Собранието едногласно го избра Зоран Ангеловски за директор на ОТА


Скопје, 7 септември, 2018 - 15:01 (META) 

Со 83 гласа „за“, Собранието едногласно го избра Зоран Ангеловски за директор на новата Оперативно-техничка агенција (ОТА), чиј што мандат ќе биде пет години.

Предлогот, Ангеловски да биде директор на ОТА во средата беше изгласан од собраниската Комисија за прашања на изборите и именувањата, откако владејачките партии постигнаа договор од 14-те кандидати.

По изборот на Ангеловски, 59. седница беше прекината и ќе продолжи откако надлежните собраниски комисии ќе ги разгледаат неколкуте закони кои треба да бидат донесени по скратена постапка.


Членовите на ДИК денеска ќе стапат на функција


Скопје, 30 јули, 2018 - 9:20 (META) 

Новоизбраните членови на Државната изборна комисија денеска ќе даваат свечени изјави во Собранието по што ќе ја одржат првата седница.

Членовите на ДИК беа избрани во средата со 100 гласа „за“ откако партиите се договорија привремениот состав на ДИК да биде избран по стариот модел односно со членови предложени од партиите со најмногу освоени гласови на последните избори.

Претседател на Комисијата е Оливер Деркоски кој доаѓа на предлог на ВМРО-ДПМНЕ, потпретседател е Дитмире Шеху предложена од ДУИ, а членови се Елизабета Постоловска од ВМРО-ДПМНЕ, Јанакие Витановски, Борис Кондарко и Радица Ристеска од СДСМ, како и Енвер Салиу од Беса.

Деркоски во петокот кажа дека првите активности на Комисијата ќе бидат нејзиното конституирање, а потоа и спроведување на референдумот за името. Тој рече дека без разлика што доаѓа од ВМРО-ДПМНЕ, тој и сите останати членови на ДИК се членови на државен орган што има одредени задачи, овластувања и надлежности.

Членовите на ДИК првично требаше свечени изјави да дадат во петокот, но поради активности на претседателот на Собранието тие беа одложени за денеска.


41 пријавени кандидати за членови на ДИК


Скопје, 22 јуни, 2018 - 15:57 (META) 

Поранешниот претседател на ДИК, Борис Кондарко, советникот во Уставниот суд Југослав Миленковиќ и поранешните членови на Комисијата за лустрација Јанакие Витановски и Чедомир Дамјановски се најдоа на листата на 41 кандидат кои се пријавиле на огласот за нови членови на ДИК.

Во документот до кој дојде „Телма“, меѓу пријавените е само еден поранешен член на ова тело, Ермира Асани Салија која беше единствената која не си поднесе оставка по скандалот со доделувањето на големи надоместоци.

СДСМ не ги открива имињата на своите адути. Од ВМРО-ДПМНЕ потврдија дека нивни предлози се Оливер Дерковски, поранешен директор на МЖ Транспорт и поранешната пратеничка Светлана Карапетрова. Алијансата за Албанците и БЕСА на Касами ќе предложат заеднички кандидат. Партиите ќе треба да се одлучат меѓу еден од тројцата пријавени, Агрон Меџити, Адмир Шабани и Берат Даути.

Се очекува кон крајот на месецот да биде закажана седница на собраниската комисија за прашања на избори и именувања која треба да го утврди предлогот кој од кандидатите ги исполнува условите за да стане член на ДИК. Според договорот на политичките партии претседателот и двајца членови на ДИК треба да бидат од опозицијата, а партиите на власт ќе предложат потпретседател и тројца членови.

Членовите на ДИК, Собранието ги избира со двотретинско мнозинство. Овој привремен состав на Комисијата со шест месечен мандат ќе треба да го организира најавениот референдум на есен. Се очекува по завршувањето на референдумот партиите повторно да седнат на заедничка маса и да ги договорат законските измени кои ќе се однесуваат на изборниот модел и ДИК која треба да биде целосно професионализирана.


