат изолирани случаи за надоместување на трошоците на медиумите од државните буџети за време на избори, но за медиумите на кои им се наметнуваат обврски за бесплатно политичко претставување на учесниците во изборите, во услови кога е забрането платеното политичко рекламирање, што не е случај во Република Македонија“, порачува ААВМУ.

Од регулаторот на медиумите велат и дека новововедените дополнителни лимити за платено рекламирање нема да обезбедат еднакви услови за сите, оти ги фаворизира големите партии, а целосно ги изостава независните кандидати.

„Новата одредба за дополнителните лимити за платено политичко рекламирање на радијата и телевизиите, повторно не обезбедува еднакви услови за пристап до платеното политичко рекламирање за сите учесници во изборниот процес, затоа што им дава предност на партиите од власта и од парламентарната опозиција, а воопшто не предвидува време за рекламирање за независните кандидати“, се вели во соопштението од ААВМУ во кое посочуваат и дека одредбата партиите и кандидатите да ги изготвуваат медиа плановите за платено политичко рекламирање, наместо тоа да го прават медиумите, е мешање во уредувачката слобода на медиумите.

Агенцијата реагира и што наместо да се избрише обврската за мониторирање на онлајн медиумите во политичка кампања, тоа се префрла на Државната изборна комисија (ДИК)

„И на крајот, наместо да се избрише обврската за мониторинг на медиумското претставување на интернет порталите по двегодишните укажувања од Агенцијата за аудио и аудиовизуелни медиумски услуги, Здружението на новинарите на Македонија, граѓанскиот сектор и стручната јавност, затоа што е спротивна на европските стандарди, со измените обврски за мониторинг на порталите и се наметнуваат на Државната изборна комисија“, велат од ААВМУ.


Измените на Изборниот законик на дневен ред во Собрание


Скопје, 23 јули, 2018 - 9:21 (META) 

Измените на Изборниот законик дeнеска ќе се дискутираат на 53. седница на Собранието.

Седницата треба да продолжи со Предлогот за разрешување на претседателот и членовите на Државната комисија за одлучување во управна постапка и постапка од работен однос во втор степен, што започна во четвртокот, завршната сметка на Буџетот за 2017, дополнет предлог на закон за изменување и дополнување на Законот за превоз во патниот сообраќај, во второ читање и други.

На предлог на владејачкото мнозинство на седницата на дневен ред се и измените на Законот за заштита на потрошувачите, во второ читање, но и дополнет предлог на закон за изменување на Законот за пратениците, во второ читање, извештаи и други закони.


Преведени сите 401 амандмани од ВМРО ДПМНЕ за Изборниот законик


Скопје, 20 јули, 2018 - 12:25 (META) 

За помалку од 24 часа преведени се и архивирани сите 401 амандмани за законот за измена на Изборниот законик поднесени од опозициската ВМРО ДПМНЕ, изјави претседателот на Комисијата за европски прашања, Артан Груби. Амандманите ќе се разгледуваат на денешната седница

Вчера опозицијата побара одложување на седницата поради поднесените амандмани, со образложение дека ќе треба време да ги поминат сите собраниски филтри за да се достават до Комисијата за европски прашања.

Расправата беше отворена вчера, но веднаш беше одложена.