Бошњаковски: Примарна цел на Владата е да обезбеди двотретинско мнозинство


Скопје, 3 октомври, 2018 - 15:15 (META) 

Собранието и сите политички партии треба да ја следат волјата на граѓаните искажана на референдумот. Процесот во моментот е во Собранието и интенцијата е да се обезбеди двотретинско мнозинство, изјави денеска владиниот портпарол Миле Бошњаковски на прес-конференција во Владата.

Одговарајќи на новинарско прашање во врска со информациите објавени во некои медиуми дека нема да има средба меѓу премиерот Зоран Заев и лидерот на ВМРО-ДПМНЕ Христијан Мицкоски и оти ќе се оди на предвремени избори, владиниот портпарол рече дека примарна цел на Владата се разговорите со пратениците и да се обезбеди потребното мнозинство за уставните измени кои произлегуваат од Договорот во Преспа.

– Очекуваме дека пратениците од опозицијата ќе ја следат волјата на граѓаните. Тоа е примарна цел на Владата и оваа порака ја упатуваме и денеска. Немаме никаква дилема дека процесот во моментот е во Собранието и дека треба да се обезбеди двотретинско мнозинство за имплементација на Договорот со Грција и уставните промени – рече Бошњаковски.

Во однос на прочистувањето на Избирачкиот список тој вели дека се наследени повеќе проблеми и оти надлежните институции соодветно треба да ги адресираат и решаваат.

Бошњаковски посочи дека од 2002 година во Македонија немало попис и оти над 400 илјади граѓани не живеат во државата, а фигурираат во Избирачкиот список, што секако има импликации на сите изборни и референдумски процеси.

– Постојат повеќе сегменти што треба да се адресираат. Дел од нив се должност на Владата, а дел се должност на други институции. Во Македонија од 2002 година немаме попис, но во моментот течат подготовките во Државниот завод за статистика за одржување на попис. Наследени се повеќе проблеми што треба да се адресираат и да се решат. Свесни сме сите и дека над 400 илјади наши сограѓани не живеат во Македонија, а ги имаме на Избирачкиот список дека живеат во Македонија. И ова си има импликации на сите изборни и рефередумски процеси. Државната изборна комисија во наредниот период најверојатно ќе интервенира во однос на Избирачкиот список, меѓутоа сите институции треба соодветно да ги адресираат овие ситуации и да се решат – рече Бошњаковски.

Додаде дека не се работи за тоа дали има добра волја ова да се направи, туку дека тоа е прашање на време и приоритети.


Завршува увидот во списокот и пријавувањето на иселениците за гласање на референдумот


Скопје, 23 август, 2018 - 10:06 (META) 

Јавниот увид во Избирачкиот список и пријавувањето на иселениците за гласањето на референдумот на 30 септември завршува вечер на полноќ.

До вчера напладне беа пријавени вкупно 2.060 граѓани за гласање во нашите дипломатско-конзуларни претставништва.

Како што соопшти ДИК, од пријавите, 2019 се прифатени, 38 се одбиени, а останатите пријави се во обработка. Најголем број пријави се доставени за гласање во Љубљана – 172, во Лондон – 114, во Торонто – 111, Канбера 88 и тн. Најмал број пријави поднесени се за гласање во Киев и Приштина – по една пријава, и Њу Делхи, Каиро и Доха – по две пријави. Онаму каде што ќе има помалку од десет пријавени нема да се спроведе гласање.

Иселениците кои се пријавиле за гласање на референдумот во ДКП-та, нема да можат да се изјаснат во Македонија доколку допатуваат во земјата. Гласањето во странство ќе се спроведе на 29 септември.

Јавен увид во Избирачкиот список, заклучно со вторник 21 август вкупно 4.466 граѓани извршиле увид во податоците во подрачните одделенија и канцеларии на ДИК. Најголем број граѓани увид извршиле во Битола – 428, следат Струмица – 420, Карпош -375, Радовиш – 240 и во Охрид – 235.

До полноќ можат да се поднесуваат барања за запишување, промена или бришење на податоци во Избирачкиот список, и да се доставуваат пријави од иселениците за изјаснување на референдумот.


Најголем интересот за гласање во Берн


Скопје, 21 август, 2018 - 13:45 (META) 

Најголем број пријавени македонски граѓани за гласање на референдумот во некоја од амбасадите и конзулатите на Македонија има во Берн – 170 запишани избирачи. Втора е Љубљана – во македонската амбасада таму на референдумот ќе гласаат 137 македонски државјани, објави Државната изборна комисија (ДИК).