Предлогот за именување на гувернер ставен на денешната 46. седница


Скопје, 21 мај, 2018 - 11:57 (META) 

Предлог за именување гувернер на Народната банка е ставен како претпоследна, 39 точка на дневниот ред на 46. собраниска седница.

Претседателот Ѓорге Иванов ја предложи вицегувернерката Анита Ангеловска Бежоска за гувернерка, откако Богов, кој беше предложен за втор мандат, се откажа од кандидатурата по реакциите и полемиките во јавноста за негов повторен избор.

Ангеловска Бежоска осум години е на функцијата вицегувернер во Народната банка задолженa за областите монетарна политика, истражување и статистика. Таа беше реизбрана за вицегувернер на Народната банка, на предлог на Богов, на 20 септември 2017 година во Собранието.


Заев и Иванов денеска ќе разговараат околу предлогот за нов гувернер на НБМ


Скопје, 7 мај, 2018 - 10:42 (META) 

На барање на премиерот Зоран Заев, денеска ќе се одржи втора средба со претседателот Ѓорге Иванов за усогласување на ставовите околу изборот на гувернер на Народната банка.

– Верувам дека по пат на кохабитацијата и дијалогот кој што го имаме ќе изнајдеме решение. Правото е апсолутно на претседателот да предложи, но правото е и на парламентарното мнозинство да избере гувернер. Оваа институција мора да ја држиме професионална. Разговараме за експертски решенија, не за партиски решенија, кои што и понатаму би ја чувале монетарната политика стабилна, затоа што и нас како Влада тоа ни е од голема важност за да можеме да ги креираме другите економски политики – изјави Заев одговарајќи на новинарски прашања.

Тој вели дека за предлогот на Иванов се информирал од медиумите.

– Како за предлозите за Уставен суд, така се случи и со предлогот за гувернер на НБРМ, се информиравме од медиумите – додаде Заев.

Од кабинетот на претседателот Иванов инфомираа дека претседателот, предлогот за гуврернер го доставил до Собранието на 27 април 2018 година.


Анѓушев: Во моментов, Регулаторната комисија за енергетика е зависна од опозицијата


Скопје, 3 април, 2018 - 14:14 (META) 

Со стапување во сила на новиот закон за енергетика, кој беше усвоен на владина седница минатата недела и кој треба да биде изгласан во Собранието, ќе престане мандатот на претседателот на Регулаторната комисија за енерегетика (РКЕ), Димитар Петров. Потоа, Владата ќе има рок од 30 дена да достави до Собранието предлог за нов претседател и двајца членови на РКЕ.

На денешното детално претставување на предлог-законот, вицепремиерот за економски прашања Кочо Анѓушев рече дека, согласно европските директиви, треба да се обезбеди ротација на комесарите во регулаторните тела и затоа се менуваат дел од тие комесари.

Прашан дали на овој начин Владата не се меша директно во регулаторно тело кое треба да биде независно, Анѓушев рече дека и до сега Владата го предложувала претседателот на РКЕ до Собранието, но важно е кој човек ќе се предложи.

– Пред целокупната јавност ќе го отворам прашањето, дали ние имаме независна Регулаторна комисија за енергетика, дали таа комисија, која ја води човек кој претходно бил јасен член на политичка партија, дава независност. Не. Во моментов Регулаторната комисија за енергетика е зависна од опозицијата. Сакаме независна Регулаторна комисија, и затоа во неа треба да седнат професионалци кои си ја знаат работата во делот на енергетиката – одговори Анѓушев.

Вицепремиерот не одговори кој ќе го наследи  Петров, туку објасни дека ќе има конкурс на кој, како што кажа, се надева дека ќе се јават професионалци и луѓе кои долги години се вклучени во таа проблематика.


Собранието го избра Насер Ајдари за нов уставен судија


Скопје, 5 март, 2018 - 13:09 (META) 

Собранието на денешната пленарна седница го избра судијата Насер Ајдари за судија во Уставниот суд. Ајдари беше изгласан со 62 пратеници „за“, без против и воздржани и 22 пратеници „за“ од немнозинските заедници.

За предлогот Ајдари да биде уставен судија немаше пријавени пратеници за расправа.

Претседателот на Собранието, Талат Џафери, потенцирашe дека по изборот за уставен судија, на Ајдари престанува да му важи јавната функција и членувањето во политичка партија.

Собранието денеска избра и двајца членови на Советот на Јавни обвинители. За Ангеле Илиевски и Ангел Солев гласаа 59 пратеници „за“ и 1 воздржан.


Собранието ги избра Мисовски, Ременски и Мемеди за потпретседатели


Скопје, 20 февруари, 2018 - 16:34 (META) 

Пратениците во Собранието на денешната седница избраа тројца потпретседатели – Горан Мисовски, Фросина Ташевска Ременски, Весел Мемеди.

Ниту еден од пратениците во Собранието не се пријави на отворената расправа за предлозите за потпретседатели.

За Мисоски, Ташевска Ременски и Мемеди гласаа 61 пратеник, а еден беше воздржан.

Новите потпретседатели по изборот дадоа свечена изјава, а пратениците ги поздравија со аплауз.


Кадриу: Функцијата ќе ја извршувам одговорно, сметам дека Законот за јазиците е уставен


Скопје, 11 јануари, 2018 - 13:34 (META) 

Новоизбраниот уставен судија, професорот Осман Кадриу откако положи свечена заклетва во Собранието, изјави дека функцијата ќе ја извршува одговорно и согласно принципите на правната држава.

– Покрај привилегиите што го има во битието на оваа функција, овде има компонента на одговорност. Тој мора да биде одговорен, бидејќи вредностите на Уставниот суд се мошне значајни. Преку нив се остварува интересот на граѓаните, бидејќи се штити уставниот поредок, а со тоа се придонесува да се штити Уставот на земјата. Ние како судии мора да дадеме придонес за ова. На прво место треба да се штити уставноста на земјата, посебно на оние земји кои сакат да бидат правни. Уставот е орган за дишење – рече Кадриу.

Прашан за уставноста на Законот за јазиците кој беше изгласан веднаш откако Собранието ги избра новите уставни судии, Кадриу рече дека неговото мислење како правник е дека Законот е во духот на Уставот и уставните норми.

-Прашањето на јазикот се гарантира со Устав. Со овој закон само се предвидува техниката, како албанскиот јазик да се имплементира – додаде Кадриу.


Кахремани добивал закани по живот откако станал в.д. претседател на Беса


Скопје, 9 јануари, 2018 - 13:27 (META) 

Вршителот на должност претседател на Движењето Беса, Неџмедин Кахремани денеска извести дека по неговиот избор за в.д. престедател, од вчера имал сериозни закани по живот за него и семејството.

– Ги поздравувам сите лица кои ми се закануваат и тие се веќе пријавени во полиција. Со овој случај е запознат министерот за внатрешни работи, Оливер Спасовски, а ќе бидат известени и сите дипломатско-конзуларни претставништва, Амбасадата на САД, Мисијата на ЕУ и на ОБСЕ. Мојата должност на пратеник сум ја прифатил, бидејќи сите точно знаат кој ги доби гласовите во Тетово – информираше денеска Кахремани во Собранието.

Во однос на случувањата во партијата, тој рече дека Движењето Беса е доволно консолидирано и со одржувањето на Конгресот идниот месец, се ќе биде во ред. Додаде дека нема скопски огранок на Беса, туку дека едно е Движењето Беса.

– Освен мојот интелектуален и професионален дигнитет, денес ги претставувам и моите гласачи и затоа ги замолувам сите кои нарачуваат закани не можат да ме спречат да ја вршам должноста чесно и доследно – додаде тој.