Според податоците до 12 часот денеска, преку веб апликацијата www.dijaspora.se​c.mk до ДИК стасале 1.725 пријави од македонски државјани што живеат во странство. Од нив, 1612 пријави се прифатени, 27 се одбиени, а останатите пријави се во обработка.

Најмал број пријави поднесени се за гласање во Киев, Подгорица и Приштина – по една пријава,  и Њу Делхи, Каиро и Доха – по две пријави.

Гласањето во странство ќе се спроведе на 29 септември амбасадите, конзултатите и конзуларните канцеларии на Република Македонија, во кои се прифатени најмалку 10 пријави за гласање.

Инаку, до вчера 3.996 граѓани извршиле увид во Избирачкиот список во некоја од подрачните канцеларии на ДИК во земјава.

Најголем е интересот во Битола – 411, во Струмица за увид дошле 364 лица, во Карпош 300, во Радовиш 217 и во Охрид и Прилеп по 199.

Јавниот увид во Избирачкиот список ќе трае заклучно со четврток, 23 август, до кога можат и да се поднесуваат барања за запишување, промена или бришење на податоци во Избирачкиот список.


МОСТ: Граѓаните да ги проверат податоците во Избирачкиот список


Скопје, 16 август, 2018 - 14:08 (META) 

Граѓанската асоцијација МОСТ денеска ги повика граѓаните да ги проверат своите податоци во Избирачкиот список во подрачните канцеларии на Државната изборна комисија, како и на интернет-страницата http://izbirackispisok.gov.mk. Увидот во Избирачкиот список за претстојниот референдум трае до 23 август.

Од МОСТ информираат дека како и на сите изборни процеси, на бесплатната телефонска линија 080 080 080 граѓаните ќе можат да пријавуваат евентуални нерегуларности поврзани со референдумот.

Граѓанската асоцијација МОСТ во досегашното свое постоење, покрај сите национални и локални избори во Македонија почнувајќи од 2002 година, го има набљудувано и референдумот на државно ниво во 2004 година, како и трите референдуми на локално ниво – во општина Чешиново – Облешево во 2004 година, во општина Радовиш во 2007 година и во општина Центар во 2015 година.

Оваа активност, како што наведуваат од асоцијацијата, претставува надоврзување на досегашните активности, со што МОСТ се надева дека ќе даде придонес кон обезбедување на повисоко ниво на транспарентност на целокупниот референдумски процес.


До 13 часот 542 пријавени за гласање во амбасадите


Скопје, 13 август, 2018 - 15:19 (META) 

Заклучно со денеска до 13 часот, преку веб апликацијата dijaspora.se​c.mk до Државната изборна комисија (ДИК) доставени се вкупно 542 пријави од граѓани за гласање на референдумот во дипломатско-конзуларните претставништва (ДКП) на Македонија во странство, соопштија од ДИК.

Од тие пријави, 473 се прифатени, девет се одбиени, а останатите се во обработка.

Најголем број пријави се поднесени за гласање во Лондон – 50, во Берн – 44, Торонто – 36, Виена – 31 и во Љубљана – 29.

Тие што ќе гласаат во ДКП ќе бидат ставени на посебен список, а ќе бидат извадени од генералниот список, па нема да може претходно да гласаат во некоја амбасада, а потоа да допатуваат во Македонија и да гласаат на избирачкото место според нивната адреса во Македонија.

Заклучно со вчерашниот ден вкупно 821 граѓани извршиле јавен увид во подрачните одделенија и канцеларии на ДИК. Од нив, најголем број граѓани увид извршиле во Битола – 95, во Радовиш – 83 и Струмица – 78, велат од ДИК.


ДИК: Избирачкиот список не е идеален и ќе се прочистува до 7 септември


Скопје, 10 август, 2018 - 14:36 (META) 

Стручната служба на Државната изборна комисија (ДИК) континуирано го прочистува избирачкиот список и кога нема изборни циклуси, а на 7 септември треба да биде завршено ажурирањето на избирачкиот список, и според таа верзија ќе се гласа на референдумот на 30 септември, соопштија од ДИК на денешната седница.

Од вчера до денеска пред 13 часот во подрачните канцеларии на ДИК увид во избирачкиот список направиле 213 граѓани, а вкупно 158 граѓани од дијаспората се пријавиле дека ќе гласаат во амбасадите или конзултатите на Македонија.

Како што рече претседателот на ДИК, Оливер Деркоски, избирачкиот список никогаш нема да биде идеален, но се прават напори тој да се исчисти и побара и граѓаните да пријавуваат неправилности во подрачните канцеларии на ДИК.

– Избирачкиот список никогаш нема да биде идеален, но ние како еден од одговорните за него правиме напори да го прочистуваме. Ги повикувам и граѓаните да пријавуваат промени на адреса, презиме, оти ова е заедничка работа на сите – рече Деркоски, појаснувајќи дека службата на ДИК е во постојана комуникација со Управата за водење матични книги и со Заводот за статистика.

Покрај промените по барање од граѓаните, во списокот според кој ќе се гласа на 7 септември, покрај постоечките гласачи ќе влезат сите оние што до 30 септември ќе наполнат 18 години, а од списокот ќе бидат избришани сите починати до 30 јуни годинава. Исто така, сите промени на презиме и адреса што се направени до 30 јуни ќе бидат внесени во конечната верзија на списокот според кој ќе се гласа на референдумот.

До денеска избирачкиот список брои 1.805.707 избирачи.

Како што појасни Јанаќе Витановски, член на ДИК предложен од СДСМ, стручната служба на комисијата секој месец во годината прави по 2.000  – 3.000 измени, односно ги внесува новите полнолетни лица и прави други измени.

Инаку, денеска беше направена измена на Правилникот на спроведување на референдумот, односно се формализираше, како што рече Деркоски, тоа што ДИК го соопшти и претходно за учесниците во јавната пропаганда.

– Собранието како овластен предлагач има право на бесплатно претставување во медиумите. Оние термини што предлагачот нема да ги искористи потоа медиумите можат да ги дадат на други заинтересирани субјекти, а тоа е буквално секој – од граѓаните, здруженијата, па натаму. Инаку граѓаните, здруженијата, партиите, Владата, може да водат пропаганда за референдумот, ама тоа да го прават комерцијално, со свои пари, секако почитувајќи ги законските и етичките норми – рече Деркоски.

 


„Цивил“: Починати лица и фантоми и натаму фигурираат во Избирачкиот список


Скопје, 10 август, 2018 - 12:23 (META) 

Фантомски гласачи, починати лица со право на глас, лица регистрирани на погрешна адреса. Избирачкиот список е далеку од прочистен, велат од граѓанската организација „Цивил“. До нив уште во првиот ден од јавниот увид пристигнале низа пријави за недоследности. Но најголем проблем, според „Цивил“, е лавиринтот во кој ќе се заглават граѓаните доколку сакаат да го пријават случајот. Затоа организацијата повикува институциите сами да ги средат проблемите во Избирачкиот список и да не ги шетаат граѓаните од врата до врата.

„Фантомите во Избирачкиот список се вратиле и удобно се сместиле на адресите на граѓанките и граѓаните што се јавија во нашата организација. Добивме и една пријава за починато лице,што сѐ уште фигурира во Избирачкиот список. Во еден случај, граѓанин ни пишува дека веднаш се јавил во ДИК да пријави неколку „ненајавени гости“ на својата адреса. Од таму, како и на претходните изборни процеси, го упатиле да се јави во МВР. Гласачите повторно ја слушаат старата приказна: секогаш некој друг е одговорен. „Цивил“ ги повикува граѓанките и граѓаните да ја искористат можноста за увид во Избирачкиот список и да ги пријават неправилностите во ДИК, но и на ЦИВИЛ, со цел да се спроведе јавна контрола на процесот“ велат од „Цивил“.

Реакцијата на „Цивил“ следува по вчерашниот повик од Државната изборна комисија, граѓаните да извршат увид во Избирачкиот список и доколку забележат проблем самите да го пријават. ДИК, овојпат, нема да прави теренски проверки, а промена на податоци ќе се направи само по претходна пријава.


Во избирачкиот список има 1.805.707 гласачи


Скопје, 9 август, 2018 - 15:40 (META) 

Бројот на гласачи во избирачкиот список е 1.805.707, а јавниот увид ќе трае до 23 август, информираше денеска Државната изборна комисија.

По завршувањето на јавниот увид, а најдоцна до 7 септември, ДИК ќе го заклучи избирачкиот список во кој се извршени сите промени кои произлегле од јавниот увид и оттаму очекуваат бројката од 1.805.707 гласачи да се промени.

Јавниот увид ќе се врши во просториите на подрачните одделенија и канцеларии на Државната изборна комисија, низ целата територија на Република Македонија, како, како и електронски на официјалната интернет страница на ДИК.

Увидот во подрачните одделенија и канцеларии ќе може да се врши секој ден од 9 до 19 часот, а на 23 август до 24 часот.

Денеска започна и пријавувањето за гласање во дипломатско-конзуларните претставништва и конзуларните канцеларии на Република Македонија во странство кое ќе трае до 23 август.

Државјаните на Република Македонија кои се на привремена работа или престој во странство, за гласање во странските држави можат да се пријават директно во дипломатско-конзуларните претставништва и конзуларните канцеларии на Република Македонија во странство, или електронски, преку веб апликацијата dijaspora.sec.mk објавена на интернет страницата на ДИК.

Од ДИК информираат дека до денеска можноста за пријавување преку веб-апликацијата ја искористиле вкупно 19 граѓани.

ДИК ќе отвори избирачки места во сите ДКП каде за гласање ќе се пријават над 10 избирачи, додека во ДКП во кои ќе има над 1.000 пријави ќе бидат отворени и дополнителни избирачки места.

Гласањето во странство ќе се одржи на 29 септември, еден ден пред денот определен за референдумот, од 7 до 19 часот според временската зона во ДКП.


Денеска почнува увидот во Избирачкиот список


Скопје, 9 август, 2018 - 9:57 (META) 

Од денеска до 23 август граѓаните ќе може да направат увид во Избирачкиот список, а државјаните на Македонија кои живеат во странство ќе можат да се пријавуваат за изјаснување на референдумот и тоа преку апликација што денеска ќе биде промовирана од Државната изборна комисија (ДИК) и со своерачно барање во Дипломатско – конзуларните претставништва во земјите каде што живеат.

Доколку решат да дојдат во Македонија и да се изјаснат тука, тогаш иселениците нема потреба да се пријават во ДКП-та или преку апликацијата. Нивните имиња ќе бидат запишани во изводот од Избирачкиот список со последната пријавена адреса во Македонија.

ДИК се очекува денеска, исто така, да ја објави последната состојба во Избирачкиот список. Проверката на податоците во списокот за спроведување на референдумот на 30 септември ќе трае до 23 август 2018 година до 24 часот.

Граѓаните можат да ги проверат своите податоци преку веб-страницата на ДИК https://izbirackispisok.gov.mk/ и во подрачните одделенија и канцеларии на Комисијата. Доколку забележат неправилности или недостатоци и доколку сметаат дека е потребно, да побараат измена, дополнување или бришење на податоците граѓаните тоа ќе може да го направат со барања кои треба да ги поднесат во подрачните одделенија и канцеларии на ДИК. Иселениците, пак, ги поднесуваат по електронска пошта до ДИК.

Во меѓувреме тече рокот за набљудувачи на референдумот. Изјаснувањето ќе може да го мониторираат меѓународни и домашни невладини организации кои во своите статути имаат предвидено активности поврзани со човекови права.

Членовите на ДИК вчера веќе имаа средба со претставници на ОБСЕ/ОДИХР кои се очекува да го набљудуваат референдумот.


Од утре почнува увидот во Избирачкиот список за референдумот


Скопје, 8 август, 2018 - 9:32 (META) 

Од утре почнува проверката на податоците во Избирачкиот список за спроведување на референдумот на 30 септември кој ќе трае до 23 август 2018 година на полноќ.

ДИК ги повика граѓаните да ги проверат податоците во Избирачкиот список, и доколку сметаат дека е потребно, да побараат измена, дополнување или бришење на податоците во него. Проверката на податоците може да го направат преку веб-страницата на ДИК https://izbirackispisok.gov.mk/ и во подрачните одделенија и канцеларии на ДИК.

Барањата за измена, дополнување или бришење на податоците во избирачкиот список, граѓаните ги поднесуваат во подрачните одделенија и канцеларии на Државната изборна комисија, додека државјаните на РМ кои се на привремена работа или престој во странство го поднесуваат по електронска пошта до ДИК.

Пријавата ДКП-та, односно конзуларните канцеларии во рок од два дена по завршување на увидот треба да ги достави електронски до МНР, а МНР, пак, најдоцна до 27 август треба да ја извести ДИК. Инаку, дијаспората за референдумското прашање ќе се изјасни на 29 септември.

ДИК по барањата и пријавите на граѓаните е должен да одлучи со решение во рок од 48 часа од денот на приемот на барањето. Доколку биде донесено решение со кое се одбива барањето, граѓанинот во рок од 24 часа од приемот на решението може да поднесе тужба до Врховниот суд. Врховниот суд во рок од 24 часа по приемот на тужбата и одлуката веднаш му ја доставува на тужителот по електронски пат.

Избирачкиот список што се става на јавен увид е со состојба на податоци на граѓаните кои заклучно со 30 септември 2018 година станале полнолетни.